Ang Dios Gugma

1 JUAN 4 : 7 ~ 21

7 Mga hinigugma, maghigugmaay kita ang usa sa usa; kay ang gugma iya sa Dios, ug siya nga nagahigugma gipanganak sa Dios ug nakaila sa Dios. 8Siya nga wala magahigugma wala makaila sa Dios; kay ang Dios gugma man. 9Ang gugma sa Dios gipadayag dinhi kanato pinaagi niini: gipadala sa Dios ang iyang bugtong nga Anak nganhi sa kalibutan, aron kita mabuhi pinaagi kaniya. 10Niini ania ang gugma, dili nga kita nahigugma sa Dios kondili nga siya mao ang nahigugma kanato ug nagpadala sa iyang Anak nga haladpasighiuli alang sa atong mga sala.

11Mga hinigugma, kay ang Dios nahigugma man kanato sa ingon niana, nan, kinahanglan kita usab maghigugmaay ang usa sa usa. 12Wala pa gayuy tawo nga nakakita sa Dios; kon kita maghigugmaay ang usa sa usa, ang Dios magapabilin kanato, ug ang iyang gugma nahingpit dinhi kanato. 13Ug mahibaloan nato nga kita nagapabilin diha kaniya ug siya dinhi kanato pinaagi niini: tungod kay kita iya mang gihatagan sa iyang kaugalingong Espiritu.

14 Ug kita nakakita ug magapanghimatuod nga ang Amahan mao ang nagpadala sa iyang Anak ingon nga Manluluwas alang sa kalibutan. 15Bisan kinsa nga magasugid nga si Jesus mao ang Anak sa Dios, ang Dios magapabilin kaniya, ug siya magapabilin sa Dios. 16Tungod niini kita nahibalo ug nagatoo sa gugma nga ginabatonan sa Dios alang kanato. Ang Dios gugma, ug ang nagapabilin sa gugma, nagapabilin sa Dios; ug ang Dios nagapabilin diha kaniya.

17 Niini gihingpit ang gugma dinhi kanato, aron kita may pagsalig unya sa adlaw sa hukom, sanglit maingon nga mao siya mao man usab kita dinhi sa kalibutan. 18Ang kahadlok wala diha sa gugma, hinonoa ang hingpit nga gugma nagahingilin sa kahadlok. Kay ang kahadlok may kalabutan sa silot, ug siya nga may kahadlok wala pa mahingpit diha sa gugma. 19Kita nagahigugma, tungod kay siya mao man ang unang nahigugma kanato.

20Kon adunay magaingon, "Ako nagahigugma sa Dios," apan nagadumot sa iyang igsoon, nan, kini siya bakakon; kay siya nga wala maghigugma sa iyang igsoon nga iya rang makita, dili gayud makahimo sa paghigugma sa Dios nga wala niya makita. 21Ug gikan kaniya nabatonan ta kining maong sugo: nga ang nagahigugma sa Dios kinahanglan magahigugma sa iyang igsoon usab.

PAGPAAMBIT SA MENSAHE:

Ang maong ebanghelyo nagpasabot sa dakong Gugma sa Dios kanatong tanan nga makasasala niyang katawhan, diin tungod sa naghingapin niya nga gugma kanato iyang gipakanaog ang iyang anak sa yuta aron kini mosagol sa tawo ug magasangyaw ug magtudlo sa iyang mga kabubut-on ug iyang mga kasugoan.

Apan nahimong pagsulay usab kini niadtong mga mabo-ot ug mga maalam nga nga mga katawhan sa Dios niadtong panahuna tungod kay wala pa may dagway ang Ginoo diha sa ilang huna-huna ug nagato-o sila isip anaa sa mga sa kinatas-ang puwesto dinhi sa yuta sama sa mga tag-as nga pariseo ug mga opisyal sa gobyerno, sila usab ang himayaon sa Dios didto sa iyang ginghari-an.

Apan lahi ang pamaagi sa Dios tungod kay kun hataas ka didto sa iyang gingharian nan puy-an mo ang pinakaubos nga kinabuhi dinhi sa yuta diin anaa ang mga pagyubit, pagpaubos ug pagpasakit, diin mao kini ang gitudlo ni Jesu Cristo diha sa iyang pagpakabuhi dinhi sa kalibutan.

Diin hataas ang pasensya ni Jesus ug halu-ag usab ang iyang kasing-kasing sa pagdawat kanatong tanan bisan diha sa mga pagpanlutos nga iyang nasinati. Usa kini ka panag-ingnan nga ang lider diay sa usa ka iglisea dili kay atong gihangad diin hataas ang garbo ug dungog. Iyang gitudlo ang pagkalider diin siya nahimong sulogoon sa mga tawo nga iyang gitudlo-an, diin wala niya gamita ang iyang pagka Dios ug hinunu-a nagpakapobre siya sa mata sa tanang tawo. Usa kini ka pagtulon-an diin dili tawo ang makahimo niini ug kini iyang gibuhat aron pagsukod ug pagtuki sa gugma sa iyang sumusunod ug pagtudlo sa hiyas nga langitnon.

Diin iyang gitudlo ang gugma ug pakigdait sa tanang katawhan diin mao kini ang bilihong sugo sa iyang Amahan ang paghigugmaay sa usag-usa diin matod pa sa ebanghelyo, Bakakon ka kun moingon ka nga nahigugma ka sa Dios apan nagdumot ka sa imong isigkatawo, kay matod pa sa maong balaang kasulatan unsaon mo man paghigugma sa wa mo makita diin ang imong silingan nga pirmi nimog kakita imo mang gidumtan.

Mao kini ginaingon sa enenglis nga “unconditional love”, ug mao nga klase sa gugma nga iyang gusto ipaabot sa Dios diha sa iyang mga katawhan diin nagpasabot kini sa panagdait ug pagbinati-ay nga walay kapin nga kabubut-on ug sa walay pagpaabot sa balos ug aron usab himayaon ug kahimut-an ka sa Dios didto sa langit , diin nagaingon ang balaang kasulatan, “Dalayegon ka nga pagkatawo kun ang Dios nagadayeg kanimo”.

Ang Paglakaw Paingon Sa Emmaus

13 Sa maong adlaw duha kanila nanaglakaw paingon sa usa ka balangay nga ginganlag Emaus, nga mga napulog usa ka kilometro gikan sa Jerusalem, 14ug nagsultihanay sila mahitungod niining tanang mga butang nga nahitabo. 15Ug samtang nagsultihanay ug nagpangutan-anay sila, si Jesus miduol ug mikuyog kanila. 16Apan ang ilang mga mata nahipugngan aron dili sila makaila kaniya. 17Ug siya miingon kanila, "Unsa ba kining inyong gisultihan samtang nanaglakaw kamo?" Ug sila mihunong, sa panagway nga masulob-on.

18Ug ang usa kanila, nga ginganlan si Cleopas, mitubag kaniya, "Ikaw ra ba ang bugtong dumuloong sa Jerusalem nga wala mahibalo sa mga butang nga nanghitabo didto sulod niining mga adlawa?" 19Siya nangutana kanila, "Unsa bang mga butanga?" Ug sila miingon kaniya, "Mahitungod ba kang Jesus nga Nazaretnon, nga usa ka profeta nga gamhanan sa buhat ug sa pulong sa atubangan sa Dios ug sa tanang mga tawo;

20siya gitugyan sa among mga sacerdote nga punoan ug sa among mga pangulo aron pagahukman sa silot sa kamatayon ug ilansang sa krus. 21Ug nanaglaum unta kadto kami nga siya mao gayud ang magtubos sa Israel. Oo, ug labut pa niining tanan, ikatulo na ka adlaw karon sukad sa pagkahitabo niining mga butanga. 22Ug labut pa, dihay mga babaye nga among mga kauban nga nakapatingala kanamo. Didto sila sa lubnganan sayo ganinang buntag,

23ug wala nila hikit-i didto ang iyang lawas; ug sila mibalik nga nanagsugilon nga nakakita kono silag panan-awon nga may mga manolunda nga nagsugilon kanila nga siya buhi. 24Ug may mga kauban namo nga nangadto sa lubnganan, ug didto ilang nakita kini sumala sa gisugilon sa mga babaye; apan siya wala nila makita." 25Ug si Jesus miingon kanila, "O mga tawong boangboang, kinsang mga kasingkasing hinayan nga motoo sa tanang gikasulti sa mga profeta!

PAGPAAMBIT SA MENSAHE:

Ang maong mensahe nagpasabot sa mga katumanan sa mga panagna sa mga propeta sa unang panahun diin hinay-hinay na nga gipadayag ang maong mga katumanan. Bisan sa pagktibulaag sa mga apostoles ni Jesu Cristo apan sa kanunay sila nagbalaan ug nagpasibantog sa ilang pagtulon-an nga nakaplagan. Bisan wala na sila masayod sa ilang pagbuhaton sa dihang nawala ang lawas ni Jesu Cristo diin nagkahugpong sila sa pagpangita niini.

Ingon niana ang tawo samtang anaa sa pagsulay diin mahuyang siya ug maapektuhan ang iyang paghuna-huna ingon man wala siya sa insakto nga pensamiento. Ang kamatayon ni Jesu Cristo niadtong panahuna maoy wala damha sa iyang mga sumosunod diin nalimtan nila ang nahisulat ug ang mga panagna.

Apan nagpadayag si Jesu Cristo ug nagpakita sa iyang mga tinun-an diin nakigsalo pa siya kanila sa pagkaon, ug nagmatuod lamang kini nga ang tawhanon nga lawas ni Jesus mao gayud ang nabanhaw ug nakig-uban kanila sa pagpanga-on diin nagpasabot lamang kini sa dili matugkad nga gahum sa Dios. Ug nagpamatuod lamang usab nga si Jesu Cristo ang Dios nga matuod ug bugtong anak sa Amahang Dios diin ginaingon nga walay moadto sa Amahan kung dili moagi kang Jesu Cristo, tungod kay si Jesu Cristo ang sinugdanan ug ang kataposan.

Ang Pagdili Ug Ang Pagtugot

MATEO 18: 18 ~20

18Sa pagkatinuod, magaingon ako kaninyo, nga bisan unsay inyong pagabugkoson dinhi sa yuta, didto sa langit pagailhon kini nga binugkos; ug bisan unsay inyong pagaluagan dinhi sa yuta, didto sa langit pagailhon kini nga linuagan. 19Usab sultihan ko pa kamo, nga kon ang duha kaninyo magakauyon dinhi sa yuta mahitungod sa bisan unsa nga ilang pangayoon, alang kanila pagabuhaton kini sa akong Amahan nga anaa sa langit. 20Kay diin gani ang duha kon tulo magakatigum sa akong ngalan, anaa ako sa ilang taliwala."

PAGPAAMBIT SA MENSAHE:

Ang maong mensahe nagahisgot sa mga katuyuan sa Dos Amahan diin matod pa sa ebanghelyo nga nga ang gidili dinhi sa yuta gidili usab sa langit, ug ang gitugot dinhi sa yuta gitugot didto sa langit. Diin nagpasabot usab kini sa pagyukbo sa Dios sa balaod sa yuta o pagyukbo sa panggobyerno nga tawhanon, diin gipanalanginan usab sa Dios ang kadaghanan sa mga balaod nga tawhanon.

Kining tanan balaod sa yuta nagsumikad usab kini sa pagtulon-an sa Dios nga gisangyaw ni Moises sa unang panahun diin gihatagan siya ug napulo ka sugo sa Dios nga gisulat sa tinabliya nga bato diin gihatag sa Dios kaniya didto sa bukiran sa Senai. Kadaghanan sa maong mga balaod sa yuta karong panahuna gipanday ubos sa panalangin sa Dios pinaagi sa mga pagtulon-an nga ilang gibarugan.

Diin mas daku ug impluensa ang pagpanalangin ug pagsimba ngadto sa Dios aron ang sa unsa man nga atong pangayoon ug iyang ihatag kun kita magkahugpong sa pagpangadye aron sa pagpangayo niini. Sumala sa ebanghelyo nga nahisgotan diin anaa si Jesu Cristo magpatunga ug maminaw sa atong pag-ampo ug pangaliya, nga diin mas dako ug bentaha ang hugpong nga mga pangaliyupo kay nahasubay man kini sa iyang kabubut-on ug usab mas lig-on ang espiritu diha sa atong kaugalingon ug dili kini dag-on sa atong dautan.

