Thursday, January 31, 2008

Ang Pag-abot Sa Anak Sa Tawo

Lucas 21: 25~28

25"Ug aduna unyay mga ilhanan diha sa Adlaw ug sa Bulan ug sa kabitoonan, ug diha sa yuta adunay kagul-anan sa kanasuran, nga managkalibug tungod sa dinaguok sa dagat ug sa mga balud; 26ang mga tawo panguyapan sa kalisang ug sa pagpaabut sa mahitabo sa kalibutan; kay mangatay-og man unya ang mga gahum sa kalangitan.

27Ug unya ilang makita ang Anak sa Tawo nga magaabut nga sinapwang sa panganud inubanan sa kagahum ug dakung himaya. 28Inigsugod nag kahitabo niining mga butanga, iyahat ninyo ang inyong mga mata ug ihangad ninyo ang inyong mga ulo, kay ang inyong kaluwasan nagakahiduol na."


PAGPAAMBIT SA MENSAHE:

Ang maong mensahe nagpasabut sa pagbalik sa Dios nga anak dinhi sa kalibutan aron paghukom sa buhi ug mga patay. Mao kini ang dakung hukom nga nahasulat sa balaang kasulatan diin nianang panahuna kitang tanan mag-atubang sa anak sa tawo aron pagdawat sa tugbang nga silot takdo usab sa atong mga kasal-anan.

Bulahan ang mga buhing binuhat nga maatlan sa pagbalik sa Dios diin ang ilang tawhanon nga lawas ibayaw ngadto sa kalangitan kun matagaan sila sa kinabuhi nga walay katapusan.

Walay gitakdang oras o adlaw ang maong pagbalik sa atong Ginoong Dios , apan sumala diha sa maong mensahe ipakita ang maong mga ilhanan. Ug makita nato mga igsoon nga hinay-hinay ng nagpakita ang maong mga ilhanan, nga sa ato pa nagkaduol na ang ginaingon nga pagbalik sa Dios ug ang Dakong Paghukom.

Bulahan ang mga katawhan nga nagasunod kanunay sa kasugo-an ug kabubut-on sa Dios diin maoy ilang ipahari diha sa ilang kaugalingon ug sa ilang kasingkasing ang giya sa Dios espiritu santo, nga mao ang pagpaubos, pagpasensiya, ug pag-ampo sa kanunay.

Dili nato masukod ang kabubut-on sa Dios diin siya lamang ang nasayod sa tanan ug kita nga iyang mga katawhan dili makapangagpas sa dangatan unya sa ato mismong kalag, diin bisan diay ang mga maayong binuhatan sa tawo kun wala magagikan sa iyang kinasingkasing nga katuyoan diin nagkahulogan lang kini ug pamulitika o dunay mga linain nga tinguha, dili diay makaluwas kaniya.

Kinahanglan gayud diay nga atong buhatang sumbanan ang mga binuhatan sa Dios nga Anak diin bisan siya Dios apan wala niya gamita ang iyang pagkaDios ug nagkinabuhi siya nga sama sa yano nga tawo, ug nagpaulipon sa iglesia nga iyang gibarugan ug wala niya baleha ang mga kasakit ug mga paglutos kaniya ( Philipos 2:5).

Gidakop Si Esteban

Buhat 6: 8~15

8Ug unya si Esteban, nga puno sa grasya ug gahum, naghimog dagkung mga kahibulongan ug mga ilhanan diha sa katawhan. 9Ug dihay pipila ka mga sakop sa sinagoga sa mga Binuhian (sumala sa gingalan niini), ug sa mga taga-Cirene, ug sa mga taga-Alejandria, ug sa mga taga-Cilicia ug sa Asia, nga nanindog sa pagpakiglantugi kang Esteban.

10Apan wala sila makahimo sa pagbuntog sa kinaadman ug sa Espiritu nga diha uban sa iyang pagpamulong. 11Ug unya ilang gisibahan sa tago ang pipila ka tawo sa pag-ingon, "Kami nakadungog kaniya nga nagsultig mga masipad-anong pulong batok kang Moises ug sa Dios."

12Ug ilang gipagubot ang katawhan ug ang mga anciano ug ang mga escriba, ug sila mihasmag ug ilang gisakmit ug gitaral siya ngadto sa atubangan sa Sanhedrin. 13Ug ilang gipaatubang ang bakakong mga saksi nga nanag-ingon, "Kining tawhana wala gayuy hunong sa pagsultig mga pulong batok niining balaang dapit ug sa kasugoan;

14kay siya among hingdunggan nga nag-ingon nga kini konong dapita pagagon-ubon ni Jesus nga Nazaretnon ug pagausabon niini ang mga pamatasan nga gibilin kanato ni Moises." 15Ug ang tanang nanag-lingkod sa Sanhedrin, sa pagtutok nila kaniya, nakamatikod nga ang iyang nawong sama sa nawong sa manulunda.


PAGPAAAMBIT SA MENSAHE:

Ang maong mensahe nagpadayag sa kinabuhi sa nagsunod sa kristohanong pagtulon-an, diin kanunay nga gilutos diha sa ilang komunidad ug sa eglisea mismo nga ilang gibarogan. Si Esteban diha sa maong mensahe nagpadayag ug nagtuman sa sugo sa Dios Jesu Cristo nga mao ang pagsangyaw sa kamatuoran.

Daghan ang nasilo ug nasina sa mga milagro ug mga kaalam nga gipakita ni Esteban, diin siya painaagi sa Dios Espirito Santo nagtambal ug nakaayo sa mga masakiton ug manggialamon nga nakiglantugi sa mga Judio. Ilang gibutang-butangan ug sala si Esteban aron siya pagadakpon ug prisohon,

Ingon niana ang pamaagi, samtang nagkinabuhi pa kita dinhi sa kalibutan, kun magsulti kita sa kamatuoran walay motoo, apan kun mag-istorya kita ug tumo-tumo ug magbutang butang sa atong isigkatawo, daghan ang motoo ug mamati, mao kini nalatid sa balaang kasulatan diin gitawag kini nga mga” biblical” nga kamatuoran sa tawhanon nga pamaagi.

Ginaingon nga kun haduol kita sa Dios daghan ang mga kasakitan nga atong masinati kay mao man kini ang mga kinabuhi nga gibarugan ni Jesu Cristo sa ania pa siya sa walog sa mga buhi. Apan angay diay nga atong ikapasalamat ang mga kasinatian sa mga paglutos kay nakaambit kita sa kasakitan ni Jesu Cristo. Angay diay natong pangandaman ang kaluwasan sa atong kalag kay mao man kini ang mopauli sa Dios diin pagasul-oban sa espirituhanon nga lawas, ug wala kitay angay kawilihan dinhi ning tawhanon nga kalibutan kay temporayo lang ang atong pagpanimuyo dinhi.





Wednesday, January 30, 2008

Ang Ebanghelyo Nga Gisangyaw Didto Sa Samaria

Buhat 8: 4~25

4 Ug ang mga nanghitibulaag nahadiindiin sa paglakaw nga nanagwali sa pulong. 5Ug si Felipe milugsong ngadto sa usa ka lungsod sa Samaria diin iyang giwali kanila ang Cristo. 6Ug ang katawhan nagkahiusa sa ilang pagpaminaw sa gisulti ni Felipe sa pagkadungog ug pagkakita nila sa mga milagro nga iyang gibuhat. 7Kay gikan sa daghang mga giyawaan nanggula ang mga mahugaw nga espiritu, nga nanagpaniyagit sa makusog nga tingog; ug nangaayo ang daghang mga paralitiko o mga bakul. 8Ug niadtong lungsora dihay dakung kalipay.

9Apan sa wala pa kini, dihay usa ka tawo nga ginganlan si Simon nga tigsalamangka didto niadtong lungsora; ug siya nakapahibulong gayud sa mga tawo sa Samaria, ug nag-ingon nga siya gayud maoy usa ka dakung tawo. 10Ug kaniya naminaw ang tanan, gikan sa mga iwit hangtud sa kadagkuan, nga nanag-ingon"Kining tawhana mao ang gahum sa Dios, ang gahum nga ginganlag Daku." 11Ug sila nanagpatalinghug kaniya, tungod kay sa hataas nga panahon sila gipahibulong man ugod niya pinaagi sa iyang salamangka. 12Apan sa diha nga nagpanoo na sila kang Felipe sa pagmantala niya sa Maayong Balita mahitungod sa gingharian sa Dios ug sa ngalan ni Jesu-Cristo, nanagpabautismo sila nga mga lalaki ug mga babaye.

13Ug bisan gani siya si Simon mitoo, ug sa nabautismohan na, nagpabilin siya kang Felipe. Ug siya nahingangha sa kahibulong sa iyang pagkakita sa mga ilhanan ug mga dagkung milagro nga nangahimo. 14 Ug unya sa pagkadungog sa mga apostoles didto sa Jerusalem nga ang Samaria midawat sa pulong sa Dios, ilang gipaadtoan sila ni Pedro ug ni Juan, 15nga sa ila nang paghiabut, nanag-ampo alang kanila nga unta makadawat sila sa Espiritu Santo; 16kay wala pa man kanilay hingkunsaran niini, ug sila igo man lamang nabautismohan sa ngalan sa Ginoong Jesus. 17Ug sila gipandungan nilag mga kamot ug nakadawat sila sa Espiritu Santo.

18Ug sa pagkakita ni Simon nga ang Espiritu gikahatag man pinaagi sa pagpandong sa mga kamot sa mga apostoles, sila sa salapi gitanyagan niya 19nga nag-ingon, "Hatagi usab ako niining gahuma, aron nga bisan kinsay akong pandungan sa akong mga kamot makadawat sa Espiritu Santo." 20Apan si Pedro miingon kaniya, "Ang imong salapi malaglag pa unta uban kanimo, kay imong gidahum nga pinaagig salapi mabatonan mo ang gasa sa Dios! 21Wala kay bahin ni luna niining mga butanga, kay ang imong kasingkasing dili matarung sa atubangan sa Dios.

22Busa hinolsuli kining imong pagkadautan, ug pangamuyo sa Ginoo basin pa, kon ugaling mahimo man, pasayloon ka niining pagdahum sa imong kasingkasing23Kay nakita ko nga ikaw anaa sa mapait nga apdo ug sa bugkos sa pagpangdaut." 24Ug si Simon mitubag, "Iampo ako ninyo sa Ginoo, nga wala untay mahitabo kanako sa inyong gisulti." 25Unya sa nakapamatuod ug nakasulti na sila sa pulong sa Ginoo, sila namalik sa Jerusalem, nga nanagwali sa Maayong Balita sa daghang mga balangay sa mga Samarianhon.


PAGPAAMBIT SA MENSAHE:

Ang maong mensahe nagpadangat sa kabubut-on sa Dios diin iyang gigamit si Felipe sa pagsangyaw sa kamatuoran. Daghan ang nangauli-an didto sa Samaria diin sila nagpasalamat sa Dios ug misagop sa kristohanong pagtulon-an. Wala magduha-duha ang taga Samaria sa gahum nga gipakita sa Dios kanila diin sila gisul-oban sa hiyas sa espirito santo ug nagpuyo nga haduol sa Dios diin isalikway ang mga tawhanon nga mga bisyo ug ipahari kanunay diha sa kasing kasing ang pagka Diosnon nga puno sa pasensya, pagpailob ug pag-ampo .

Ginaingon nga kun unsa ang kakusog sa espirito santo sa Dios diha sa imong kinabuhi, mao usab ang kakusog sa mga pagtental kanimo sa mga dautan. Diin kanunay kang gilutos sa mga pagsulay, pagdauog-daug diha sa imong komunidad. Ug kini kanunay gayud nga masinati sa mga sumusunod sa kristohanong pagtulon-an kay aron usab pagsukod sa Dios kun asa kutob ang atong pasensya ug pagpasidungog kaniya.

Angay lamang nga kita mag-ampo sa kanunay ug ihalad ang mga pagsulay sa kinabuhi aron gaan kini dad-on. Ug sa ingon dili nato batukan ang nanaglutos kanato hinunu-a i-ampo ug pasaylo-a sila kay gihimo lang silang instrumento sa mga dautan aron ka usab makabig nila.


Naglakaw Si Jesus Sa Tubig

Juan 6:16~21

16Ug sa pagkasawomsom na, ang iyang mga tinun-an nanglugsong ngadto sa lanaw, 17ug misakayg sakayan, ug mitabok sa lanaw ngadto sa Capernaum. Mangitngit na ug si Jesus wala pa mahiabut kanila. 18Ug ang lanaw misugod na sa pagbalud tungod sa makusog nga hangin nga naghuros. 19Ug sa nakagaud na silag mga lima o unom ka kilometro, nakita nila si Jesus nga naglakaw ibabaw sa tubig ug nagkahiduol sa sakayan. Ug sila nangalisang, 20apan siya miingon kanila, "Ako kini; ayaw kamo kalisang." 21Ug gikalipay nila ang pagdawat kaniya ngadto sa sakayan, ug dihadiha ang sakayan nahidunggo sa yuta nga ilang gipadulngan.


