Ang Kristuhanong Pagkinabuhi

TITO 3: 1~11

3 • 1 Pahinumdomi ang mga magto too nga magmasinug-tanon sila sa mga punoan ug sa awtoridad. Magmatinahuron ug maghimo sila sa kinaugalingong paningkamot sa pagbuhat og maayo. 2 Sultihi sila sa dili pagpanginsulto ni bisag kinsa. Dili sila palaaway. Hinuon, aghop ug masinaboton sa tanan.

3 Buang sab ta kaniadto, masinupakon ug nasalaag; naulipon sa atong mga pangandoy ug nangita sa bisag unsang matang sa kalingawan. Nagpuyo ta sa kasina ug kadaotan. Nasilag ug gikasilagan nato ang usag usa. 4 Apan ang Diyos nagpakita sa dakong kaayo ug gugma alang sa katawhan. 5 Giluwas ta niya, dili tungod sa maayo tang binuhatan kondili, sa kaugalingon niyang kaluoy. Gipakatawo ta niyag usab sa bunyag ug gibag-o sa Espiritu Santo 6 nga gibubo kanato diha ni Cristo Jesus, atong Manluluwas. 7 Sa grasya sa Diyos gibalaan ta niya. Naglaom ta karon sa kinabuhing walay kataposan, ang atong kabilin.

• 8 Mao ni ang kamatuoran. Gusto ko nga padayonon ninyo kining mga butanga. Kay ang mitoo sa Diyos manghawod sa mga maayong buhat. Mao ni ang mahinungdanon ug mabungahon alang nato. 9 Likayi ang binuang nga pakiglantogi, ang pagdukiduki bahin sa kaliwatan, ang pag-away-away mahitungod sa Balaod. Wala niy kapuslanan ug dili mahinungdanon. 10 Kon may mopasiugdag mga sekta sa simbahan, pasidan-i siya sa makausa ug unya, sa makaduha. Kon magpadayon siya, pahilayo niya. 11 Nasayod ka nga kining tawhana nasalaag ug makasasala. Siyay nagsilot sa kaugalingon.

PAGPAAMBIT SA MENSAHE:

Ang maong ebanghelyo nagtukib o nagpahibalo diha sa pagkinabuhi nga kristuhanon dinhi sa ibabaw sa kalibutan. Ang pagkinabuhi nga iya ni Kristo mao ang pagsul-ob sa kinaiyahan nga maoy gisangyaw ni Jesus diha sa iyang pagpakabuhi niining kalibutana, diin iyang gihimong sumbanan ang iyang kaugalingon pinaagi sa pagpakabuhi nga daw sama sa ulipon, lider siya sa tinukod niyang iglisea apan nagpakaubos siya sa tanang ubos diha sa matuod nga iglisea. Kay para sa Dios ang usa ka pangulo sa iglisea magsilbi sa iyang katawhan diha sa espirituhanon ug tawhanon nga pamaagi.

Iyang gipasabot nga sa higayon unya nga siya mobalik na ngadto sa kiliran sa iyang amahang Dios nan mao na kana ang sinugdanan diha sa atong pagpuasa sa mga kasal-anan, kay wala na man ang iyang tawhanong lawas uban kanato. Nga sa ato pa ang pagpuasa nagkahulugan diha sa paglikay sa pagpakasala sa huna-huna sa pulong ug sa buhat. Kini nagasugod niadtong pagkabanhaw ni Jesus ug dili kita moundang sa pagpuasa hangtod nga dili mobalik ang anak sa Dios aron sa pagsilot ug paghukom kanatong tanan.

Sa ato pa dili lang diay panahon sa mahal nga adlaw ang pahinulsol sa mga kasal-anan kundili sa matag-adlaw nga tanan. Kay matod pa diha sa ubang sinulat, mas bulahan kun nagapuyo ka nga langyaw niining kalibutana apan ha-om didto sa gingharian sa Dios kay sa magpuyo ka nga ha-om niining kalibutana diin puno sa tanang tawhanon nga kailigon apan dili ilhon nga anak sa Dios ug sirhan ang ganghaan sa langit para kanimo. Ang balaang bata nagaingon, Sr. Santo Niño, nga kun nasayod pa lang unta kita kun unsa ang atu-a didto sa ilang gingharian sa langit nan dili na unta kita magpalabi diha sa mga tawhanon nga mga kailibgon ug mga bahandi ug biyaan ta kining tanan ug maoy atong siguroon kun unsaon nato paghiabot didto sa gingharian sa Dios.

Apan maoy gayuy gilatid sa Amahan nga ang iyang tinawag ug pinili nga katawhan mag-agi gayud diha sa mga kalisdanan, diin daghan ang mga paagi sa pagtawag kanato sa Dios diin nagaingon usab Siya diha sa uban niyang mga pulong nga tawgon ko ang akong katawhan pinaagi sa balatian aron sa kanunay mahinumdom ug moduol sila kanako. Ug ang Dios miingon nga dili tanan tawo dinhi sa kalibutan ang Iyang gitawag, ug kadtong wala tawga ug pili-a sa Dios nan dinhi lang sila kutob sa kalibutan.