Gitawag Ni Jesus Si Levi

LUCAS 5 :27~32

27 Tapus niini siya milakaw ug iyang nakita ang usa ka maniningil sa buhis, nga ginganlan si Levi, nga naglingkod didto sa buhisanan; ug kaniya miingon siya, "Sumunod ka kanako." 28Ug iyang gibiyaan ang tanan, ug mitindog siya ug mikuyog kaniya. 29Ug alang kang Jesus si Levi naghimog dakung kombira sa iyang balay; ug didtoy dakung pundok sa mga maniningil sa buhis ug uban pang mga tawo, nga nanaglingkod tambong sa kan-anan uban kanila.

30Ug ang mga Fariseo ug ang ilang mga escriba nanagbagotbot batok sa iyang mga tinun-an, nanag-ingon, "Nganong makigsalo man kamog pangaon ug panginom uban sa mga maniningil sa buhis ug sa mga makasasala?" 31Ug si Jesus sa mingtubag mingon kanila: Ang mga maayog lawas wala magkinahanglan sa mananambal; kondili ang mga masakiton. 32Wala ako maonhi aron sa pagtawag sa mga matarung, kondili sa mga makasasala sa paghinulsol.

PAGPAAMBIT SA MENSAHE:

Ang maong ebanghelyo nagpasabot sa katoyu-an ni Jesu Cristo dinhi sa yuta nga diin mianhi siya alang ug tungod sa mga tawo nga makasasala. Ug diin kini nagpasabot lamang nga kun bug-os ug tinud-anay ang pagpangayo ug pasaylo nianang maong tawo nan walay katarungan nga dili siya mapasaylo sa Dios. susama nianang maong ebanghelyo nga ginganlan ug Levi diin nagapasidungog sa Dios pinaagi sa paghatag kaniya ug kumbira, diin daghan usab ang mga kolektor sa buhis nga nanambong sa maong kumbira.

Angay natong mapanaminan nga tanan kita makasasala dinhi sa kalibutan, apan diha sa tinud-anay nimo nga pagbasol ug paghinulsol sa imong kasal-anan panalanginan ka sa Dios diin makita gayud kini pinaagi sa imong tim-os ug putli nga kasing-kasing. Dili diay angay nga hukman nato ang atong isigkatawo nga makasasala kay wa man kita masayod sa sulod sa iyang kasing-kasing. Mas maayo diay nga ato lang ihangad sa langit ang sa unsa may atong nakita sa iya kay ang Dios lamang ang mahibalo nga mopahimatngon niini.

Ginaingon diha sa balaang kasulatan nga ang pagpakasala tawhanon ug ang pagpasaylo langitnon, ug diin mahimo nimong pasayloon ang imong isigkatawo sa makapito-an ka pito kun kasetenta (70) beses nimo siya nga andaman sa imong pasaylo. Kay wala kita katungod sa pagsilot o paghukom sa atong isigkatawo diin ang maong paghukom iya sa Dios inig-abot na sa anak sa tawo.

Ginaingon diha sa balaang kasulatan nga ang maayong binuhatan dili maoy makapahiadto kanimo sa langit, diin ang kaluwasan ug kahimayaan sa langit nga gisaad ni Jesu Cristo dili kini premyo o ganti tungod sa imong maayong buhat kundili gasa kini sa Dios ngadto iyang katawhan nga nagatuman sa iyang kabubut-on aron walay bisan kinsa nga makapasigarbo diha sa atubangan sa Dios nga siya naluwas pinaagi sa iyang maayong buhat

Ang Tawo Nga Kuyos Ang Kamot

LUCAS 6: 6 ~11

6Ug sa lain na usab nga adlaw nga igpapahulay, sa paghisulod niya sa sinagoga ug nagpanudlo siya, didtoy usa ka tawo kinsang kamot nga too nakuyos. 7Ug ang mga escriba ug mga Fariseo naniid kang Jesus kon mang-ayo ba siyag sakit sulod sa adlaw nga igpapahulay, aron makakita silag ikasumbong batok kaniya. 8Apan siya nasayud sa ilang mga hunahuna, ug siya miingon sa tawo nga may kamot nga nakuyos, "Umari ka ug tindog diri." Ug siya mibangon ug mitindog didto.

9Ug si Jesus miingon kanila, "Mangutana ako kaninyo, uyon ba sa kasugoan ang pagbuhat sa makaayo o anga pagbuhat sa makadaut sulod sa adlaw nga igpapahulay, ang pagluwas ug kinabuhi o ang paglaglag niini?" 10Ug miliraw siya sa pagsud-ong kanilang tanan, ug unya miingon siya sa tawo, "Ituy-od ang imong kamot." Iyang gihimo kini, ug ang iyang kamot nahiulian. 11Apan sila napuno sa kapungot ug ilang gipanagsabutan kon unsay ilang pagabuhaton kang Jesus.

PAGPAAMBIT SA MENSAHE:

Ang maong ebanghelyo naghisgot sa pagtrabaho o pagtuman sa kasugo-an sa Dios diha sa adlawng igpapahulay. Sa panahon sa balaod sa Dios Amahan nga gisangyaw ni Moises niadtong panahuna, sala ang pagtrabaho sa adlaw nga igpapahulay, diin adunay silot ang makalapas niini kay usa kini ka paglapas sa kabubut-on sa Dios Amahan.

:

Apan nagpasabot si Jesu Cristo nga bililhon ang kinabuhi sa matag tawo nga imong luwason diha sa maong adlaw nga igpapahulay . Susama sa pagtambal ni si Jesus sa maong masakiton nga kuyos ug kamot diin iyang gipakita ang milagro atubangan sa mga paresyohanon ug sa mga magtotoo nga diha sa maong sinagoga. Iyang gipamatuod nga bililhon kita diha sa mata sa Dios, maoy ua ka katuyu-an ni Jesus ang pagluwas gikan sa mga kasal-anan

:
Gipakita ni Jesu kristo nga sayop ang pagsabot sa mga katawhan labi niadtong mga maboot nga pariseo diin mas importante ug mahinungdanon ang kinabuhi sa matag tawo nga imong luwason kay sa maong kasugo-an sa pagpahulay. Kay ang Dios nagahatag ug kalinaw sa tanan nga iyang katawhan ug diin iyang ihatag ang bisan unsa nga imong gipangayo kun kini alang sa kaayohan, ug diin bulahan ang tawo nga maoy gigamit sa Dios agig tubag sa atong mga pag-ampo.

Mga Pangulo Sa Iglisea

1 TIMOTEO 3: 1 ~ 7

1 Kasaligan kini nga pulong: Kon adunay magatinguha sa katungdanan sa pagkaobispo, ang iyang ginatinguha maoy usa ka bulohaton nga hamili. 2Ug ang obispo kinahanglan dili badlonganon, ug siya usa ray asawa, mapugnganon sa kaugalingon, mabuot, maugdang, maabiabihon, maayo sa pagpanudlo, 3dili palahubog, dili tigpanukmag, hinonoa malomo, dili palaaway, ug dili mahigugmaon ug salapi.

4Kinahanglan magamaayo ang iyang pagdumala sa iyang kaugalingong panimalay, nga magadumala sa iyang mga anak aron sila magamasinugtanon ug magamatinahuron sa tanang paagi; 5kay kon ang usa ka tawo dili makamao nga magdumala sa iyang kaugalingong panimalay, unsaon man niya sa pagpakatagad sa iglesia sa Dios?

6Kinahanglan nga siya dili bag-o pa lang nakabig, kay tingali unyag moburot siya sa pagpagarbo ug mahulog ngadto sa pagkasinilotan ingon sa yawa; 7labut pa niini, kinahanglan matinamud siya sa mga taga-gawas ingon nga maayog dungog, kay tingali unyag mahulog siya ngadto sa pagkabaladlongon ug sa bitik sa yawa.

PAGPAAMBIT SA MENSAHE:

Ang maong ebanghelyo nagpasabot sa trabaho sa usa ka lider sa pagtulon-an diin maoy una ug prayoridad sa iyang gimbuhaton ang pagdayeg sa Dios sa adlaw nga tanan ug ang pag-aghat sa iyang mga ginsakopan o katawhan sa pagpasunod gayud sa mga proseso sa pagdayeg ug pagsunod sa kabubut-on sa Dios pinasikad as balaang kasulatan. Diin iyang tagaan ug importansya ang mga dumudoong o ang nahiabot diha sa sinagoga nga mga linghod pa sa maong pagtulon-an , nga matagaan gayud sa pagtagad una sa tanan.

Ginaingon diha sa ebanghelyo nga kinahanglan dad-on usab niya ang iyang pamilya ubos sa landong sa espiritu sa Dios diin silang tibook pamilya magpasidungog sa Dios matag adlaw nga tanan. Diin ang lider sa maong pagtulon-an wala magpasabot nga siya hawod na nianang maong grupo kundili sulogoon siya ug magsilbi sa iyang katawhan,

Maoy himoon niyang sumbanan ang kinabuhi ni Jesu Cristo sa pagtukod niining Iglisea sa Kamatuoran sa kanhi-ay diin siya nagpakaubos sa iyang kaugalingon ug nagsilbi sa iyang mga katawhan ug mga sumusunod sa mga maayong pagtulon-an sa kinabuhi, diin siya nagsangyaw sa himaya sa Dios didto sa kalangitan. Ug mao kini ang sumbanan sa usa ka lider nga gipangita ug gikahimut-an sa Dios amahan.

:
Kay matod pa sa balaang kasulatan kun gusto nimo nga mahatagan ug hataas nga katungdanan didto sa langit nan puy-i ang pinakaubos nga pagkinabuhi dinhi sa yuta diin anaa ang mga paglutos, mga kasakit sa kinabuhi,pagbiay-biay ug pas-ana ang imong krus ug sunda si Jesu Cristo, diin bulahan ang mga katawhan nga makaambit sa mga kasakitan ni Jesu Cristo didto sa Krus kay makaambit usab sila sa himaya sa pagkabanhaw didto sa langit.

Ang Kasal Didto Sa Cana

JUAN 2 : 1 ~ 12

1 Ug sa ikatulo ka adlaw may kasal sa Cana sa Galilea, ug didto ang inahan ni Jesus; 2ug si Jesus usab gidapit ngadto sa kasal, uban ang iyang mga tinun-an. 3Ug sa pagkahurot na sa bino, ang inahan ni Jesus miingon kaniya, "Wala na silay bino." 4Ug si Jesus miingon kaniya, "Babaye, unsay imong labut kanako? Ang akong takna wala pa moabut." 5Ug ang iyang inahan miingon sa mga sulogoon, "Unsa ganiy iyang isugo kaninyo, buhata ninyo."

6Ug didtoy nahimutang nga unom ka buok tadyaw nga bato, sumala sa batasan sa mga Judio sa pagpanghugas, nga ang matag-usa niini kasudlan ug kaluhaan o katloan ka galon. 7Ug si Jesus miingon kanila, "Pun-a ninyog tubig ang mga tadyaw." Ug kini ilang gipanagpuno hangtud sa ngabil. 8Ug unya siya miingon kanila, "Pagkabo na kamo niana ug dad-a ngadto sa punoan sa kombira." Ug kini ilang gidala ngadto kaniya.

9Ug sa natilawan sa punoan sa kombira ang tubig nga nahimo nang bino, ug kay wala man siya masayud diin kini gikan (bisan tuod nasayud niini ang mga sulogoon nga nanagkabo sa tubig), ang punoan sa kombira mitawag sa bana 10ug miingon kaniya, "Nabatasan baya sa mga tawo ang pagdalit pag-una sa maayong bino, ug unya sa diha nga ang mga dinapit makainom na pag-ayo, mao pay pagdalit sa minos nga bino; apan ikaw, imo hinoong gitagoan ang maayong bino hangtud karon."

11Kini, ang nahauna sa iyang mga milagro, gibuhat ni Jesus didto sa Cana sa Galilea, ug nagpadayag sa iyang himaya; ug ang iyang mga tinun-an nanagpanoo kaniya. 12 Ug tapus niini siya milugsong ngadto sa Capernaum, uban ang iyang inahan ug ang iyang mga igsoon ug ang iyang mga tinun-an; ug didto mipabilin sila sulod sa pipila lamang ka adlaw.

