Ang Pag-antos Gumikan Sa Pagkinabuhi Nga Balaan

1 PEDRO 3: 8~22

:

:
8 Sa kataposan, kinahanglang magkahiusa mong tanan sa hunahuna: pag-inambitay sa mga problema uban sa pagbati sa usag-usa. Pagmanggiluy-on ug pagmapaubsanon mo. 9 Ayawg basli ang daotan og daotan ni ang insulto sa laing insulto. Hinunoa, panalangin. Mao ni ang panawagan. Sa ingon, panalanginan ka. 10 Kon nangita kag kinabuhi ug gustong makakitag kalipay, ampingi ang dila sa daotan ug ang baba sa pagsultig mga lingla. 11 Talikdi ang daotan ug buhat sa maayo. Pangitaa ang kalinaw ug sunda ni. 12 Kay ang mata sa Diyos nagtan-aw sa katarongan; ang dalunggan naminaw sa hangyo. Apan ang Diyos moyam-id sa nagbuhat og daotan.

13 Kinsay makapasipala nimo kon gihalad ang kaugalingon sa pagbuhat og maayo? 14 Kon nag-antos ka tungod sa katarong, magmalipayon ka. Ayawg kahadlok sa ilang gikahadlokan ni kahasol sama nila. 15 Dayega si Cristo, ang Ginoo sa inyong kasingkasing. Pag-andam kanunayg tubag kon pangutan-on ka sa hinungdan sa imong paglaom. Apan hatag og yanong tubag uban ang pagtahod. 16 Pagbaton og limpyong konsensya aron ang nagpasipala nimo maulawan tungod sa tarong ug Kristohanong pagkinabuhi. 17 Mas maayo pang mag-antos tungod sa pagbuhat og maayo, kon pagbuot ni sa Diyos, kay sa pagbuhat og sayop.

• 18 Hinumdomi giunsa pagpakamatay ni Cristo sa makausa ug alang sa tanan tungod sa atong mga sala. Siya, ang tarong, nagpakamatay alang sa dili tarong aron pagdala nato sa Diyos. Namatay siya sama sa mga tawo, apan gibanhaw sa kinabuhi pinaagi sa Espiritu. 19 Busa, milakaw siya aron pagwali sa mga nabilanggong espiritu, 20 ang kaliwatan nga wala motoo sa Diyos nga sa iyang dakong pailob, miangan-angan pagsilot sa kalibotan, samtang si Noe naghimo pa sa arka diin ang gamayng grupo sa walo ka tawo naluwas sa tubig. 21 Tipo sa bunyag nga nakaluwas. Ang maong pamunyag dili lang paglimpyo sa lawas, apan pagpangayo sab sa Diyos nga magkauliay ta pinaagi sa pagkabanhaw ni Cristo Jesus. 22 Misaka siya sa langit sa tuong kamot sa Diyos human mabuntog niya ang anghel, ang galamhan ug ang kadagkoan.

PAGPAAMBIT SA MENSAHE:

Ang maong mensahe nagpasabot diha sa pagsangyaw sa maayong balita diin matod pa sa inengles “Charity Begins At Home” nga sa ato pa diha sa kaugalingon nato magsumikad ang pagsangyaw sa kamatuoran diin unsa man tuod ang atong isangyaw kun kita mismo wala magausab sa atong kaugalingon, Atong himoon nga sumbanan ang mga pagtulun-an nga gibilin ni Jesus sa iyang mga apostoles diin bisan tuod ug nagatago-tago sila tungod sa mga pagpanlutos ug mga kasakitan nga ilang nasugatan apan wala nila kini baleha kay para kanila bulahan kita nga nagasilbi ug naga sunod sa pagtulun-an nga gipiyal ni Jesus sa mga apostoles.

Bisan ang mga tawhanon nga mga ginikanan ni Jesus sa ilang pagpakabuhi uban kang Jesus sa kanunay gigukod sila sa kalisod kay mao man gayud ang kabubut-on sa Amahan nga ang iyang mga katawhan mag-antos diri sa yuta, kay tam-is dawaton ang grasya nga gihatag sa Dios kun kini patulu-an nato sa atong luha ug mga pag-antos. Usa ka sumbanan nga angay panaminan sa mag kristyanos nga ang bililhon sa Dios dinhi sa kalibutan mao man ang kabulahanan sa atong espirituhanon nga pagkinabuhi diin anaa kita kanunay sa mga pag-ampo ug mga pagsakripisyo.

Usa kini ka panag-ingnan diin dili matugkad sa tawo, kay walay lain nga imporatante diha sa atubangan sa Dios kundili ang kaluwasan sa atong mga kalag diin mas bulahan diay nga magkinabuhi kita nga langyaw kita niining kalibutana apan haom didto sa iyang gingharian, diin atong ayran ug likayan ang mga tawhanon nga mga kailibgon, kay unsaon ta man tuod kun ato ang tanan dinhi sa kalibutan apan walay tumong ang atong kalag inig-abot nga mopauli na kini ngadto sa laing kalibutan.

