Gitagna Ni Jesus Ang Paglimod Ni Pedro

MARCOS 14: 27~31

27 Miingon si Jesus: “Karong gabhiona masakit mong tanan tungod nako, ug mamiya. Matud pa sa Kasulatan: Akong patyon ang magbalantay ug magkatibulaag ang mga karnero. 28 Apan sa pagkabanhaw mag-una ko ninyo sa Galilea.”

29 Unya, miingon si Pedro: “Dili ko magpahilayo nimo bisag magpahilayo pa ang tanan.” 30 Si Jesus mitubag: “Sa pagkatinuod, sultihan tikaw, karong gabhiona sa dili pa motuktugaok ang sunoy sa makaduha ilimod na ko nimo sa makatulo.” 31 Apan miusab si Pedro sa pag-ingon sa mas dako pang kaikag: “Bisag patyon pa ko uban nimo, dili tikaw ilimod.” Kini sab ang gisulti sa tanan.

PAGPAAMBIT SA MENSAHE:

Ang maong ebanghelyo maoy pagpasabot sa kabubut-on sa Dios diin magpasabot lamang nga ang unsay ipamulong sa Diyos matuman gayud ug si kinsa man ang tagaan sa Amahan ug mga paglutos nan matuman gayud kini. Diha niining maong ebanghelyo nagpasabot lamang nga dili gayud kita makapanansag nga kita lig-on, nga kita bisan kuso-kusohon sa mga pagsulay magpabilin nga lig-on kay tawo lamang kita ug kay tawo huyang ug ulipon gayud sa mga kasal-anan.

Gipakita lamang ni Jesus ngadto kang Pedro usa sa uban pa niyang mga tinun-an nga kun unsay kabubut-on sa Diyos nan matuman gayud kini. Walay mahimo ang tawo kun nalatid na daan ang pagsulay diha sa iyang kinabuhi. Diin daghan man ang moingon nga dili sila magpaduol sa Dios, dili sila magsige ug sulod sa simbahan gani bisan sa paglili na lang dinhi sa sinagoga mahadlok ang uban kay matod pa sa uban kun haduol ka kanunay sa Dios nan sa kanunay usab makaambit ka sa mga paglutos.

Ang Diyos Amahan nagaingon molikay-likay ka man sa Diyos apan kun nalatid na daan ang pagsulay sa imong kinabuhi nan makaambit ka gayud sa mga paglutos. Apan kun adunay kay mga paghalad ug mga pag-ampo, nagaingon usab ang buhing pulong sa Diyos nga anak, “ Tukhi ang mga pagsulay sa mga pag-ampo kay anaa si Jesu-Cristo manalipod kanimo.

Apan gipasidaan usab sa Diyos, diha sa balaang kasulatan nga nagaingon nga kun gidawat mo si Jesus nga imong manluluwas ug imong Diyos nan, makaambit ka gayud sa mga paglutos, ug diha sa ubang sinulat nagaingon, “ Kun gusto nimong himaya-on ug daygon didto sa gingharian sa langit nan pas-ana ang imong krus ug sunod sa pagtulun-an ni Cristo, puy-i ang kinabuhi nga puno sa mga pagtamay ug pagdaug-daug dinhi sa yuta, diin anaa ang mga kasakitan sa kinabuhi. kay bulahan ka nga nakaambit diha sa mga kasakitan ni Jesu-Cristo diha sa Krus kay makaambit ka diha sa himaya ni Jesu- Cristo diha sa iyang pagkabanhaw didto sa langit.

Mini Nga Magtutudlo

2 PEDRO 2: 1~22

2 • 1 Sama nga dunay mga mining propeta taliwala sa katawhan sa Israel, taliwala ninyo naa poy mga mining magtutudlo. Magpasulod silag makadaot nga mga sekta. Pinaagi sa paglimod sa Magtutudlo nga nagluwas nila, nagdala sila sa ilang kaugalingon og kalit nga kapildihan. 2 Bisan pa ana, daghan ang moawat sa ilang mga bisyo. Tungod nila ang dalan sa kamatuoran mawad-ag maayong ngalan. 3 Pahimuslan mo nila ginamit ang malinglahong mga pulong tungod sa kwarta. Apan ang pagkalaglag nila nagsugod na. Ang pagkagun-ob nag-paabot nila.

4 Sa pagkatinuod, wala pasayloa sa Diyos ang mga Anghel nga nakasala. Gibalhog sila sa impyerno, gipriso sa ngiob nga lungag ug gibilin didto hangtod sa Adlaw sa Hukom. 5 Wala pod niya pasayloa ang karaang kalibotan diha nga gipabuhagay niya ang nagbul-og nga tubig sa kalibotan sa daotang mga tawo. Si Noe lang ang gipanalipdan, ang ikawalong propeta nga nagwalig katarong. 6 Gilaglag sab sa Diyos ang mga syudad sa Sodoma ug Gomorra ug gitun-as daw abo aron pagpasidaan sa mga daotan sa umaabot nga hitabo. 7 Apan giluwas si Lot, maayong tawo nga gisakit tungod sa dili kapugngang gihimo sa bisyosong mga tawo. 8 Tarong si Lot nga nagpuyo taliwala nila, nag-antos matag adlaw sa kaayo sa kasingkasing, kay nakita ug nadungog man niya ang ilang mga krimen.

9 Ang Diyos nahibalog unsaon paglingkawas sa mga pagsulay sa nag-alagad niya ug nagbantay sa mga daotan aron silotan sa pag-abot sa Adlaw sa Hukom. 10 Iya ning buhaton labi na gyod sa katawhan nga misunod sa daotang mga pangandoy sa kinaiya. Gitamay nila ang kahalangdon sa Diyos. Mapagarbohon ug mahagiton sila ug dili mahadlok pag-insulto sa mga Espiritu nga nahagba. 11 Apan ang mga Anghel nga labawg kusog ug gahom dili motugot sa pagpasangil ug pagsumbong nila atubangan sa Diyos.

12 Gibutangbutangan nila ang dili masabtan. Sama sila sa walay salabotang mananap nga matawo aron dakpon ug patyon. 13 Antoson nila ang balos sa ilang kadaotan. Nagpahimulos sila sa lumalabayng kalipay. Hilas sila ug bisyosong mga tawo. Ikalipay nila ang paglimbong nimo inig-ambit nila sa inigsoon mong salusalo. 14 Dili sila makatan-aw sa babaye sa walay pagpaninguha niya; dili kapuyon sa pagpakasala ug pagtintal sa huyang nga mga kalag. Puno sila sa kahakog – tinunglo.