PAGPAAMBIT SA MENSAHE:

Ang maong ebanghelyo naghisgot sa unang milagro ni Jesu Cristo diin iyang gipakita sa mga katawhan ug ilabi na sa iyang mga sumusunod ang pagbuhat niya sa bino gikan sa tubig diin kini gisulod sa unom (6) ka tadyaw. Dinhi nagsumikad ang seminar diha sa katoliko nga pagtulon-an – diin sa pagpahigayon sa mga kaslonon ug seminar sa dili pa mosulod sa salag sa kaminyoon, ug gitawag kini ug “pre-cana seminar”.

Daghan ang mga milagro nga nahimo ni Jesu Cristo sa dinhi pa siya sa yuta diin kini naga-agad sa Dios Amahan nga maoy nagpadala kaniya dinhi sa yuta. Diin daghan sa mga pagtulon-an nga nagadili sa pag-inom sa bino nga makahubog, kay kini nahasupak sa kabubut-on sa Dios, ug diin nahimo usab nilang sumbanan ang bino sa kasal sa kana nga gibuhat ni Jesu Cristo, ug nga kini dili makahubog kay gikan man sa tubig.

Usa lang kini ka sambingay isip pagtulon-an usab nga diin diha sa mga kumbira o mga kapistahan kinahanglan gayud nga atong ipangaliya ug ipauna sa tanan ang presensya sa Dios diin siyay magpahigayun sa tanan, kay bisan unsa ka gamay sa giandam nga pagkaon o ilimnon sa maong kumbira kun kini nakadawat sa panalangin sa espiritu santo nan kini moigo ug maapud gayud.

:

Usa kini ka pagpasidungog sa Dios nga bisan diha sa taliwala sa kawad-on as usa ka tawo diha sa mga kumbira sa kasal o kapistahan unahon gayud ang Dios sa pagpasalamt ug pangaliya, nga sa ato pa mag-una ang mesa ayha dayun ang lamesa, aron mahimuot ang Dios ug diin dugangan pa niya ang imong grasya sa umaabot nga mga adlaw.

Panabang Alang Sa Iyang Isigka Cristohanon

2 CORINTHO 9: 1~15

1 Karon dili na kinahanglan nga magasulat pa ako kaninyo mahitungod sa mga pag-alagad alang sa mga balaan, 2kay ako nasayud na man sa inyong pagkamaikagon, nga tungod niini ginapasigarbo ko kamo ngadto sa mga tawo sa Macedonia, sa pag-ingon nga ang Acaya andam na sukad pa sa miaging tuig; ug ang inyong kadasig nakapaikag sa kadaghanan kanila. 3Apan ang mga igsoon gipadala ko diha kaninyo aron nga niining butanga ang among pagpasigarbo tungod kaninyo dili masuta nga pasiatab alang diay, aron kamo maandam, sibo sa akong giingon nga kamo andam na,

4basi pa lang may mga taga-Macedonia nga manguban kanako ug unya ilang makita nga kamo dili man diay andam, kami (bisag dili na lang kamo ilabut) maulawan ug daku tungdo sa among pagsalig kaninyo. 5Busa, nakahunahuna ako nga kinahanglan ang mga igsoon akong agdahon sa pag-una kanako pag-anha diha kaninyo ug sa pagpahigayong daan niining hatag nga inyong gisaad aron kini maandam dili ingon nga gipugos pagkuha gikan kaninyo kondili ingon nga inyong kinabobut-ong hatag.

6 Karon timan-i ninyo kini: siya nga nagapugas ug tagidyot magaani ug diriuot, siya nga nagapugas ug dinaghan magaani ug daghan. 7Ang matag-usa magahatag sumala sa pagbuot sa iyang kasingkasing, dili nga magapanuko ni ingon nga pinugos, kay ang Dios nagahigugma sa malipayong maghahatag. 8Ug ang Dios makahimo sa pagtagana kaninyo sa tanang panalangin sa madagayaon gayud, aron kamo magabaton kanunay ug igo sa tanang butang ug magatagana nga madagayaon alang sa tanang maayong buaht. 9Sumala sa nahisulat: Siya nagasabwag, siya nagahatag ngadto sa mga kabus; ang iyang pagkamatarung naga-padayon sa walay katapusan."

10Ang Dios nga mao ang nagahatag s binhi ngadto sa magpupugas ug sa tinapay nga kan-onon magahatag kaninyog binhi ug magapadaghan niini ug magapatubo sa mga bunga sa inyong pagkamatarung. 11Sa tanang butang kamo iyang pagadatoon aron kamo makapakita sa tuman nga pagkamahinatagon; ug ang inyong mga gasa, nga among pagadumalahon, makapahimo sa mga tawo nga mapasalamaton sa Dios; 12kay ang inyong paghimo sa maong pag-alagad dili lamang magahulip sa kawalad-on sa mga balaan, kondili usab magapabaha kini sa daghang mga pagpasalamat ngadto sa Dios.

13Pinaagi sa pagsulay sa maong pag-alagad, kamo magahimaya sa Dios pinaagi sa inyong pagkamatinahuron sa pag-ila sa Maayong Balita mahitungod kang Cristo, ug pinaagi sa pagkamadagayaon sa inyong amot alang kanila ug alang usab sa tanan nga uban pa, 14samtang sila magapangandoy alang kaninyo ug magaampo alang kaninyo, tungod sa hilabiha ka dakung grasya sa Dios diha kaninyo. 15Salamat sa Dios tungod sa iyang gasa nga dili maasoy sa pulong.

PAGPAAMBIT SA MENSAHE:

Ang maong ebanghelyo nagpasabot sa pagtinabangay diha sa pagtulun-an nga imong gibarugan, diin ginaingon nga daghan kamot nga magtrabaho makapaga-an sa trabaho. Diin diha sa mga espirituwal nga tulomanon, magauna gayud ang panabang ngadto tagsa-tagsa kanato pinaagi sa paghalad ug pag-ampo diin mao kini motuko sa mga paglutos o kasakit nga binuhatan sa dautan.

Bisan ang panabang pinaagi sa materyal nga butang nagakinahnglan gayud kini sa hinugpong nga pag-ampo diin nagaingon ang balaang kasulatan nga usa o duha nga nag-ampo anaa si Jesu Cristo nagauban kanato. Diin ginaingon sa balaang kasulatan nga ang Dios lamang ang may kagahum sa pagpatig-a ug pagpahumok sa kasing-kasing sa matag tawo, diin pinaagi ra usab sa hugot , hinay-hinay nga pag-ampo nato sa kauban natong magtotoo, ang imposible sa tawo, mamahimo unya nga posible kun madaug nimo sa mga pag-ampo ug paghalad.

:
Mao kini bugtong hinagiban nga gipiyal sa Dios ngadto sa iyang mga sumusunod, diin sa kanunay nimong pagsunod sa iyang kabubut-on, sa pagpangayo usab sa mga giya mahatagan ka ug katin-awan igsoon. Kay bisan diay ang mga tawo nga wala moto-o sa Dios diin sila nagpalabi-labi na sa pagpakasala, atong matabangan pinaagi sa hugot ug hinugpong mga pag-ampo, diin moabot gayud ang adlaw nga siya mobalik sa pagsimba ug pagtahud as Dios kun kuhiton ang iyang kasing-kaing, diin ang tanan butang niining kalibutan naga-agad gayud sa iyang kabubut-on.

Kinabuhi Nga Minando-an Sa Espiritu

ROMA 8 : 1 ~ 17

1 Busa, sila nga anaa kang Cristo Jesus dili na karon mga hinukman sa silot. 2Kay ang kasugoan sa makabuhi nga Espiritu pinaagi kang Cristo Jesus nagpahigawas kanako gikan sa balaod sa sala ug sa kamatayon. 3Kay ang wala mahimo sa kasugoan nga nahuyang pinaagi sa unod, kini sa Dios nahimo, nga mao: nga sa pagpadala niya sa iyang kaugalingong Anak nga diha sa dagway sa usa ka masal-anon nga unod ug alang sa sala, ang sala diha sa unod iyang gihukman sa silot,

4aron ang matarung nga gimbut-an sa kasugoan matuman sa sulod nato nga wala magkinabuhi uyon sa unod, kondili uyon sa Espiritu. 5Kay ang mga nagakinabuhi uyon sa unod mga makilawasnon sa ilang panghunahuna, apan ang mga nagakinabuhi uyon sa Espiritu nagapanghunahuna sa mga butang sa Espiritu. 6Ang panghunahuna alang sa unod mosangpot sa kamatayon, apan ang panghunahuna alang sa Espiritu mosangpot sa kinabuhi ug kalinaw. 7Kay kaaway sa Dios ang panghunahuna nga alang sa unod; kini nagadumili sa pagpailalum sa kasugoan sa Dios, sa pagkatinuod dili kini makahimo sa pagpailalum niini; 8ug ang mga anaa sa unod dili makapahimuot sa Dios.

9Apan kamo wala diha sa unod, hinonoa anaa kamo sa Espiritu kon tinuod man nga ang Espiritu sa Dios nagapuyo diha sa sulod ninyo. Ang wala magbaton sa Espiritu ni Cristo dili iya ni Cristo. 10 Apan kon anaa si Cristo sa sulod ninyo, bisan patay kamog mga lawas tungod sa sala, ang inyong mga espiritu buhi tungod sa pagkamatarung. 11Kon nagapuyo sa sulod ninyo ang Espiritu sa nagbanhaw kang Jesus gikan sa mga patay, siya nga nagbanhaw kang Cristo Jesus gikan sa mga patay magahatag usab ug kinabuhi nganha sa inyong mga kamatayong mga lawas pinaagi sa iyang Espiritu nga nagapuyo sa sulod ninyo.


12Busa, mga igsoon, mga utangan kita, dili ngadto sa unod aron magkinabuhi kita uyon sa unod-- 13kay mamatay kamo kon magkinabuhi kamo uyon sa unod, apan mabuhi kamo kon pinaagi sa Espiritu inyong patyon ang mga binuhatan sa lawas. 14Kay ang tanang ginamandoan sa Espiritu sa Dios, mga anak sila sa Dios. 15Kay wala kamo makadawat sa espiritu sa pagkaulipon aron mangahadlok na usab kamo, hinonoa maoy nadawat ninyo ang espiritu sa pagkainanak. Sa dihang managtuwaw kita sa pagpangamuyo nga magaingon, "Abba! Amahan!"

16ang Espiritu gayud mao ang magapanghimatuod uban sa atong espiritu nga kita mga anak sa Dios, 17 ug nga kon kita mga anak, nan, mga manununod diay kita, mga manununod sa Dios ug mga isigkamanununod uban kang Cristo, kon moantus man kita uban kaniya aron pagahimayaon usab kita uban kaniya.


PAGPAAMBIT SA MENSAHE:

Ag maong mensahe nagpasabot sa pagkinabuhi nga kristuhanon diin maoy atong isul-ob ang hiyas ni Jesus nga puno sa pagpailob, pagpaubos ug pagpasensya inubanan sa hinayhinay ug kanunay nga mga pag-ampo. Mao kini ang giya sa espiritu santo nga gisul-ob ni Jesu Cristo sa iyang pagpakatawo dinhi sa kalibutan ug mao usab kini ang hiyas nga iyang gibilin ug gipasul-ob sa iyang mga sumusunod.

Apan ang tawo samtang nagkinabuhi pa dinhi sa walog sa mga buhi dag-on gayud sa mga tawhanon nga mga kailibgon o sa mga tawhanon nga mga butang ug hiyas tungod kay mao man kini ang atong nasunod sa atong mga katigulangan ug mao usab ang atong makita sa matag-adlaw. Diin ang giya sa espiritu santo nga iya sa Dios dili gyud nimo makita ni mahikap apan bulahan ka nga nagpakabana diha a maong mga langtinong butang kay mahimuot sng Dios niini.