Usa ka kamatuoran nga ang gingharian sa langit lisod gayud ang pagtultuol ug ang pahiabot didto diin tunokon, bangilid ug sigpit ang mga agianan niini ug maihap lamang ang mga katawhan nga nagatultol sa pag-agi niini, ug kining maga dalana mao kini ang imong pagkinabuhi diin anaa ang mga pagpanlutos mga kasakitan ug mga pagdaug-daug, apan ang dalan paingon sa kalaglagan sa mga sala halu-ag kini , masadya ug magahob diin daghan ang nagmaya samtang naga-agi niini, ug mao kining mga anaa sa atong palibot diin anaa ang mga videoke, mga sugalan, hantakan, ug ang mga patay-sindi ang ilaw. Apan matod pa sa pulong sa Dios nag bulahan pa sila kay inosente pa sila niining maong kamatuoran ug adun pay pasaylo ang Dios para kanila apan kita nga nakatukib na niini nga pagtulun-an sa higayon nga motalikod kita niini wala nay pasaylo ang Dios para kanato.

Ang Buhing Bato Ug Ang Balaang Nasod

1 PEDRO 2: 1~10

2 • 1 Busa, biyai ang tanang daotan ug panglingla, ang kamaot, kasina, ug tanang klase sa libak. 2 Sama sa bata nga bag-ong nahimugso, pangitaa ang lunsayng gatas – sa Pulong – nga makatabang nimo pagtubo ug pagkab-ot sa kaluwasan. 3 Wala ka ba makatagamtam sa kaayo sa Ginoo? 4 Ang bato siyang buhi nga gisalindot sa katawhan, apan ang Diyos nagpili niya. Bililhon ni alang sa Ginoo. 5 Sa pagduol ninyo, nabuhi mong bato nga gitukod sa espirituhanong templo: balaang katilingban sa kaparian nga naghalad og espirituhanong sakripisyo nga nakapahimuot sa Diyos pinaagi ni Cristo Jesus. 6 Nag-ingon ang Kasulatan: “Tan-awa, nagbutang ko sa Sion og pinili ug bililhong bato nga sukaranan. Ang motoo niya dili makawang.”

7 Dungog ni alang ninyo nga mitoo. Sa dili matoohon, ang bato nga gisalindot sa magtutukod nabato nga sukaranan. 8 Bato ni nga kapandolan, ang batong lag-it nga nakapukan sa katawhan nga mapandol sa pagsalikway nila sa Pulong. Apan natuman ang plano sa Diyos. 9 Mga pinili mong kaliwat, katilingban sa kaparian-kaharian; nasod nga gibalaan; katawhang gihimo sa Diyos nga iyaha aron mosangyaw sa iyang mga katingalahan. Kay gitawag mo gikan sa kangitngit ngadto sa kaugalingong kahayag. 10 Kanhi, dili mo katawhan, apan karon katawhan na mo sa Diyos; wala makadawat sa iyang kaluoy, apan karon gihatagag kaluoy.

PAGPAAMBIT SA MENSAHE:

Ang maong mensahe nagpasabot diha sa duha ka butang una si Jesu-Cristo nga mao ang buhing bato nga maoy gihimong haligi niining maong pagtulun-an diin gipakaingon sa uban nga walay pulos apan maoy gipili sa Dios ug maoy sumbanan sa tanang pagtulun-an dinhi sa yuta ug sa langit, Ang balaang nasod mao ang nasod sa Jerusalem diin maoy sentro sa pagtulun-an niadtong panahuna diin didto nagsumikad ang kaliwatan ni Abraham ug ni David ug usab didtong dapita nagsumikad si Jesus ang hari sa mga hari Ug ang atong manunubos ug manluluwas sa atong pagka makasasala.

Daghan ang mga pagtulun-an nga nanggawas niini karong panahuna ug usab daghan ang nagpasibantog sa ilang kaluwasan pinaagi sa pagtulun-an nga imong gibarugan, apan ang pulong sa Dios naga-ingon, walay pagtulun-an nga makaluwas sa tawo kundili ang iya lamang pagtuo ug pagsunod sa kabubut-on sa Dios, diin diha sa ubang sinulat nagaingon nga ang kaluwasan sa atong kalag mao kini ang gisaad ni Jesus kanato diha sa pagsunod sa iyang kabubut-on apan wala kini magpasabot nga ang kaluwasan usa ka ganti o premyo tungod sa imong maayong buhat kindili usa kini ka grasya o gasa nga hinatag gikan sa Dios Amahan aron sa ingon walay makapasigarbo diha sa atubangan sa Dios nga siya maluwas tungod sa iyang maayong binuhatan kundili ang kaluwasan iyang gihatag kanato isip gasa ug sa iyang gugma kanatong tanan.