15 Gitalikdan nila ang tarong nga dalan ug misunod ni Balaam, anak ni Beor, nga nagaid sa nakuha sa sayop nga binuhatan. 16 Apan gibadlong siya tungod sa iyang sala: Ang asno niyang bayi misugod og sulti daw tawo. Gipahunong niya ang propeta sa binuang. 17 Kining mga tawhana daw mga tinubdang walay tubig, mga panganod nga giabog sa bagyo nga kusog kaayong miirog paingon sa labing itom nga kangitngit. 18 Uban sa hinambog ug haw-ang nga mga diskurso, gidasig nila ang pamiga ug hugawng tinguha sa kasingkasing. Makadaldal sila sa bag-o pa lang nga nakalingkawas sa kaugalingon sa kasagarang mga sayop.

19 Nanaad silag kagawasan nga ulipon man unta sila sa kadaotan. Ang tagsa tagsa ulipon sa nagmando niya. 20 Tinuod nga human makalingkawas sa kalibotanong mga bisyo pinaagi sa kasayoran sa Ginoo ug Manluluwas nga si Cristo Jesus, mibalik sila adtong mga bisyoha ug mitugyan ini sa ilang kaugalingon. Ang kahimtang karon mas grabi pa kay sa una. 21 Mas maayo unta nga wala na sila mahibalo sa dalan paingon sa kabalaan. Kay human mahibalo gitalikdan nila ang sagradong pagtulon-an nga gitudlo kanila. 22 Sa ilang bahin, mapuslanon ni: “Ang iro mobalik sa kaugalingong suka,” ug: “Bag-o pa ganing nadigo ang baboy, naglunang na pod.”

PAGPAAMBIT SA MENSAHE:

Ang maong ebanghelyo maoy kamatuoran lamang diha sa ubang sinulat sa balaang kasulatan nga nagaingon nga daghang mga pastor ug mga ebanghelista nga nagasangyaw ug nagabuhat sa tag-as nga mga pag-ampo aron sa ingon matabunan ang ilang mga salawayong binuhatan, nan ang Pulong sa Diyos nagaingon nga walay kapasaylo-an kining mga tawhana, buhi pa sila apan laglagonon na ang ilang kalag sa impyerno.

Daan na nga gipasidaan ni San Pablo niadtong ilang Panahun nga magbantay gayud sa mga magsasangyaw nga nagadala sa ngalan sa Dios apan diay nagabuhat sa mga salawayon nga buhat din nagalunang sa mga sala ug sa mga tawhanon nga kailibgon. Diha sa mga panan-awon ni Juan sa Pinadayag, iya usab nga nakita nga moabot gayud ang panahun nga daghang mga pagtulun-an nga nagapaila sa kamatuoran diha sa ngalan ni Jesus apan nahisalaag sila sa dalan sa kamatuoran tungod kay gigamhan man sila sa kaaalam nga tawhanon.

Hinay-hinay na nga natuman ang tanan nag mga panan-awon ni Juan diha sa Pinadayag, ug ania na ang mga pahimangno ni Juan kabanhin niining mga impostor nga mga pagtulun-an ug diin nagpaila lamang usab diha sa nagsingabot nga pagbalik sa atong Ginoong Jesus

Atong mapalandungan nga sa pagtukod ni Jesus Cristo niining pagtulun-an 2000 na ka tuig ang milabay diin miingon siya sa una niyang tinawag nga apostoles nga si Simon diin iyang gibunyagan ug Pedro uban sa iyang igsoon nga si Andres, Mateo 17 :18 nagaingon si Jesus:, “Simon ikaw si Pedro ibabaw niining bato itongtong ko ang akong pagtulun-an ni ang kamatayon dili makabuntog niini.”

Ang pulong nga Pedro sa balaang kasulatan nagkahulugan kini sa Hebrew ug Petros, diin nagpasabot kini nga “hard rock” o batong bantiles sa ato pa ang maong mensahe ni Jesus nagpasabot lamang nga si Pedro gayud ang ipaagak ug maoy magsangyaw sa pagtulon-an ug simbahan ni Cristo niadtong panahuna diin dili gayud kini mawala bisan kun mangamatay na ang mga nagsangyaw nga mga apostoles niadtong panahuna.

Diin hingpit gayud nga nasangyaw ang Kristohanon nga pagtulun-an sa 600 years A.D., ug diin nahimo kini nga universal nga pagtulun-an diin mao kana ang buot ipasabot nga “Catholic” nga pagtulun-an. Ika 15 nga siglo o 1500 ka tuig sa dihang nahitala ang unang tawo o pari nag migawas sa katoliko ug nagatukod ug iyang kaugalingon nga pagtulun-an diin nagasimba gihapon kang Cristo ug pinaagi sa iyang tawhanon nga kaalam iyang giinterpretar ang kahulugan sa mga sinulat sa bibliya. Siya si Martin Luther diin ua kini ka Aleman nga mongha ug usa ka henyo , ug didto midagsang na dayun ang mga pagtulun-an nga sukawahi sa doktrina nga katoliko. 40,000 na ka pagtulun-na sa tibook kalibutan diin daghan kanila gihimong puhunan ang abilidad nga tawhanon ang pagtuki sa balaang kasulatan, ug gihimong negosyo ang ilang mga pagtulun-an nga gibarugan. Kunohay nagasangyaw sa pulong sa Dios apan gihimong panapi ang ilang pagtulun-an ug nagasulti ug mga bakak ug mga tinu-is nga pulong diha sa balaang kasulatan.

Apan ang Dios nagaingon nga lahi-lahi ang pagtawag sa Dios kanato, apan dili ang tanan nga nagatawag Dios ko, Dios ko, makasulod sa iyang gingharian sa langit kundili kadto lamang nagasunod sa iyang kabubut-on. Matod pa niya dili lang dinhi nga pagtulon-an nga duna siyay tinawag, sa uban nga pagtulon-an aduna usab siyay tinawag, nagpasabot lamang mga igsoon nga dili gayud ang relihiyon o ang pagtulun-an maoy makaluwas sa tawo kundili ikaw mismo nga tagtungod mao lamang ang makaluwas sa imong kaugalingon, busa dili gayud di-ay kita motan-anw o maghukom sa lain-lain nga mga pagtulon-an kay Diyos lamang ang nahibalo sa tanan. Ipadayun lamang ang atong tahas ug ang atong mga gimbuhaton ug likayi ang pagpasigarbo, kay ang pulong sa Diyos dili pulong sa pagpasigarbo kundili ang pulong sa Diyos pulong sa pagpaubos. Busa ayaw lantawa ang imong isigkatawo, ug siguro-a ang imong kaluwasan.