PAGPAAMBIT SA MENSAHE:

Ang maong mensahe nagpasabot sa mga pagsangyaw ni Jesu Cristo samtang nagkinabuhi pa siya dinhi sa kalibutan, diin iyang gipakita ang kabubut-on sa iyang amahan sama sa pagbuhat ug mga managlahi nga milagro . Daghan ang mga grasya ug mga gasa nga gihatag sa Dios espirito santo ngadto sa mga sumusunod ni Jesu Cristo. Diin bisan si kinsa nga binuhat basta adunay hugot nga pagtoo sa Dios makagagahum mahatagan gyud sa milagro sa kinabuhi.

Ang balaang kasulatan nag-ingon nga walay makatugkad sa kabubut-on sa Dios amahan diin ang tanan butang dinhi sa kalibutan ubos sa iyang pagbuot. Pangayo-a kay ikaw pagataga-an, panuktok kay ikaw paga-ablihan diin ang tanan iyang ihatag basta kaayuhan lang, apan diha sa iyang kaugalingon nga oras, kay matod pa sa tawhanon nga sinultihan, dili sama sa sili nga mohalang dayun.

Ang Kamatuoran Magahatag Kaninyo Ug Kaluwasan

Juan 8:31~47

31 Unya si Jesus miingon sa mga Judio nga misalig kaniya, "Kon pabilin kamo sa akong pulong, nan, kamo tinuod gayud nga akong mga tinun-an, 32ug kamo mahibalo sa kamatuoran, ug ang kamatuoran magahatag kaninyog kagawasan." 33Ug sila mitubag kaniya. "Mga kaliwat baya kami ni Abraham, ug wala gayud kami maulipon ni bisan kinsa. Naunsa ba nga nakaingon ka man, `Pagahatagan kamog kagawasan`?" 34Ug si Jesus mitubag kanila, "Sa pagkatinuod, sa pagkatinuod, magaingon ako kaninyo, nga ang tanan nga magapakasala ulipon sa sala.

35Ang ulipon dili magapuyo nga dayon diha sa panimalay, apan ang anak magapuyo nga dayon. 36Tungod niini, kon ang Anak mao ang magahatag kaninyog kagawasan, kamo mahimo gayud nga mga tawong gawas. 37Nasayud bitaw ako nga kamo mga kaliwat ni Abraham, ngani gitinguha ninyo ang pagpatay kanako tungod kay ang akong pulong dili man makakaplag ug luna diha kaninyo. 38 Ako nagasulti sa nakita ko sa atubangan sa akong Amahan, ug kamo nagabuhat sa nadungog ninyo sa atubangan sa inyong kaugalingong amahan."

39Kaniya mitubag sila nga nanag-ingon, "Si Abraham mao ang among amahan." Si Jesus miingon kanila, "Kon mga anak pa kamo ni Abraham, magabuhat unta kamo sa gibuhat ni Abraham. 40Apan karon naninguha kamo sa pagpatay kanako-- sa pagpatay sa tawo nga nagsugilon kaninyo sa kamatuoran nga akong nadungog gikan sa Dios. Wala magbuhat niini si Abraham. 41Kamo nagabuhat sa gibuhat sa inyong kaugalingong amahan." Ug sila miingon kaniya, "Dili kami mga pinaangkan. Kami usa rag Amahan, nga mao ang Dios."

42Si Jesus mitubag kanila, "Kon ang Dios mao pa ang inyong Amahan, higugmaon unta ninyo ako, kay migula ug mianhi man ako gikan sa Dios. Ako wala moanhi sa akong kinaugalingong pagbulot-an, kondili siya mao ang nagpadala kanako. 43Nganong dili man kamo makasabut sa akong sinultihan? Tungod kay kamo dili man ugod makabati sa akong pulong.

44Kamo gikan sa inyong amahan nga mao ang yawa, ug ang inyong tinguha mao ang pagtagbaw sa mga pangibog sa inyong amahan. Siya maoy usa ka mamumuno sukad pa sa sinugdan, ug siya walay labut sa kamatuoran kay ang kamatuoran wala man diha kaniya. Inigpamakak niya, siya magasulti tukma sa iyang kaugalingong kinaiya, kay siya bakakon man ug mao ang amahan sa mga bakak.

45Apan kay nagsulti man ako sa kamatuoran, kamo dili motoo kanako. 46 Kinsa ba kaninyoy makapamatuod nga ako nakahimog sala? Kon ako nagasulti man sa kamatuoran, nganong dili man kamo motoo kanako? 47Siya nga gikan sa Dios makabati sa mga pulong sa Dios. Ang katarungan ngano nga dili kamo makabati niini mao nga kamo dili gikan sa Dios."


PAGPAAMBIT SA MENSAHE:

Ang maong mensahe naghisgot sa kagawasan o kaluwasan sa atong kaugalingon diha sa pagtoo sa iglesia sa kamatuoran, Mao kini ang gisangyaw ni JesuCristo didto sa mga Judio ug dili Judio nga ang anak sa Dios pagasakiton, dagmalan ug ilansang sa Krus aron maluwas ang iyang mag katawhan nga makakasala.

Bulahan ang nagpuyo diha sa Kristuhanong kinabuhi, diin puno sa pagpaubos, pagpasensya, ug pag-ampo ug sa kanunay nagpahilayo sa mga tawhanon nga kailibgon o mga tawhanon nga mga bisyo o hiyas kay maiya ang himaya nga dayun didto sa gingharian sa Dios.

Ginaingon diha sa balaang kasulatan nga: " Ang dalan paingon sa gingharian sa Dios, hagip-ot, tunokOn, ug bakilid, diin gamay ra ang nagaagi niini, apan ang dalan paingon sa kalaglagan sa atong mga sala, halu-ag, masadya ug daghan ang gapangagi niini, ug kining mga dalana ania ra kini sa walog sa mga buhi,diin mao na kini ang atong gibarogan karon.

Nga sa ato pa mga igsoon bulahan ka nga nakasinati sa mga paglutos, kasakit ug mga pagbiay-biay kay mao na kana ang dalan paingon sa ganghaan sa langit. Apan mas bulahan ang mga tawo diin ilang gisubay ang mga tawhanon nga mga kinaiya kay adunay pay pasensya ang Dios kanila, kay inosente pa man sila sa kamatuoran. Apan ang mga tawo nga motalikod sa kamatuoran ug mobiya sa Dios . wala nay pasensya ang Dios kanila ug nga dili na gyud sila mapasaylo pa.

Ang Balaod Ug Ang Mga Judio

Roma 2:17~29

17 Apan kon ikaw nagatawag sa imong kaugalingon nga Judio ug nagasalig sa kasugoan ug nagapagawal sa imong kalabutan sa Dios 18ug nasayud ka sa iyang kabubut-on ug nakauyon sa mga butang halangdon, kay binansay man tuod ikaw sa kasugoan, 19ug kon nagatoo ka nga ikaw magtotultol sa mga buta, kahayag sa mga gingitngitan, 20magpapanton sa mga hungog, magtutudlo sa mga kabataan, kay nakabaton man tuod ikaw sa dagway sa kahibalo ug sa kamatuoran nga anaa sa kasugoan

21nan, karon, ikaw nga nagapanudlo sa uban, dili ba usab nimo tudloan ang imong kaugalingon? Ikaw nga nagawali batok sa pagpangawat, nagapangawat ka ba? 22Ikaw nga nagaingon nga ang tawo kinahanglan dili manapaw, nanapaw ka ba? Ikaw nga ngil-aran ug mga larawan, nagapangawat ka ba sa sulod sa ilang mga templo? 23Ikaw nga nagapasigarbo tungod sa kasugoan, gipakaulawan mo ba ang Dios pinaagi sa paglapas sa kasugoan? 24Kay sumala sa nahisulat, "Tungod kaninyo ang ngalan sa Dios ginapasipad-an taliwala sa mga Gentil."

25Sa pagkatinuod, ang sirkunsisyon may kapuslanan kon magatuman ikaw sa kasugoan; apan kon magalapas ikaw sa kasugoan ang imong sirkunsisyon mahimo nang dili sirkunsisyon. 26Busa, kon ang usa ka tawong walay sirkunsisyon magatuman sa mga lagda sa kasugoan, dili ba ang iyang pagkawalay sirkunsisyon pagaisipon nga sirkunsisyon?

27Sa ingon niana, siya nga walay sirkunsisyon sa lawas apan nagatuman sa kasugoan, siya magahukom kanimo sa silot, kanimo nga nakabaton sa sinulat nga kasugoan ug nga may sirkunsisyon apan nagalapas sa kasugoan. 28Kay ang usa ka tawo dili tinuod nga Judio kon ang iyang pagka-Judio anaa ra sa dayag nga panagway; ug ang tinuod nga sirkunsisyon dili ang anaa ra sa dayag diha sa lawas.

29Kay ang tinuod nga Judio mao kadtong tawo nga Judio diha sa kinasuloran sa iyang pagkatawo, ug ang tinuod nga sirkunsisyon maoy usa ka butang nga iya sa kasingkasing, espirituhanon ug dili sumala sa mga letra sa kasugoan. Siya magadawat sa pagdalayeg nga dili gikan sa tawo kondili gikan sa Dios.


PAGPAAMBIT SA MENSAHE:

Ang maong mensahe nagpadayag sa kasugo-an ug sa kabubut-on sa Dios diin ang tinago nga kamatuoran gisangyaw kini pinaagi ni Jesu-Cristo didto sa Jerusalem nga maoy sentro sa maong pagtulon-an niadtong panahuna. Daghan sa mga Judio nga nagbiay-biay kaniya apan daghan usab ang nanoo sa maong bag-ong pagtulon-an. Diin maoy gihatag tahas ni Jesu Cristo sa Maayong balita ang napulog duha ka apostoles.

Ang tinubdan o kahulogan sa maong pagtulon-an ni Jesu Cristo mao ang pagsul-ob sa hiyas sa espirito santo nga mao ang pagpaubos diha sa kaugalingon, pagpailob ug pag-ampo . Nga sa ato pa atong idistansya ang atong kaugalingon diha sa mga tawhanon ug salawayon nga binuhatan. Bulahan ang katawhan o mga Judio niadtong panahuna nga nagsangyaw sa kamatuoran diin sila nagbalaan sa ilang kaugalingon ug nagtoo sa kinasingkasing niini.

Apan alaot ang mga magsasangyaw sa kinabuhi ug pagtulon-an ni Jesu Cristo, diin nagpadayag sila sa kamatuoran ug sa kinaugalingon nilang paagi nagabuhat sila sa supak sa kabubut-on sa Dios. Sa ato pa taphaw lamang ang ilang pagsangyaw sa kamatuoran kay gihimo man lang nila kining dayan-dayan sa ilang pagkatawo aron sila tahuron ug pasidunggan diha sa ilang komunidad, apan sa tinago nga paagi nagpasidungog sila sa mga kaaway sa Dios pinaagi sa pagbuhat sa hiwi ug mga tawhanon nga bisyo. Nan alaot unya ang ilang mga kalag pag-abot sa adlaw sa dakong paghukom.

Daghan ang mini nga mga pagtulon-an karong panahuna nga nagbatbat ug nagsangyaw sa maayong balita apan sa hilom nga paagi ila kining gihimo nga negosyo, diin sama ra nga ilang gabaligya ang mga pulong sa Dios apan diay sila mismo dili maka-Dios. Libo-an ka mga bag-o nga pagtulon-an ang nadugang kada tuig sa tibook kalibutan diin nagsangyaw sa kasugo-an sa Dios ug sa Maayong balita apan ang kadaghanan nag-atiman lamang sa ilang mga personal nga interses.

Ilang gihimong taming ang balaod sa yuta dinhi ang kadaghanan nga balaod nagatugot kini sa pagpili o pagsunod sa bisan asa nga pagtulon-an, ug kadaghanan niining mga lideres sa maong mga pagtulon-an nagpahimulos lamang sa unsa man nga materyal o benipisyo nga ilang makuha, kay ginahimo na man hinoon nila kini nga panginabuhi.

Mga Pagkaon Nga Gihalad Sa Dios-Dios

1 CORINTHO 8: 1~13

1 Karon mahitungod sa mga kan-onon nga gikahalad ngadto sa mga diosdios: kita nasayud nga tuod "ang tanan kanato nanagpakabaton ug kahibalo." Ang "kahibalo" baya magapaburot apan ang gugma magapalig-on. 2Kon adunay nagadahum nga siya may kahibalo na, siya wala pa gayud mahibalo sa kinahanglan niyang pagahibaloan. 3Apan kon ang usa ka tawo magahigugma sa Dios, kining tawhana pagailhon sa Dios.