Apan maoy himoong panag-ingnan ang mga kasakitan ni Jesus diha sa iyang pagpapakabuhi dinhi sa kalibutan, diin nagpuyo siya ug nagpakabuhi nga sama sa usa ka ordinaryong tawo. Diin diha sa Pilipos 2 nagaingon nga bisan siya Dios apan wala niya ipamugos ang iyang pagkaDios hinunu-a nagpakaubos siya ug mitipon sa mga kabos ug sa mga tinamay, diin tungod sa dako niyang kadaugan sa pagtuman sa kasugo-an sa iyang Amahang Dios gitagaan siya ug dungganan nga ngalan ug ang tanang binuhat sa yuta ug sa langit nagasimba ug nagaluhod sa iyang ngalan nga Jesus.

Usa kini ka pagtulun-an nga nagaingon nga ang giisip nga maoy nahinungdanon sa tawo dinhi sa yuta walay pulos didto sa gingharian sa Dios ug ang giisip sa tawo nga walay pulos ug binuang lamang dinhi sa ibabaw sa yuta moy labing mahinungdanon didto sa gingharian sa langit. Nga sa ato pa dili diay angay nga atong ipalabi ang atong mga tawhanon nga ambisyon kay wala kini gamit didto sa langit, diin mas bililhon nga matagaan ug maayong panahun ug presentasyon ang atong kalag inig-abot sa adlaw sa panudya , kay matod didto unya sa la-ing kalibutan, diin mahiabot ang atong kalag inig-abot sa adlaw sa panudya diin matod pa walay siguro nga maluwas ang atong kalag bisan diha sa kanunay nga mga pag-ampo sa nagkinabuhi pa kita dinhi sa kalibutan nan unsa na kaha ang mga katawhan nga walay mga pag-ampo ,asa kaha paingon ang ilang kalag.

Ang Wali Ni Pedro

BUHAT 10: 34 ~ 43

:

34 Unya, si Pedro miingon, “Sa pagkatinuod, nakaamgo ko nga ang Diyos walay pili. 35 Hinunoa, nagpatalinghog siya sa kanasoran nga mahadlokon sa Diyos ug nagbuhat sa maayo. 36 Kini ang mensahe nga iyang gipadala sa mga anak sa Israel, ang Maayong Balita sa kalinaw nga iyang gipadayag pinaagi ni JesuCristo, ang Ginoo sa tanan. 37 Walay duhaduha, nakadungog na mo sa dakong hitabo sa tibuok kayutaan sa mga Judio.

Nagsugod ni sa Galilea, human sa bunyag nga giwali ni Juan. 38 Nasayod mo giunsa sa Diyos pagdihog si Jesus ang Nazareno sa Espiritu Santo ug sa gahom. Naglakawlakaw siya nga nagbuhat og maayo ug nag-ayo sa naa sa gahom sa yawa, kay ang Diyos nag-uban man niya. 39 Mga saksi mi sa tanan niyang gihimo sa tibuok kayutaan sa mga Judio ug sa Jerusalem mismo.

Sa kataposan gipapatay siya pina-agi sa pagpabitay niya sa krus nga kahoy. 40 Apan ang Diyos mibanhaw niya sa ikatulong adlaw, ug gipadayag siya 41 dili sa tanang tawo kondili, sa mga saksi nga napili nang daan sa Diyos – kanamo nga nangaon ug nanginom uban niya human sa pagkabanhaw. 42 Ug gimandoan pagwali ini sa katawhan ug pagsaksi nga gitudlo siya sa Diyos aron paghukom sa mga buhi ug patay. 43 Ang tanang propeta nag-ingon bahin niya, nga ang motoo pasayloon sa ilang sala tungod sa iyang Ngalan.”


PAGPAAMBIT SA MENSAHE:

Ang maong ebanghelyo naghisgot diha sa mga wali ug ang mga pagtulun-an sa mga mabuot nga apostoles diin diha sa pagsangyaw niya sa mga pulong sa Dios kanunay nagasunod ang mga pagsulay, apan bulahan sila kay nagasunod sa kabubut-on sa Dios ug maoy mga ehemplo diha sa maong ebanghelyo nga nagaingon, Ang katawhan nga mahadlukon sa Dios ug sa kanunay nagasunod sa iyang kabubut-on kanunay gayud makadawat sa iyang grasya ug panalangin sa walay pagpili sa iyang bulok o pamanit.