Mga Dumuduong Gikan Sa Sidlakan

MATEO 2: 1~12

2 • 1 Natawo si Jesus sa Betlehem sa Juda sa panahon ni Hari Herodes. Nangabot sa Jerusalem ang mga maalamon gikan sa sidlakan nga 2 nangutana: “Hain man ang bag-ong natawo nga hari sa mga Judio? Among nakita ang pagsubang sa iyang bitoon sa sidlakan. Ania mi aron pagpasidungog niya.” 3 Sa pagkadungog ni Herodes, nahasol siya pag-ayo, ingon man ang tanang katawhan sa Jerusalem. 4 Nagpatawag dayon siyag tigom sa mga pangulong pari ug sa nagtudlo sa katawhan sa Diyos sa iyang balaod ug nangutanag asa matawo ang Mesiyas5 Mitubag sila: “Sa lungsod sa Betlehem sa Juda, kay mao ni ang gisulat sa propeta: 6 Ikaw, Betlehem, sa yuta sa Juda, dili ka iwit sa mga banay sa Juda. Kay maggikan nimo ang pangulo nga moatiman sa akong katawhan, ang Israel.”


7 Nagpatawag dayon si Herodes og tinagong tigom uban sa mga maalamon, ug nagpakisayod nila sa insaktong panahon sa pagsubang sa bitoon. 8 Unya, gipaadto sila sa Betle-hem ug gitugon: “Lakaw ug pihoa pagpakisayod mahitungod sa bata. Kon inyo na siyang makaplagan, pahibal-a dayon ko, aron makaadto pod ko ug makapasidungog niya.” 9 Human sa tigom uban sa hari, nanglakaw sila. Ang bitoon nga nakita sa sidlakan nag-una nila ug mihunong sa dapit nga nahimutangan sa bata. 10 Nalipay kaayo sila sa pagkakita pag-usab sa bitoon. 11 Nanulod sila sa balay. Sa pagkakita sa bata ug ni Maria, ang inahan, miluhod sila ug misimba niya. Giablihan nila ang ilang mga bag ug gihalad ang ilang gasa nga bulawan, insenso ug mira. 12 Pinaagi sa damgo gipasidan-an sila sa dili pagbalik kang Herodes. Busa, namauli sila agi sa laing dalan.


PAGPAAMBIT SA MENSAHE:

Ang maong ebanghelyo maoy pagpasabot lamang diha sa mga panagna sa mga propeta diin dugay na nga gipaabot ang mesiyas nga maoy manunubos sa kalibutan diin pinaagi diha sa giya sa espiritu santo gipakita kini niadtong tulo ka mga dumoduong gikan sa sidlakan, diin gipangita ang maong bata nga si Jesus nga mamahimong hari sa mga hari.

Usa lamang ka sumbanan diha sa pagpakatawo ni Jesu-Cristo nga matuod nga siya anak sa Dios apan sa iyang paghiabot niining kalibutana usa lamang siya ka yano nga binuhat diin nagpakatawo diha sa mga yano usab nga inahan, diin usa ka pagpamalandong nga atong maambitan nga dili babag ang kawad-on diha as pagsulod sa gingharian sa langit,.

Gipakita sa Dios nga maadunahan ang tawo kun kuntento na siya kun unsay anaa kaniya, kay diha sa atong paghimugso niining kalibutan, wala man kitay dala, ug sa atong pagtaliwan niining kalibutan biyaan ta ang tananang bahandi. Nan walay laing bililhon nga butang nga sarang natong mabitbit diin isukip kini sa atong kasingkasing, mao ra gayud ang mga bahandi nga langitnon diin atong madala pinaagi diha sa kanunay natong pag-ampo ug mga pangaliya.

Mao kini ang gipakita sa anak sa Dios kanato ang pagpakatawo nga hubo sa bahandi niining kalibutana apan hupong sa bahandi nga langitnon, kay unsaon man tuod kun maimo ang tanang bahandi nga iya niining kalibutan apan ayran ka didto sa iyang gingharian sa langit mas maayo nga magpakabuhi kita nga langyaw ka niining kalibutana apan ha-om didto sa gingharian sa Amahan.

Sa ato pa ang pagpakatawo ni Jesus maoy gasa sa Dios diin maisip nga pinaskohan niadtong una natong mga katigulangan, kay mao gayuy gusto sa Dios nga mahiduol kita kaniya pinaagi diha sa pagluwas sa atong mga kasal-anan diha sa pagsakripisyo ni Jesus, kay matod pa mahal ang iyang pagpalit kanato busa angayan nato kini pamalandungan sa makadaghan, diin dili pa nato makita ang tanan dinhi sa ibabaw sa kalibutan, apan ang tanan matubag kun mahatagan kita sa kinabuhi nga hingpit diha kang Cristo..

Ang Kagikan Ni Jesus

MATEO 1:1~17

1• 1 Kini ang kagikan ni Jesu-Cristo, anak ni David nga anak pod ni Abraham.
2 Si Abraham ang amahan ni Isaac, si Isaac ni Jacob, si Jacob ni Juda ug sa mga igsoon.
3 Si Juda ang amahan ni Fares ug Zera (si Tamar ang inahan), si Fares ang amahan ni Esron, ug si Esron ni Aram. 4 Si Aram ang amahan ni Aminadab, si Aminadab ni Naason, si Naason ni Salmon. 5 Si Salmon ang amahan ni Booz, ug si Rahab ang inahan. Si Booz ang amahan ni Obed. Si Ruth ang inahan. Si Obed ang amahan ni Jese. 6 Si Jese ang amahan ni David nga hari. Si David ang amahan ni Solomon. Ang kanhi asawa ni Urias maoy inahan


7 Si Solomon ang amahan ni Roboam nga amahan ni Abias, ug sunod ang mga hari nga si Asa, 8 Josafat, Joram, Osias, 9 Joatan, Ajaz, Ezequias, 10 Manases, Amon ug Josias.
11 Si Josias ang amahan ni Jeconias ug sa iyang mga igsoon sa ilang pagkabihag sa Babilonia.
12 Sa nabihag na ang mga Israelita sa Babilonia, si Jeconias naamahan ni Salatiel, ang amahan ni Zorobabel. 13 Si Zorobabel ang amahan ni Abiud; si Abiud ni Eliacim, ug si Eliacim ni Azor. 14 Si Azor ang amahan ni Sadoc, si Sadoc ni Aquim, ug si Aquim ni Eliud. 15 Si Eliud ang amahan ni Eleazar, si Eleazar ni Matan, ug si Matan ni Jacob. 16 Si Jacob ang amahan ni Jose, ang bana ni Maria, inahan ni Jesus nga ginganlag Cristo. 17 May 14 ka kaliwatan gikan ni Abraham hangtod ni David, ug 14 gikan ni David hangtod sa pagpamihag sa Babilonia; 14 sab gikan sa pagpamihag sa Babilonia hangtod sa pagkatawo ni Cristo
.