4 Ug mahitungod sa pagkaon sa mga kan-onon nga gikahalad ngadto sa mga diosdios, kita nasayud na nga "ang diosdios dili tinuod," ug nga "walay laing Dios gawas sa usa lamang." 5Kay bisan tuod adunay gipanagtawag nga mga dios sa kalangitan o sa kayutaan-- ingon nga tuod daghan man ang mga "dios" ug daghan ang mga "ginoo"-- 6apan, alang kanato adunay usa lamang ka Dios, ang Amahan, nga ginikanan sa tanang mga butang ug nga alang kang kinsa kita nanaglungtad; ug usa lamang ka Ginoo, si Jesu-Cristo pinaagi kang kinsa nagalungtad kita ug ang tanang mga butang

7 Apan dili ang tanan nanagpakabaton niining maong kahibalo. Hinonoa, tungod sa ilang pagkaanad pag mga diosdios hangtud karon, adunay pipila nga nagakaon ug kan-onon ingon nga daw tinuod gayud nga gikahalad ngadto sa diosdios, ug busa ang ilang kaisipan nahugawan, tungod kay kini mahuyang man. 8Sa pagkatinuod, ang kan-onon dili makaunsa sa atong kalabutan ngadto sa Dios. Kon kita mokaon, dili kita mahimong labi pa ka dautan; ug kon kita dili man mokaon, dili kita mahimong labi pa ka maayo. 9Mao lamang nga kinahanglan imong pagabantayan nga kining imong kagawasan dili mahimong kapangdolan sa mga mahuyang.

10Kay kon ikaw nga may kahibalo makita sa usa ka tawo nga ikaw nagalingkod tambong sa kan-anan sa sulod sa templo sa diosdios, dili ba siya lagmit nga madasig, kon mahuyang ang iyang kaisipan, sa pagkaon sa kalan-on nga gihalad ngadto sa mga diosdios? 11Sa ingon niana, tungod sa imong kahibalo nadaut hinoon kining maong tawong mahuyang, nga imong igsoon nga alang kaniya si Cristo nagpakamatay.

12Sa ingon niana, sa nakasala ikaw batok sa imong mga igsoon ug nagasamad sa ilang kaisipan sa diha nga maluya kini, ikaw nagapakasala batok kang Cristo. 13Tungod niining maong katarungan, kon ang pagkaon ko mao man ang hinungdan sa pagkahulog sa akong igsoon, ako dili ug dili na gayud mousab sa pagkaon ug karni basi pa unya hinoon makaangin ako sa pagkahulog sa akong igsoon


PAGPAAMBIT SA MENSAHE:

Sa panahun diin wala pa ang anak sa Dios mokanaog niining kalibutan, nagkadaiya ang panagway sa Dios diin gibuhat kini pinaagi sa mga kinulit nga plata, bulawan o kahoy. Kadaghanan niini mao kadtong mga pagano nga mga pagtulon-an diin naghalad sila sa mga mananap nga sununog diha sa Altar. Gi kopya usab kining maong mga paghalad sa mga pagtulon-an nga nagsimba sa Dios Amahan.

Sa pagpakamatay ni JesuCristo sa krus hinay-hinay nga nawala ang maong mga paghalad kay humana man ihalad ang anak sa Dios didto sa Kalbaryo, diin siya gilansang ug namatay niadtong krus aron pagluwas kanatong tanan. Apan daghan gihapon ang nagpadayon sa paghalad sa kinaraan nga paagi diin ilang gisimba ug gipasidunggan ang lahi nga mga Dios, ug mao kini gitawag nga mga dios-dios.

Sa kristohanon nga pagtulon-an diin nag-ingon ang balaang kasulatan pinaagi diha sa kasugo-an nga gikuptan ni Moises niadtong tinabliyang bato, nag-ingon: Higugmaon mo ang Dios labaw sa tanan ug dili ka magsimba ug laing Dios gawas kanako, kay ako seloso nga pagka Dios. Nga sa ato pa mga igsoon pagsimba sa maong mga Dios-dios wala na kini panalangin sa Dios Amahan ug nakasupak na kini sa iyang kabubut-on.

Daghan nga mga pagtulon-an sa iglesia karon panahuna nga nagasunod ug nagtuis sa balaang kasulatan diin nagbatikos sa pagtulon-an nga Katoliko kay lagi kuno nagsimba sa mga debulto diin giingon nga kini mga dios-dios. Apan daghan ang mga milagro ug mga mensahe sa mga propeta niining bag-ong panahun nga wala na mahisulat sa balaang kasulatan. Ang balaang kasulatan nagtagik laman sa mga pagkinabuhi ni Jesu Cristo ug sa napulo ug duha ka apostoles. Daghang sa mga mensahe nga nagpamatuod nga ang Dios espirito santo mokunsad diha nianang mga debolto sa mga santos sa higayon nga kita mangaliya ug mag-ampo niini.

Sa ato pa mga igsoon dili diay dios-dios ang mga debulto nga gigamit o gisunod sa mga katoliko nga pagtulon-an kundili sumbanan sa atong mga mensahe ug mga pangliyupo didto sa kahitas-an. Ang tiunay nga mga dios dios mao kadtong mga debulto nga dili iya sa Dios, o mga debulto nga binuhat lamang sa mga tawhanon nga kaalam aron sa pagpakita sa linahi nga Dios nga ilang gisimba, diin wala kini mag-gikan sa kalangitan. Diin ang mga pagkaon nga gihalad diha sa maong mga Dios-Dios dili angay kan-on sa mga tawo nga nagtahod sa kristyanismo nga pagtulon-an kay sama ra nga nagsimba ka usab sa maong mga Dios-Dios, ug sama ra sa duruha ang imong gisimba nga Dios.

Bulahan ang mga katawhan nga nasayod sa tinago nga kamatuoran ug kanunay nga nagasunod sa kabubut-on sa Dios kay mapanalanginan kanunay sa Dios Amahan. Apan mas bulahan ang mga tawo inosente pa sa maong mga kamatuoran kay aduna pay pasensya ang Dios kanila.

Tuesday, January 29, 2008

Si Jesus Gihukman Nga Patyon

(Juan 18:39~40, Juan 19:1~16)

39Apan aduna man kamoy batasan nga sa matag-Pasko kinahanglan akong buhian alang kaninyo ang usa ka buok binilanggo, buot ba kamo nga buhian ko kaninyo ang Hari sa mga Judio?" 40Us sila misinggit pag-usab, "Dili kanang tawhana, kondili si Barabas!" Ug kini si Barabas usa ka tulisan.

1 Busa gikuha ni Pilato si Jesus ug iyang gipalatigo. 2Ug ang mga sundalo nanaglukong ug mga sampinit, ug kini ilang gipahaum sa iyang ulo, ug siya ilang gisul-oban ug kupo nga mapula. 3Ug kaniya miduol sila nga nanag-ingon, "Mabuhi ang Hari sa mga Judio!" ug unya ilang gipanagsagpa siya. 4Ug si Pilato migula na usab ug miingon kanila, "Tan-awa, ania gidala ko siya kaninyo sa gawas aron mahibalo kamo nga wala akoy nakitang ikasumbong batok kaniya."

5Ug si Jesus migula nga sinul-oban sa purongpurong nga mga sampinit ug sa kupo nga mapula. Ug si Pilato miingon kanila, "Tan-awa, ania ra ang tawo!" 6Sa pagkakita kaniya sa mga sacerdote nga punoan ug sa mga polis, sila misinggit nga nanag-ingon, "Ilansang mo siya sa krus! Ilansang mo siya sa krus!" Si Pilato miingon kanila, "Kuhaa ninyo siya ug kamoy maglansang kaniya sa krus, kay wala akoy nakitang ikasumbong batok kaniya."

7Ang mga Judio mitubag kaniya, "Kami adunay balaod, ug sumala niining maong balaod kini siya kinahanglan pagapatyon kay siya nagpaka-Anak sa Dios." 8Sa pagkadungog ni Pilato niining sultiha, siya misamot sa pagkahadlok. 9Ug siya misulod pag-usab sa palasyo ug miingon kang Jesus, "Tagadiin ba ikaw?" Apan si Jesus wala motubag kaniya. 10Busa si Pilato miingon kaniya, "Dili ka motingog kanako? Wala ka ba mahibalo nga may gahum ako sa pagbuhi kanimo ug may gahum ako sa paglansang kanimo sa krus?" 11Si Jesus mitubag kaniya, "Wala unta ikaw kagahum batok kanako kon wala ka pa hatagi niini gikan sa kahitas-an; busa labaw pa kadakug sala ang nagtugyan kanako nganhi kanimo."

12Tungod niini si Pilato naninguha sa pagbuhi kaniya, apan ang mga Judio misinggit nga nanag-ingon, "Kon imong buhian kining tawhana, dili ka diay higala ni Cesar. Ang tanan nga magapakahari nagapakigbatok kang Cesar." 13Sa pagkadungog ni Pilato niining mga pulonga, iyang gidala si Jesus sa gawas ug milingkod siya sa hukmanan, sa usa ka dapit nga ginganlan ug Plataforma nga Bato, ug sa Hebreohanon, Gabata. 14Ug kadto adlaw sa Pangandam alang sa Pasko, sa may ikaunom ang takna. Ug siya miingon sa mga Judio, "Tan-awa, ania ang inyong Hari!"

15Apan sila misinggit nga nanag-ingon, "Pahawaa siya, pahawaa siya, ilansang mo siya sa krus!" Si Pilato miingon kanila, "Ilansang ko ba diay sa krus ang inyong Hari?" Ang mga sacerdote nga punoan mitubag nga nanag-ingon, "Wala kami ing hari gawas kang Cesar." 16 Busa iyang gitugyan siya ngadto kanila aron ilansang sa krus. 17Busa ilang gikuha si Jesus, ug siya milakaw nga nagpas-an sa iyang kaugalingong krus, paingon sa dapit nga ginganlan ug dapit sa kalabera, nga sa Hebreohanon ginganlan ug Golgota. 18Ug didto ilang gilansang siya sa krus uban sa duha pa ka tawo, ang matag-usa sa masigkakilid, ug si Jesus sa taliwala nila.


PAGPAAMBIT SA MENSAHE:

Ang maong mensahe naghubit sa mga pagdagmal ni Jesus diin siya gisilotan sa mga Judio pinaagi sa paglansang sa krus. Mao kini ang katumanan sa mga panagna sa mga karaan nga propeta diin nagaingon nga ang anak sa Dios pagasakiton ug ilansang sa krus aron maluwas ang tanang katawhan sa kalibutan. Mao usab kini ang kabubut-on sa Dios Amahan diin iyang gipakanaog ang iyang bugtong anak aron magpakatawo sa ingon maoy iyang gisugo sa pagtubos sa atong mga sala pinaagi sa pagbuhis sa iyang lawas ug dugo.

Ang mga Judio niadtong panahuna ug hangtod karon nagatoo lamang sa Dios Amahan diin gitawag kining ilang tinuohan ug Judaism. Ang Dios Amahan sa pulong Hebrew gitawag kini ug yahweeh. Labihan kadako ang ilang pagrespeto sa Dios Amahan diin ang ngalan sa Dios nga Yahweeh ila kanang litokon nga pinaduko ang ulo ug pinabugnaw ang tingog. Bisan karon panahuna didto sa maong lugar sa Jerusalem, makasab-an ka kun litokon nimo ang pangalan nga Yahweeh nga morag walay respeto.

Dako ang kasuko sa mga Judio ingon man sa ilang mga pariseo niadtong panahuna, sa dihang nagpaila si Jesu-Cristo nga anak sa Dios. Ilang pagtoo nga gibugalbugalan lang ni Jesu Cristo ang Dios Amahan. Ang mga pagtulon-an niadtong panahuna daan nang may sagol politika diin ang mga dagkong pariseo adunay katakos sa pag-impluwensya sa ilang gobyerno kay may kuwarta man, diin gikan ra gihapon sa ilang mga sumosunod.

Wala masabti sa ubang maalamon ang mensahe sa karaang mga propeta diin giingon nga moabot ang hari sa mga hari nga maoy magmando sa tibook kalibutan, nagatoo sila nga tawo lamang gihapon ang maong hari nga susama kang Haring David.

Si Jesu Cristo nagpaila nga anak sa Dios apan yano lamang nga pagkatawo, walay dayan dayan sa lawas, gawas sa mga amorsiko nga namilit sa sidsid sa iyang sinina. Nagpakaubos sya sa iyang kaugalingon diin mas ganahan sya makig-uban sa mga kabos ug ordinaryong mga katawhan.

Ang pagpalansang ni Jesu-Cristo sa Krus maoy katumanan sa tanang kasugo-an sa Dios Amahan. Apan diha sa balaang kasulatan gipadayag ang gipuy-an nga kapobrehon ni Jesu-Cristo, diin bisan siya anak sa Dios apan iyang gibiyaan ang tanan niyang katungod sa pagkaDios ug nakig-uban sa iyang mga sumusunod isip magtutudlo sa Bag-ong pagtulon-an ug nagpaulipon sa iyang mga sumosunod pinaagi sa pagtambal, pagsilbi ug pagpakita sa mga milagro (Piliphos 2:5~8).