Apan kun madistansya nimo ang imong kaugalingon diha sa maong mga tawhanon nga kailibgon ug ipahari nimo ang espiritu santo nga gisul-ob ni Jesus ngadto sa iyang mga sumusunod nan bulahan ka igsoon kay nakatuman ka sa kabubut-on sa Dios Amahan ug diin gipapuyo nimo si Jesu Cristo diha sa imong kasing-kasing.

Ang tawo samtang nagpuyo pa niining kalibutan giingon nga makasasala gayud kay tawo pa man kita, diin sa kanunay anaa ang mga pagsulay ug hulga sa dautan nga espiritu sa matag karon ug unya. Kanunay kitang makasala , sa huna-huna , sa pulong ug sa buhat, diin sa adlaw ug gabiing tanan atong pangayoon ang kapasaylo-an sa atong kalapasan ug ingon man kalig-onan sa atong kaugalingon sa dili pagpakasala.

Ginaingon diha sa mga mensahe sa Dios nga dili nato makita ang ang atong kaaway kun nagasunod ka sa pagtulon-sa Dios diin ang mga espiritu nga dautan ang kanunay mohasi kanimo, diha sa imong kaugalingon. Gikinahanglan ang hingpit nga pagtoo ug pagsalig sa Dios pinaagi sa atong mga pag-ampo ug pangaliya.

:
Bulahan ka igsoon diin hingpit mong gitugyan ang imong kaugalingon kaniya diin nakaambit ka sa mga kasakit ug mga pag-antos ni Jesu Cristo pinaagi sa pag-alsa sa imong kaugalingong krus sa kinabuhi, ug diin ginaingon sa kasulatan, bulahan ang tawo nga nakaambit sa mga kasakit ni Jesus kay makaambit usab sa iyang himaya didto sa langit.(Roma 8:18)

Ang Umaabot Nga Himaya

ROMA 8 : 18 ~ 30

18Giisip ko nga ang mga pag-antus niining panahona karon dili takus ikagtandi sa himaya nga igapadayag ra unya kanato. 19Kay ang tibuok kabuhatan nagapaabut nga mahinamon sa pagkapinadayag sa mga anak sa Dios; 20kay ang kabuhatan nailalum sa kakawangan, dili tungod sa kaugalingong pagbuot niini, kondili tungod sa pagbuot niya nga mao ang nagpahimutang niini diha, uban sa paglaum; 21kay ang kabuhatan ipahigawas ra unya gikan sa kaulipnan sa pagkadunot, ug makaambit kini sa mahimayaong kagawasan sa mga anak sa Dios.

22Nahibalo kita nga ang tibuok kabuhatan nanagduyog sa pag-agulo sa pagbati hangtud karon; 23ug dili lamang ang kabuhatan ra, kondili kita gayud usab nga mga nanagpakabaton sa unang mga bunga sa Espiritu nagaagulo sa sulod nato samtang nagapaabut kita nga mahinamon nga pagasagupon ingon nga mga anak, nga mao ang pagtubos sa atong mga lawas. 24Kay diha sa maong paglaum nangaluwas kita. Apan ang paglaum nga makita dili paglaum. Kay kinsa bay nagalaum alang sa butang nga iyang makita? 25Apan kon magalaum kita alang sa butang nga dili makita, nan, magapaabut kita niini uban sa pailub.

26 Sa ingon usab nga paagi, ang Espiritu motabang kanato sa diha nga magmaluyahon kita; kay kita ugod dili man makamaong moampo sa hustong inampoan, apan ang Espiritu mao ang mangunay sa pagpangamuyo alang kanato uban ang laglum nga mga pag-agulo nga dili arang malitok sa pulong. 27Ug siya nga mao ang nagasusi sa mga kasingkasing sa mga tawo nasayud kon unsa ang hunahuna sa Espiritu, kay ang Espiritu magapangamuyo man uyon sa kabubut-on sa Dios alang sa mga balaan.

28Kita nasayud nga diha sa matag-usa ka butang ang Dios nagabuhat ug maayo uban kanila nga mga nahigugma kaniya ug mga tinawag sumala sa iyang katuyoan. 29 Kay sila nga mga giila niyang daan gikabut-an usab niyang daan nga mahisama sila sa dagway sa iyang Anak, aron kini siya mahimong maoy panganay sa daghang mga magsoon. 30Ug sila nga gikabut-an niyang daan, iya usab sila nga gitawag; ug sila nga iyang gitawag, iya usab sila nga gimatarung; ug sila nga iyang gimatarung, iya usab sila nga gidala ngadto sa himaya.

PAGPAAMBIT SA MENSAHE:

Ang maong mensahe nagpasabot sa kabubut-on sa Dios diin iyang gisaad ang himaya niadtong iyang mga katawhan nga nagtuman sa iyang kabubut-on, diin iyan gipili ang mga katawhan nga pinatikan sa espiritu santo aron mamahimong mga igsoon ug sumusunod sa iyang bugtong anak nga si Jesu Cristo. Daghan ang wala pa makasabot sa mga tinguha o plano sa Dios Amahan samtang ania pa kita dinhi sa tawhanon nga kalibutan, apan pinaagi sa giya sa espiritu santo diin maoy magpasabot kanato ug moagak ngadto sa dalan sa katarong ug diin giubanan kita sa mga pag-ampo diha mismo sa mao natong espiritu, ug sa kanunay magpaabot ug magtuman lamang kita sa iyang kabubut-on ug magpuasa o maglikay sa pagpakasala aron himaya-on kita sa Dios pag-abot sa panahun.

Ang pinili nga katawhan sa Dios giingon nga pagapili-an pa diin makasinati gayud kita sa mga pagpanlutos, kasakit sa kinabuhi, pagyubit ug pagbiay-biay, diin kini maoy sukdanan sa Dios mismo diha sa iyang pagpili kanato, diin iyang sukdon kun asa kautob ang imong pagtahod ug pag-ila kaniya luyo sa mga kasakit nga imong naagian diha sa walog sa kinabuhi, diin anaa siya nagatan-aw diha sa imong mga diskarte, sa imong pagpanlimbasog pinaagi sa hinay –hinay ug kanunay nga mga pag-ampo inubanan sa mga pangaliya ug hugot nga pagto-o sa Dios Amahan. Kay walay laing tuko diha sa mga kasakit ug pagsulay nga atong naagian diha sa atong kinabuhi, mao ra gayud ang mga pag-ampo.

Ug nagpasabot lamang mga igsoon nga lahi ang mga paagi sa Dios sa pagpili kanato diin dinhi sa yuta diin mag-agi ka sa tumang kalisod ug kapit-os apan didto sa iyang gingharian maimo ang himaya nga walay katapusan. Iyang gisaad ang bag-o nga Jerusalem didto sa iyang gingharian diin ang makasulod mao lamang kadtong iyang mga pinili nga katawhan. Nan bulahan ka igsoon diin wala na unyay mga kasakit, kapit-os, ug mga paglutos nga imong masinati didtong dapita. Diin lunlun na kalipay, ug himaya ug mga panagdayeg sa Dios hangtod sa kahangturan.

Sa pagpaabot anaa ang pasensya diha sa imong pagtoo sa Dios, ug anaa ang paglaom sa kanunay diin maimo ang kahimayang dayun inig abot nianang panahuna. Gikinahanglan lamang ang pagbalaan sa kaugalingon, ang pagsangpit kanunay sa Dios diha sa mga kasakit, ug ang pag distansya sa kaugalingon sa mga tawhanon nga kailibgon diin wala mahimuot ang Dios niana. Isentro ang kaugalingon sa pagtulon-an nga gibarugan diin diha nimo Makita ang ti-unay ug lubos nga kabubut-on sa Dios diin diha sa mga tahas, ug mga misyon kanunay kang giyahan sa imong mga pag-ampo.

Sigpit ug batoon ang maong agianan ngadto sa himayang dayun diin pinili lang usab ang iyang gipaagi niini ug maihap lang usab ang molahutay sa maong himaya nga mao ang dalan ngadto sa iyang gingharian. Mao na kining mga dalana nga atong giagian diha sa pagtulon-an nga atong nakaplagan diin nagpakaubos siya sa pagbarog dinhi sa ibabaw sa yuta apan maoy pinakaimportantae nga sukaranan diha sa mga pag-ampo ug mga tahas. Ubos ra siya kumpara sa ubang pagtulon-an nga nagdayeg sa Dios apan maoy pinakataas diha sa mga mata sa Dios diin maoy pagtulon-an nga gipangunayan pagpabarog sa Dios espiritu Santo ug diin maoy sukaran ngadto sa himaya sa Dios.

Pagpandong Sa Ulo Kun Magsimba

1 CORINTHO 11: 1 ~ 16

1 Magmaawaton kamo kanako, maingon nga ako nagamaawaton kang Cristo. 2Ginadayeg ko kamo tungod sa inyong paghandum kanako sa tanang paagi ug sa pagbantay sa akong mga pagtulon-an ingon sa akong pagbilin niini kaninyo. 3Apan buot ko nga inyong sabton nga ang ulo sa matag-usa ka lalaki mao si Cristo, ug ang ulo sa babaye mao ang iyang bana, ug ang ulo ni Cristo mao ang Dios. 4Ang lalaki nga magapandong sa iyang ulo samtang nagaampo o nagahimo siyag profesiya, nagapakaulaw siya sa iyang ulo;

5apan ang babaye nga wala magpandong sa iyang ulo samtang nagaampo o nagahimo siyag profesiya, nagapakaulaw siya sa iyang ulo-- sama ra nga kiniskisan ang iyang ulo. 6Kay kon ang babaye dili man magpandong sa iyang kaugalingon, nan, kinahanglan putlon na lang niya ang iyang buhok; apan kon makauulaw man alang sa babaye ang pagkainalutan o pagkakiniskisan ug ulo, nan, paggamita siyag pandong. 7Dili kinahanglan sa lalaki nga magpandong siya sa iyang ulo sanglit dagway ug himaya man siya sa Dios; apan ang babaye mao ang himaya sa lalaki.

8(Kay ang lalaki wala buhata gikan sa babaye, kondili ang babaye hinoon gikan sa lalaki. 9Ug ang lalaki wala usab buhata alang sa babaye, kondili ang babaye hinoon alang sa lalaki.) 10Mao kana ang katarungan ngano nga ang babaye kinahanglan magabutang ug pandong sa iyang ulo, bisan tungod na lang sa mga manolunda. 11(Hinoon, diha sa Ginoo ang babaye dili gawas sa lalaki ni ang lalaki gawas sa babaye; 12kay maingon nga ang babaye gibuhat gikan sa lalaki, mao man usab karon ang lalaki-- natawo gikan sa babaye. Ug ang tanang mga butang gikan sa Dios.)

13Hukmi ninyo kini alang sa inyong kaugalingon: angay ba sa babaye ang pag-ampo ngadto sa Dios nga dili magpandong sa iyang ulo? 14Dili ba ang kinaiya mao man ang nagatudlo kaninyo nga makauulaw sa lalaki ang pagpatag-as sa iyang buhok, 15apan nga kon ang babaye adunay tag-as nga mga buhok, kini maoy usa niya ka garbo? Kay ang iyang buhok gihatag kaniya ingon nga igpapandong. 16Apan kon aduna may makiglalis bahin niini, pahibaloa siya nga ako o ang mga iglesia nga iya sa Dios wala magaila ug batasan nga lahi niini.

PAGPAAMBIT SA MENSAHE:

Ang maong mensahe nagpasabot sa kasugo-an sa Dios diha sa pagsimba. Diin nahitala sa balaang kasulatan nga gikinahanglan sa mga babaye ang magpandong o magporong isip pagpasidungog sa ilang bana o pagpasidungog sa Dios nga Jesu Cristo isip maoy ulo niining iglisea nga atong gibarugan. Kini nga pagtulun-an tagsa na lang makita dinhi sa atong lugar diin moderno na ang panahun, ug moderno na usab ang mga pamaagi, apan usa ra ang balaang kasulatan, usa ra ang Dios ug usa ra ang pagtulon-an nga gipabarog sa Dios nga Jesu Cristo, ug mao kining Iglisea sa kamatuoran nga atong gibarugan.