Apan ang mga tinawag ug pinili nga katawhan pagapilian pa matod sa Dios, Nga sa ato pa ang iyang mga tinawag nga mga katawhaan dili kay magalingkod lamang ug magpaabot sa pagbalik sa anak sa Dios kundili pagasulayan gayud sila kun asa kutob ang ilang pag-ila sa kabubut-on sa Dios kay matod pa pagasulayan man gani ang bulawan sa kalayo kun kini puro ba nan ang tawo nga mas dako pagbili sa bulawan pagasulayan usab sa Dios

Kamatuoran lamang ang gipadayag diha sa ubang sinulat sa balaang kasulatan nga ngaingon, Kun gusto nimo nga daygon ug himayaon didto sa gingharaian sa langit nan puy-i ang kinabuhi nga puno sa mga paglutos ug pagbiay-biay dinhi sa yuta, pas-ana ang imong krus ug sunod sa mga pagtulon-an nga gisangyaw ni Kristo. Kay bulahan ka nga nakaambit sa mga kasakitan ni Jesus diha sa paglansang niya sa krus kay makaambit ka usab sa iyang himaya sa pagabanhaw didto sa iyang gingharian sa langit.

Dili diay nato ikasakit ang mga paglutos nga atong natagbuan diha sa atong pagkinabuhi dinhi sa kalibutan, diin bulahan nga nadawat mo kini sa dakong pagpailob ug pagpaubos kay nagpasabot lamang kana igsoon nga imong gidawat, imong gipapuyo ug imong gipahari si Jesu Cristo diha sa imong kasing-kasing.

Sayop Nga Pagtulon-an Ug Matuod Nga Bahandi

1 TIMOTEO 3: 1~21

• 3 Sa pag-adto ko sa Macedonia, giingnan tikaw nga magpabilin sa Efeso aron tudloan ang mga tawo sa dili pag-usab sa pagtoo, 4 sa dili pagsunod anang mga sugilanon ug taas nga mga talaan. Panaglantogi lang ang makuha nila, inay mga buhat sa Diyos pinaagi sa pagtoo. 5 Limpyong kasingkasing ug putling konsensya ug dili pagpakaaron-ingnong gugma ang tuyo ini.

6 Nasalaag ang uban nila tungod sa walay hinungdan nga lantogi. 7 Buot silang ilhon nga mga magtutudlo sa balaod. Ang tinuod, sila mismo wala makasabot sa ilang gipanulti ni sa mga butang nga gihisgotan sa dakong pagsalig. 8 Nahibalo ta nga ang balaod maayo kon gamiton sa maayong paagi. 9 Ang Balaod dili alang sa tarong kondili, sa malapason, sa daotan ug sa makasasala, sa wala moila sa Ginoo ug sa relihiyon, sa mipatay sa ginikanan, sa mga kriminal; 10 sa himabaye, sa makighilawas sa isigkalalaki, sa mga puta, sa mga bakakon, sa nagguba sa ilang debosyon, ug sa tanang misupak sa maayong pagtulon-an, 11 sumala sa Ebanghelyo nga gitugyan kanako sa dalayegong Diyos.

12 Nagpasalamat ko sa nagtudlo nako, si Cristo Jesus nga atong Ginoo, ug naghatag sa igong kusog aron pag-alagad niya. 13 Kaniadto masupakon ko, naglutos ug nagbugalbugal. Apan gikaloy-an ko, kay wala masayod sa akong gibuhat sa pagsupak sa pagtoo. 14 Naghingapin gihapon ang grasya sa atong Ginoo uban sa pagtoo sa kristohanong gugma. 15 Tinuod ug angayng toohan ang giingon: mianhi si Cristo Jesus sa kalibotan aron pagluwas sa makasasala; ug una ko nila. 16 Gikaloy-an ko aron sa kaugalingon ikapakita ko ang hingpit nga pailob ni Cristo Jesus. Maghatag kog panig-ingnan sa nagtoo niya alang sa kinabuhing dayon. 17 Alang sa Hari sa tanang panahon, kaniya nga walay kamatayon ug dili makita, ang bugtong Diyos: dungog ug himaya hangtod sa kahangtoran. Amen!


18 Hatagan tikawg katungdanan, anak kong Timoteo, sumala sa mga pulong sa mga propeta nga nag-una nimo: pagpakigbugno sa maayong bugno. 19 Pabilin sa maayong pagtoo ug sa maayong tanlag. Ayawg sunda ang nagbale wala sa tanlag. Sa ingon, giguba nila ang pagtoo. 20 Labi na si Himeneo ug Alejandro nga akong gitugyan kang satanas aron makakat-on sa dili pagpasipala sa Diyos.

PAGPAAMBIT SA MENSAHE:

Ang maong ebanghelyo nag-awhag sa mga katawhan sa pagpadayon sa pagsunod sa kristuhanon nga pagtulon-an diin maoy gisangyaw ni Jesus sa dihang dinhi pa siya uban kanato, diin maoy siyang gisangyaw ang mga maayong pagtulon-an diin para sa uban nga wala makasabot ug makaila kaniya nga anak sa Dios nagatoo nga nagbugalbugal siya sa matuod nga Dios. Para niadtong mga mabuot nga pariseo imposible nga ang usa ka tawo nga ordinaryo lamang sa ilang panan-aw mamahimong anak sa Dios.