Diha asa ubang sinulat ug sa mga kasugo-an sa Dios nagaingon, nga ang iyang katawhan sama sa balas sa baybayon kabaga o kadaghan apan pipila pa lamang kahakop ang iyang natawag ug maihap lamang usab ang iyang mga pinili ug mga tinawag nga sa ato pa nga ang Dios diay namili gayud sa mga katawhan nga adunay bug-os ug tim-os nga pagtuo ug pagsalig diha kaniya. Nga sa ato pa ang mga pinili nga katawhan sa Dios pagapili-an pa diin matod pa sa mga buhing pulong sa Dios ang mga katawhan sa Dios dili lamang kay magalingkod-lingkod lamang ug magahulat sa iyang pagbalik kundili pagasulayan gayud sila sama sa bulawan diin ipaagi gayud sa kalayo aron masuta ang kapuro niini, nan mao usab kitang tawo diin sa kanunay anaa ang mga pagsulay arong sa pagtikay ug pagsukod sa iyang pagtuo ug pagsalig sa Dios.

Bisan kadtong mga mabuot nga mga apostoles sama kang Pedro ug kang Pablo diha sa pagsunod nila sa kabubut-on sa Dios dili matukib sa pulong ang mga kalisod ug pagsulay nga ilang naagi-an. Diin niadtong panahuna didto lamang sa kasikbit sa Jerusalem ang mga pagsangyaw nga ilang gihimo diin didto sila sa Roma diin mao kadto ang sentro sa sibilisasyon niadtong panahuna diin kadaghanan sa namunu-an sa Roma wala magatuo sa Dios o mga pagano.

:

Ang mga mabuot nga apostoles didto sa dapit sa Roma nakabsan sa ilang kinabuhi diin sila gipangdakop, gibitay nga nagtu-ali ug giputlan sa ulo diin diha sa ilang kamatayon wala nila kini kahadloki diin diha sa akto sa pagputol sa ilang liog gihimaya nila ang Dios pinaagi sa paghalad ug mga langitnong mga awit kay para kanila wala nay pulos ang ilang kinabuhi kay nasayod sila kun kinsa ang ilang gisimba ug gipasidunggan ug mas mahinungdanaon kanila ang kaluwasan sa ilang kalag . Usa lamang kini ka pagtulun-an ug kamatuoran nga nahasulat dia sa balaang kasulatan diin nagaingon nga ayaw kahadloki ang tawo nga makapatay lamang sa imong lawas apan walay mahimo sa imong kalag maoy kahadloki ang Dios nga dako ug mahimo sa kaluwasan ug kalaglagan sa imong kalag.

:

Gipanalipdan Ni Pablo Ang Iyang Pagtoo

ROMA 8: 1~17

1 Ako, si Pablo mismo, nanga muyo ninyo sa kamapaubsanon ug kamaluluy-on ni Cristo. Ang Pablo “mahadlokon sa taliwala ninyo ug isog sa layo!”2 Ayaw kog pugsa pag-inisog inig-abot nako. Kay disidido ko, ug gani mangahas pagpakigbatok sa pipila nga nagtoo nga kalibotanan ang akong pagkinabuhi. 3 Bisag nagkinabuhi ko sa ingon, dili ko makigbisog alang ini.

4 Ang among hinagiban dili tawhanon apan, salamat sa Diyos, gamhanan alang sa pagguba og mga kota. Mangguba mig mga katarongan ug mapahitas-ong hunahuna 5 nga supak sa kahibalo sa Diyos. Among gipugos ang tanang panabot sa pagsunod ni Cristo. 6 Andam ko pagsilot sa tanang masupilon, kay kinahanglang magtahod mo sa hingpit.

7 Tan-awa ang mga butang sa ilang pagkasila. Kon ang usa ka tawo nagtoo nga kang Cristo siya, maghunahuna unta siya: sama nga kang Cristo siya, ako sab iya ni Cristo. 8 Bisag mora kog naglaom pag-ayo sa gahom nga gihatag kanako sa Ginoo aron pagtukod ninyo ug dili aron pagguba, dili ko maulawan tungod ini. 9 Ayawg hunahuna nga makahadlok ko ninyo sa mga sulat lang. 10 “Ang iyang mga sulat ugdang ug gamhanan,” nag-ingon ang pipila, “apan siya mismo, walay pamarog ug dili maayong mosulti.” 11 Ingnon ko sila: “Pagbantay: ang akong gisulat gikan sa layo, mao poy akong buhaton inig-anha nako.”