Mas maayo nga atong tumanon ang pagpandong o pagpurong diha sa pagsulod sa dagkong templo ug bisan sa sinagoga aron kapasidunggan nato ang Dios isip maoy tag-iya kanatong tanan ug sa ingon mas mapanalanginan ang mga pag-ampo ug pangaliya kun nahisubay kini sa iyang kabubut-on, kay unsa may pulos sa mga pag-ampo kun ang proseso sayop nang daan. Mas maayo diay nga sundon nato kadtong mga pamaagi sa atong mga apohan diin sa hugot nag-ampo sila ug nagabalaan ug nagapurong sa ulo diha sa mga pag-ampo.

Niining panahuna igsoon ikaw na pod hinoon ang tan-awon sa mga tawo kun molahi ka sa kadaghanan apan mao man ang insakto nga proseso, kun imong ikaulaw ang maong proseso nga pagpurong samtang nag-ampo nan sama ra nga gikaulaw nimo si Jesu Cristo nga mao ang atong manluluwas nan ikaulaw ka usab ni Jesus didto sa atubangan sa iyang Amahang Dios.

Gugma

1 CORINTHO 13: 1 ~ 13

1 Kon ako tigpanultig mga dila sa mga tawo ug sa mga manolunda, apan walay gugma, ako usa lamang ka masaba nga agong o piyangpiyang nga nagatagingting. 2Ug kon ako may mga gahum sa paghimog profesiya, ug makasabut sa tanang mga tinago ug sa tanang kahibalo, ug kon ako nakabaton sa hingpit nga pagtoo nga tungod niana arang ko mabalhin ang mga bukid, apan walay gugma, ako walay kapuslanan. 3Kon ipanghatag ko ang tanan kong katigayonan, ug kon itahan ko ang akong lawas aron pagasunogon, apan walay gugma, kini dili magapulos kanako.

4 Ang gugma mapailubon ug mapuangoron. Ang gugma dili masinahon, dili tigpagawal. 5Ang gugma dili tigpaburot, dili bastos, dili maakop-akopon, dili masuk-anon o maligotguton; 6ang gugma wala magakalipay sa mga buhat nga dili matarung, hinonoa nagakalipay kini sa mga butang nga maminatud-on. 7Ang gugma mopailub sa tanang mga butang, motoo sa tanang mga butang, molaum sa tanang mga butang, moantus sa tanang mga butang.

8 Ang gugma wala gayuy pagkatapus; apan kon aduna may mga paghimog profesiya, kini igahiklin ra unya; kon aduna may pagsultig mga dila, kini pagahunongon ra unya; kon aduna may kahibalo, kini igahiklin ra unya. 9Kay ang ato ugod nga kahibalo karon dili man hingpit, ug maingon man ang atong pagpanghimog profesiya; 10apan kon ang hingpit moabut na, nan, ang dili hingpit igahiklin na lang unya.

11Sa bata pa ako, nagsulti ako nga ingon ug bata, nagpanghunahuna ako nga ingon ug bata, nagpangatarungan ako nga ingon ug bata; apan sa nahamtong na ako, gihiklin ko ang mga paaging binata. 12Kay sa karon, kita nagasud-ong sa mga hanap nga panagway daw pinaagi ug salamin, apan nakita ra nato kini unya sa laktud nga nawong ug nawong. Sa karon, bahin lamang ang akong nahibaloan, apan unya masabtan ko ra ang tanan, maingon nga ang tanan kanako nahisabtan na. 13Ug karon magapabilin kining totulo: ang pagtoo, ang paglaum, ug ang gugma, apan ang labing daku niini mao ang gugma.

PAGPAAMBIT SA MENSAHE:

Ang maong mensahe naghisgot ug Gugma diin mao kini ang hinungdan nga ang kalibutan nga atoong gipuy-an karon nahiabot pa niining mga tuiga ug diin bisan sa pagkamasalaypon sa tawo apan tungod as gugma sa Dios Amahan sa iyang mga katawhan, nagpabilin ang kalibutan nga nagbarog tungod sa gugma ug kabubut-on sa Dios.

Bisan sa napulo kasugo sa Dios Amahan diin kina gisangyaw ni Moises sa dihang gihatag sa Dios kaniya ang maong mga sugo diha sa tinabliya nga bato didto sa bukid sa Senai, diin nagsumikad kini sa Gugma sa Dios sa iyang mga sumusunod. Bisan sa pagpakatawo sa anak sa Dios diin nakig-uban siya sa mga yano nga mga katawhan ug diin diha mgaa yano nga mga tawo niya gikuha ang iyang mga sinaligan o mga apostoles.

:

Si Jesus nagpasabot nga wala siya moanhi sa kalibutan aron pagsilot kanato apan aron sa pagluwas kanato sa atong mga kasal-anan, ug diin iyang gipasabot ang napulo ka kasugo-an sa Dios mamahimo lamang duruha, diin ang una mao ang paghigugma sa Dios labaw sa tanan, ug dili ka magbaton ug laing Dos gawas kaniya, ug ang ikaduha nga kasugo-an mao paghigugma sa imong mga kaaway o sa imong isigkatawo sama sa paghigugma sa imong kaugalingon.

Diin nagpasabot mga igsoon nga kun masupak mo ang usa sa maong mga kasuga-an nan nasupak mo na ang napulo ka kasugo-an sa Dios. Nga sa ato pa mga igsoon ang maong mga kasugo-an sa Dios nagkahulugan kini ug Gugma.

Bisan ang pagpalansang ni Jesu Cristo diha sa Krus usa kini ka simbolo sa gugma diin iyang gihalad ang iyang lawas ug dugo para sa kaluwasan dili kang sa iyang mga sumusunod kundili hasta usab niadtong nanaglutos kaniya.

Mao kini ang gugma nga gipasinati sa Dios diha sa yang mga katawhan diin gitawag kini ug “unconditional love”, diin mao usab kini ang iyang gihatag nga gugma ngadto sa unang Adan ug Eba dinhi sa kalibutan sa wala pa sila matental sa kasal-anan. Apan bisan pa niadtong tanan nagpadayun ang gugma sa Dios diin gusto niyang mahimong sukaranan ang maong gugma sa pagtulon-an nga iyang gibarugan dos mil na katuig ang nakalabay.

Diin mao kini ang iyang gipaambit sa iyang mga sumusunod ug mga apostoles taliwala sa mga paglutos sa mga Judio niadtong panahuna. Diin tungod sa kabubut-on sa Dios siya mismo, si Jesu Cristo ang nagatukod ug nangamahan niining pagtulon-an nga atong gibarugan diin namugna kini taliwala sa mga paglutos ug pagbiay-biay.

Apan ginaingon nga ang gantangan kun mapuno kaluson gayud kini diin niining panahuna ato pang masinati ang maong pasensya ug paghigugma sa Dios sa mga katawhan sa kalibutan apan inig balik na sa anak sa tawo, mao usab ubya kini ang pagkalos sa gantangan sa pasensya sa Dios diin bulahan unya kadtong nagpatalinghug ug nagasukli usab sa gugma sa Dios pinaagi sa paghigugma, sa hugot nga pagtoo ug sa hinay-hinay nga pag-ampo kay mahatagan gayud siya sa kinabuhi nga walay katapusan

Ang Sambingay Mahitungod Sa Dakong Kumbira

LUCAS 14: 15 ~ 24

15 Sa pagkadungog niini sa usa sa mga nanaglingkod tambong sa kan-anan, siya miingon kaniya, "Bulahan ang magakaon didto sa gingharian sa Dios!" 16Apan si Jesus miingon kaniya, "Dihay usa ka tawo nga midalit ug dakung kombira, ug daghan ang iyang gidapit. 17Ug sa panahon na sa kombira, ang mga dinapit iyang gipaadtoan sa iyang ulipon ug giingnan, `Umadto na kamo, kay ang tanan andam na.`

18Apan silang tanan nga nanagkahiusa misugod sa pagpamalibad. Ang nahauna miingon kaniya, `Nakapalit akog uma, ug kinahanglan nga adtoon ug tan-awon ko kini; hangyoon ko ikaw nga pasayloa lang usa ako.` 19Ug ang usa miingon, `Nakapalit akog lima ka pares nga baka, ug moadto ako aron sulayan ko sila; hangyoon ko ikaw nga pasayloa lang usa ako.` 20Ug may laing usa pa nga miingon, `Bag-o lang ako nga nakapangasawa, busa dili ako makaadto.`

21Unya ang ulipon mipauli ug gisugilon niya kini sa iyang agalon. Ug uban sa kasuko ang tagbalay miingon sa iyang ulipon, `Dumali ka sa pag-adto sa mga kadalanan ug mga agianan sa lungsod, ug dad-a dinhi ang mga kabus ug ang mga pungkol ug ang mga buta ug ang mga piang.` 22Ug unya ang ulipon miingon, `Agalon, nahimo ko na ang imong gisugo, ngani aduna pay kasudlan.`

23Ang agalon miingon sa ulipon, `Umadto ka sa kadalanan ug sa kakoralan, ug pilita ang mga tawo sa pag-anhi dinhi aron mapuno kining akong balay. 24Kay sultihan ko kamo, nga walay bisan usa niadtong mga dinapit nga makatilaw sa akong kombira.`"

PAGPAAMBIT SA MENSAHE

Ang maong ebanghelyo nagpasabot sa kahimayaan sa gingharian sa langit diin kini giandam niadtong mga tawo nga pinili sa Ginoo, labina niadtong mga tawo nga pinatikan sa espiritu santo. Apan daghan ang gitawag sa Dios diin nahimo na lamang ikaduha nga prayuridad ang Dios diha sa ilang kinabuhi diin linga na kaayo sila sa mga tawhanon nga kailibgon ug sa tawhanon nga bahandi, diin gipaka-Dios na nila ang ilang kaugalingon kay anaa na man kanila ang tanan dinhi sa ibabaw sa kalibutan.

Nakalimot sila nga dili kini ang tinuod nilang pinuy-anan diin sa higayon nga motaliwan kana sa kalibutan nan mabiyaan mo man ang imong mga bahandi nga iya sa yuta , ug diin kun ang imong bahandi ania ra dinhi sa yuta nan diri kara usab kutob. Mas maayo nga adunay kay bahandi nga langitnon diin mao kini ang imong ipakita sa Dios inig-abot na sa adlaw sa panudya. Kay unsa may maayo sa tawo nga sa pag-abot dinhi sa kalibutan wala man siya dala bisag unsa, ug diin sa mobiya na siya dinhi sa kalibutan, wala man gihapon siya madala nga kalibutanon nga bahandi.

Susama sa ebanghelyo nga diin sa gipanawag na sila sa Dios alang sa pag-andam sa ilang kalag ug espiritu para sa himaya sa Dios wala gayuy niduol ug nagpatalinghug, mas maayo pa diay kadtong mga katawhan nga way mga materyal nga bahandi kay anaa kanunay ang Dios diha a ilang mga dughan. Ipahari gayud si Jesu Cristo diha sa atong tagsa-tagsa ka kasing-kasing aron sa higayon nga tawgon ka na sa Dios ngadto sa laing kalibutan, walay kitay angay kawid-an ug walay angay kahadlokan kun andam ka na sa pag-atubang kaniya.

Ang Dakong Tinago

1 TIMOTEO 3: 14 ~ 16

14 Ginalauman ko nga sa dili madugay mahianha ako kanimo, apan gisulat ko kining maong mga tugon aron nga 15kon malangan man ugaling ako, ikaw mahibalo na unsaon sa paggawi diha sa sulod sa panimalay sa Dios, nga mao ang iglesia sa buhi nga Dios, ang haligi ug panalipod sa kamatuoran. 16Ug dili malalis nga daku gayud ang tinago sa atong tinoohan: Ang Dios nadayag diha sa lawas, nahimatud-an nga matarung diha sa Espiritu, nakita sa mga manolunda, giwali sa taliwala sa kanasuran, gitoohan dinhi sa kalibutan, gibayaw ngadto sa himaya.