Diha sa ubang sinulat nagaingon nga Ang Dios moabot sa atong kinabuhi sa paagi nga dili nato damhon ug ang iyang mga pinili nga katawhan daan na nga aduna siya giandam. Colossas 2, nagaingon si Jesus maoy buhing panagway sa dili makita nga Dios diin maoy tuyo ug tumong ni Jesu Cristo sa iyang pagpakabuhi sa kalibutan aron pagluwas kanato sa paagi nga kadto lamang mga tinawag ug gilamdagan sa espiritu santo sa kamatuoran maoy makasabot niini.

600 ka tuig ang milabay sukad sa iyang pagkamatay ayha nasangyaw ang pagka Dios ni Jesus sa upat ka suok sa kalibutan. Daghang mga milagro ang nanggawas diin hangtod niining panahuna nagasige pa ang mga milagro sa pagtulon-an nga kristuhanon ni Jesu Cristo. 2000 ka tuig ang milabay diin mitubo ug milambo ag kristuhanong pagtulon-an sa tibuok kalibutan, apan nanggawas usab ang daghang mga pagtulon-an nga nagasangpit ug nagasangyaw sa mga pulong sa Dios, Diin matod pa sa ulohan niining maong ebanghelyo mga sayop nga pagtulon-an, diin kadaghana kanla wala motuo sa pagka Dios ni Jesus, kadaghanan kanila susama lang usab niadtong unang mga Judio nga nagatamay ug nagabiay-biay sa kinatubuk-ang kristuhanong pagtulon-an.


Ang Dios nagaingon, lahi-lahi ang pagtawag niya kanatong mga katawhan apan dili ang tanan nga nagasangpit kaniya Dios ko, Dios ko, makasulod sa iyang gingharian, kundili kadto lamang nagatuman sa iyang kabubut-on. Walay lain bahandi nga atong madala ngadto sa gingharian sa Dios kundili ang mga bahandi nga dili makita ug mahikap, mga bahandi nga langitnon, apan maoy bahandi nga matuod nga moluntad hangtod sa kahangturan. Atong ambitan ang matuod nga bahandi pinaagi sa pagsul-ob sa kinaiyahan nga gisangyaw ni Jesus diin anaa ang pagpaubos, pagpasaylo ug pagkamangindawaton, diha sa kanunay ug hina-hinay nga mga pag-ampo.

Ang Yutan-on Ug Langitnong Pagsimba

HEBREO 9: 1~22

1 Ang unang kasabotan may ka su­goan ug talaan. May san­­twar­yo pod nga yutan-on. 2 May lawak ni nga gita­wag og Balaang Dapit diin nahimu­tang ang tungto­nganan sa suga ug ang talad nga na­hi­mutangan sa tinapay nga ihalad sa Diyos. 3 Dihay tabil nga nag-ulang sa duha ka lawak. Sa ika­du­hang lawak nga gitawag og Labing Ba­laang Dapit nga 4 may bu­la­wang altar alang sa paaso sa insenso ug ang Arka sa Ka­sabotan nga giputos og bula­wan. Di­hay bulawang tadyao nga dunay manna. Sa sulod tua ang sung­kod ni Aaron nga nanalingsing ug ang duha ka papan sa kasabotan. 5 Ibabaw sa arka ang duha ka anghel sa himaya nga milandong sa lingko­ranan sa Pa­saylo. Apan dili nato ika­hulagway ang tanan.

6 Kay nahimutang man ang tanan su­ma­la sa gikahulagway, ang mga pari kanunayong nanulod sa unang lawak aron pagtuman sa gimbuhaton. 7 Apan ang Labawng Pari mosulod maka­usa sa usa ka tuig sa ikaduhang lawak. Sa pagsulod magdala siya sa halad nga dugo alang sa iyang mga sala ug sa mga sala sa katawhan. 8 Pinaagi ini ang Espiritu Santo nag­tudlo nato nga dili bu­kas ang agi­anan padulong sa san­twaryo sa sulod sam­­tang naa pa ang unang lawak. 9 Mahi­nung­danon kaa­yong pagtulon-an ang gilarawan karon. Ang mga gasa ug sakripisyo dili maka­hingpit sa naghalad, 10 kay kining mga ilim­non, pagkaon ug uban pang paagi sa pag­­linis pinaagi sa tubig mga taw­hanong lagda. Bu­haton ni hangtod sa panahon sa pagbag-o.