PAGPAAMBIT SA MENSAHE:

Ang maong ebanghelyo maoy pagpasabot lamang diha sa kabubut-on ug binuhatan sa Dios diin han-ay ug plastar ang tanan, diin diha niining maong ebanghelyo gipasabot sa Dios nga dili tiaw ang pag-andam ug paghan-ay diha sa mga kaliwat ni Jesus diin diha gikan kang Abraham paingon kang Moises ug paingon kang David ug hangtod diha sa pagkatawo ni Jesus Cristo aduna kini 20 ka kaliwatan matag usa ayha miabot si Jesus , sa ato pa gikan kang David ngadton kang Jesus Cristo dunay 20 ka kaliwatan o “generation”, diin ang matag generation atong lang ibutang nga 20 ka tuig ang gap o distansya niini, nan sa 20 ka kaliwatan adunay 400 ka tuig gikan kang David hangtod kang Jesus Cristo.

Nagapasabot lamang mga igsoon nga daan na nga han-ay ang pagpakatawo sa manunubos bisan kun halayo pa ang tuig nga gitagal niini, ug nagapasabot nga dili salagma ang pagpakatawoa sa anak sa Dios kundili nalatid na kining daan, nagpasabot usab nga wala gayuy makasukod o makatugkad diha sa gahum ug kabubut-on sa Dios kay matod pa walay binuhat dinhi sa kalibutan ang gitugutan sa Dios sa pagtugkad sa iyang kabubut-on.

Bisan diha sa edad sa atong kalibutan diin hangtod niining panahuna wla gayud magkatugma ang balaang kasulatan ug ang siyensa, diin diha sa balaang kasulatan nagaingon nga ang kalibutan nga atong gipuy-an aduna kini 10,000 ka katuigan ang edad, apan matod pa usab sa mga scientist diha sa ilang pag-estudyo sa mga fossil ug mga karaan nga mga bato, ang kalibutan aduna nay pangedaron nga 4.2 bilyon ka katuigan.

Usa lamang ka pagpasabot nga ang kaalam nga Diosnon dili nimo matugkad pinaagi diha sa tawahanon nga kaalam o tawhanon nga kinaadman, diin ang Dios nagpasidaan nang daan nga wala niya tugti ang bisan kinsa diha sa pagtugkad sa ilang kaalam, kay ang buhat nga espirituhanon dili gayud kini nimo maambitan kundili itugot sa Dios kun kulang ang imong mga pangaliya ug pag-ampo. Nagapasabot lamang usab nga sa kataas na sa numero nga naabtan sa kalibutan, apan hamubo lang usab ang iya sa Dios, diha sa ubang sinulat, 2 Pedro 3: 17 nagaingon nga ang 1 ka adlaw sama sa usaka libo ka tuig apan ang 1000 ka tuig sama lamang usab kini sa 1 ka adlaw sa ato pa dili gayud magkatugmad ang iya nnining kalibutan ug ang iya Dios.

Ang Bag-ong Sugo

JUAN 13: 31~35

31 Sa wala na si Judas, miingon si Jesus: “Himayaon na karon ang Anak sa Tawo, ug himayaon ang Diyos diha niya.” 32 Busa, himayaon siya sa Diyos, ug buhaton ni dayon.
• 33 Mga anak, sa dili madugay mobiya ko ninyo. Mangita mo nako, apan sama sa gisulti ko sa mga Judio, ingnon tamo: “Dili mo makaadto sa akong adtoan.” 34 Hatagan tamo og bag-ong sugo: paghigugmaay! Ingon nga nahigugma ko ninyo, paghigugmaay sab mo sa usag-usa. 35 Pinaagi ini makahibalo ang tanan nga mga tinun-an mo nako, kon mahigugma mo sa usag-usa.

PAGPAAMBIT SA MENSAHE:

Ang among ebanghelyo pagpasabot lamang diha sa katuyuan sa Dios nga Jesu Cristo diha sa iyang tahas sa pagpakatawo dinhi sa kalibutan diin iyang gipasabot nga ang napulo ka sugo nga gisangyaw ni Moises nagkahulugan lamang kini ug usa ka sugo, Ang Panaghigugmaay sa matag-usa ingon nga ang Dios nahigugma kanato.

Juan 14:15 nagaingon usab si Jesus, Kung nahigugma kamo kanako tumana ninyo ang akong mga sugo, Mangayo ako sa Amahan ug tagaan kamo niyag laing manlalaban, ang espiritu sa kamatuoran, aron makig-uban kaninyo hangtod sa kahangturan. Ang kalibutan dili makadawat kaniya kay dili man kini makakita ni makaila kaniya, apan makaila kamo kaniya kay makig-uban siya ug magpuyo diha kaninyo.

1 Corinto 3: 16 nagaingon nga ang lawas sa tawo maoy templo sa Dios Espiritu Santo sa Dios, ug ang mopasipala sa templo sa Dios nag mao ang atong lawas nan iya usab nga pagalaglagon. Sa ato pa mag igsoon nga kun nangita ka sa Dios nan anaa lamang siya diha sa atong lawas diha sa atong kasing-kasing, diin maoy hinungdan nga nag-aghat gayud si Jeus Cristo diha sa paghigugmaay sa matag-usa kay sa ingon ang Dios sa kanunay manalagnin kanato.

Gusto gayod sa Dios nag ipatunhay ang gugma ug panagdait, sa iyang mga pinili nga katawhan diin biyaan ta ang mga panagdumot ug pagbingkilbingkil, kay kun nahigugma ka ug nagatoo kang Jesu Cristo nga imong Dios ug manluluwas nan biyaan mo gayud ang tawhanon nga mga kailibgon ug mga tawhanon nga mga kasal-anan, kay wala kay kalainan niadtong nagasimba sa mga Dios-dios kay sila nagabuhat man usab niini kun dili mo kini biyaan.