PAGPAAMBIT SA MENSAHE:

Ang maong mensahe nagpasabot sa mga pagtulun-an nga gibilin ni Jesu Cristo diin siya mianhi sa kalibutan dili aron pagsilot kanato kundili aron sa pagluwas kanato sa mga kasal-anan pinaagi sa paglansang niya diha sa Krus. Daghan ang gitawag sa Dios para ipaambit sa kahimayaan sa langit apan gamay ra ang milahutay,

Diin mao kini ang tinago nga kamatuoran sa pagtulon-an nga gibarugan ug gisangyaw ni Jesu Cristo, diin nagaingon ang balaang kasulatan nga bulahan ang mga katawhan nga nakasinati sa mga paglutos ug mga kasakit dinhi sa yuta kay maiya ang gingharian sa Dios, Kay kinsa kadtong nagpaubos dinhi sa yuta ipataas sa Dios didto sa langit, apan ang mapahitas-on dinhi sa yuta ipaubos ug dili niya ilhon didto sa langit.

Matod pa sa balaang kasulatan kung gusto nimo nga dayegon ug ibayaw sa Dios didto sa iyang gingharian nan puy-i ang kinabuhi nga pinakaubos dinhi sa yuta diin puno kini sa mga pagpanglutos ug mga kasakit ug pas-ana ang imong krus ug sunod kang Jesu Cristo.

Ang mga pinili nga katawhan sa Dios baga kayo sama sa balas sa baybayon diin diyutay pa lamang ang iyang natawag ug mas diyutay ang nakasulod sa iyang gingharian, diin nagpasabot siya nga ang pinili niya nga katawhan kinahanglan nga iya gayung pagasulayan kun asa kutob ang ilang pag-ila ug pagtahud kaniya, diin sama unya sila sa bulawan nga mosamot ang kasinaw niini sa sige ug paduol sa kainit.

:
Nan mas importante diay nga atong ipahari si Jesu Cristo diha sa atong kasing-kasing ug atong tumanon ang mga kasugo-an ug kabubut-on sa iyang amahan Dios. Sa ingon unya niana sama ra nga nagatungtong kita sa malign-on nga bato isip pundasyon sa atong pagtulon-an nga gibarugan, kay dili lang kining atong gipuy-an ang kalibutan nga atong pagapuy-an ug mas may importante pa niini nga kalibutan nga mao ang iya mismo nga gingharian, didto tukuron ang bag-on Jerusalem nga walay lain nga makasulod kundili kadto lamang mga katawhan sa Dios nga pinatikan sa espiritu santo.

Ang Asin Nga Walay Kapuslanan

LUCAS 14: 34 ~ 35

34"Ang asin maoy usa ka maayong butang; apan kon ang asin kawad-an sa iyang lami, unsaon pa man sa pagpabalik sa kaparat niini? 35Kini dili na gayud mapuslan bisan pa alang sa yuta o sa abuno; igasalibay na lang kini sa mga tawo. Ang may mga dalunggan nga makadungog kinahanglan magpatalinghug.

PAGPAAMBIT AS MENSAHE:

Ang maong ebanghelyo nagapasabot sa kinabuhi sa matag tawo dinhi sa ibabaw sa kalibutan, diin sa batan-on pa madasigon pa diha sa mga kalibutanon nga mga materyal, puno pa sa mga plano sa kinabuhi diin maoy gipa-sentro ug gipahari sa kaugalingon ang mga damgo ug tingusbawan diin naglangkob kini sa mga bahandi nga materyal. Susama kini sa asin diin anaa pa ang kalami sa kaparat niini.

Apan diha sa taliwala sa iyang kalampusan ug pagmadaugon sa kinabuhi, hupong na siya sa materyal nga butang, maayo nga pamilya, daghan ug dumadapig ug daghan usab ug sumusunod, diin hikalimtan ang Dios diha sa iyang kinabuhi , hikalimtan niya nga dili siya magdugay niining kalibutana, hikalimtan niya nga mosawop diay gihapon siya sama sa adlaw, diin wala niya maandam ang iyang mga espirituhanon nga tulumanon, iya lang gisiguro ang iyang tawhanon nga lawas wala niya siguroha ang iyang espiritu ug kalag nga niwang na kay wala man niya pakan-a.

Inig katigulang na niya diin wala niya maandam ang iyang kalag nan sama usab unya siya sa asin nga nawad-an ug kaparat diin bisan diha sa iyang mga kaigsoonan kanhi dili na siya ilhon kaw wala na man unya siyay nahot. Apan kun ipahari nato ang Dios ug ipapuyo nato si Jesu Cristo diha sa atong kasing-kasing, siguro mawad-an ka sa kaparat nga tawhanon sama sa asin kay lagi mao man kana ang balaod dinhi sa kalibutan apan magpabilin ang imong kadasig, kahimsog sa imong kalag ug espiritu kay lagi dili ka gyud hikalimtan sa Dios sa panahun sa imong pag-inusara kay imo man syang gipahari ug maoy imong gipauna isip giya ug dan-ag diha sa imong panikay-sikay sa imong dinhi sa kalibutan .

Ang Pagto-o

LUCAS 17 : 5 ~ 6

5Ug ang mga apostoles miingon sa Ginoo, "Dugangi ang among pagtoo!" 6Ug kanila mitubag ang Ginoo nga nag-ingon, "Kon kamo may pagtoo nga ingon ug liso sa mustasa, makaingon kamo niining kahoy nga sikomoro, `Paibut ug patanum ka diha sa lawod,` ug kini mosugot kaninyo

PAGPAAMBIT SA MENSAHE:

Ang maong ebanghelyo naghisgot sa pagkamaduhaduha-on sa mga apostoles diha sa ilang pagtoo kang Kristo Jesus. Diin gitubag sila ni Jesus nga kun aduna kay pagto-o sama kadako sa liso sa mustasa nan makahimo ka paglukat sa puno-an sa kahoy nga sikomoro ug sa pagsugo sa maong kahoy sa pagbalhin didto sa dagat ug motuman ang maong kahoy sa imong sugo.

Nagaingon ang Dios Amahan sa iyang mensahe: , “ Bulahan ang tawo nga nagasunod kanako ug nagtugyan sa hingpit sa iyang kinabuhi nganhi kanako kay matagaan ko ug hataas nga kinabuhi apan ang katawhan nga nagduha-duha sa pagtugyan sa iyang kinabuhi ngari kanako basin kawad-an niini”.

Sa ato pa mga igsoon bug-oson ug usahon nato ang atong pagto-o ug pagsalig sa Dios pinaagi sa mga pag-ampo ug sa pagsunod sa iyang kabubut-on ug kasugo-an. Gikinahanglan ang mga pagbalaan sa kaugalingon pinaagi sa paglikay sa pagpakasala, ug pangayo-on sa kahitas-an nga lig-onon ang atong kaugalingon sa atong pagsalig kanila.

Ang Dios lamang ang makakita sa tinud-anay natong pagsalig ug pagto-o kanila kay sila lamang ang makakita sa katim-os ug kabug-os sa atong tagsa-tagsa ka kasingkasing, diin nagaingon ang balaang kasulatan dili ang tanan nga nagasangpit kanako ug Dios ko..ang makasulod sa ganghaan sa Langit kundili kadto lamang nagatuman sa akong kabubut-on, ug diin miingon usab Siya : walay tawo dinhi sa ibabaw sa kalibutan nga wala nako madunggi ang pag-ampo, ang tanan nadunggan sa Dios Amahan, apan dili ang tanan nakadawat sa iyang panalangin tungod kay ang kadaghanan nga nag-ampo anaa lang sa tumoy sa ilang dila, wala magsumikad sa ilang kasing-kasing.

Mas maayo diay mga igsoon nga ipahiluna nato ang atong kaugalingon diha sa presensya sa Dios, ug sa kinasing kasing maga-ampo ug mangaliya kita kaniya para sa kalig-unan sa atong kalag ug espiritu kay ang tawo nga kulang sa pag-ampo, huyang ang espiritu ug kalag ug dali dang dag-on sa pagsulay, apan kun sa kanunay naga-ampo ka sa kinasing-kasing ug hugot gayud nan walay gahum sa dautan nga makabuntog kanimo tungod kay ang espiritu sa Dios nagapuyo sa imong kasing-kasing.

Didto Sa Malta

BUHAT 28 : 1 ~ 10

1 Ug sa nakalingkawas na kami, mao pay among pagkahibalo nga ang pulo ginganlan ug Malta. 2Ug ang mga nanagpuyo didto nagpakita kanamog talagsaong pagkamaloloy-on, kay sila nanagdaub, ug ilang giabiabi kaming tanan, tungod kay nagsugod na man pag-ulan ug matugnaw ang panahon. 3Ug si Pablo namunit ug usa ka bangan nga mga igsosugnod, ug sa iya na kining gikatam-ok sa daub, usa ka bitin nga malala miwayway tungod sa kainit ug miukob sa iyang kamot.

4Ug sa pagkakita nila sa bitin nga nagbitay gikan sa iyang kamot, ang mga nanagpuyo didto miingon sa usag usa, "Sa walay duhaduha kining tawhana mamumuno. Ug bisan tuod nakalingkawas siya gikan sa dagat, dili motugot ang hustisya nga mabuhi pa siya." 5Apan gisawilik niya ang bitin ngadto sa kalayo, ug siya wala maunsa. 6Ug ilang gipaabut nga mohubag ang iyang kamot o nga dihadiha matumba siya nga patay; apan sa nakapaabut na silag taas nga panahon ug wala silay nakitang kadaut nahitabo kaniya, nangausab sila sa ilang paghunahuna ug nanag-ingon nga siya usa ka dios.

7Ug kasikbit niadtong dapita mao ang kayutaan nga iya sa punoan sa maong pulo, nga si Publio ang ngalan, nga midawat kanamo ug miamoma kanamo nga maabiabihon gayud sulod sa tulo ka adlaw. 8Ug nahitabo nga ang amahan ni Publio naghigda nga nagmasakit sa hilanat ug kalibag dugo. Ug si Pablo miadto kaniya ug nag-ampo, ug mitapion sa iyang kamot diha kaniya, ug iyang giayo siya. 9Tungod sa maong hitabo ang ubang mga tawo sa pulo nga may mga sakit nangadto usab kaniya ug sila naayo. 10Ug kami ilang gidad-an ug daghang mga gasa; ug sa amo nang paggikan, kami ilang gipabalonan sa among mga kinahanglanon.

PAGPAAMBIT SA MENSAHE:

Ang maong mensahe nagpasabot sa mga katuyu-an sa Dios amahan diin iyang gipakita ang iyang gahum ngadto sa naga panglutos ni Pablo. Iyang gipakita sa makausa pa nga dili kabubut-on ni Pablo ang pagsangyaw sa tinago nga kamatuoran kundili iya gayud sa Dios. Bisan sa mao nga kapit-os ni Pablo apan puno siya sa espirito santo diin wala siya maunsa niadtong bitin nga milikos sa iyang kamot.

Nagpadayon sa pagsangyaw si Pablo sa himaya ug gahum sa Dios didto sa maong pulo diin sa maka-usa pa gipasinati sa Dios ang mga milagro diha sa mga pagsangyaw ni Pablo. Usa lang kini kapagmatuod sa walay kinutuban nga gahum sa Dios, ug diin si bisan kinsa nga binuhat nga hugtanon nga mitoo sa Dios diha sa mga pagpanglutos iya gayud nga panalanginan.

Walay gahum dinhi sa ibabaw sa kalibutan ang makabuntog sa maong gahum sa Dios apan lagi ginaingon diha sa balaang kasulatan nga kun unsa kadako sa imong pagtoo sa maong gahum sa Dios mao usab kadako ang hulga as dautan. Apan kun kanunay kang magabalaan pinaagi sa mga pag-ampo ug sa paglikay sa pagpakasala ug sa hugot nga pagtoo sa Dios inubanan sa mga armadora nga anaa sa imong lawas, wala gayuy dautan nga modulot kanimo.

Matud pa sa mensahe sa Dios Amahan bisan anaa ka na sa baba sa kamatayun luwason ko ikaw kun sa hingpit gitugyan mo ang imong kinabuhi kanako. Ni pilas, ni garas ,ni usa ka lugas nga buhok walay mawala kanimo kun sa hingpit gisalig mo ang imong kaugalingon. Nagpasabot lamang igsoon nga ang Dios dili sama sa uban matod pa nila, diin dili ang imong binuhatan ug huna-huna lang ang iyang makita, kundili hasta usab ang katim-os ug kaputli sa imong kasing-kasing.