11 Apan karon si Cristo ipakita isip Labawng Pari nga may kalabotan sa mga maayong butang ining panahon sa kabag-ohan. Misulod siya sa san­twaryo nga dili binuhat sa tawo, mas harianon ug mas hingpit. 12 Sa ato pa, dili mi­nugna. Wala siya mag­dalag dugo sa mga kanding ug toro. Ang ka­uga­lingong dugo ang gidala. Mi­sulod siya aron pagkab-ot sa hingpit nga kalu­wa­san. 13 Kon ang pagsablig sa katawhan nga nahu­gawan sa sala og dugo sa kan­ding ug toro o ang pagkatagkatag sa abo sa laking baka maghatag og tawhanong kalinis ug kabalaan, 14 unsa pa kaha ang pag­sablig sa dugo ni Cristo! Linamdagan sa tunhayng Espi­ritu, mihalad si Cristo sa kaugalingon isip walay buling nga halad ngadto sa Diyos. Ang iyang dugo mipapas sa mga daotan tang bu­hat. Sa ingon, ma­kaalagad ta karon sa buhing Diyos.

15 Busa, si Cristo ang tigpataliwala sa bag-ong kasabotan o Kasabotan. Ang iyang kamatayon magbayad sa mga sala nga atong nabuhat ubos sa Daang Kasa­botan. Ang saad gihatag sa ta­nang gitawag alang sa kinabu­hing da­yon. 16 Ingon sa tanang kasa­botan, ki­na­hang­lang paaboton nga mamatay ang naghi­mo ini. 17 Ang ka­sa­botan na­lig-on sa kamatayon ug walay kahulo­gan samtang ang nag­himo buhi pa. 18 Mao nga ang unang kasabotan gi­panghi­matuod pinaagi sa dugo. 19 Gi­pa­hibalo ni Moises sa nagkatigom nga katawhan ang tanang kasugoan sa ba­laod. Unya, mikuha siyag dugo sa toro ug kanding nga iyang gi­sagolag tubig. Nagkuha pod siyag isopo ug pulang panapton nga delana ug gisabligan ang libro sa kasabotan ug sa katawhan sa 20 pag-ingon: Kini ang dugo sa Kasa­bo­tan nga gisugo kaninyo sa Diyos. 21 Sa samang paagi, gisabligan niya sa dugo ang santwaryo ug ang tanang gala­mi­ton sa paghalad. 22 Sumala sa Balaod, halos ang tanang paglinis kinahang­lang himoon sa dugo. Walay pasaylo kon walay dugo nga iula.

PAGPAAMBIT SA MENSAHE:

Ang maong ebanghelyo naghisgot diha sa mga bulohaton niadtong unang panahun sa panahun pa ni Moises diin uso pa ang paghalad sa dugo ug sa mga mananap nga sinunog ug diin usa kini ka yutan-on nga paghalad kay kini nagalangkob man lang diha sa mga materyal nga nia sa yuta apan tungod sa kinasin kasing ug hugot nga paghalad ngadto sa Dios ang maong mga paghalad gipanalanginan sa Dios Amahan, diin usa kini ka ritwal nga susama sa mga ritwal sa mga Dios-dios apan lagi kay mao may naandan niadtong panahuna.

Apan sa dihang si Jesu-Cristo nagpalansang ug nagpakamatay sa krus nan, dili na dawaton sa Dios Amahan ang mga halad sa mga mananap nga sinunog kay humana man nagbuhat ug halad si Jesus sa iyang kaugalingong lawas ug dugo, diin diha sa mao niyang paghalad maoy kadaugan sa tanang mag katawhan agig kaluwasan sa ilang mga sala, diin pinaagi sa kamatayon ni Jesus namatay ang atong mga sala ug apil kita apan diha sa iyang pagkabanhaw, nabanhaw kita apan nagpabilin nga namatay ang atong mga sala.

Apan lagi kay nagpakabuhi pa man kita niining kalibutana nan anaa gihapon kita sa pagpakasala kay ang tawo makasala gayud diha sa iyang huna-huna, sa pulong ug sa buhat. Mao nga sa kanunay atong ibalaan ang atong kaugalingon diha sa paglikay sa pagpakasala ug sa kanunay manalangin ug mag-ampo kita diha sa pagsimba sa atong Dios nga labing gamhanan, diin mas maayo nga magkahugpong ang katawhan diha sa ilang pagsimba ug pag-ampo kay ang Dios nagaingon duha o tulo nga nagasangpit sa akong ngalan anaa ako nga nagauban kaninyo.

Diha sa atong pagsimba sa kanunay ang Dios naminaw sa atong mga pag-ampo kay matod pa sa pulong sa Amahan walay pag-ampo dinhi sa ibabaw sa kalibutan nga dili nako madunggan ang tanan iyang hidunggan apan dili ang tanan nakadawat sa iyang panalangin kay ang kadaghanan nga naga-ampo anaa lamang sa tumoy sa ilang dila, wala magagikan sa ilang kasing-kasing. Nagpasabot mga igsoon nga ang Dios walay gipili walay gipihig diin andam siya maminaw kanatong iyang mga katawhan.

Pasidaan Sa Paglikay Sa Dios-Dios

1 COR 10: 1~ 33

• 23 Ang tanan nagsubay sa balaod alang nako, apan dili ang tanan mapuslanon. Ang tanan nagsubay sa balaod alang nako, apan dili ang tanan naglig-on. 24 Ayaw pag-agap sa kaugalingong interes. Pangitaa ang interes sa uban. 25 Busa, kaon sa gibaligya sa merkado. Ayawg kabalaka diin ni gikan. 26 Kay: Ang yuta ug bisag unsa nga naa ini iya sa Ginoo.” 27 Kon dapiton ka sa wala magtoo, lahi nimo, lakaw ug kaon sa iyang gidalit. Ayawg panuko. 28 Apan kon ingnon ka nga ang unod gikan sa mga halad sa diosdios, ayawg kaon tungod sa nagpasidaan nimo ug tungod sa ilang konsensya.