Dako ang kadaugan ni Jesu-Cristo sa iyang pagtuman sa maong kasugoan, diin gibanhaw ang iyang tawhanon nga lawas ug gibayaw ngadto sa kalangitan ug gitagaan ug dung-ganan nga ngalan din ang tanan nga mga binuhat didto sa langit, didto sa yuta ug sa ilawom sa yuta magaluhod ug magasimba sa iyang ngalan.

Monday, January 28, 2008

Ang Pag-alagad Sa Dios

ROMA 12: 1~21

1 Busa hangyoon ko kamo, mga igsoon, tungod sa mga kalooy sa Dios, sa pagtugyan sa inyong mga lawas ingon nga halad nga buhi, balaan ug hinangponon sa Dios, ang halad nga mao ang inyong espirituhanong pagsimba. 2Ayaw kamo pagpahiuyon niining panahona sa kalibutan, kondili usba hinoon ninyo ang inyong kaugalingon pinaagi sa pagbag-o sa inyong salabutan, aron inyong masuta kon unsa ang maayo ug hinangponon ug hingpit nga kabobut-on sa Dios.

3Kay pinaagi sa grasya nga gihatag kanako agdahon ko ang matag-usa kaninyo sa dili paghunahuna ug labaw kay sa angay niyang hunahunaon mahitungod sa iyang kaugalingon, kondili nga maghunahuna hinoon siya uban sa kaligdong, ang matag-usa sibo sa gidak-on sa pagtoo nga gibahin sa Dios kaniya
4Kay maingon nga diha sa usa ka lawas aduna kitay daghang mga bahin, ug ang tanang mga bahin dili managsamag bulohaton, 5mao man usab kita, bisan daghan, usa ra kita ka lawas diha kang Cristo, ug ang matag-usa kanato isigkabahin, ang usa sa usa.

6Ug sanglit nabatonan ta man ang espirituhanong mga hiyas nga nagkalainlain sibo sa grasya nga gihatag kanato, kinahanglan gamiton ta kini: kon sa profesiya, kinahanglan gamiton ta kini sibo sa gidak-on sa atong pagtoo; 7kon sa pag-alagad, sa atong pagpang-alagad; ang nagatudlo, sa iyang pagpanudlo; 8ang nagamaymay, sa iyang pagpangmaymay; ang nagaamot, sa pagkamanggihatagon; ang nagahatag ug panabang, sa pagkamasinabuton; ang nagahimog mga buhat sa kalooy, sa kasaya. 9Kinahanglan walay pagminaut ang gugma. Dumti ninyo ang dautan, gumakos kamo sa maayo. 10Paghigugmaay kamo ang usa sa usa sa gugma nga inigsoon; pagpalabwanay kamo sa pagtahud ang usa sa usa.

11Ayaw kamo pagpakulang sa kasibut, hinonoa magmainiton kamo diha sa Espiritu. Alagara ninyo ang Ginoo. 12Pagkalipay kamo diha sa inyong paglaum, pagpailub kamo sa panahon sa kagul-anan, lumahutay kamo sa pag-ampo. 13Umamot kamo alang sa mga kinahanglanon sa mga balaan, batasana ninyo ang pagkamaabi-abihon. 14Panghinauti ninyo ang mga nagalutos kaninyo; panghinauti ug ayaw ninyo sila pagpanghimarauta. 15Pagkalipay kamo duyog sa mga nagakalipay, panghilak kamo duyog sa mga nagapanghilak. 16Panagkaangay kamo sa inyong panghunahuna, ang usa ngadto sa usa; ayaw kamo pagpahitaas, hinonoa pakigharong kamo sa mga timawa; ayaw ninyo palabihi ang inyong pag-isip sa inyong kaugalingong pagkamakinaadmanon
.

17Kinahanglan walay balusan ninyog dautan tungod sa dautan, hinonoa tinguhaa ninyo ang pagkamaligdong diha sa atubangan sa tanang tawo. 18Kon mahimo, sumala sa inyong takus maarangan, kinahanglan makigdinaitay kamo uban sa tanang tawo. 19Mga hinigugma, ayaw ninyo himoa ang panimalus, hinonoa hatagi ninyog higayon ang kapungot sa Dios; kay nahisulat man kini nga nagaingon, "Akoa ang panimalus, ako mao ang magabayad, nagaingon ang Ginoo." 20Hinonoa, "kon gutomon ang imong kaaway, pakan-a siya; kon uhawon, paimna siya; kay sa imong pagbuhat niini magapundok ikaw ug mga baga diha sa ibabaw sa iyang ulo." 21Ayaw pagpadaug sa dautan, hinonoa dag-a ang dautan pinaagi sa maayo.


PAGPAAMBIT SA MENSAHE:

Ang maong mensahe ngapadayag sa pagsul-ob sa hiyas nga kristohanon nga mao ang giya sa espirito santo sama sa pagkamainampoon, mapailubon, ug puno sa pasensya. Nga sa ato pa ang pag-alagad sa Dios dili lang usa ka tahas sa mga sumusunod ni Jesu Cristo kundili obligasyon gayud kini natong tanan kun gusto nato nga maangkon ang kinabuhing dayun.

Si Jesu Cristo nagpadayag nga ang napulo ka sugo sa Dios nga gibandilyo ni Moises diin nahisulat kini sa tinabliya nga bato, nagpasabot lamang sa duruha ka kasugo-an. Una, higugmaon mo ang Dios labaw sa tanan ug dili ka magbaton ug laing Dios gawas kaniya. Ikaduha, higugmaa ang imong isigkatawo sama sa paghigugma nimo sa imong kaugalingon. Apan kun masupak nimo ang bisan asa niining duha ka kasugo-an nan, nasupak na nimo ang tanan nga kasugo-an.

Si Jesu Cristo nagpasabot usab nga ang tawo makasala usab sa tulo ka paagi, pinaagi sa iyang dautan nga hunahuna, dautan nga mga pulong, ug dautan nga binuhatan. Nan sa ato pa mga igsoon ang pagkinabuhi nga haduol sa Dios kinahanglan nga batunan nato ang pagbalaan sa atong huna-huna, atong mga pulong ug sa atong mga buhat. Puy-an nato ang kinabuhi nga duol sa Dios diin kanunay naga-ampo, nagabuhat sa maayong binuhatan,

Ang balaang kasulatan nag-ingon, Gipili sa Dios ang mga sinalikway, ug mga tinamay ,ug kadtong mga katawhan nga anaa sa ubos nga hut-ong sa katilingban, nga maoy modala sa iyang tingog sa pagsangyaw sa kaluwasan, aron ang mga may tawhanon nga kaalam ug kinaadman, dili makapanghambog o makapasigarbo diha sa atubangan sa Dios kay walay gamit ang mga tawhanon nga abilidad didto sa Gingharian sa Dios. Ug kun adunay angay nga ipasigarbo sa Dios kadto lamang mga milagro nga iyang gipasinati diha sa atong tagsa-tagsa ka kinabuhi.

Ang Pagkamatay Ni Lazaro

JUAN 11:1~16

1 Ug dihay nagmasakiton nga usa ka tawo, si Lazaro nga taga-Betania, sa balangay ni Maria ug sa iyang igsoon nga si Marta. 2Kini si Maria, kinsang igsoon nga si Lazaro nagmasakiton, mao kadto ang naghaplas sa Ginoo ug pahumot, ug gipahiran niya ang mga tiil niini pinaagi sa iyang mga buhok. 3Busa si Jesus gipasugoan sa mga magsoong babaye nga nag-ingon, "Ginoo, ang imong hinigugma nagamasakiton."

4Apan sa pagkadungog niini ni Jesus, siya miingon, "Kining sakita dili ikamatay, kondili alang kini sa himaya sa Dios, aron ang Anak sa Dios pagahimayaon pinaagi niini." 5Ug si Jesus nahigugma kang Marta ug sa iyang igsoong babaye ug kang Lazaro. 6Busa sa iyang pagkadungog nga nagmasakiton si Lazaro, siya mipabilin pa ug duha ka adlaw sa dapit diin didto siya. 7Tapus niini siya miingon sa iyang mga tinun-an, "Mangadto kita pag-usab sa Judea." 8Ug ang mga tinun-an miingon kaniya, "Rabi, ang mga Judio bag-o pa lang naninguha sa pagbato kanimo, ug karon moadto ka na usab didto?"

9Ug si Jesus mitubag nga nag-ingon, "Dili ba ang adlaw napulo man ug duha ka takna? Kon may magalakaw sa adlaw, siya dili mahipangdol kay siya magatan-aw man sa kahayag niining kalibutan. 10Apan kon adunay magalakaw sa gabii, siya mahipangdol kay ang kahayag wala man diha kaniya." 11Gisulti niya kining mga butanga, ug unya miingon siya kanila, "Ang atong higala nga si Lazaro natulog, apan moadto ako aron sa pagpukaw kaniya gikan sa paghikatulog."

12Ug ang mga tinun-an miingon kaniya, "Ginoo, kon siya nahikatulog, nan, mamaayo ra siya." 13Ang gihisgutan ni Jesus mao ang kamatayon ni Lazaro, apan sila nanagdahum nga ang iyang gipasabot mao ang pagpahulay sa kinaiya nga pagkatulog. 14Busa si Jesus misulti kanila sa walay lipodlipod, "Si Lazaro namatay. 15Ug tungod kaninyo ako nalipay nga wala ako didto aron managpanoo kamo. Apan, tana, mangadto kita kaniya." 16Ug si Tomas nga ginganlag Kaluha, miingon sa iyang mga masigkatinun-an, "Mangadto usab kita aron mamatay kita uban kaniya."


PAGPAAMBIT SA MENSAHE:

Ang maong pagtulon-an nagpadayag sa kabubut-on sa Dios, diin gipakita ni Jesu Cristo ang mga milagro sa iyang Dios amahan. Gibanhaw niya ang iyang amigong si Lazaro aron ipakita sa mga katawhan ang iyang pagka anak sa Dios, diin ang motoo ug mosunod kaniya adunay luna didto sa gingharian sa Dios.

Ginaingon diha sa Balaang kasulatan nga walay imposible sa gahum ug kabubut-on sa Dios, diin bisan anaa ka na sa kamatayon iya kang luwason kun gisalig ug gitugyan mo ang imong kaugalingon kaniya. Nagpamatood lamang ang maong pagbanhaw kang Lazaro nga si Jesu Cristo Dios nga mato-od, ug nga si Lazaro pinalangga nga ug masinugtanon nga magtotoo sa Dios.

Apan Bulahan ang mga katawhan nga nagatoo ug nagasunod sa kabubut-on sa Dios bisan wala ang mga milagro diha sa ilang kinabuhi, kay sila mapanalanginan sa Dios sa tukmang panahun. Gikinahanglan lamang ang hugot nga pagtoo ug hugot nga pag-ampo ngadto sa Dios ug kanunay nga ipahari ang Dios espiritu santo diha sa atong kaugalingon, ug sa ingon bisan kiras o garas o usa ka lugas nga buhok , walay mawala kanimo.

Sunday, January 27, 2008

Didto Sa Siyudad Sa Atenas

BUHAT 17: 16~34

16 Ug samtang si Pablo nagpaabut kanila didto sa Atenas, ang iyang espiritu sa sulod niya
nahagit sa pagkasuko sa iyang pagkakita nga ang siyudad napuno sa mga larawan. 17Tungod niini, sa sulod sa sinagoga iyang gipakiglantugi ang mga Judio ug ang mga tawong masimbahon; ug didto sa taboan sa adlaw-adlaw iyang gipakiglantugi ang uban kanila nga iyang igahibalag. 18Ug iyang gikaasdang usab ang pipila sa mga pilosopo nga mga Epicureo ug mga Estoico. Ug may nangutana nga nag-ingon, "Unsa man kahay buot isulti niining tawong tigpamunit ug kahibalo?" Ang uban nanag-ingon, "Kini siya daw usa ka tigmantalag mga dios nga dumuloong"-- kay iya man ugod nga gimantala si Jesus ug ang pagkabanhaw.

19Ug ilang gikuptan siya ug gidala ngadto sa Areopago ug gipangutana, "Makahimo ba kami pagpakisayud unsa kining bag-ong tuloohan nga imong gipanudlo? 20Kay gikahatdan mo ang among mga dalunggan sa pipila ka mga laing butang; busa buot unta kami mahibalo unsay kahulogan niining mga butanga." 21Ang tanan ugod nga mga taga-Atenas ug mga dumuloong nga nagpuyo didto wala man lamay laing mahimo kondili ang pagtabi pagpaminaw sa bag-ong butang nga mahiabut.