Mga Sundalo Gipadala Aron Sa Pagdakop Ni Jesus

JUAN 7 : 32 ~ 36

32Ug ang mga Fariseo nakadungog sa panon sa katawhan nga naghohongihong niini mahitungod kaniya, ug ang mga sacerdote nga punoan ug ang mga Fariseo nagpadalag mga polis sa pagdakop kaniya. 33Tungod niini si Jesus miingon, "Ako magapakig-uban pa kaninyo sulod sa hamubong panahon, ug unya moadto na ako kaniya nga mao ang nagpadala kanako. 34Kamo mangita kanako apan dili kamo makakaplag kanako; ug diin atua ako, niini dili kamo makaadto."

35Ug ang mga Judio nasig-ingon, ang usa sa usa, "Unsa man kahay buot niyang adtoan, nga dili man kono kita makakaplag kaniya? Buot ba siya moadto sa mga Judio nga nanghitibulaag taliwala sa mga Gresyanhon ug manudlo sa mga Gresyanhon? 36Unsa ba kahay buot niya ipasabut sa iyang pag-ingon, `Kamo mangita kanako apan dili kamo makakaplag kanako,` ug, `Diin atua ako, niini dili kamo makaadto`?"

PAGPAAMBIT SA MENSAHE:

Ang maong ebanghelyo nagsaysay sa kabubut-on sa Dios Amahan diin sumala sa nahasulat ang anak sa Tawo pagasakiton, dagmalan ug dakpon ug ilansang sa krus. Gipasinati lamang sa Dios ang iyang pagbu-ot diin ang tanan mahitabo gayud sa gitakdang oras. Ug miabot na ang maong oras diin si Jesu Cristo pagadakpon na sa mga Judio.

Apan siya mipasabot kanila nga sa higayon nga mangita na sila kaniya, dili na mahimo nga siya ilang maadto-an tungod kay lahi naman unya ang iyang pagadulngan, mobalik na siya sa nagpadala kaniya, ug didto siya himayaon sa iyang kadaugan diha sa krus.

Gikan niadtong panahuna hangtod karon, o dos mil kapin katuig na nga milabay ang katawhan nangita na sa ilang kaluwasan sa kalag diin ang mga milagro na lang diha sa ilang kinabuhi ang ilang masinati diha sa hingpit nga pagtoo nila sa Dios Jesu Cristo. Nagauban siya sa iyang mga sumusunod apan dili sila makakita kaniya, kay matud pa diha sa balaang kasulatan duha o tulo nga nagaampo diha sa ngalan sa Dios anaa si Jesu Cristo nagauban kanila.

Ang Kaalam Sa Dios

1 CORINTHO 2 : 6~16

6 Ngani, kami managsulti man ug kaalam ngadto sa mga magtotoo nga hamtong na; hinoon kini maoy kaalam nga dili iya niining kapanahonan karon ni sa iyang mga punoan kinsang gahum nagapaingon na sa pagkawagtang. 7Apan ang among panagsultihan mao ang tinagoan ug sinalipdan nga kaalam sa Dios, nga sa wala pa ang kapanahonan gitagana sa Dios alang sa atong kahimayaan. 8Walay bisan usa sa mga punoan niining kapanahonan karon nga nakasabut niini; kay kong nakasabut pa, ang Ginoo sa kahimayaan dili unta nila ilansang sa krus.

9Apan ingon sa nahisulat: Ang wala makita sa mata, ni madungog sa dalunggan, ni mosantop sa kasingkasing sa tawo, ang gikatagana sa Dios alang kanila nga nahigugma kaniya," 10kini gikapadayag sa Dios kanato pinaagi sa Espiritu. Kay ang Espiritu nagatugkad man sa tanang mga butang, lakip sa mga kinahiladman sa Dios. 11Kay kinsa bang pagkatawhana ang nasayud sa mga hunahuna sa tawo gawas sa espiritu nga anaa nianang tawhana? Maingon man usab, walay bisan usa nga makasabut sa mga hunahuna sa Dios gawas sa Espiritu sa Dios.


12Apan kita nanagpakadawat dili sa espiritu nga iya sa kalibutan, kondili sa Espiritu nga gikan sa Dios, aron kita managpakasabut sa mga hiyas nga gikahatag kanato sa Dios. 13Ug kini among panagsultihan dili pinaagi sa mga pulong nga gitudlo sa tawhanong kaalam kondili gitudlo sa Espiritu, nga kita magahubad sa mga kamatuoran nga espirituhanon ngadto sa mga tawo nga espirituhanon.


14Ang tawo nga kalibutanon dili magadawat sa mga igatudlo sa Espiritu sa Dios, kay alang kaniya kini mga binoang, ug siya dili arang makasabut niini tungod kay kini ugod kinahanglan mang pagatugkaron sa espirituhanon nga paagi. 15Ang tawong espirituhanon magatugkad sa tanang mga butang, apan siya dili pagatugkaron ni bisan kinsa. 16"Kay kinsa bang tawhana ang nakasabut sa hunahuna sa Ginoo, aron ang Ginoo iyang katudloan?" Apan kita nanagpakaambit sa panghunahuna ni Cristo.

PAGPAAMBIT SA MENSAHE:

Ang maong ebanghelyo nagpasabot sa mga gahum sa Dios Amahan diin ginaingon nga walay tawo dinhi sa ibabaw sa kalibutan nga gitugotan sa Dios sa pagtugkad sa iyang kabubut-on. Ang kaalam nga iya sa tawo tawhanon diin aduna kini pagkahubas o pagkahurot ug mosangko gayud kini sa tumoy inig-abot sa maong pangedaron.

Ang kaalam nga langitnon giya sa espiritu santo sa Dios nga gihatag ngadto sa tawo, ug diin ang maong tawo makasinati o magabuhat sa maong kaalam ubos sa gahum ug diktar sa espiritu sa Dios diin para sa tawhanon nga mga maalamon ug makinaadmanon usa kini ka binuang apan alang sa mga tinawag ug pinili nga katawhan sa Dios usa kini ka walay kinutuban nga gahum nga gipaambit sa Dios kanila.

Bisan ang balaang kasulatan diin anaa ang mga tipik nga mga milagro ug kasaysayan sa gahum a Dios, gisulat kini sa mga yanong mga katawhan sa unang panahun apan ubos sa giya ug gahum sa Dios Amahan aron ang nahibilin makasinati sa tipik sa gahum sa Dios kay daghan ang mga milagro nga wala na mahisulat sa balaang kasulatan niadtong panahuna.

Bisan ang pangedaron sa atong kalibutan hangtod karon wala man gayud mgkatukma ang sensya ug ang balaang kasulatan diin ang bibliya nagpasabot nga ang kalibutan anaa pa sa diyes mil (10,000) katuig ang edad apan ang siyensya, pinaagi sa ilang pagduki-duki sa mga karaan nga mga bato sa lawom ug ibabaw sa yuta nagpasabot nga ang kalibutan adunay 4.5 bilyon katuig.

Usa lang kini ka pagmatuod nga lisod tugkaron ang gahum sa Dios diin adunay kaugalingon nga oras ang Dios Amahan diin siya lamang ang nasayod, susama sa ulohan sa kanta nga nagkanayon “In his time”.

Ang Nating Karnero Sa Dios

1 CORINTHO 2 : 6~16

29 Ug sa pagkasunod nga adlaw iyang nakita si Jesus nga nagpaingon kaniya, ug siya miingon, "Tan-awa, mao kana ang Cordero sa Dios, nga magakuha sa sala sa kalibutan! 30Mao kana siya ang gihisgutan ko sa akong pag-ingon, `Sunod kanako moanhi ang usa ka tawo nga gikapahimutang na unahan kanako, kay siya una pa man kanako.`

31Ug ako gayud gani wala man masayud kaniya; mao lamang nga mianhi ako nga nagpangbautismo sa tubig aron ikapadayag siya ngadto sa Israel." 32Ug si Juan nagpanghimatuod nga nag-ingon, "Nakita ko ang Espiritu nga mikunsad ingon ug salampati gikan sa langit, ug kini nagpabilin diha kaniya.

33Ako gayud wala masayud kaniya, apan siya nga nagsugo kanako sa pagpangbautismo sa tubig miingon kanako, `Siya nga imong makita nga pagakunsaran ug pagapuy-an sa Espiritu, mao kana siya ang magapangbautismo diha sa Espiritu Santo.` 34Ug ako nakakita ug gipanghimatuod ko nga kini siya mao ang Anak sa Dios."

PAGPAAMBIT SA MENSAHE:

Ang maong ebanghelyo naghisgot kang Jesu Cristo diin siya mao ang magbalantay kanato nga iyang mga katawhan. Mianhi si Jeus sa kalibutan dili aron sa pagsilot kanato kundili aron sa pagluwas kanatong tanan. Luwas siya sa sala sa panalundon diha sa iyang pagpakatawo kay gitisok man siya diha sa sabakan sa langitnong inahan pinaagi sa gahum as espiritu santo.

Ang pagbunyag kaniya sa tubig maoy pagdawat lamang ug pagpaila sa iyang mga sumusunod nga siya nga anak sa tawo nga gubunyagan sa gahum sa espiritu santo. Ug ang motoo ug mouban sa gisangyaw ni Jesu Cristo maluwas usab. Ang hingpit nga kaluwasan sa atong mga kasal-anan nahitabo didto na sa paghalad ni Jesu Cristo sa iyang dugo ug lawas isip bugti o lukat sa mga kasal-anan sa mga kasal-anan sa mga tawo sa kalibutan.

Mao kini ang misyon ni Jesu Cristo isip nati nga karnero sa Dios diin ang iyang katuyuan mao gayud ang pag giya kanatong tanan, ang pagbilin ug mga pagtulun-an nga langitnon, diin ang pinaka importanting butang didto sa langit mao nag mga bahandi nga espirituhanon diin walay taya nga magakutkut ug kawatan nga magasaka. Apan bulahan ang mga katawhan nga nagpakaubos sa ilang kaugalingon ug nagasunod sa kabubut-on as Dios bisan sa kadaghan sa material nga grasya nga nahiabot sa ilang kinabuhi.

Ang Gugma Ni Jesus Sa Jerusalem

LUCAS 13:31 ~ 35

31 Ug niadtong tungora dihay mga Fariseo nga nangabut ug miingon kaniya, "Pumahawa ka dinhi kay si Herodes buot mopatay kanimo." 32Siya mitubag kanila, "Adtoa ug suginli ninyo ang maong singgalong, `Tan-awa, ginapagula ko ang mga yawa ug ginahimo ko ang pagpang-ayo karon ug ugma, ug sa ikatulo ka adlaw matapus ko na ang akong bulohaton.

33Bisan pa niini, kinahanglan magapadyon ako sa akong panaw karon ug ugma ug sa pagkadamlag; kay dili mahitabo nga ang propeta adto mamatay gawas sa Jerusalem.` 34O Jerusalem, Jerusalem nga nagapatay sa mga profeta ug nagabato sa mga sinugo diha kanimo! Sa makadaghan gipangandoy ko ang pagtigum unta sa imong mga anak, maingon sa himungaan nga nagatigum sa iyang mga piso ilalum sa iyang mga pako, apan nagdumili ikaw!

35Tan-awa, mabiniyaan ang inyong balay. Ug sultihan ko kamo, nga dili na kamo makakita kanako hangtud magaingon na kamo, `Dalaygon ang nagaanhi sa ngalan sa Ginoo!`"


PAPAAMBIT SA MENSAHE:


Ang maong mensahe nagpasabot sa kabalaan sa maong lugar nga Jerusalem, diin mao kini ang gisaad sa Dios Amahan kang Abraham, ug mao kini ang sento sa kristuhanong pagtulon-an niadtong panahuna apan wala kini dawata sa kadaghanan sa mga katawhan didtong dapita kay nagatoo man lagi sa Dios Amahan diin mao kini ang ilang relihiyon niadtong panahuna, ang Judaism. Serado na ang utok sa mga dagkong pariseo nga wala nay laing Dios gawas sa ilang gituho-an.

Si Jesu Cristo nagpasabot usab nga walay propeta nga pagapatyon gawas sa Jerusalem, nga sa ato pa siya nga anak sa Dios ug hari sa mga propeta patyon gayud diha sa Jerusalem aron paglukat sa atong kasal-anan diha sa kamatayon niya sa krus. Apan nagpasidaan siya nga moabot ang adlaw nga mahimo na lamang istorya ang kabalaan sa maong lugar sa Jerusalaem tungod kay bisan ang mga magtoto-o didtong dapita nangawala na.