29 Nag-ingon ko: “tungod sa ilang konsensya,” dili tungod sa imoha. Ang pagduhaduha sa laing tawo dili makalatid sa kaugalingong konsensya. 30 Kon nagpuyo ko sa grasya, ayawg tugot nga daotan ang akong gipasalamatan. 31 Busa, o nagkaon mo o nag-inom, o bisag unsa ang inyong buhaton, buhata na alang sa himaya sa Diyos. 32 Ayawg pasakiti ang mga Judio o ang mga Griyego o ang Simbahan sa Diyos, 33 sama nga naningkamot ko pagpahimuot sa tanang tawo sa tanang butang. Wala ko mangita sa kaugalingong interes kondili, sa interes sa kadaghanan, kay gusto ko nga maluwas sila.

PAGPAAMBIT SA MENSAHE:

Ang maong ebanghelyo naghisgot diha sa pagdili sa pagsimba sa Dios-dios diin mao kini ang gisimba sa pagano nga pagtulun-an diin nagsimba sila sa kahoy ug mga bato ug diin kini ilang giludhan sama sa matuod nga Dios apan ang balaang kasulatan nagaingon “Dili ka magbaton ug laing Dios gawas kanako kay usa ako ka seloso nga Dios”. Ang pagsimba sa Dios-dios kaniadto pa kini sa panahun sa unang kasulatan diin ang kadaghanan nga nagasimba ug nagapasidungog sa Dios naghimo ug ilang kaugalingon nga imahen diin maoy ilang gihimong Dios.

Ang maong ebanghelyo nagaingon nga kun imbitahon ka sa pagkaon sa mga tawo nga lahi ug pagtulun-an nan kaon sa grasya nga iya sa Dios kay nakadawat na kini sa panalangin gikan sa Kahitas-ans kay walay hugaw sa maong maga butang dinhi sa yuta, apan kun pasidan-an ka nga kini gihalad gikan sa Dios-dios nan ayw pagkaon kay sama man lang unya nga nakighiusa ka diha kanila, sama na man lang usab nga nakigsaulog ka usab uban sa ilang giampoan.

Si Jesus mao ang buhing panagway sa dili makita nga Dios matod pa diha sa basahon sa Colosas 2: Niadtong panahun sa unang kasulatan ang paghalad bulohaton kini sa mga pagano ug ingon man sa mga pagtulun-an nga nagatoo sa Dios, apan sa dihang nagpakamatay ug nagpasakit si Jesus diha sa maong krus nan giwala na sa mga nagsimba sa matuod nga Dios ang halad sa mamanap nga sinunog, ug mao na lamay nahabilin diha sa paghalad kadtong mga pagano nga pagtulon-an o kadtong mga tawo nga nagasimba sa Dios-Dios, kay matod pa human ihalad ni Jesus ang iyang dugo ug lawas niadtong mabug-at nga krus pinaagi sa iyang pagpalansang ug pagpakamatay niini. Nan kun nagbuhat ka diha sa mag paghalad sa mga mananap nga sinunog sumala sa ikaduhang basahon sa balaang kasulatan bulohaton kini sa mga pagano o mga katawhan nga nagasimba sa Dios-Dios.

:
Daghan ang mga pagtulun-an nga mikaylap dinhi sa ibabaw sa kalibutan diin ang kadaghana niini nagpaila diha sa kaluwasan sa kinabuhing dayun apan ang uban nagmaskara diha sa pagtahod sa laing Dios , diin maoy ilang gisimba ug gipasidunggan ang bahandi nga iya niining kalibutana, diin mas labaw pa kini sa Dios-dios diin mabutahan ka man sa imong huna-huna ug ang imong mga mata diin mao may mopatigbabaw ang garbo diha sa imong kaugalingon kay anaa na man kanimo ang tanang butang ug daghan usab ang motahod kanimo nga giisip nilang Dios nga buhi kay makatubag ka man diha sa ilang material nga kinahanglanon.

Ang balaang kasulatan nagaingon, nga kun asa ang imong bahandi, nan atu-a usab ang imong kasing-kasing, ug ang imong bahandi kalibutanon nan dinhi ka ra usab kutob, diin mobalik ka sa abog apan kun ang imong bahandi iya sa Dios sa langit nan aduna kay mabitbit diha sa imong kasingkasing inig-abot sa adlaw sa panudya. Sa ato pa mga igsoon importante gayud nga nakaila kita sa atong giampoan, diin maoy atong dangpan didto sa laing kalibutan, ug maoy importante diha sa atong lawas ug kalag.