Sa ato pa mga igsoon kun gidawat mo si Jesu Cristo nga imong Dios ug manluluwas nan nagpasabot kana ng gidawat mo usab ang iyang sugo , kay matod pa diha sa ubang mag sinulat nga kun gidawat mo si Jeuu Cristo nga imong Dios apan nagdumot ka sa imong isigkatawo o sa imong silingan nan wala ka pa magpuyo sa kahayag anaa ka pa sa kangitngit. Kun moingon ka nga nahigugma ka sa Dios apan nagdumot ug nakigbungol ka sa imong isigkatawo nan Ang Dios miingon nga namakakak ka wala ka mahigugma sa Dios kay giunsa man nimo paghigugma ang Dios nag dili makita ug mahikap apan gidumtan mo ang imong isigkatawo nga sa tanang adlaw imong makita, bakakon ka nang tawhana. Sa ato pa mga igsoon ang pagdawat diha sa bag-ong sugo sa Dios maoy pagpasabot lamang sa pagpaubos sa imong garbo maoy pagpasabot lamang nga tumban ang imong garbo ug ipaubos mo ang imong kaugalingon, kay matod pa diha sa mga Japanese nga pinulongan nagaingon nga “ Masaketsu Agatsu” nga sa ato pa Ang imong dako nga kadaugan mao ag imong kadaugan diha sa pagkontroloar sa imong kaugalingon , diha sa pagkontrolar sa imong garbo diin makigdait kita diha kang Kristo ug sa iyang mga katawhan nga walay maskara..

Si Jesus Ug Si Pedro

JUAN 21 : 15 ~ 19

15 Human sa pamahaw, miingon si Jesus kang Simon Pedro: “Simon, anak ni Juan, nahigugma ka ba nako labaw kay kanila?” Mitubag siya: “Oo, Ginoo, nasayod ka nga gihigugma tikaw.” Si Jesus miingon: “Pakan-a ang mga nati kong karnero.”

16 Sa ikaduhang higayon miingon si Jesus: “Simon, anak ni Juan, nahigugma ka ba nako?” Miingon si Pedro: “Oo, Ginoo, nahibalo ka nga gihigugma tikaw.” Si Jesus miingon: “Atimana ang akong mga karnero.” 17 Miingon siya sa ikatulong higayon: “Simon, anak ni Juan, nahigugma ka ba nako?”

Nasubo si Pedro, kay katulo na mangutana si Jesus: “Nahigugma ka ba nako?” Mitubag siya: “Ginoo, nakahibalo ka sa tanan; nasayod ka nga gihigugma tikaw.”
Si Jesus miingon: “Pakan-a ang akong mga karnero.”

18 Sa pagkatinuod sultihan tikaw, sa batan-on ka pa, baksan nimo ang kaugalingon ug moadto sa bisag asa ka gusto. Apan sa tigulang ka na idupa na nimo ang kamot. Lain ang mobakos ug dad-on ka sa dapit diin dili ka gustong moadto.” 19 Misultig sama ini si Jesus sa pagpasabot sa matang sa kamatayon nga mahiagoman ni Pedro aron paghimaya sa Diyos. Human ini midugang siya: “Sunod nako!”

PAGPAAMBIT SA MENSAHE:

Ang maong ebanghelyo maoy pagpasabot lamang diha sa unang mga apostoles ni Jesus Cristo diin atong mahinumduman nga si Pedro mao man kini si Simon nga igsoon ni Andres diin pulos sila mananagat ug sa dihang gipakita sila ug milagro sa Ginoo nga makakuha sila ug daghan mga isda miingon si Jesus kang Pedro o Simon nga sukad niining adlawa managat ka na ug tawo.

Diha sa ubang sinulat Mateo 17: 18 miingon si Jesus ngadto kang Pedro, Simon ikaw si Pedro ug ibabaw niining bato itongtong ko ang akong pagtulun-an ni ang kamatayon dili makabuntog niini. Dawata kining mga yawe didto sa akong gingharian sa langit, ang imong idili dinhi sa yuta, idili usab didto sa langit, ug ang imong itugot dinhi sa ibabaw sa yuta itugot usab didto sa gingharian sa langit.

Ang mga pinulongan ni Jesus nga gigamit niadtong panahuna 3 ka klase, Hebrew, Greyego ug Aramaic. Ang Aramaic mao gayud ang pinulongan sa Jerusalem niadtong panahuna diin ang Pulong Pedro sa pinulonang nga Hebrew gitawag kini ug Petros sa inengles “Hard Rock” sa ato pa nga sinultihan batong bantiles.

Sa ato nagpasabot diay si Jesus kang Pedro diin diha kaniya ipaagak ni Jesu-Cristo ang iyang simbahan, ang ang iglisea sa tinago nga kamatuoran diin bisan diha sa mga paglutos nga naagian sa iyang mga apostoles pinangulohan ni Pedro nagpabilin gayud nga mobarog nga malig-on kini nga pagtulun-an tungod kay dili tawo ang nagtukod niini.

Si Pedro maoy giila nga pangulo sa 12 ka apostoles ni Cristo ug gitawag siya nga “prince of apostle” ug diin siya maoy sinaligan ni Jesu Cristo sumala diha sa balaang kasulatan. Didto gayod sa Roma nagdugay si Pedro diha sa iyang pagsangyaw diin ang Roma nianang panahuna maoy gibantog nga manlulutos sa pagtulun-an ni Cristo tungod kay kadaghanan kanila wala man makaila sa matuod nga Dios ug nasimba sila sa mga Dios-Dios.

Nahimong dakong pari si Pedro didto sa Roma diin pinaagi niini gidakop siya ug gibitay sa krus diin siya gayud ang mihangyo nga gusto niya balihon siya sa paglansang sa krus diin magtu-ali siya ug ang tiil maoy atua sa taas kay gusto niy nga makaambit diha sa mga kasakitan diha ni Cristo diin giila siya nga martir ug siya ang unang Santo Papa didto sa Roma diin adunay siya simbolo nga yabe. Ug ang tanang Santo Papa sa Roma sumosunod ni San Pedro.

Diin diha sa mao niyang kamatayon matod pa sa ubang sinulat wala niya kini kahadloki diin diha sa akto sa pagpatay kaniya sa berdugo sa Roma, nanag-awit pa siya diha sa pagdayeg sa Dios kay para kaniya wala nay bili ang iyang materyal nga lawas kay maoy bililhon kaniya ang kapaingnan sa iyang kalag diin nasayod siya kun asa kini paingon nasayod siya nga himayaon kini didto sa gingharian sa langit uban sa iyang agalon ug magtutudlo nga si Jesus. Usa ka kamatuoran lamang ang giingon diha sa balaang kasulatan nga nagaingon nga “Ayaw kahadloki ang tawo nga makapatay sa imong lawas apan walay mahimo sa imong kalag, maoy kahadloki ang Dios nga adunay gahum diha sa pagpatay sa imong kalag didto sa kalayo sa impiyerno.

Ang Tuyo Sa Pagsulat Niining Basahona

JUAN 20 : 30 ~ 31

30 Daghan pang milagro ang gibuhat ni Jesus atubangan sa mga tinun-an, nga wala masulat dinhi. 31 Gisulat ni aron motoo mo nga si Jesus mao ang Cristo, ang anak sa Diyos. Too ug sa Ngalan niya makabaton mog kinabuhi.