Karong panahuna matod pa diha sa mga istorya sa internet hina-hinay na nga nawala ang mga magtotoo ni Jesu Cristo didtong dapita, diin dos porsyento nalang ang mga katoliko didto, ug ang pinakadaghan na didto karon kadto na ang mga Muslim, ug mga Judaism. Bisan ang tinuig nga pag dramatize sa pagkatawo sa Dios diha sa pasongan dili na magakatanol kay wala na man ang mga katoliko.


Mao kini ang giingon sa mensahe sa Dios Amahan nga tukoron niya ang bag-ong Jerusalem sa halayong silangan diin ania kana dinhing dapita sa Asia ug diin daghan ang mga magtotoo ni Jesu Cristo dinhing dapita. Daghan nga mga maalam sa bibliya ang nagahubad nga ang maong lugar nga bag-ong Jerusalem ania diha sa atong nasod sa Pilipinas. Ug diin masinati usab nato ang mga paglutos sa mga dautan niining dapita, kay ginaingon sa balaang kasulatan kun usa kakusog sa sumusunod sa Dios nianang lugara mao usab kakusog ang hulga sa dautan.

Katapusang Pahimangno

TITO 3: 12~15

12Kon ikapadala ko na kanimo si Artemas o si Tiquico ba, paningkamoti gayud ang pag-adto kanako sa Nicopolis, kay maoy akong tuyo ang pagpuyo didto sa panahon sa tingtugnaw. 13Paningkamoti gayud ang pagtabang sa pagpagikan kang Zenas nga abogado, ug kang Apolos, nga dili unta sila makulangan sa bisan unsa nga kinahanglanon. 14Ug patun-a ang atong mga sakop sa pagkugi sa mga maayong pamuhat aron sila makatabang sa mga hitabo nga talabangon, ug nga dili unta sila magmadili mabungahon.

PAGPAAMBIT SA MENSAHE

Ang maong mensahe nagpasabot sa pagbuhat gayud sa maayo nga binuhatan ug nagasubay sa kabubut-on sa Dios. Diin gikinahanglan ang kanunay nga pagsuporta sa mga tawo nga gitahasan sa Dios sa mga gimbuhaton.

Nagaingon ang Dios sa iyang mga mensahe, ang mga pinili kung katawhan dili kay magling-lingkod lang ug magahulat sa pagbalik sa anak sa tawo, kinahanglan nga suwayan gayud siya aron makita kun asa kutob ang pagtahod ug pagtuman sa iyang kabubut-on.

Apan hinumdumi igsoon nga kun ang Dios Amahan mohatag sa maong pagsulay , wala gayuy makababag niini. Apan wala ihatag ang mga pagsulay aron sa pagsilot kanimo kundili aron sa pagtuki o pagsuta sa imong kalig-on. Diin susama ka unya sa bulawan nga mosamot ka sinaw kun kanunay nga maigo sa kainit sa kalayo.

Kinsa Ang Labing Dako

LUCAS 9: 46~48

46Ug nahitabo ang usa ka paglalisay nila sa pagsuta kon kinsa kanila ang labing daku. 47Apan sa pagkasabut ni Jesus sa ilang gilalisan nga diha sa ilang mga kasingkasing, iyang gikuha ang usa ka gamayng bata ug iyang gipatupad kini kaniya, 48ug miingon siya kanila, "Bisan kinsa nga tungod sa akong ngalan magadawat niining gamayng bata, magadawat kanako; ug bisan kinsa nga magadawat kanako, magadawat kaniya nga mao ang nagsugo kanako; kay ang labing diyutay kaninyong tanan mao ang daku."

PAGPAAMBIT SA MENSAHE:

Ang maong ebanghelyo nagsaysay sa espirituhanon ug tawhanon nga hiyas o bahandi sa tawo, diin inila ka dinhi sa yuta tungod sa imong bahandi apan didto sa gingharian sa Dios walay pulos ang mao mong mga bahandi kay mahabilin man kini sa yuta. Kung ang imong bahandi nia ra sa yuta nan diha kara usab kutob mas maayo nga adunay kay bahandi nga langitnon aron mao kini imong yabe sa pag-abot sa adlaw sa panudya.

Ginaingon diha sa balaang kasulatan nga kun gusto nimong mamahimong dako didto sa langit nan puy-an nimo ang kinabuhi sa pagpaubos dinhi sa yuta diin puno kini sa paglutos, pagyubit, ug mga kalisod. Kay kinsa kadtong nagpaubos dinhi sa yuta ipataas sa Dios didto sa langit apan ang nagpasigarbo ug nagpataas dinhi sa yuta dili ilhon sa Dios ug ipaubos didto sa langit. Mas maayo puy-an ang kinabuhi diin ipahari nato si Jesu Cristo diha sa atong kasing-kasing, luyo sa mga kasakit ug paglutos , pas-ana ang imong krus sa kinabuhi ug sunod sa mga hiyas na Jesu Cristo.

:

Ginaingon nga lisod ang pag-agi sa dalan paingon sa ginharian sa Dios diin puno kini sa tunok, bato, ug bangilid diin kanang mga dalana mao na kini nga pagtulon-an nga atong gibarugan nga puno sa mga kasakit ug pagbiay-biay. Nga sa ato pa mga igsoon kini usab nga pagtulon-an nagpaka-ubos sa iyang pagbarog dinhi sa ibabaw sa yuta mao usab ang pinakataas nga pagtulon-an ug pinakaimportante nga bato diha sa mga mata sa Dios.

Ang Suga Nga Gitago-an

LUCAS 8: 16~18

16"Walay tawo nga tapus makadagkot sa suga iya kining pagatakloban ug tadyaw o ibutang ilalum sa katri, hinonoa igabutang niya kini ibabaw sa tongtonganan aron sila nga managsulod makakita sa kahayag. 17Kay walay butang nahisalipdan nga dili igapadayag, ug walay butang natago nga dili mahibaloan ug mabutyag. 18Busa kinahanglan magbantay kamo sa inyong pagpamati; kay siya nga adunay iya pagahatagan ug labaw pa, apan siya nga walay iya pagakuhaan bisan pa sa mga butang nga iyang ginadahum nga anaa kaniya."

PAGPAAMBIT SA MENSAHE:

Ang maong mensahe naghisgot sa mga daghang butang kabahin sa hiyas nga langitnon o gasa nga hinatag sa kahitas-an diin dili nato kini ihangol sa atong isigkaingon kay dili kini ato ug gipahulaman lang kini sa kahitas-an.

Ang kahayag nga nahisgotan mao ang kaalam nga langitnon ug tawhanon diin ato kining i-“share” o ipa-ambit sa atong isigkatawo. Sama sa mga hiyas o mga gasa nga gihatag kanimo sa Dios diin ikaw magasangyaw sa iyang pulong ug imo kining ipadayag o isangyaw ngadto sa kadaghanan o sa mga katawhan nga nagkinahanglan sa mga espirituhanon nga mga giya, diin nagaingon ang balaang kasulatan nga sama ra sa imong gikaulaw si Jesu Cristo kun magdumili ka pagsangyaw o pag-”share” sa imong nahibaw-an nga kamatuoran, nan ikaulaw ka usab ni Jesu Cristo didto sa atubangan sa iyang Amahan.

Ang laing nahisgutan sa maong ebanghelyo mao ang grasya nga materyal nga gipiyal kanimo sa Dios diin imo kining i-share o ipahat ngadto sa nagkinahanglan ug sa kanunay magpasalamat pinaagi diha sa mga pag-ampo aron magatubo ang maong grasya nga hinatag sa Dios nga i ug sa ingon kini pagadugangan pa, apan kun imong ihangol ug ihikaw ang maong mga grasya sa imong isigkaingon ug imo lang iwaldas sa walay pagpakabana o pagpasalamat sa Dios nan moabot ang adlaw nga kuhaon sa Dios ang maong grasya ug hasta pa unya ang imong kinabuhi.

Paghukom Sa Uban

LUCAS 6: 37~42

37 "Ayaw kamo pagpanghukom sa uban, ug kamo dili nila pagahukman; ayaw ninyo sila pagpakasad-a, ug kamo dili nila pagapakasad-on; pagpasaylo, ug pagapasayloon kamo. 38Panghatag kamo, ug kamo pagahatagan; ang takus nga pinaugdo, dinasok ug tinantan, ug magaawas, igabutang ra unya diha sa inyong sabakan. Kay ang takus nga inyong igahatag mao usab unya ang takus nga inyong pagadawaton."

39Ug sila iya usab nga gisuginlan niining usa ka sambingay: "Makahimo ba ugod ang usa ka buta sa pagguyod sa laing buta? Dili ba mangahulog silang duha ngadto sa gahong? 40Ang tinun-an dili labaw sa iyang magtutudlo, apan ang matag-usa nga katudloan sa hingpit mahisama sa iyang magtutudlo. 41Nganong tan-awon mo man ang puling nga anaa sa mata sa imong igsoon, ug wala hinoon nimo tagda ang troso nga anaa sa kaugalingon mong mata?

42Ug unsaon mo man sa pagpakaingon sa imong igsoon, `Igsoon, ambi, kuhiton ko kanang puling gikan sa imong mata,` nga dili ka man gani makakita sa troso nga anaa sa kaugalingon mong mata? Maut! Kuhaa una ang troso nga anaa sa kaugalingon mong mata, ug unya makakita ka na pag-ayo sa pagkuhit sa puling gikan sa mata sa imong igsoon.

PAGPAAMBIT SA MENSAHE:

Ang maong ebanghelyo nagtuki sa paghukom diha sa atong isigkatawo, diin nagpasabot ang balaang kasulatan nga dili kita magahukom sa atong isigkatawo aron dili usab kita pagahukman sa Dios. Walay katungod ang bisan kinsang binuhat sa paghukom sa iyang isigkatawo diin ang Dios lamang ang nasayod sa tanan ug siya lamang ang adunay katungod sa paghukom kanatong tanan, ug mao kana ang gitawag nga katapusang paghukom, diin walay pasaylo nga mahitabo ug kitang tanan magaatubang sa tukma nga silot sumala sa atong binuhatan.

Apan lahi ang kinabuhi natong mga tawhanon diin atong ng pagahukman ang unsa man nga atong nakita sa duha ka mata,sa atong nadungog, diha usab sa atong pag-analisar. Mao kini ilang giingon nga maot gayud ang tawo kay maghukom na man gayud kita sa unsay atong makita, diin kun pagtan-aw sa imong isigkatawo nga hambugero ka hambugero ka gayud, ug Makita sa tawo nga mapahitas-on ka mapahitas-on ka na gayud, mao kini giingon sa inengles nga “first impression is everlasting” diin maoy gihatagan sa tawo ug bili sa iyang paghukom ang primero gayud niyang nakita diha nianang tawhana.

Apan ang Dios wala mahimoot niana , lahi ang pamaagi sa Ginoo diin wala gilantaw sa Dios ang imong tawhanon nga kinaiya, diin Makita lamang kini diha sa imong barog ug lihok, maoy gilantaw sa Dios ang imong espirituhanon nga kinaiya diin diha kini makita sa imong kasingkasing. Apan bisan pa ang anak sa Dios sa nagkinabuhi pa dihi sa kalibutan, gihukman usab siya sa mga Judio nga impostor o peke nga anak sa Dios kay ang mga tag-as nga pariseo niadtong panahuna naglantaw man sa usa ka Dios nga hamili ug bahandianon ang mga beste, ug sirado na ang ilang utok niini, apan si Jesu Cristo wala ma niana kay iyang gipuy-an ang panakaubos nga kalidad sa pagkatawo niadtong panahuna, diin walay dayan-dayan ang iyang mga sinina gawas sa amorsiko nga namilit sa sidsid nini.

Usa lamang kini ka pagpahimatngon diin dili maayo ang maghukom pinaagi lamang sa unsay imong makita, mas maayo gayud nga isentro nato ang atong huna-huna sa kabubut-onsa Dios diin lamang ang maykatungod sa paghukom kanato.