22 Ug si Pablo mitindog sa taliwala sa Areopago ug miingon, "Mga taga-Atenas, nasabut ko nga sa tanang paagi kamo mga masimbahon gayud. 23Kay sa naglakaw ako sa kadalanan ug naniid sa inyong mga ginasimba, nakita ko gani usab ang usa ka halaran nga diha niini gikasulat kining mga pulonga, `Alang sa dios nga wala hiilhi.` Kining inyong ginasimba nga wala ninyo hiilhi, nan, kini mao ang akong ginamantala kaninyo. 24Ang Dios nga mao ang nagbuhat sa kalibutan ug sa tanang butang nga ania niini, maingon nga Ginoo man siya sa langit ug sa yuta, wala magpuyo diha sa mga templo nga binuhat sa kamot,

25ni pagaalagaran siya sa mga kamot sa tawo, nga daw may pagpanginahanglan pa siya, sanglit siya gayud mao man gani ang nagahatag ug kinabuhi ug ginhawa ug sa tanang butang ngadto sa tanang mga tawo. 26Siya mao ang nagbuhat sa tanang nasud sa katawhan gikan sa usa ka tawo, aron papuy-on sa tanang dapit sa yuta, tapus niya maandam ang mga gitagal nga kapanahonan ug ang mga utlanan sa mga dapit nga ilang pagapuy-an, 27aron sila mangita sa Dios, basin pag ila siyang mahikapan ug makaplagan, bisan tuod nga siya dili ra halayo gikan sa matag-usa kanato,

28kay `Diha kaniya kita nangabuhi ug nagalihok ug nagalungtad;` ug matud pa usab gani sa inyong mga magbabalak: `Kay sa pagkatinuod kita iyang kaliwat.` 29Kay kaliwat man diay kita sa Dios, nan, dili nato paghunahunaon nga ang pagka-Dios nahisamag bulawan, o salapi, o bato, nga minugna sa kabatid ug sa panghanduraw sa tawo. 30Ang Dios wala lamang manumbaling sa maong mga panahon sa kaburong, apan karon siya nagasugo sa tanang mga tawo bisan diin sa paghinulsol,

31kay siya nakatudlo na ug adlaw kanus-a, subay sa katarungan, iyang pagahukman ang kalibutan pinaagi sa usa ka tawo nga iyang gitudlo alang niini, ug kini iyang gipanghimatud-an ngadto sa tanang mga tawo pinaagi sa pagbanhaw kaniya gikan sa mga patay." 32 Ug sa ilang pagkadungog mahitungod sa pagkabanhaw sa mga patay, dihay nanagbiaybiay; apan ang uban miingon, "Maminaw ra kami kanimo pag-usab mahitungod niini." 33Ug si Pablo mipahawa kanila. 34Apan dihay mga tawo nga mikuyog kaniya ug mitoo, nga ang pipila niini mao sila si Dionisio nga Areopagohanon, ug ang usa ka babaye nga ginganlan si Damaris, ug ang uban pa kanila.


PAGPAAMBIT SA MENSAHE:

Ang maong mensahe nagpadayag sa pagsangyaw sa kamatuoran sa mga Apostoles sama kang Pablo, bisan kun wala na si Jesu Cristo uban kanila. Ilang gitadlas ang upat ka sook sa tibook kalibutan diin dili matukib sa pulong ug kakuyaw nga ilang naagian nga mga pagsulay.

Niadtong panahuna ang Dios sa matag lugar nagkalain lain pa ang panagway. Diin ang kadaghanan binuhat sa bulawan , plata ug uban pang mahalon nga mga materyal, ug ang uban mismo nga mga katawhan nagsimba sa Dios nga wala nila maiilhi.

Daghan nga mga tawo ang naglutos sa mga apostoles, tungod sa pagpadayag sa kinabuhi ni Jesu- Cristo nga anak sa Dios. Daghan usab ang nagatoo sa maayong balita nga gipadayag nila ni Pablo. Ug matod pa sa balaang kasulatan bulahan kadtong mitoo sa kamatuoran bisan wala makakita sa maong panghitabo kay panalanginan sa Dios Amahan.

Apan daghan ang inosente sa kamatuoran niadtong panahona diin sila giedukar sa mga apostoles ni Jesu-Cristo pinaagi sa panabang sa espirito santo . Nikuyanap ang maong kristiyanismo sa tibook kalibutan diin nagpadayun ang pagpanglutos sa mga sumusunod ni Jesu Cristo.

Apan daghan usab ang nagtu-is sa balaang kasulatan , pinaagi sa mga tawong may kaalam ug kinaadman nga tawhanon, diin ilang gipakawaly-bili ang mensahe sa Anak sa Dios nga nagpakatawo. Kon atong subayon ang balaang kasulatan nagaingon ang mga pulong sa Dios nga nagkanayun : "Walay bili ang tawhanong kaalam diha atubangan sa Dios ug dili kini angay ipasigarbo kay wala kini pulos didto sa gingharian sa Dios. Ug kun adunay may atong angay ipasigarbo , kana mao lamang ang mga milagro sa Dios nga iyang gihimo diha sa atong tagsa-tagsa ka kinabuhi ".

Ang Sala

LUCAS 17:1~4

1 Miingon si Jesus sa mga tinun- an: “Moabot gyod ang sala sa kalibotan, apan alaot ang magdala ini! 2 Maayo pag hiktan ang iyang liog sa galingang bato ug ilabay sa dagat kay sa maangin ang usa ining mga gagmay
.
3 Pagmatngon. Kon makasala ang imong igsoon, pahimangnoi siya, ug kon maghinulsol, pasayloa. 4 Kon makapito siya makasala batok nimo sa usa ka adlaw ug makapito pod mobalik pagpangayog pasaylo, pasayloa.”


PAGPAAMBIT SA MENSAHE:

Ang maong mensahe nagpasabot nga ang tawo mentras nagkinabuhi pa dinhi sa kalibutan, makasala gyud. Daghan ng mga bag-o nga teknolohiya dinhi dinhi sa kalibutan dinhi naglangkob kini sa mga tawhanon nga bisyo o mga sala. Si Jesu Cristo miingon : Ang tawo makasala sa tulo (3) ka aspeto: makasala sa huna-huna, sa pulong ug sa buhat.


Angtawo paggawas dinhi sa kalibutan daan na kitang nagtangag sa sala nga panolundon, diin kini napasaylo na ug naluwas na ni Jesu Cristo sa dihang gilansang siya sa Krus didto sa kalbaryo.


Miingon ang balaang kasulatan nga wala kitay katungod sa pagsilot o paghukom sa atong isigkatawo , isumbong siya sa Dios kay siya lamang ang may katungod sa pagpahimatngaon ug pagsilot kaniya. Angay lamang nga atong pasayloon ang nagpakasala kanato kay iya man sa Dios ang pagsilot sa mga makasasala. Ug atong hinumdoman mga igsoon ngaang silot sa sala mao ang kamatayon

Ang Pangutana Mahitungod Sa Puasa

MARCOS 2:18~22

18 Usa ana ka adlaw, samtang nagpuasa ang mga tinun-an ni Juan, ang Magbubunyag, ug ang mga Pariseo, gipangutana si Jesus sa pipila ka tawo: “Nganong nagpuasa ang mga tinun-an ni Juan nga Magbubunyag ug ang sa mga Pariseo, apan ang imoha, wala?”

19 Si Jesus mitubag: “Magpuasa ba diay ang mga dinapit sa kasal samtang naa pa ang pamanhonon? Naa pa gani ang pamanhonon dili sila magpuasa. 20 Apan moabot ang panahon nga kuhaon ang pamanhonon. Niana magpuasa na sila.

21 Walay motapak og bag-ong panapton sa karaang sinina. Ang bag-ong tapak mokulo ug magisig samot ang sinina. 22 Wala poy mobutang og bag-ong bino sa karaang sudlanan nga hinimo sa panit. Ang bag-ong bino mopabaliskad sa karaang sudlanan; mausik ang mga sudlanan ug ang bino.


PAGPAAMBIT SA MENSAHE:

Ang maong mensahe nagpasabot sa pagpuasa diha sa atong mga kasal-anan pinaagi sa pagsunod sa kasugo-an ni Jesu Cristo diin ipatigbabaw nato ang giya sa espiritu santo nga mao ang gipasul-ob ni Jesu Cristo diha sa iyang mga sumosunod.

Ang gihisgutan nga pamanhunon sa mensahe mao ra usab si Jesu Cristo diin pinaagi sa sambingay nga pagpamulong siya hiusahon sa mga katawhan sa Jerusalem nga maoy sentro sa pagtulon-an niadtong panahuna. Ug nahitabo ang maong panaghiusa didto sa Kalbaryo sa Golgota diin ilang gipalansang sa krus ang anak sa Dios nga maoy gipanagna sa mga propeta aron maluwas ang mga kasal-anan natong tanan.

Sa pagkabanhaw ni Jesu Cristo mao na kini ang iyang sambingay nga gikuha na ang pamanhunon diin siya nabanhaw didto sa langit. Ang iyang mga sumosunod nga mga Kristohanon aron mabanhaw usab uban kaniya ngadto sa kinabuhing dayon kinahanglan nga magpuasa sa mga kasal-anan. Nga sa ato pa nga bag-ohon nato ang atong mga kaugalingon pinaagi sa pagbalaan ug biyaan ang mga dautan nga hiyas o bisyo.

Mao kini ang unod saiyang sambingay nga nag-ingon: Dili magtapak ug bag-o nga panapton sa karaang sinina, nga sa ato taphaw lamang ug walay grasya ang imong pagpuasa sa imong mga sala, kay imo man lang gilingla ang imong kaugalingon ingon man usab gilingla nimo ang Dios kay paglabay sa semana santa o paglabay sa pipila ka semana mobalik kanaman usab unya sa karaan mong hiyas o mga bisyo

Ang unod sambingay sa maong mensahe nga nagkanayun: Ayaw gamita ang daan nga sudlanan nga panit sa bag-ong bino kay madaot lang ang maong sudlanan, nga sa ato pa kun ipahari nato si Jesu-Cristo diha sa atong kinabuhi, ipasulod nato ang Dios espirito santo sa atong kaugalingon nan bag-ohon sad nato ang atong mga hiyas, mopahilayo kita sa mga tawhanon nga mga hiyas ug atong amumahon o ipalambo diha sa atong kaugalingon ang hiyas nga langitnon.

Nga sa ato pa mga igsoon ang pagpuasa sa mga sala dili lang diay sa semana santa mahitabo, dili lang diay sa pipila ka semana, kundili hangtod nga dili mobalik ang anak sa Dios aron sa paghukom kanatong tanan, aron nga kita sama sa bulawan mosanag ug mosidlak diha sa mga mata sa Dios Amahan, nan wala unya sarang kabalak-an diha sa pagbalik sa Dios kay naandam naman nato ang atong kaugalingon ug mahiluna na unya ang atong kalag diha sa ganghaan sa Gingharian sa Dios.



Friday, January 25, 2008

Gisugilon Ni Jesus Ang Iyang Pag-antos Sa Kamatayon

LUCAS 9:21~27

21Apan iyang gitugon ug gibaoran sila nga walay bisan kinsa nga ilang suginlan niini. 22Ug siya miingon, "Ang Anak sa Tawo kinahanglan magaantus sa daghang mga butang, ug igasalikway siya sa mga anciano ug sa mga sacerdote nga punoan ug sa mga escriba, ug pagapatyon, ug sa ikatulo ka adlaw pagabanhawon siya."

23Ug siya miingon sa tanan, "Kon adunay buot mosunod kanako, kinahanglan magdumili siya sa iyang kaugalingon ug magpas-an sa iyang krus matag-adlaw ug magasunod kanako. 24Kay bisan kinsa nga buot magpatunhay sa iyang kinabuhi kawagtangan hinoon siya niini; ug bisan kinsa nga magawagtang sa iyang kinabuhi tungod kanako, magapatunhay niini

25Kay unsa may kapuslanan alang sa usa ka tawo kon maangkon niya ang tibuok kalibutan nga pagawagtangan o pagapildihan niya sa iyang kaugalingon? 26Kay bisan kinsa nga magakaulaw tungod kanako ug sa akong mga pulong, siya igakaulaw man sa Anak sa Tawo inig-abut niya diha sa iyang himaya ug sa himaya sa Amahan ug sa mga balaang manolunda.

27Apan sa pagkatinuod suginlan ko kamo nga adunay mga nanagbarug karon dinhi nga dili una patilawon ug kamatayon samtang dili pa sila makakita sa gingharian sa Dios."


PAGPAAMBIT SA MENSAHE:

Ang maong mensahe nagpadayag sa mga pagapahimatngon ni Jesu Cristo diin iyang giasoy ang kabubut-on sa iyang Amahan diin giingon nga ang anak sa Dios pagasakiton ug ilansang sa krus ug mamatay apan mabanhaw siya sa ikatulo ka adlaw.

Mao kini ang maayong balita diin kitang tanang katawhan maluwas tungod sa pagpakamatay sa atong Ginoo diha sa Krus. Mao kini ang kataposan ug kalamposan sa tahas ni Jesu Cristo diin tungod sa mao niyang kalamposan siya gituboy sa iyang amahan didto sa kinatas-ang dapit sa langit, diin siya gitagaan ug ngalan nga dungganan ug ang tanan binuhat didto sa langit dinhi sa yuta moluhod ug magsimba sa iyang ngalan.