PAGPAAMBIT SA MENSAHE:

Ang bibliya o balaang kasulatan maoy sinulat sa kamatuoran diha sa mga pulong sa Dios diin naglangkob kini sa daan ug bag-o nga mga tugon. Ang daan nga tugon mao kini ang naglangkob sa mga balaod sa mga panahun pa ni Moises ug mao kini ang mga basahon nga gisangyaw sa kapanahunan ni Moises diin gitawag kini nga Judaism o pagtulun-an kalabot lamang sa Dios Amahan. Ang bag-png kasabutan mao kini ang mga sinulat sa panahun ni Jesu Cristo ug sa iyang unang mga apostoles. Ang bibliya naglangkob kini sa Judaism, sa panahun ni Moises ug Christianity sa panahun Jesu Christo ug sa iyang mga tinahasan.

Ginaingon nga wala na unta kinahanglana pa ang ikaduhang kasulatan kun wala nay mga kasaypanan ang unang kasulatan. Bisan diha sa nabantog nga Exodus diin gipakagiw ni Moises ang mga 600,000 tanan ka tawo gikan sa Ehipto paingon sa yuta sa mga saad gitawag sa unang panahun ug Capernaum diin sila nagabaklay sulod sa 40 ka tuig. Matod pa wala makabalaan si Moises sa dihang nasupak niya ang kabubut-on sa Amahan sa pag-abot na u 39 ka tuig ug wala na siya tugti uban ni Aaron sa pagsulod sa Capernaum. Diha lamang sila sa silingan ng dapit diin 1 na lang katuig ang distansya sa Capernaum ug usa ka binuhat binuhat maoy gipapuli sa Dios kang Moises …Si Joshue.

Usa sa katuyu-an diha sa pagpakatawo sa Anak sa Dios dinhi niining kalibutan mao ang pagpasabot sa tinuoray nga kasugo-an sa Dios diin diha kang Moises iyang gisangyaw ang napulo ka sugo diin gipasabot kini sa anak sa Dios ang ang napulo ka sugo mamahimo lamang kini nga duruha, Una ang paghigugma sa Dios labaw sa tanan, ug Ikaduha ang paghigugma sa imong isigkatawo sama sa paghigugma sa imong kaugalingon. Sa ato pa ang kasugo-an sa Dios naglangkob lamang sa pulong gugma.

Ang balaang kasulatan maoy pagpasabot lamang sa tipik nga gahum ug mga bulohaton nga gipakita sa Dios niadtong unang mga tinawag ug mga unang katawhan, kini aron lamang usab nga makaambit kitang ania niining ikatulo nga siglo diha sa kabubut-on sa Dios, diin ginaingon nga dili ang tanan mga milagro ug buhat sa espiritu santo nahasulat sa maong balaang kasulatan, kay kun isulat kini tanan nan basin mismo ang kailibutan dili igo nga butangan sa mga sinulat.

Kini gituyo sa Dios aron usab dili na matugkad ang iyang kabubut-on, diha sa mga tawo nga magtuki pinaagi sa tawhanong kaalam, kay walay tawo dinhi sa ibabaw sa kalibutan nga gitugotan sa Dios sa pagtugkad sa iyang kabubut-on. Diin usa na ka ehemplo niini ang tinuoray nga edad sa kalibutan diin hangtod niining panahuna wala gayud mag-“coincide” ang siyensya ug ang balaang kasulatan diin diha sa balaang kasulatan nagaingon nga ang edad sa kalibutan anaa lamang sa 10,000 ka tuig apan matod pa sa siyensa, ang edad sa kalibutan nga atong gipuy-an, anaa na sa 4.2 bilyon ka tuig . Nagapasabot lamang mga igsoon nga lahi ang oras nga gigamit sa Dios ug lahi usab ang orasan sa tawo, nagpasabot lamang mga igsoon nga bisag unsaon pa sa tawo sa pagbugtaw diha sa kaalam nga tawhanon dili gayud niya masukod ang gahum ug kaalam sa Dios.

Ang Daan Ug Ang Bag-ong Kinabuhi

COLOSAS 3 : 5 ~ 17

5 Bisag layo ko, ang akong espiritu nag-uban ninyo. Nalipay kong naghunahuna sa kalig-on sa inyong disiplina ug pagtoo ni Cristo. 6 Kon gidawat ninyo si Cristo Jesus isip Ginoo, himoa siya nga inyong doktrina. 7 Pagamota ug pasukara ang kaugalingon diha niya. Himoa ang pagtoo nga inyong prinsipyo sumala sa gitudlo kaninyo. Hatagi siya sa nag-awas-awas nga pasalamat. 8 Paninguhaa nga dili mo malingla sa pilosopiya o bisag unsang haguka nga diskurso – tawhanon kaayong mga pagtulon-an. Dili ni linamdagan ni Cristo, kondili sa kalibotanong kaalam.

9 Diha niya naa ang kahingpitan sa tawhanong porma sa Diyos. 10 Ulo siya sa tanang gahom ug awtoridad sa kalibotan. Diha niya makaangkon mo sa tanang butang. • 11 Diha ni Cristo Jesus natinuli mo, apan dili sa tawhanong kamot nga sa hingpit nagkuha gikan ninyo sa lawas sumala sa unod. 12 Ang akong gipasabot mao ang bunyag. Sa pagdawat ninyo ini gilubong mo uban ni Cristo; mabanhaw sab mo uban niya, kay nagtoo man mo sa gahom sa Diyos nga nagbanhaw niya sa mga patay. 13 Patay sab mo kaniadto. Nakasala mo. Sa samang higayon dili mo tinuli. Apan gibuhi mo sa Diyos uban ni Cristo. Gipasaylo niya ang tanan tang kasal-anan

14 ug gigisi ang listahan sa atong utang, ang mga lagda nga nagsang-at og pasangil batok nato. Giwagtang niya ang tanan nga iyang gilansang sa Krus. 15 Gihuboan niya sa gahom ang mga hari ug mga awtoridad ug gipakaulawan atubangan sa tibuok kalibotan unya, giguyod daw mga piniriso. • 16 Ayawg tugot nga sawayon mo tungod sa matang sa pagkaon o ilimnon o tungod sa inyong walay pagpanumbaling sa bisag unsang pyesta, sa bag-ong bulan o sa Adlaw sa Pahulay. 17 Kining tanan anino lang sa umaabot sanglit ang kamatuoran mao man si Cristo.