Pito Ka Katabang

BUHAT 6: 1~7

6 • 1 Adtong mga adlawa, samtang nagkadaghan ang mga tinun-an, ang mga gitawag og Helenista mireklamo batok sa mga gitawag og Hebreo, kay ang ilang mga byuda wala maapil sa adlaw adlawng pag-alagad. 2 Busa, ang dose mipatawag og tigom sa tanang tinun-an ug miingon, “Dili maayo nga pasagdan nato ang pulong sa Diyos aron pag-atiman sa lamesa. 3 Busa, mga igsoon, pagpili gikan ninyo og pito ka tinahod nga tawo, puno sa Espiritu ug kaalam, nga sangonan namo ining buluhatona. 4 Ug kami, igahin namo ang among kaugalingon sa pag-ampo ug pagwali sa Pulong.”

5 Ang tibuok katilingban nagkauyon. Gipili nila si Esteban, tawo nga puno sa pagtoo ug sa Espiritu Santo; si Felipe, Procoro, Nicanor, Timon, Parmenas ug Nicolas, ang taga Antioquia nga nakabig sa pagtoo, ug 6 gipaatubang sa mga apostoles. Giampoan una sila sa mga apostoles unya, gitapin-an sa kamot. 7 Ang pulong sa Diyos nagpadayon pagkaylap. Midaghan pag-ayo ang mga tinun-an sa Jerusalem. Bisan gani ang mga pari nakabig sa pagtoo.

PAGPAAMBIT SA MENSAHE:

Ang maong mensahe nagpasabot sa paghugpong diha sa iglisea nga gibarugan bisan diha sa mga panahun sa krisis sa matag gimbuhaton, diin diha sa maong ebanghelyo nagpatawag ug "meeting" ang mga apostoles kay dili na nila maakopar ang pag-atiman diha sa mga materyal nga gikinahanglan sa matag magtotoo. Nagpaili sila ug mga katawhan nga maoy mopahiluna diha sa mga pag-apod-apod diha sa ilang mga materyal nga gikinahanglan.

Nagpasabot lamang mga igsoon sa usa ka panultihon nga nagaingon nga ang gimbuhataon diha sa mga misyon alang sa Dios dili lamang kay diha lang sa pagluhod lamang kundili nagalangkob kini sa tanang mga trabaho aron mamahimong hapsay ang dagan sa maong pagdayeg sa Dios. Sa ato pa gisabot sa Dios kadtong mga katawhan nga usahay dili mahiapil diha sa mga pag-ampo ug pagdayeg sa Dios tungod diha sa laing mga bulohaton nga ilang gi-atiman

Ang mportante lamang nga mabalaan nato ang atong kasing-kasing –huna-huna ug ang binuhatan, diin maoy atong gamiton ang mga pag-ampo nga gitudlo kanato sa Dios. Sa ato pa diha sa tulomaanon sa pag-ampo kinahanglan nga atong isentro ng atong pagtoo ngadto sa amahang Dios. Kay diha sa maong kalihukan gitudlo kanato sa Dios ang insaktong dalan paingon sa kaluwasan, ug ingon man ang pakigdait sa matag magtotoo. Sa ato pa ang misyon mao usab ang pag-edukar sa atong kaugalingon diha sa mga buhat sa mga apostoles ug mga sumosunod ni Kristo sa unang panahon.

Hinlo-an nato ang atong kasing-kasing, hunahuna ug mga pulong aron hapsay ang tanan diha sa pagsunod nato sa Iyang kasugo-an .Kay matod pa sa pulong sa Dios, ayaw ninyo kabalik-i ang nahibilin tungod kay ang Dios Amahan maoy nanalipod diha sa nahabilin sa atong panimalay. Nagpasabot lamang mga igsoon nga diha sa bulohaton sa mga misyon, ang mga bulohaton pagabahin-bahinon aron hagkap kining dad-on diha sa matag-usa. Sama sa mga dautan nga mga elemento nga mosamok kanato diin diha sa nagkahugpong nga pag-ampo hagkap lang kining pagadad-on. Maoy gusto sa Dios nga adunay tulomanon ang matag-usa aron "busy" kanunay ang ilang huna-huna aron sa ingon dili daling malingla sa dautang pulong ug binuhatan.

Mga Sulogoon Sa Dios

1 COR 3: 1~ 23

3 Dawata ang panalangin ug kalinaw gikan sa Diyos, atong Amahan, ug ni Cristo Jesus, atong Ginoo. 4 Sa kanunay nagpasalamat ko sa Diyos tungod ninyo ug sa grasya sa Diyos nga gihatag kaninyo diha ni Cristo Jesus. 5 Nabuhong mo sa hingpit diha niya sa mga pulong ingon man sa kahibalo. 6 Sama nga ang pagsaksi ni Cristo namatud-an diha ninyo, 7 wala mo makulangi og bisag unsa sa espirituhanong gasa. Naghulat lang mo sa mahimayaong pag-abot ni Cristo Jesus, atong Ginoo. 8 Ampingan mo niya nga makanunayon hangtod sa kataposan. Wala unyay ikasaway ninyo sa pag-abot sa atong Ginoong Jesus. 9 Human mo tawga sa matinud-anong Diyos alang sa pakig-uban sa iyang anak, si Cristo Jesus, atong Ginoo, dili mopakyas ninyo.