12 Nganong mangahas man mi pagpakigsama o pagtandi sa kaugalingon sa mga tawo nga nagpagarpar sa kaugalingong katakos? Mga buang! Gisukod nila ang kaugalingon sa kaugalingong sukod. Gitandi nila ang kaugalingon kanila mismo. 13 Apan kami, dili namo palab-anan ang among hambog. Dili namo lapason ang sukod nga gitakda kanamo sa Diyos nga magsukod sab ninyo. 14 Wala namo palab-ani ang among gibuhat diha ninyo ingon nga naglapas sa sukod daw wala makaabot ninyo. Una ming miduol ninyo dala ang Ebanghelyo ni Cristo. 15 Inay nangandak diin naghago na ang uban, naglaom mi nga samtang nagtubo ang inyong pagtoo modako pod ang among pag-alagad sa walay paglapas sa utlanan. 16 Sa ingon dad-on namo ang Ebanghelyo unahan pa sa inyo nga dili makapanghilabot sa gihagoan na sa uban ug nga dili mangandak diin nahuman na ang buluhaton. 17 Ang manghambog, pahamboga sa Ginoo. 18 Dili ang nagdayeg sa kaugalingon maoy mauyonan kondili, ang gidayeg sa Ginoo

PAGPAAMBIT SA MENSAHE:

Ang maong mensahe nagsangyaw diha sa katakos ni Pablo isip maoy usa sa pinakamaisog nga magsasangyaw sa panahun ni Kristo diin diha sa unang kinabuhi gitawag siya ug Saulo nga maisogon nga nagsangyaw ug naglutos sa mga sumosunod ni Jesus. Apan nakita sa Dios ang iyang pagkamatinuon sa pagtulon-an nga iyang gibarugan, diin niadtong panahuna ang pagtulon-an nga naghari sa wala pa si Jesus mao kadtong pagtulun-an nga nagasimba lamang sa Dios Amahan diin gitawag kini ug Judaism, diin hangtod karong panahuna anaa pa kini didto sa Jerusalem, Ang ilang Dios gitawag kini nila sa Hebrew nga pinulongan ug Yahweh.

Matod pa sa atong mga pari nga nahiabot didto as Jerusalem, hilabihan ka estrikto ang maong pagtulon-an diha sa pagrespeto nila sa Dios Amahan diin kun moingon ka ug Yaweeh diha sa atubangan sa mga tawo nga Judaism kinahanglang nga imo kining litokon nga pinaduko ang ulo ug adunay respeto . Nan unsa na kaha niadtong panahun ni Jesus diin adunay dako ug kagahum ang relihiyon o pagtulon-an diha sa pag-inpluwensya sa ilang gobyerno. Mao kana ang gibati ni Saulo niadtong higayona diin nagtoo siya nga usa lamang ka pagtoo-too ang pag-ingon nga anaksa Dios nga si Jesus.

Apan gitagaan siyag ug tsansa sa Dios pinaagi sa pagtawag kaniya pinaagi sa balatian diin gipakita kaniya ang milagro nga ang iyang gilutos ug ang iyang gisimba usa ra kay ang Dios nga Amahan, Dios Ang anak ug Dios nga espiritu usa ra kini sila, diin maglisod kita ug tukib sa maong kamatuoran kay mao kini ang usa sa mga tinago nga kamatuoran diin wala pay tawo nga gitugotan sa Dios sa pagtukib diha sa mga lawom nga mga pagtulon-an sa kahitas-an.

Apan sa nahimo na si Saulo nga Pablo ug nagasangyaw sa kamatuoran sumala sa gipadayag ni Jesus, siya na usab ang gilutos sa iyang mga kauban ug sa mga dagkong pariseo sa panggobyerno. Apan iyang gipakita nag iyang kaisog diin ilan gitadlas ang mag kasikbit nga mga nasod sama as Roma ug Italya, nga maoy mga sentro sa sibilisasyon niadtong dapita. Niadtong panahuna ang Roma wala pa makatukib sa pagtulun-an ni Jesus diin kadaghanan sa mga nagadala sa gobyerno didtong dapita mga pagano ug wala gayud magasimba sa kristuhanon nga pagtulon-an.

:

Didtong dapita sila si Pablo ug uban pang mga maisog nga apostoles gipangdakop gigapos ug gibitay nga gatuali diin diha sa pagbitay kanila ug sa pagputol sa ilang ulo wala nila kahadloki ang Dios hinunu-a diha sa akto sa ilang kamatayon gihimaya nila ang Dios, nanag-awit sila sa mga kanta sa pagdayeg sa Dios kay para kanila walay pulos ang ilang lawas, ang mahinungdanon ang kahimayaan sa ilang kalag uban kang Kristo Jesus, Kay matod pa sa balaang kasulatan, ayaw kahadloki ang tawo nga makapatay sa imong lawas apan walay mahimo sa imong kalag maoy kahadloki ang Dios nga maoy tag-iya sa atong lawas ug kalag.

Kinabuhi Nga Minandoan Sa Espiritu

ROMA 8: 1~17

8 • 1 Wala nay dakong panagsungi alang sa nagpuyo diha ni Jesu Cristo, 2 kay diha niya ang Balaod sa Espiritu sa kinabuhi nga nagluwas nako sa balaod sa sala ug kamatayon. 3 Walay epekto ang balaod, kay ang unod wala man mosanong. Unya, ang Diyos nga naglaraw pagpukan sa sala, mipadala sa kaugalingong Anak nga daw tawong makasasala aron pagbuntog sa sala ining tawhanong kahimtang. 4 Gikan adto, ang kahingpitan nga tumong sa Balaod matuman na diha nila nga naglakaw dili sa dalan sa unod kondili, sa Espiritu.