Mao kini ang tinago nga kamatuoran diin bulahan ang mga katawhan mga makasunod o makaambit sa kasakit ni Jesu Cristo diha sa krus. Diin bulahan ang magatugyan sa iyang kinabuhi ngadto sa Dios kay malugwayan pa kini apan kadtong magdumili pa sa pagtugyan sa iyang kinabuhi ngadto sa Dios basin kawad-an niini

Dili maihap ang nagsakripisyo ug nagpahinungod sa ilang kaugalingon dinha sa Dios diin ilang gibuhis ang ilang kinabuhi aron pagpaila sa katiunay sa paglaban sa ilang gibarugan nga pagtulon-an.

Bisan dinhi sa Pilipinas diin nakaabot ang maong kristyanismo nga pagtulon-an sa mga napulog lima nga siglo. Karon panahuna usa na usab ang Pilipinas sa mga sentro sa maong pagtulon-an dinhi sa Asia. Daghan ang atong mga Filipino martir nga namatay aron paglaban sa maong pagtulon-an, diin nakabaton kita ug pinaka una nga santos nga Pilipinhon pinaagi ni San Lorenzo Ruiz., usa siya ka Filipino nga taga dapit sa Luzon diin nagmisyonaryo sa pagtulon-an nga katoliko didto sa nasod sa Hapon ug “gitorture” ug gihulga nga patyon kun dili niya isurender ang iyang pagtulon-an nga kristiyanismo. Apan miingon siya sa pinulongan nga inengles “ I’d Rather Die In A Thousand Times Than To Denounce My Faith. Nga sa ato pa nga sinultihan mas palabihon pa niya nga mamatay sa makalibo nga higayon kay sa isurender niya ang iyang pagtoo sa kristiyanismo nga pagtulon-an.

Thursday, January 24, 2008

Ang Sambingay Mahitungod Sa Kuwartang Bulawan

LUCAS 19: 11~27

11 Ug sa nagpatalinghug sila niining mga butanga, si Jesus mipadayon ug misugilon kanila sa usa ka sambingay, tungod kay siya nagkahiduol na man sa Jerusalem, ug tungod kay ila mang gidahum nga ang gingharian sa Dios igapadayag dihadiha. 12Busa miingon siya, "Usa ka tawong hamili mipanaw ngadto sa halayong yuta aron sa pagdawat ug harianong gahum alang sa iyang kaugalingon, ug sa pagpauli tapus niini. 13Ug iyang gipatawag ngadto kaniya ang napulo sa iyang mga ulipon, ug sila iyang gihatagan ug napulo ka mina ug giingnan niya, `Ipatigayon ninyo kini hangtud sa akong pagpauli.`

14Apan ang iyang mga tagilungsod nanagdumot kaniya, ug siya ilang gipasundan ug mga tinugyanan aron sa pag-ingon, `Dili kami buot nga maoy magahari kanamo kining tawhana.` 15Sa iya nang paghiuli, tapus madawat niya ang harianong gahum, iyang
gipasugoan sa pagduol kaniya ang maong mga ulipon nga iyang gikahatagan sa kuwarta, aron iyang mahibaloan kon pilay ilang nakita sa patigayon. 16Ug sa iyang atubangan miduol ang nahauna nga nag-ingon, `Senyor, ang imong usa ka mina hingdugangan ug napulo ka mina.

` 17Ug siya miingon kaniya, `Mao kana, maayong ulipon! Tungod kay sa diyutay kaayo kasaligan ka man diay, ikaw igapahimutang nga magbubuot sa napulo ka lungsod.` 18Ug ang ikaduha miduol nga nag-ingon, `Senyor, ang imong usa ka mina hingdugangan ug lima ka mina.` 19Ug siya miingon kaniya, `Ug ikaw igapahimutang nga magbubuot sa lima ka lungsod.

` 20Ug unya miduol ang usa nga nag-ingon, `Senyor, ania ra ang imong mina nga akong gitipigan, giputos ug panyo; 21kay nahadlok ako kanimo, sanglit ikaw mapig-uton man ugod nga pagkatawo; ikaw nagakuha man sa dili imong binutang, ug nagaani sa dili imong pinugas.` 22Ug siya mitubag kaniya, `Lampingasan nga ulipon, pinaagi sa kaugalingon mong sulti pagahukman ko ikaw sa silot! Nasayud ka man diay unta nga ako maoy usa ka tawong mapig-uton, nga nagakuha sa dili akong binutang ug nagaani sa dili akong pinugas,

23nan, nganong wala man lamang nimo idiposito ang akong kuwarta sa bangko, aron nga sa akong paghiuli makuha ko unta kini nga may tubo? 24Ug siya miingon kanila nga nanagtindog sa duol, "Kuhaa kaniya ang usa ka mina, ug ihatag kana kaniya nga may napulo ka mina!` 25(Ug sila miingon kaniya, `Senyor, siya aduna nay napulo ka mina``) 26`Sultihan ko kamo, nga siya nga adunay iya pagahatagan ug labaw pa; apan siya nga walay iya. pagakuhaan sa bisan unsa nga anaa kaniya. 27Ug mahitungod niining akong mga kaaway nga wala mobuot nga ako maoy magahari kanila, dad-a sila dinhi ug patya ninyo sila sa akong atubangan.`"


ANG PAGPAAMBIT SA MENSAHE:

Ang maong sambingay nagpadayag sa katuyo-an ug kabubut-on sa Dios ngadto sa iyang mga piniling katawhan, diin angay diay nga atong tagaan ug dakong pagtagad o respesto ang mga butang o grasya nga gihatag sa Dios kanato dinhi sa walog sa mga buhi. Ang tanang butang dinhi sa yuta nagagikan sa kabubut-on sa Dios diin kun kita makahupot niini, materyal man o espiritwal nga mga butang ato gayud kining palambo-on ug ampingan.

Nakapahinumdom kanako kining maong pagtulon-an diin dunay nidaug sa usa ka lottery draw diri sa Pilipinas kanang gitawag ug lotto nga diin misugot silang magti-ayon nga entirbyuhon sa telibesyon niadtong mga tuig 2003, nidaug kadtong maong magti-ayon diha sa mga 1997 o sayes (6) anyos na ang milabay , diin sila na-ana sa katigulangon nga edad ug gipakita gyud ang ilang panagway sa telebesyon diin wala silay alahas ug nagpabilin ang ilang pagkamapaubsanon.

Gipangutana sila sa maong “anchor reporter” kun giunsa nila pagdaug o pagpili sa maong mga numero sa lotto, mipasabot ang tigulang babaye nga siya nagdeboto ni Santo NiƱo diin aduna silay gamay nga imahen as maong santo sa ilang altar sa balay ug ilang gisug-an sa “electric candle bulb” diin kini magkipatkipat ug unya mohunong ug mokipat-kipat na sab sa matagsiga niini.

Giihap sa tigulang ang kada kipatkipat sa maong candle bulb , hangtod nga nakakuha siya ug unom (6) ka kumbinasyon nga mga numero. Gitay-an kadto sa tigulang ana mismong gabhi-una ug pagkaugma nigawas ang maong numero ug nakadaug ang managtiayon sa diseyete (17 ) milyones ka pesos, (P17 Million Pesos).

Adunay silay pito ka mga anak diin mga kabos usab , ila kining gipabuhatan ug tagsa ka residensyal nga balay gikan sa ilang daug dayun gitagaan kini nila ug negosyo nga matawag nga “Family Business” o para kanilang tanan. Pito na katuig gikan sa ilang pagdaug apan nagbarog gihapon ag ilang negosyo nga malamboon.

Nagpasabot ang managtiayon diha sa nag-interbyu kanila nga angayan gayud nga respetuhan ang grasya o gasa nga gihatag sa Dios kanato. pinaagi sa paamping ug pagpalambo nini, ug sa kanunay magpaduol sa Dios pinaagi sa inadlaw nga pag-ampo ug pasalamat ug paghatag usab sa ginagmay nga hinabang sa nanginahanglan, diin usa na ang pag-abag usab sila sa pagpabarog sa gamay nga templo sa ilang lugar.

Ginaingon diha sa mensahe sa balaang kasulatan nga kinsa kadtong aduna pagadugangan, ug kinsa kadtong wala paga kuha-an, diin nagpasabot kini sa dugang grasya sa mga tawo nga makamao mopasidungong ug mapalambo sa materyal nga gasa sa Dios kanila. Ug usab sa laing bahin ang kadtong dili makamaong morespeto o mopalambo sa grasya nga hinatag sa Dios, diin nagwaldas ug nagusik-usik lang ninini, pagakuha-on kini sa Dios ug iapil pa ang tubo niini .




Si Jesus Ug Si Saqueo

LUCAS 19: 1~10

1 Unya si Jesus misulod sa Jerico ug miagi niini. 2Ug didtoy usa ka lalaki nga ginganlan si Zaqueo. Siya punoan sa mga maniningil sa buhis, ug siya dato. 3Ug siya naninguha sa pagtan-aw kon unsang pagkatawhana si Jesus, apan wala siya makahimo tungod sa panon sa katawhan, kay siya ugod mubo man


4Ug siya midalagan sa unahan ug misaka sa usa ka kahoyng sikomoro aron sa pagtan-aw kaniya, kay siya taliagi man niadtong dalana. 5Ug sa paghiabut ni Jesus niadtong dapita, siya mihangad ug miingon kaniya, "Zaqueo, dumali ka pagkanaug, kay kinahanglan adto ako moabut sa imong balay karong adlawa." 6Ug siya midali pagkanaug, ug kaniya midawat siya nga malipayon.

7Ug sa ilang pagkakita niini, silang tanan nanagbagutbot nga nag-ingon, "Misulod siya sa pag-abut diha sa balay sa usa ka tawong makasasala." 8Ug si Zaqueo mitindog ug miingon sa Ginoo, "Tan-awa, Ginoo, ang katunga sa akong kabtangan ihatag ko sa mga kabus; ug kon ugaling diha man kanilay akong gikalimbongan ug bisan unsa, igauli ko kini sa upat ka pilo."

9Ug si Jesus miingon kaniya, "Niining adlawa karon, ang kaluwasan nahiabut niining balaya, sanglit siya usab anak man ni Abraham. 10Kay ang Anak sa Tawo mianhi sa pagpangita ug pagluwas sa nawala."


PAGPAAMBIT SA MENSAHE:

Ang maong pagtulon-an nagpadayag lamang sa kabubut-on sa Dios diin kini nagpasabot nga dili gayud nato masukod o matagna ang iyang pamaagi. Sa mensahe nagpadayag kini sa usa ka Dato nga kubrador nga ginganlan ug Saqueo diin daghan sa mga katawhan ang naglagot kaniya tungod sa di maayo niya nga binuhatan ug di pod maayo nga mga hiyas.

Bisan tood si Saqueo dato na ug tinahod sa ilang lugar apan nagpakaubos siya sa iyang kaugalingon pinaagi sa pagkatkat sa usa ka kahoy sikomoro aron lamang malantaw niya si Jesu-Cristo sa iyang paglabay. Gidawat ni Jesu-Cristo ang pagpaubos ni Saqueo sa iyang kaugalingon diin didto mismo sa panimalay sa maong Dato gustong mapahulay si Jesu-Cristo. Usa kadto ka kadaugan sa kristyanismo nga pagtulon-an ug kaluwasan sa mga kaliwatan ni Saqueo ngadto sa himaya sa Dios.

Usa sab kadto ka pagkakaplag sa kamatuoran ni Saqueo diin iyang gitugyan sa hingpit ang iyang kinabuhi ngadto sa Dios ug gipanalanginan usab sa Dios ang tibook niyang pamilya. gipang-uli usab ni Saqueo ang iyang mga tinikas ngadto sa mga hingtundan.

Ang mensahe nagpasabot lamang nga walay gipalabi ang Dios diha sa iyang mga katawhan, diin iyang tagaan ug pasidungog ang si kinsa man nga nahisalaag. Atong mapalandungan si Jesu Cristo nga sama diay siya sa magbalantay sa karnero diin iya gayud nga pangitaon ang nawala nga karnero aron mahitipon kini sa kadaghanan.

Dili gyud diay nato mahukman ang atong isigkatawo pinaagi sa iyang batasan ug hiyas nga makita sa atong panan-aw, diin lahi ang panan-aw sa Dios ngadto sa iyang mga katawhan nga maoy gitagaan ug gibug-aton ang makita diha sa atong tagsa-tagsa ka kasing-kasing.

Ang Pagkapriso Ni Pablo Ug Ni Silas

Buhat 16:16~40

16 Ug nahitabo nga sa nagpaingon kami sa dapit nga ampoanan, gikasugat kami sa usa ka
dalagitang ulipon; ug kini siya nakabaton sa espiritu sa pagpanag-an, ug siya hingsapian pag-ayo sa iyang mga agalon pinaagi sa iyang pagpanag-an. 17Ug si Pablo ug kami gisunodsunod niya nga nagsinggit, "Kining mga tawhana maoy mga ulipon sa Labing Halangdong Dios, ug kaninyo nagamantala sila sa dalan sa kaluwasan."