• 10 Nangamuyo ko, mga igsoon, sa ngalan ni Cristo Jesus, nga magkauyon mo. Likayi ang pagbingkilbingkil. Maghiusa unta mo sa hingpit, sa hunahuna ug sa hukom. 11 Nakadungog ko gikan sa mga tawo sa balay ni Cloe bahin sa inyong palabwanay. 12 Kanay akong nasabtan. Kay dunay nag-ingon: “Kang Pablo ko;” ang uban: “Kang Apolo ko;” o “Kang Pedro ko;” o “Kang Cristo ko.” 13 Nabahinbahin ba diay si Cristo? Ako ba, si Pablo, ang gilansang sa krus alang ninyo? Nabunyagan ba mo sa ngalan ni Pablo? 14 Nagpasalamat ko sa Diyos nga wala ko makabunyag ni bisag kinsa ninyo, gawas ni Crispo ug Gaio, 15 aron walay makasulti nga gibunyagan siya sa akong ngalan. 16 Tinuod nga akong nabunyagan ang panimalay ni Estefanas! Gawas ini, wala na koy nahinumdoman nga akong gibunyagan.


• 17 Si Cristo wala magpadala nako aron pagbunyag kondili, aron pagwali sa iyang Ebanghelyo. Dili sa nindot nga mga pulong, kay sama ra na sa pagwakli sa krus ni Cristo. 18 Apan ang pagwali sa krus nagpabiling binuang alang sa nawala. Alang natong naluwas, gahom ni sa Diyos. 19 Matud pa sa kasulatan: Akong gun-obon ang kaalam sa maalamon ug lumpagon ang pangatarongan sa makinaadmon. 20 Hain man ang mga batid sa tawhanong kaalam, ang mga edukado, ang mga pilosopo? Wala ba pakyasa sa Diyos ang kaalam ining kalibotana? 21 Sa sinugdan ang Diyos misulti sa pinulongan sa kaalam. Apan ang kalibotan wala makaila sa Diyos sa iyang kaalam. Gikahimut-an sa Diyos ang pagluwas sa matoohon pinaagi sa binuang namong giwali. 22 Ang mga Judio nangayog mga milagro. Ang mga Griyego nangayog labaw nga kahibalo. 23 Nagwali mi ni Cristo nga gilansang sa krus. Alang sa mga Judio, dako ning iskandalo! Alang sa mga Griyego, binuang

PAGPAAMBIT SA MENSAHE:

Ang maong ebanghelyo naghisgot ug nagtuki sa mga katawhan sa Dios nga nakatukib sa mga pagtulun-an ni Jesus. Diin diha sa ubang sinulat nagaingon ang pulong sa Dios nga "Ayaw tan-awa ang imong isigkatawo, siguro-a ang imong kaluwasan. Nga sa ato pa diha sa pagkinabuhi nato nga ubos sa landong sa espiritu santo dili na kita ang naga-administer sa atong lawas diin diha sa ubang sinulat nagaingon, nga mas bulahan kun nagapuyo ka nga langyaw niining kalibutana apan ha-om didto sa gingharian sa Dios, kay sa magpakabuhi kita nga ha-om niining kalibutana diin anaa ang tanan nga mga tawhanon nga kailibgon ug mga kahilayan, diin maoy atong ipatigbabaw ang mga bahandi niining kalibutana apan ayran kita ug dili ilhon didto sa iyang gingharian sa langit.

Ang balaang kasulatan nagaingon kun asa ang imong bahandi nan atua usab ang imong kasing-kasing nan kun ang imong bahandi ania lamang sa yuta diin kini kan-on sa taya ug pagakutkuton sa anay nan ikaw mismo nga tagtungod dinhi lang usab kutob. Apan kun adunay kay bahandi nga iya sa langit diin mao kini ang mga langitnong gasa nga gipiyal kanimo sa Dios ug ang mga bulawanong hiyas nga imong gisukip diha sa imong kasing-kasing , nan bulahan ka igsoon kay aduna kay ikapakita unya damlag diha sa imong paglawig didto sa laing kalibutan.

Nan mas maayo diha sa pagtuman nato sa kabubut-on sa Dios atong unahon ang iyang kasugo-an, diin ang iyang kasugo-an mao nga higugma-a ang Dios labaw sa tanan, ug ayaw pagbaton ug laing Dios gawas kaniya ug ang ikaduhang kasugo-an mao nga paghigugma sa imong mga kaigsoonan sama sa paghigugma nimo sa imong kaugalingon. Dili na mangaplag pa ug dugang bahandi kay ako nga inyong Dios dili gayud motalikod niadtong mga katawhan nga nagapapuyo kanako diha sa inyong kasing-kasing.