• 5 Ang naglakaw sumala sa unod hilig sa mga butang sa unod; ang gidumala sa espiritu hilig sa mga butang sa espiritu. 6 Ang unod nagpunting sa kamatayon; samtang ang espiritu, sa kinabuhi ug kalinaw. 7 Gitinguha sa unod ang supak sa Diyos, bisan gani sa balaod sa Diyos. 8 Busa, ang naglakaw sumala sa unod dili makapahimuot sa Diyos. 9 Apan dili mo ubos sa pagdumala sa unod kondili, sa espiritu kay ang Espiritu sa Diyos naa man ninyo. Kon wala pa, dili unta mo masakop ni Cristo.


10 Apan kon si Cristo naa ninyo, bisag ang lawas mamatay isip sangpotanan sa sala, ang espiritu magpabiling buhi kay grasya man ni sa Diyos. 11 Kon ang Espiritu sa mibanhaw ni Cristo sa minatay naa ninyo, ang mibanhaw ni Cristo mobanhaw sab ninyo. Iya ning buhaton pinaagi sa iyang Espiritu nga nagpuyo diha ninyo. 12 Unya, mga igsoon, biyaan ta ang unod ug dili na magpuyo sumala ini. 13 Kon dili, mamatay ta. Hinuon, maglakaw ta sa Espiritu ug patyon ang mga buhat nga lawasnon aron mabuhi ta. 14 Ang naglakaw sa Espiritu sa Diyos, mga anak sa Diyos.

15 Mawala na ang kahadlok, kay wala man mo makadawat sa espiritu sa kaulipnan. Ang inyong nadawat mao ang Espiritu nga naghimo ninyo nga mga anak. Matag sangpit nato: “Abba, Amahan,” 16 ang Espiritu nagpasalig sa atong espiritu nga 17 mga anak ta, ug mga sumusunod. Maato ang kabilin sa Diyos nga paambitan nato ni Cristo; kay kon nag-antos ta karon uban niya, moambit sab ta sa Himaya uban niya.

PAGPAAMBIT SA MENSAHE:

Ang maong ebanghelyo nagpasabot diha sa kinabuhi nga nagasunod sa kabubut-on sa espiritu santo sa Dios diin matod pa sa ubang sinulat mas maayo nga magapuyo kita nga haom didto sa iyang gingharian sa langit apan langyaw niining kalibutana kay mag-unsa man kun hupong ka sa mga tawhanon nga kailibgon ug diin walay atiman ug napasmo ang imong kalag kay wala man kini mga pag-ampo nga nadawat.

Sa ubang sinulat nagaingon, nga kun ang imong bahandi ania lang sa yuta nan dinhi ka ra usab kutob diin mas maayo ang adunay kay bahandi nga espirituhanon o langitnon aron maoy atong ikasarang kun moabot na unya ang katapusang paghukom. Diha unya sa paghiabot nato sa laing kalibutan o diha sa gitawag nga kamatayon diin ang atong espirito maoy mobalik sa Dios ug mosumbong sa imong mga kalapasan ang atong tawhanon nga lawas maoy mahabilin diin kini madugta ug mobalik sa abog apan ang atong kalag maoy mopadayon paingon didto sa laing kalibutan diin ang kamatayon diay maoy siniugdanan sa bag-ong kinabuhi para sa imong kalag. Diin dili na kita makadminister sa atong kalag nga matod pa sa ubang sinulat bisan ang katwhan nga sa kanunay naga-ampo diha sa paghimaya sa Dios apan puhon diha sa iyang ikaduhang kinabuhi human sa kamatayon dili na nato masiguro nga maluwas ang atong kalag, kay dili na kita ang naga-administer sa atong kalag nan unsa na kaha kadtong mga tawo nga walay mga pag-ampo asa sad kaha punita ang ilang mga kalag.

Apan bulahan ka igsoon kun tinawag ug pinili nga sa Dios diin nakaplag ka niining tinago nga kamatuoran kay ang atong Dios dili gayud mosugot nga dili kita makaduol kaniya sa dili pa moabot ang kataposang gutlo sa imong kinabuhi. Kay matod pa ang kaluwasan nga gisaad sa Dios iyang ihatag ngadto sa mga pinili nga katawhan apan dili pagasabton nga usa kini ka ganti o premyo tungod sa maayong buhat aron sa ingon walay makapasigarbo diha sa atubangan sa Dios nga siya naluwas tungod sa mga maayong buhat kundili kita maluwas tungod sa grasya ug kalooy sa Dios.