18Ug kini gibuhat niya sulod sa daghang mga adlaw. Apan si Pablo nga gisamokan gayud kaniya, miatubang ug miingon sa espiritu, "Sa ngalan ni Jesu-Cristo, ako nagasugo kanimo sa paggula gikan kaniya." Ug kini migula dihadiha. 19Apan sa pagkakita sa iyang mga agalon nga nahanaw na ang ilang kalauman sa panapi, ilang gidakop si Pablo ug si Silas ug gitaral sila ngadto sa taboan sa atubangan sa mga punoan. 20Ug sa nadala na nila si Pablo ug si Silas ngadto sa mga maghuhukom, ang mga agalon nanag-ingon, "Kining mga tawhana nga mga Judio nagapagubot sa atong siyudad.

21Kini sila nanudlog mga batasan nga dilimatarung sa pagsagop o paggawi nato ingon nga mga Romanhon." 22Ug batok kanila nangapil sa paghasmag ang panon sa katawhan; ug sila gihuboan sa mga maghuhukom pinaagi sa paggisi sa ilang mga bisti ug unya gipabunalan. 23Ug sa gikabunalan na sila sa makadaghan, sila gibanlud nila sa bilanggoan; ug ang magbabantay sa bilanggoan ilang gisugo nga kinahanglan bantayan sila pag-ayo. 24Ug sa pagkadawat niya sa maong sugo, iyang gibanlud sila sa labing kinasuloran sa bilanggoan ug ang ilang mga tiil iyang gisul-ot diha sa mga sipohan.

25 Apan sa may pagkatungang gabii si Pablo ug si Silas nanag-ampo, ug nanag-awit silag mga alawiton ngadto sa Dios, ug ang mga binilanggo nanagpatalinghug kanila. 26Ug sa kalit miabut ang usa ka makusog nga linog, nga tungod niana nauyog ang mga patukoranan sa bilanggoan; ug dihadiha naabli ang tanang pultahan ug nangatangtang ang mga talikala sa matag-usa. 27Ug sa pagmata sa magbabantay sa bilanggoan, ug sa iyang pagtan-aw nga naabli na man ang mga pultahan sa bilanggoan, milanit siya sa iyang espada ug magpatay na lang unta siya sa iyang kaugalingon, sa pagdahum nga nakabuhi na ang mga binilanggo.

28Apan si Pablo misinggit kaniya sa makusog nga tingog nga nag-ingon, "Ayaw buhatig dautan ang imong kaugalingon, kay ania ra kaming tanan!" 29Ug siya nangayog suga ug milayat paingon sa sulod, ug mihapa nga nagkurog sa atubangan ni Pablo ug ni Silas. 30Ug iyang gidala sila sa gawas ug miingon kanila, "Mga senyores, unsay kinahanglang buhaton ko aron maluwas ako?" 31Ug kaniya mitubag sila nga nag-ingon, "Tumoo ka sa Ginoong Jesus ug maluwas ka, ikaw ug ang imong panimalay."

32Ug ang pulong sa Ginoo ilang gisulti kaniya ug sa tanang diha sa iyang balay. 33Ug sa maong takna sa kagabhion sila iyang gikuha, ug ang ilang mga samad iyang ginunaran; ug dihadiha gibautismohan siya ug ang iyang tibuok panimalay. 34Ug sa gikapasaka na niya sila sa iyang balay, iyang gidulotan silag pagkaon; ug uban sa iyang tibuok panimalay, siya nalipay nga nakakaplag sa pagtoo diha sa Dios. 35 Apan sa pagkabuntag na, ang mga maghuhukom nagsugo ug mga polis sa pagsulti nga nag-ingon, "Buhii kadtong mga tawhana." 36Ug ang magbabantay sa bilanggoan mitaho sa maong mga pulong ngadto kang Pablo. Matud niya, "Ang mga maghuhukom nagpasugo nga pabuhian kono kamo; busa panggula ug panglakaw kamo nga malinawon." 37Apan si Pablo miingon kanila, "Kami nga mga tawong Romanhon, sa wala lamay husay, ilang gibunalan sa atubangan sa kadaghanan ug gibanlud sa bilanggoan; ug karon ila ba lamang diay kaming buhian sa tago? Dili mahimo! Kinahanglan sila gayud ang mangunay sa pag-anhi sa pagpagula kanamo."

38Ug ang mga maghuhukom gisuginlan sa mga polis niining mga pulonga, ug sila nangahadlok sa ilang gimaymayan; ug unya migikan sila. pagkadungog nga kini sila mga tawo man diay nga Romanhon. 39Ug sila nangadto ug nangayo kanilag pasaylo. Ug ilang gipagula sila ug gihangyo nga mopahawa sa siyudad. 40Ug sila migula sa bilanggoan ug nangadto sa ka Lidia; ug sa ila nang gikakita ang mga kaigsoonan.


PAGPAAMBIT SA MENSAHE:

Ang mensahe nagbutyag sa tinago nga kamatuoran diin gisangyaw kini nila ni Pablo ug ni Silas. Tungod sa tiunay ug kinasingkasing nila nga pagtoo ug pagsunod sa mga kasugoan ug kabubut-on sa Dios sila gimilagrohan sa Dios ug giluwas sa ilang pagkabilanggo.

Sa makausa pa ang balaan kasulatan nagbutyag sa kahimoan sa Dios pinaagi sa iyang mga apostoles diin napalandongan nato ang mga milagro nga gipakita tungod sa hugot nga pagtoo ug pagsangyaw sa kamatuoran. Walay imposible sa gahum sa Dios diin bisan anaa ka na sa baba sa kamatayon maluwas ka gayud kong ngatugyan ka sa hingpit sa imong kinabuhi kaniya.

Miingon ang balaang kasulatan nga Bulahan ang Tawo nga nagasunod sa Dios ug nagatugyan sa hingpit sa iyang kinabuhi kay mahatagan ug hataas nga kinabuhi, apan kadtong nagasunod sa Dios ug nagdumili sa pagtugyan sa iyang kinabuhi sa hingpit basin ug kawad-an niini.

Nagpasabot lamang kini sa ti-unay nga kabubut-on sa Dios Amahan diin ang mga tinawag ug pinili niya nga katawhan iyang kanunay gibantayan sa matag-adlaw. Ginaingon usab nga ang pinili niyang katawhan., makasinati sa mga paglutos ug mga kasakit sa kinabuhi, aron mahisama sila sa bulawan nga mogilak o magsinaw sa kanunay nga pag-ganggang sa kalayo.

Makapamalandong kita, Unsa o asa man nga parte sa atong lawas nga daw sama sa bulawan nga mogilak ? Matod pa sa Dios Amahan diha sa balaang kasulatan: “ Wala unta akoy mahatagan sa akong gasa kun ang inyo lang tawhanong binuhatan ang akong gitan-aw apan kay ako man usab nakita ang kaputli ug katim-os sa inyong kasingkasing naa gayud akoy mahatagan sa akong mga gasa".

Nagpadayag lang mga igsoon nga ang mosiga ug mogilak mao diay ang atong kasingkasing diha sa mga mata sa Dios tungod sa pagtuman ug pagsunod sa iyang kasugo-an, ug tungod sa kasinaw niini mo-“reflect” sab unya ang panagway sa Dios diha sa atong kasingkasing ug nagpasabot lamang nga aduna kay dakong luna didto sa ganghaan sa gingharian sa Dios kay nakatuman ka man sa iyang kasugo-an .




Wednesday, January 23, 2008

Si Felipe Ug Ang Opisyal Nga Ehiptohanon ( Buhat 8: 26~40)


26 Apan usa ka manolunda sa Ginoo miingon kang Felipe, "Tindog ug umadto ka sa habagatan, sa dalan nga gikan sa Jerusalem padulong sa Gaza." Kini diha sa awaaw. 27Ug si Felipe mitindog ug miadto. Ug tan-awa, usa ka Etiopiahanon nga eunoco ug alagad ni Candace, ang rayna sa mga Etiopiahanon, nga maoy gitugyanan sa tanang bahandi niini, miadto sa Jerusalem sa pagsimba didto, 28ug karon nagpauli na siya nga naglingkod sa iyang kalisa ug nagbasa sa basahon sa propeta nga si Isaias.

29Ug ang Espiritu miingon kang Felipe, "Duol ug kumuyog ka nianang kalisa." 30Ug si Felipe midalagan ngadto kaniya, ug iyang nadungog siya nga nagbasa sa basahon sa propeta nga si Isaias, ug siya iyang gipangutana nga nag-ingon, "Nakasabut ka ba sa imong gibasa?" 31Ug siya mitubag, "Unsaon ko man pagpakasabut, gawas kon adunay magatudlo kanako?" Ug iyang gihangyo si Felipe sa pagsakay ug sa paglingkod tupad kaniya.

32Ug ang bahin sa kasulatan nga iyang gibasa mao kini: Maingon nga dili lamang magatingog ang karnero nga pagadad-on sa ihawan o ang nating karnero sa atubangan sa iyang mag-aalot, maingon man siya, sa iyang baba wala magbuka. 33Sa pagpahiubos kaniya, sa katarungan gihikawan siya. Ni kinsa pa man pagaasoyon ang iyang kaliwatan? Kay ang iyang kinabuhi gikuha na man gikan sa yuta." 34Ug ang eunoco miingon kang Felipe, "Suginli ako, kinsa may ipasabut niini sa propeta, ang iya bang kaugalingon o ang lain bang tawo?"

35Ug si Felipe mibungat sa iyang baba, ug ang Maayong Balita mahitungod kang Jesus iyang giwali kaniya nga diha magsugod sa maong bahin sa kasulatan. 36Ug sa nagpadayon sila sa pagpanaw nahiabut silag tubig, ug ang eunoco miingon, "Tan-awa, anaay tubig! Unsa pa may makaulang sa akong pagpabautismo?" 37Ug si Felipe miingon, "Kon ikaw nagatoo uban sa tibuok mong kasingkasing, mahimo." Ug siya mitubag, "Ako nagatoo nga si Jesu-Cristo mao ang Anak sa Dios."

38Ug misugo siya sa pagpahunong sa kalisa ug silang duha, si Felipe ug ang eunoco, nanaug ngadto sa tubig ug iyang gibautismohan siya. 39Ug sa nakahaw-as na sila gikan sa tubig, si Felipe gisakgaw sa Espiritu sa Ginoo; ug ang eunoco wala na makakita kaniya, ug sa iyang panaw mipadayon siya nga nagmalipayon. 40Apan si Felipe hingkaplagan didto sa Asdod, ug sa iyang paghiagi didto, ang Maayong Balita iyang giwali sa tanang kalungsuran hangtud sa iyang paghiabut sa Cesarea.


PAGPAAMBIT SA MENSAHE:

Ang maong mensahe naghisgot ug pagtulon-an bahin sa pagsangyaw sa maayong balita, diin walay gipili nga dapit o adlaw aron atong ikapadayag sa ubang tawo ang kaluwasan ngadto sa kinabuhing dayon pinaagi sa pagsunod sa pagtulon-an nga gibilin ni Jesu-Cristo.

Si Felipe gisugo sa Espirito Santo sa pagsangyaw ug pagtudlo niadtong Opisyal nga Ehiptohanon aron makasabot sa mga pasumbingay nga mga pulong diha sa mga balasahon ni Propeta Isaias. Ang maong opisyal mitoo sa maayong balita ug nagpabunyag kini mismo diha sa linaw nga ilang nalabyan nga dinoyugan ni Felipe.

Bulahan ang maong opisyal kay wala niya duha-duha-i ang pagtawag sa Dios kaniya diin iyang gidawat si Jesu-Cristo sa kinasingkasing gayud. Diha sa balaang kasulatan nagpadayag ang grabe nga mga paglutos ug pagpasakit sa mga sumosunod ni Jesu-Cristo diin pipila lamang ang nahitala susama niining pagtulon-an nga gihisgutan.

Ang lugar ni Jesu-Cristo niadtong panahuna dili makadawat sa kristiyanismong pagtulon-an, diin ang mga kadagko-an sa mga pariseo ug ang ilang gobyerno nagkahiusa sa mga pagdakop o paglutos sa mga bag-ong kristiyanos. Ang mga Judio niadtong panahuna ug bisan gani karon nagatoo lamang sa Dios Amahan o Judaism nga pagtulon-an ug gitawag nila ang Dios Amahan ug Yahweeh.

Ginaingon diha sa estatistika nga ang Jerusalem diin maoy sentro sa pagtulon-an ni Jesu-Cristo kaniadto, dos porsiyento na lamang karon ang mga kristiyanos didtong dapita, diin ang kadaghanan sa mga molupyo didto, Muslim ug Judaism na nga pagtulon-an. Dinhi sa Asia kita lamang dinhi sa Pilipinas ang pinakadaghan nga katawhan nga nagatoo kang Jesu-Cristo nga anak sa Dios apan naglangkob usab kini ug lain-lain nga relihiyon.