PAGPAAMBIT SA MENSAHE:

Ang maong ebanghelyo maoy pagpasabot diha sa pagpakabuhi nga iya sa Dios, pagpakabuhi nga minando-an sa espiritu santo diin isul-ob nato ang espituhanong pagkinabuhi nga maoy gisul-ob ni Jesu-Cristo diha sa iyang pagpakatawo niining kalibutan, diin atong ibalaan ang atong kaugalingon, biyaan nato ang mga tawhanon nga mga kailibgon.

Nagpasabot lamang mga igsoon nga huboon nato ang daan nato nga pagkinabuhi, dinhi sa kalibutan diin magpuyo kita nga sa daw langyaw niining kalibutana apan ha-om didto sa iyang ginghari-an sa langit, kay unsa man tuod ang pulos kun imong ipahari ang imong mga tawhanon nga mga kailibgon ug bisyo kun paga-ayran ka usab didto sa gingharian sa langit diha sa atubangan sa atong Amahang Dios.

Usa ka pagpamalandong ang pagpakabuhi ni Jesu-Cristo dinhi sa kalibutan diin gibiyaan niya ang tanan matod pa diha sa Philipos 2: 17, nagaingon nga diha Kaniya ang kinaiya sa pagka Dios, apan wala niya ipamugos ang iyang pagka Dios pina-agi sa kusog hinunu-a gihubo ug gibiyaan niya ang tanan, ug miuban siya sa mga kabos ug nagsangyaw sa pulong sa iyang Amahan ug nag-ayo sa mga masakiton pinaagi diha sa mga milagro nga iyang gipakita.

Iyang gipamatuod nga dili babag ang kawad-on diha sa pagsulod sa ilang gingharian, ug iyag gipamatuod nga maoy bililhon sa tawo ang kaluwasan sa iyang kalag diha sa kinabuhing dayun ug iyang gipamatuod nga adunay kinabuhi human sa kamatayon, ug matuod ang pagkabanhaw kay matod pa siya ang pinaka-unang binuhat diha sa kasaysayan sa balaang kasulatan, nga gibanhaw ug diin ang iyang tawhanon nga lawas ang gibayaw sa Dios Amahan ug gipasidunggan didto sa iyang gingharian sa langit.

Diha sa ubang sinulat miingon si Jesus nga sa takna unya nga mobalik na siya ngadto sa gingharian sa iyang Amahan nan ayha na ang iyang mga katawhan magsugod sa pagpuasa, pagpuasa diha sa paglikay sa pagbuhat ug mga kasal-anan, sa paglikay sa pagsimba sa mga Dios-dios. Gibag-o na ni Jesu-Cristo ang atong kinabuhi diha sa iyang pagpakamatay sa krus, diin matod pa namatay kita uban kaniya, ug nabanhaw uban kaniya apan nagpabilin nga patay ang atong mga kasal-anan.

Apan ang tawo samtang nagkinabuhi pa niining kalibutan, sa kanunay makasala gayud diha sa huna-huna, sa pulong ug sa buhat. Nan sa kanunay gisabot kita sa Dios diin kita giaghat sa Dios sa pag-ampo ug sa pagpangayo ug pasaylo sa adlaw nga tanan, diin hataas pa gihapon ang ilang pasensya diha sa ilang mga katawhan , kay matod pa tanan nga mga sala aduna gayuy kapasaylo-an , madako man o magamay ang importante lamang nga hugot kang nagto-o usab nga ikaw mapasaylo sa imong mga sala pinaagi diha sa imong mga pag-ampo kay kun kulang ka sa pagto-o nga ikaw mapasaylo sa imong sala nan sama ra nga wala ka moto-o nga si Jesu-Cristo matuod nga manluluwas ug matuod nga anak sa Dios.

Pagpakamatay Ug Pagpakabuhi Diha Kang Cristo

COLOSAS 2: 20~23, 3:1~4

20 Kon tinuod nga namatay mo uban ni Cristo ug nakalingkawas sa mga baroganan sa kalibotan, nganong nagpatudlo man mo nga morag sakop pa sa kalibotan? 21 “Ayawg kan-a, ayawg tilawi, ayawg hikapa...” 22 Mga tawhanong lagda ni ug pagtulon-an mahitungod sa mga butang nga malata, madugta ug mahanaw. 23 Morag lawom ang maong mga pagtulon-an, kay gahisgot mag relihiyon, pagpaubos ug pagsalikway sa kaugalingon. Apan ang tinuod, walay kapuslanan sa pagbuntog sa kahakog!

3 • 1 Busa, kon nabanhaw mo uban ni Cristo, pangitaa ang tua sa, diin si Cristo naglingkod sa tuo sa Diyos. 2 Tinguhaa ang mga butang nga naa sa ibabaw, dili ang kalibotanon, 3 kay namatay na mo, ug natago diha sa Diyos ang inyong kinabuhi uban ni Cristo. 4 Sa pag-padayag ni Cristo, atong kinabuhi, sa kaugalingon, ipadayag pod mo uban niya sa Himaya.

PAGPAAMBIT SA MENSAHE:

Ang maong ebanghelyo maoy pagpakita lamang diha sa kabubut-on sa Dios diin kitang iyang gitawag ug gipili, magkinabuhi gayud nga langyaw niining kalibutana apan ha-om didto sa iyang gingharian sa langit. Mao na kini ang pagkinabuhi nga minando-an sa espiritu santo sa Dios diin sa kanunay anaa ang mga pag-ampo ang pagbalaan sa kanunay ug ang pagkinabuhi nga puno sa paglutos mga kasakitan sa kinabuhi.

Dili masabtan niadtong mga katawhan nga wala kanila ang giya sa espiritu santo, niadtong mga katawhan nga gipalabi nila ang bahandi nga iya niining kalibutana, kay para sa uban ang langit ania ra sa kalibutan, ang bahandi mao ang ilang Dios ug sila mismo naglunang diha sa mga kasal-anan ug mga kalibutanon nga kailibgon.

Dili nila masabtan kun unsa ang kaluwasan diin para sa uban mao lang kini ang kinabuhi dinhi sa kalibutan, ug diin wala nila huna-nunaa ang kinabuhi human dinhi sa yuta, ang kinabuhi nga espirituhanon, nga maoy labing imporatnte.

Matod pa samtang buhi pa kita , kita mismo ang nag-administer sa atong kaugalingon, kita mismo ang nagdiskate diha as atong pagkinabuhi nga tawhanon, apan ang tawo tulo ang iyang kianbuhi matod pa sa pulong sa Dios, Una ang kinabuhi diha sa materyal nimong lawas diin ikaw mismo maoy hawod, ikaduha ang kinabuhi sa imong espiritu diin sa higayon diha sa imong kamatayon mobalik kini ngadto sa Dios ug maoy mosumbong diha sa imong mga sala niining kalibutan, ug ikatulo mao ang kinabuhi sa atong kalag diin mao pagkaon niini ang atong mga pag-ampo niining kalibutana ug ang kalag usab maoy maoatubang sa atong ikaduha ug kataposang paghukom diin bulahan kun maangkon na niini ang kinabuhing dayon diin makaangkon kini sa lawas nga langitnon ngadto sa kinabuhing dayon.