:

Ang balaang kasulatan nagaingon, Mateo 17: 24~25, Kun gusto nimong mahimong tinun-an ni Jesus nan kalimti ang imong kinabuhi ug sunod sa agtulon-an ni Kristo, kay bulahan ka nga mawad-an ug kinabuhi diha sa pagtuman nimo sa kabubut-on sa Dios kay mahatagan ka ug dugang kinabuhi apan kun magdumili ka sa pagtuman sa iyang kabubut-on sa kahadlok nga mawad-an ug kinabuhi nan basin ug kawad-an ka niini. Sa laing sinulat nagaingon kun gusto nimong himayaon ug daygon didto sa gingharian sa Dios nan puy-i ang pagkinabuhi nga ubos sa pagpasakit ug pagdawat sa mga paglutos, sunod sa pagtulun-an ni kristo ug pas-ana ang iong krus.

Kinabuhi Nga Makapahimuot Sa Dios

1 TESALONICA 4 : 1 ~ 12

4 • 1 Dili na kinahanglang sulatan pa mo bahin sa nadugay ug anang panahona ug taknaa. 2 Nasayod na mo nga moabot ang Adlaw sa Ginoo sama sa kawatan sa kagabhion. 3 Kon ang mga tawo dunay paglaom ug kalinaw, kalit nga moabot nila ang kaalaot sama sa pag-antos sa babayeng manganak. Dili sila makalingkawas. 4 Apan kaigsoonan, wala mo sa kangitngit. Busa, dili mo makurat anang adlawa sama sa kawatan. 5 Mga lumolupyo mong tanan sa kahayag ug sa adlaw. Wala ta mahimutang sa kangitngit ug sa kagabhion. 6 Dili ta matulog sama sa uban, apan pabiling igmat ug malinawon.

7 Sa gabii natulog ang mga katulgon; sa gabii sab nahubog ang mga palahubog. 8 Kay nahimutang ta sa adlaw – isul-ob nato ang taming sa pagtoo ug gugma. Ug himoon natong helmet ang paglaom sa kaluwasan. 9 Kay dili gusto ang Diyos nga silotan ta apan, aron maluwas pinaagi ni Cristo Jesus nga atong Ginoo. 10 Namatay siya alang nato aron mosulod ta sa kinabuhi uban niya, buhi o patay. 11 Busa, dasiga ang matag usa. Lig-ona ang usag usa sama sa inyong gibuhat karon. 12 Mga igsoon, naghangyo mi nga pasalamatan ninyo ang naghago alang ninyo: ang nag-una ninyo sa dalan sa Ginoo, ug ang nagsaway ninyo.

PAGPAAMBIT SA MENSAHE:

Dinhi sa maong ebanghelyo nagpasabot ang mga magsasangyaw sa unang panahon, niadtong unang mga apostoles, diin sila mihatag ug giya diha sa pagkinabuhi nga haduol kanunay sa kabubut-on sa Dios. Ilang gipakita ang hiyas nga espiritu santo nga maoy gisul-ob ni Jesus dinhi sa kalibutan, hiyas diin puno sa pagpaubos, pangindawato ug ang pagsurender sa hingpit diha sa atong kristuhanon nga pagkinabuhi ubos kang kristo Jesus.

Matpd pa diha sa ubang sinulat diha as kamatayon ni Jesus sa krus mao usab ang atong kamatayon uban sa atong mga sala, ug sa pagkabanhaw ni Kristo, nabanhaw kita uban kaniya, apan nagpabilin nga patay ang atong mga kasal-anan, nga sa ato pa mao kadto ang unang hugna sa kaluwasan nga giasad ni Jesus. Diin usa pa kini ka pasiuna diha sa iyang gisaad nga kaluwasan, diin gusto lang as Dios nga atong mapalandungan nga diha sa mao natong kaluwasan usa laman kini ka paglinis diha sa atong mga sala nag nasunod as atong mga kaliwatan, apan halayo pa kayo ang atong panaw diin daghan pang mga pagsulay nga atong labangon.

Kay matod pa diha sa ubang sinulat, kitang tawo makasala man gayud kita sa pulong , sa huna-huna, ug sa buhat, nan diah sa maong kaluwasan nag atong nadawat, haduol pa gihapon kita sa pagpakalasla kun ato lang pasagdan ang atong kaugalingon labina ang atong kalag diha sa pagsubay dalan sa gingharian as Dios. Matod pa diah sa aubang sinulat sa balaang kasulaatn nagaingon ang Dios ayaw pakan-a ang tawoa nga wal magtrabaho nga kun atong hubaron diha sa espirituhanon nga paghubad nagpasabot kini nga wala kay katungod pagpangayo sa grasya sa Dios kun nagkulang ka diha sa mga pag-ampo ug pangliya sa Dios.

Diha sa mga buhing pulong sa Dios nagaingon nga daghan ang iyang tinawag ug pinili nga mga katawhan dinhi sa ibabaw sa kalibutan, sama kini sa balas sa baybayon, ug pipila lang usab ka hakop ang miduol sa Dios sa iyang pagtawag, Kitang tawo nahitala na diha sa libro sa kinabuhi ang atong mga kapalaran diin matod pa nahiabot kitang tanan dinhi sa kalibutan sumala gayud sa kabubut-on sa Dios, ug nga walay dautan sa tawo ug kun duna may dautan dili ang tawo kun dili ang iyang binuhatan, diin dili kana iya sa tawo kundili iya kana sa dautan.