Ang pagtulon-an ni Jesu Cristo nasangyaw na sa upat ka sook ning kalibotan apan daghan pausab ang mga dapit nga wala mataaki sa mensahe sa maayong balita. Daghan ang mga apostoles o ministro sa pagtulon-an niining panahun karon diin sila usab nagpasibantog sa ilang gibarogan nga relihiyon nga maoy makaluwas apan pipila laman kanila ang nagsilbi sa tiunay nga tumong sa diwa sa kristiyanismo nga pagtulon-an. Ang kadaghanan gihimo na lamang negosyo ang ilang pagtulom-an o simbahan diin ginaingon sa nga tawhanon nga ekonomista nga tulo lang ka negosyo ang nagmalamboon dinhi sa kalibutan, una gubat, ikaduha politika, ikatulo simbahan,

Tuesday, January 22, 2008

Ang Dato (Lucas 18:18~29)



18 Ug kaniya nangutana ang usa ka punoan nga nag-ingon, "Maayong Magtutudlo, unsa bay buhaton ko aron makapanunod ako sa kinabuhing dayon?" 19Si Jesus mitubag kaniya, "Nganong giingnan mo man ako nga maayo? Walay bisan usa nga maayo gawas sa Dios lamang. 20Ikaw nahibalo sa mga sugo: `Ayaw pagpanapaw, Ayaw pagbuno, Ayaw pagpangawat, Ayaw pagbakak sa imong pagsaksi, Tumahod ka sa imong amahan ug inahan.`

" 21Ug siya miingon, "Kanang tanan ako nang ginabantayan sukad pa sa akong pagkabatan-on." 22Ug sa pagkadungog niini ni Jesus, siya miingon kaniya, "Usa pa ka butang ang imong kulang. Ibaligya ang tanan mong kab-tangan ug ang halin ipanghatag sa mga kabus, ug makabaton kag bahandi didto sa langit; ug unya umanhi ka ug sumunod kanako."

23Apan sa iyang pagkadungog niini, siya nasubo sa hilabihan gayud kay siya dato man ugod kaayo. 24Ug si Jesus, sa nagtan-aw siya kaniya, miingon, "Pagkalisud gayud sa mga adunay mga bahandi ang pagsulod ngadto sa gingharian sa Dios! 25Kay masayon pa sa kamelyo paglusot sa mata sa dagum kay sa usa ka dato pagsulod sa gingharian sa Dios."

26Ug sila nga nakadungog niini nangutana, "Nan, kinsa man diay ang arang maluwas?" 27Apan siya mitubag nga nag-ingon, "Ang sa tawo dili mahimo, sa Dios mahimo." 28Ug si Pedro miingon, "Tan-awa, amo nang gibiyaan ang among mga puloy-anan ug nanagsunod kami kanimo."

29Si Jesus miingon kanila, "Sa pagkatinuod, ako magaingon kaninyo, nga walay tawo nga nagbiyag puloy-anan o asawa o mga igsoon o mga ginikanan o mga anak, tungod sa gingharian sa Dios, 30nga dili niining panahona karon makadawat sa pilopiloon ka labaw pa niini, ug unya sa kapanahonan nga umalabut, sa kinabu-hing dayon."

PAGPAAAMBIT SA MENSAHE:

Ang mensahe nagpasabot sa pagbiya sa tawhanon nga bahandi ug kinaiya ug isul-ob nato ang hiyas sa espirito santo nga maoy gibarugan ni Jesu Cristo, diin iyang gisangyaw ang kamatuoran ug himaya sa Dios pinaagi sa giya sa Espirito Santo ug maoy ipahari sa iyang mga sumosunod ang tinuoray nga diwa sa kristiyanismo nga mao ang pagpakigsandurot sa atong isig-kaingon ug batonan nato ang pagpaubos, pagpasensya ug kanunay nga pag-ampo sa Dios Amahan.

And Dato wala makasabot sa maong mensahe diin “literal” niyang gisabot ang pagbaligya sa iyang mga kabtangan ug mosunod sa pagtulon-an ni Jesu Cristo, atong palundongon nga ang tanang butang nga materyal dinhi sa kalibutan iya sa Dios ug walay ato niini bisan gamay nga sa ato pa, sa pagbaton nato niining mga butanga aduna kini panalangin o pagtugot gikan sa Dios.

Kinahanglan lang nga masentro nato ang atong mag espirituwal nga katuyoan o misyon ngadto sa Dios diin biyaan nato o ipakawalay bili ang mga tawhanon nga kinaiya ug dili magpaulipon sa bahandi, ug sa kanunay kita moabag o motabang sa mga kaigsoonan nato nga nanginahanglan sa materyal o espirituwal nga mga kinahanglon ubanan sa pag-ampo ngado sa Dios. Nagkuholugan kini sa paghatag sa tanang pagtagad o pag-alagad sa Dios labaw sa tanang butang dinhi sa kalibutan


Nagaingon ang balaang kasulatan nga ang pagkadato o pagkakabos sa tawo kabubut-on kini sa Dios, diin kun pinili o tinawag kita niya nga binuhat apan makita niya nga mahimulag ka sa Dios o masalaag ka sa dalan sa katarong tungod kay mahimo namang unya ang bahandi mao na ang imong agalon o prioridad nan dili ka gyud tugotan sa Dios nga ma-dato. Apan kon bahandianon ka ug mapalabilabihon ka usa sa imong isigkatawo basin sa isa lang ka pamilok mawala ang imong bahandi isip pahimatngon kanimo.

Bulahan ang mga tawo nga giisip nga bahandi ang espiritwal nga gasa nga gihatag kanila sa Dios diin mao kini ang ilang giya ngadto sa dalan sa katarong paingon sa himaya sa langit ug bulahan usab ang mga katawhan nga kanunay nga naga-ampo ug nagpasidungog sa Dios luyo sa mga paglutos o kasakit nga nasinati dinhi sa walog sa mga buhi apan mas bulahan ang mga tawo nga maoy gipadala sa Dios isip-tubag sa atong mga pag-ampo.













Monday, January 21, 2008

Ang Dato Ug Si Lazaro (Lucas 16:19-31)


19 "Dihay usa ka tawong dato nga nagsapot ug purpora ug lino nga manipis, ug nagkaon sa makabuhong nga pagkaon matag-adlaw. 20Ug sa gowa sa iyang pultahan gipalubog ang usa ka tawong kabus nga ginganlan si Lazaro, nga nalukop sa kabahong. 21Ug gipangandoy ni Lazaro nga mabusog unta siya sa mga mumho nga nangatagak gikan sa lamisa sa tawong dato; ug labut pa, ang mga iro nanagpanuol kaniya ug ilang gitilapan ang iyang kabahong.

22Ug ang tawong kabus namatay ug gidala sa mga manolunda ngadto sa sabakan ni Abraham. Unya ang tawong dato namatay usab ug gilubong. 23Ug didto sa Hades, sa nag-antus siya sa mga kasakit, giyahat niya ang iyang mga mata ug iyang nakita si Abraham didto sa halayo ug si Lazaro diha sa iyang sabakan. 24Ug siya misinggit nga nag-ingon, `Amahan kong Abraham, kaloy-i intawon ako, ug sugoa si Lazaro sa pagtuslob sa tumoy sa iyang tudlo diha sa tubig aron ipabugnaw sa akong dila; kay ania ako sa kasakit dinhi niining nagadilaab nga kalayo.

` 25Apan si Abraham mitubag kaniya, `Anak, hinumdumi nga sa buhi ka pa nakadawat ikaw sa mga maayo mong butang, ug si Lazaro usab nakadawat sa dili mga maayong butang; apan siya ginalipay karon diri, samtang anaa ikaw diha sa kasakit. 26Ug labut pa niining tanan, sa taliwala kanamo ug kaninyo gikapahimutang ang usa ka dakung bung-aw aron nga sila nga buot molabang gikan diri nganha kaninyo dili arang makahimo; ug nga walay bisan kinsa nga makalabang gikan diha ngari kanamo.` 27Ug ang dato miingon, `Sa ingon niana, mangamuyo ako kanimo, amahan, nga imo siyang paadtoon sa balay sa akong amahan,

28kay aduna akoy lima ka mga igsoong lalaki, aron iyang pasidan-an sila, basi usab unyag mahianhi sila niining dapita sa kasakit.` 29Apan si Abraham mitubag kaniya, `Atua na kanila si Moises ug ang mga profeta; papatalinghuga sila kanila.` 30Ug siya miingon, `Dili kana, amahan kong Abraham; apan kon kanila adunay moadto nga gikan sa mga nangamatay, sila managhinulsol gayud.` 31Si Abaraham mitubag kaniya, `Kon sila dili man manimati kang Moises ug sa mga propeta, nan, dili sila malukmay bisan pa kon adunay mabanhaw gikan sa mga patay.`"


PAGPAAMBIT SA MENSAHE:

Ang maong mensahe nagpasabot sa katuyoan sa kristohanong pagtulon-an nga mao ang pag-unong ug pagpakigdait sa atong mga igsoon sa walay pagtan-aw sa estados sa ilang kinabuhi diin atong puy-an ang kinabuhi nga iya sa Dios espirito Santo nga tugob sa pag-ampo, pagpasensya ug pagpailob ug atong ipakawalay bili ang tawhanon nga bahandi kay kini mahabilin man dinhi sa kalibutan ug ipatigbabaw ang bahandi nga iya sa Dios diin mao kini ang atong giya ngadto sa langitnong himaya ug kinabuhi nga walay katapusan .

Ang maong Dato wala makig-angay-angay niadtong Lazaro nga makililimos diin nagpasabot diha sa balaang kasulatan nga ang Dato hupong sa tawhanon nga bahandi ug pagkaon apan si Lazaro dili halos makakaon matag-adlaw apan hupong sa espirituhanon nga grasya diin siya gihimaya didto sa kalangitan sa dihang namatay siya apan ang Dato nga mata-pobre kaayo sa iyang pagkamatay didto nagtingkagol sa maiinit nga impiyerno.

Kini nagpasabot ug nagpamatuod lamang sa saad sa Dios sa iyang mga pinili nga katawhan nga nagpakaubos sa ilang kaugalingon dinhi sa yuta ug nagtuman sa kabubut-on sa Dios diin ipataas sila didto sa gingharian sa Dios apan kadtong mapahitas-on dinhi sa yuta ipakaubos usab sila didto sa langit ug wala silay luna diha sa Gingharian sa Dios..

Matod pa sa Dios diha sa balaang kasulatan nga kon ang imong bahandi ania lang sa yuta nan dinhi ka ra usab kutob apan kun ang imong bahandi iya sa espiritu santo nan haluag ang luna sa imong hawan didto sa ganghaan sa gingharian sa Dios. Matod pa mensahe diha sa 1 Corintho 3:16 , Ang lawas sa tawo maoy templo sa Dios Espirito Santo, ug ang magalaglag sa templo sa Dios nga mao ang atong lawas iya sab nga laglagon. Nagpasabot lamang nga kun imong gidaugdaug o gipasipad-an ang imong isigkatawo nan imo usab nga gipasipad-an ang templo sa Dios ug nga manubag ka sa Dios Amahan sa imong binuhatan ug kasal-anan diin ginaingon nga ang silot sa sala mao ang kamatayon.

Matod pa usab sa mga maalamon sama kang Ms. Indhira Gandhi , bantugan nga presidente sa India kaniadto: Ang imong kaugalingon nga butang o gamit nga wala na nimo gamita ug imo nalang gitipigan diha sa imong kaugalingon nan sama ra sa gihikaw nimo kini sa mga tawo nga nagkinahanglan niini ug sama ra usab nga imo kining gikawat sa mga tawo nga nagkinahanglan.

Miingon usab si General Douglas Mc Arthur, bantugan nga heneral panahon sa ikaduhang gubat sa kalibotan, sa inengles nga pinulongan: You have No Right To Die If You Have Not Done Good To Humanity, nga sa ato pa Wala Kay Katungod Nga Mamatay Kun Wala Kay Nabuhat Nga Maayo Sa Imong Isigkatawo, nga sa ato inigkamatay nimo wala kay luna didto sa gingharian langit kay wala ka man makasunod sa kabubot-on sa Dios.

Matod pa usab ni anhing Senador Benigno “Ninoy” Aquino Jr. sa iyang mga "bible passage": Its Better to Die in a Meaningful Death than to Live in a Meaningless Life. Sa inato nga pagka istorya nagkanayun kini: “Mas maayo pa nga mamatay ug mahimong pagtulon-an ang iyang kamatayon kay sa magpakabuhi apan daw sama ka lamang sa usa ka kahoy nga nagtubo apan dili gapamunga” Unsa man diay tuod ang atong angay buhaton sa kahoy nga gatubo apan dili gapamunga mga igsoon?

Holy Spirit of Blessed Mother of Mercy

Easter Greetings Of Holy Spirit of Sr. Santo NiƱo