Gibunalan Ug Gibugalbugalan Si Jesus

LUCAS 22: 63~65

63 Gibugalbugalan ug gibunalan si Jesus sa mga nagbantay; 64 gitaptapan ang mata ug gipangutana: “Kinsay mihampak nimo? Tag-ana.” 65 Giinsulto siya pag-ayo

PAGPAMBIT SA MENSAHE:

Ang maong mensahe naghubit diha sa mga kasakitan ni Jesu Cristo diin iyang gipakita ang ehemplo as usa ka lider ug sa usa ka tawo nga manunod sa trono sa Dios Amahan. Tawo siya ug Dios usab siya diin matod pa diha sa ubang sinulat, siya maoy ikaduhang Adan nga nagpakabuhi niining kalibutan apan wala siya magagikan sa abog kundili nagagikan sa lalang sa espiritu santo sa Dios nga gitisok sa sabakan ni birhen Maria. Sa ubang sinulat nagaingon nga bisan siya Dios apan wala niya ipamugos ang iyang pagkaDios hinunu-a nagpakaubos siya ug mitipon sa mga katawhan nga kabos ug misangyaw sa pulong sa Amahan pinaagi sa pagpakita ug maayong sumbanan, diha sa mga milagro sa pag-ayo sa mga masakiton , ug diha sa pag pakaubos sa iyang kaugalingon diin iyang gipakita ang sumbanan sa usa ka matuod nag lider diin bisan siya ang kamatuoran ug ang kahayag apan tagaan niya ug kagawasan ang iyang mga katawhan kay lagi ang Dios hataas ug pasensya.

Usa ka kamatuoran nga dili malalis nga ang pagpasakit diay dinhi sa ibabaw sa yuta mao lamay pagdawat sa kabubut-on sa Dios kay matod pa sa ubang sinulat sa balaang kasulatan, Kun gusto nato nga himayaon ug daygon didto sa gingharian sa Dios nan puy-i ang kinabuhi nga puno sa pagdaug-aug ug pagtamay ug pagdawat sa mga paglutos dinhi sa yuta, pas-ana ang imong krus sa kinabuhi ug sunod sa mga pagtulun-an ni Jesus, diin bulahan ka nga makaambit sa mga kasakitan ni Jesus didto sa pagpalansang niya sa krus kay makaambit ka usab sa himaya sa iyang pagkabanhaw didto sa langit.

Sa maong ebanghelyo mga igsoon diin gipakita ug gisay-say ang pagbugal-bugal ug pag-insulto sa pagkatawo ni Jesus mao lamay pagpakita isip sumbanan nga ang pagdawat sa kasakitan dinhi sa yuta ug mga pagsinati sa mga paglutos ug pagbiay-biay, nagpasabot lamang kana mag igsoon nga dili ka martir ug wala ka magpadaug-daug kun dili imong gidawat ug gipahari si Jesus diha sa imong kasingkasing.

Ang Milagro Nga Buot Nilang Tan-awon

LUCAS 11: 29~32

29 Diha nga nagkapundok na ang mga tawo, miingon nila si Jesus: “Daotan ang katawhan karong panahona. Nangita silag timailhan, apan walay ihatag gawas sa timailhan ni Jonas. 30 Ingon nga si Jonas natimailhan alang sa katawhan sa Ninive, ang Anak sa Tawo timailhan alang ining kaliwata. 31 Ang Rayna sa habagatan mobangon sa Adlaw sa Hukom uban sa katawhan ining panahona, mosumbong nila, kay mianhi man siya gikan sa mga utlanan sa kalibotan aron pagpamati sa kaalam ni Solomon. Ania dinhi ang mas dako pa ni Solomon. 32 Ang mga lalaki sa Ninive mobarog sa Adlaw sa Hukom uban sa katawhan ining panahona. Isumbong sila, kay ang wali ni Jonas nakapabiya nila sa kasal-anan. Ania dinhi ang mas dako pa ni Jonas.

PAGPAAMBIT SA MENSAHE:

Ang maong mensahe nagtagik diha sa pagsangyaw sa pulong ug mga milagro sa Dios diin miingon si Jesus sa panahon ni Solomon ug ni Naïve diin gihimaya nila ang Dios niadtong panahuna diin si Solomon ginaingon diha sa unang kasulatan nga siya ang usa sa pinakamaalam nga tawo niadtong panahuna kay matod pa ang mga mananap ang hangin ug ang tanom pwede niya nga istoryaahon apan ang anak sa Dios ug bugtong manunod sa trono sa langit labaw pa kay ni Solomon ug ni Naïve.

Wala kahimut-i ni Jesus ang mag katawhan niadtong panahuna diin gusto una sila nga makakita sa milagro ayha sila motuo sa iyang gipanulti, diin mas bulahan kadtong mga katawhan nga mituo ug mipasidungog sa Dios bisan wala pay mga milagro nga nakita, kay matod pa mas bililhon ang mga butang nga dili nato makita ug mahikap diin ato kining gituhu-an nga iya sa Dios kay mao man usab kining mga butanga nga walay kataposan ug maoy mdala sa atong kalag didto sa laing kalibutan.

Ang mga milagro diha sa atong pagkatawo ug pagsunod sa kabubut-on sa Dios, kini mokunsad lamang kun kita adunay hugot usab nga pagtuo sa Dios , nga sa ato pa ang mga milagro diha nga imong gipangayo sa kahitas-an magadepende usab sa imong pagtuo, diin kun moingon kita ug pagtuo sa Dios nagpasabot kini nga sa adunay kay pagsalig, adunay kay pag-laom ug adunay kay pasensya ug labaw sa tanan adunay kay mga pag-ampo ug mga Diosnon nga binuhatan. Santiago 1: 17 nagaingon ang pagtuo nga walay binuhatan sama sa lawas sa tawo nga walay espiritu, patay kini, sa ato pa ang pagtuo nga walay binuhatan patay usab kini. Nan angayan diay nga atong ipakita ang pagtuo sa Dios pinaagi sa buhat aron makita nato usab ang himaya sa Dios pinaagi sa iyang mga milagro.

Gamita Ang Inyong Lawas Sa Paghimaya Sa Dios

1 CORINTO 6: 12~20

• 12 Ang tanan gitugot kanako sa balaod. Apan dili ang tanan makatabang nako. Ang tanan gitugot kanako sa balaod, apan dili ko magpaulipon sa bisag unsa. 13 Ang pagkaon alang sa tiyan, ug ang tiyan alang sa pagkaon, apan ang Diyos molaglag ini. Ang lawas hinunoa, dili alang sa pamuta kondili, sa Ginoo; ug ang Ginoo alang sa lawas. 14 Ang Diyos nga nagbanhaw sa Ginoo, mobanhaw sab nato pinaagi sa iyang gahom.

15 Wala ba mo masayod nga ang inyong lawas mga bahin ni Cristo? Himoon ba ninyo ang maong bahin nga bahin sa puta? Dili motugot ang Diyos! 16 Wala ba mo masayod nga ang nakighilawas sa puta, nahiusa niya? Ang Kasulatan nag-ingon: Ang duha usa ka lawas. 17 Sa laing bahin, ang nahiusa sa Ginoo nahimong espiritu uban niya.

18 Likayi sa hingpit ang pamuta. Ang ubang sala nga buhaton sa tawo wala maggamit sa lawas. Apan ang namuta nakasala batok sa kaugalingong lawas. 19 Wala ba mo masayod nga ang inyong lawas templo sa Espiritu Santo nga naa sulod ninyo, hinatag sa Diyos? Dili na mo tag-iya sa inyong kaugalingon. 20 Hinumdomi ang presyo sa gibayad alang ninyo. Busa, himayaa ang Diyos sa lawas ug sa espiritu nga iya sa Diyos.


PAGPAAMBIT SA MENSAHE:

Ang maong ebanghelyo naghisgot diha sa paghalad nagdto sa Dios ang tanan nga anaa diha sa atong pagkinabuhi niining kalibutana. Kay ginaingon diha as ubang sinulat nga walay pulos ang mga tawhanon nga mga kinaadman ug kaalam didto sa gingharian sa Dios kay mao man ang mahinungdanaon diha sa atong pagkatawo ang pagkinabuhi nga espirituhanon diin maoy atong sumbanan ang mga lihok ni Jesus diha sa iyang pagpakatawo diin bisan siya Dios apan wala niya gamita ang iyang pagkaDios hinunu-a nagpakaubos siya ug mitipon sa mga kabos ug timawa ug nagpakapobre ug nagpakaulipon diha sa iyang mga katawhan nga gisangyawan.

Nan kun kita nga tawo diin hupong sa mga tawhanon nga grasya angayan lamang sa karon ug unya atong ipamahin o ihalad ngadto sa Dios kay pinaagi unya niana mahiuban sa iyang panalangin ang atong tawhanon nga kinaadman diin pinaagi usab sa pagtabang sa imong mga isigkaingong ug pinagi sa imong mga tawhanon nga kaalam kanunay ka usab nga mapanalanginan sa Dios.

Kay matod pa ang lawas sa matag tawo balaan kay anaa man ang espiritu santo sa Dios nagapuyo diha sa atong lawas nga sa ato pa templo kita sa Dios espiritu santo, nan ang atong lawas aduna na kini tahas dinhi niining kalibutana diin maoy tumong ug tuyo sa Dios nga ibalaan ang atong kaugalingon kay aron sa kanunay makadawat kita sa kahimayaan sa Dios ug sa iyang apanalangin inig-abot sa tukmang takna.