Nan ang pangutana kun wala nimo maandam ang imong kalag diin nagkulang ka sa pag-ampo, aduna ka ba kahay kaluwasan nga sebo niining maong ebangheyo. Anag Dios ray nasayod kay matod pa adunay mga pag-ampo ang imong kalag apan haguka na kini kay wala na man kanimo ang espiritu ug mibalik na sa Dios ug wala na usab kanimo ang materyal nga lawas nga maoy modawat sa mga sakripisyo nan dugay maka-abot ang imong mga pag-ampo ngadto sa Dios.

Diha unya nianang panhuna diin mahinumduman nimo ang imomng mga binuhatan sa tawo kapa kay matod pa ipadala man sa Dios ngadto sa imong kalag ang imong panumduman niadtong nagkinabuhi ka pa, Wala ka nay mahimo igsoon, minando-an ka sa espiritu apan wala kay mabuhat kay wala ka may mga pag-ampo nga imong nabawon didto sa laing kalibutan walay pag-ampo nga imong natigom ang mga langitnong bahandi nga maoy imong pases ngadto sa ganghaan sa gingharian sa Dios nan magahulat ka gayud nga matagaan ug parol pinaagi sa grasyaa ug mga pag-ampo diha sa imong mga paryente nag maoy nagahangyo sa Amahan para makalangit ang imong kalag.

Ang importante diay mga igsoon mao ang imong pagpakabuhi uban ni Cristo diin tagaan ka ug kahigayunan nga maluwas ngadto sa kinbuhing dayun dihaha sa iyang grasya ug panalangin. Ang buhing pulong sa Dios miingon : “ Kun nasayod pa unta kamo kun unsay atua didto sa iyang gingharian sa langit nan dili na unta lamo mangaplag pa ug dugang bahandi nga iya niining kalibutana, biyaan ninyo ang tanan ug maoy inyong sigoroon nga mahiabot kamo ngadto sa iyang gingharian.

Ang Kinaiya Ug Buhat Ni Cristo

COLOSAS 1:15~23

15 Larawan siya sa Diyos nga dili makita, ang panganay sa tanang binuhat. 16 Diha niya gibuhat ang tanang butang nga makita ug dili makita: ang mga trono, mga hari, mga gahom... ang tanan gihimo pinaagi niya ug alang niya. 17 Siya na ang Siya, sa wala pa ang tanan, ug diha niya ang tanang butang.

18 Ulo siya sa lawas, ang Simbahan; ang sinugdan, ang unang gibanhaw sa mga patay aron mag-una sa tanan. 19 Kay nahimuot ang Diyos nga ang kahingpitan magpabilin niya. 20 Gimbut-an sa Diyos nga pinaagi ni Cristo mapahiuli ang tanan diha ug pinaagi niya, sa iyang pagpaagas og dugo sa Krus, gimugna sa Diyos ang kalinaw dinhi sa yuta ingon man sa Langit.

• 21 Kamo mismo layo ug masinupakon sa Diyos kaniadto tungod sa daotang binuhatan. 22 Apan karon gipahiuli namo. Ang Diyos nagpahiuli ninyo pinaagi sa pagtugyan sa kamatayon sa lawas ni Cristo, aron makaatubang mo niya nga walay sala, balaan ug putli. 23 Barog nga lig-on sa sukaranan sa pagtoo ug pabilin sa gilaoman. Ibutang sa hunahuna ang Ebanghelyo nga nadungog. Kay gitudlo ni sa tanang binuhat ubos sa langit. Ako, si Pablo, ang nag-alagad niya.

PAGPAAMBIT SA MENSAHE:

Ang maong ebanghelyo nagpasabot lamang diha sa tanang mga pulong sa Dios, diin ginaingon nga si Jesu Cristo ang buhing larawan sa dili makita nga Dios. Siya ang panganay sa tanang mga binuhat nga makita ug dili makita.

Dinhi na si Jesu Cristo sa wal pa buhata ang kalibutan siya ang pulong nga nagpakatawo ug mopuyo uban kanato. Diha sa uabang sinulat nagaingon, Siya ang ikaduhang Adan nga miabot dinhi sa kalibutan, diin wala siya magagikan sa abog kun dili nagagikan siya sa espiritu santo sa Dios nag gitisok diha sa sabakan ni Birhen Maria.

Philipos 2: 8 ~ 17 nagaingong nga diha kaniya ang kinaiya sa pagkaDios ug diin wala niya ipamugos ang iyang pagka Dios pinaagi sa kusog hinunu-a gihubo niya ang tanan, ug nagpakauos ug mitipon ngadto sa mga kabos uban sa sa iyang pagsangyaw niining iglisea sa kamatuoran nga iyang gisangyaw ngadto sa mga sumosunod pinaagi diha sa pagpakita ug maayong buhat diha sa mga milagro ug sa pagtambal sa mga ,masakiton, uban sa pagsangyaw sa maayong balita.

Dako ang panalangin kaniya sa amahan tungod sa kadaugan nga iyang naangkon ang kadaugan diha sa paglansang ug sa pagkamatay niya sa krus, Diha sa ma-o niyang kadaugan gibayaw ang iyang lawas ngaddto sa langit ug gihatagan ug kinatas-an nga puwesto diha sa gingharaian sa Amahn ug gipalingkod sa to-o nga trono sa Amahan ug pinaagi kaniya ang tanan nag atua sa langit ,ani-a sa yuta ug sa ilawom sa yuta miluhod aron sa pagsimba sa iyang ngalan nga Jesu-Cristo.

Usa ka pagtulon-an nga sarang sa pagpamalandong nga ang anak sa Dios mikanaog dinhi sa yuta aron sa pagluwas kanatong tanan pinaagi diha sa kamatayon sa krus, usa ka kamatuoran nga ang nagpaubos dinhi sa yuta nan ipataas ug himay-on didto sa iyang gingharian sa langit, apan ang mapasigarbohon dinhi sa yuta nan ipaubos ug dili ilhon sa Amahan didto sa iyang ginghari-an sa langit.

Usa ka pagpamalndong diha sa iyang kamatayon sa krus diin matod pa diha sa ubang sinulat 1 Corinto 1 : 18, nagaingon ang mensahe ni Jesus Cristo diha sa kamatayon niya sa Crus binuang alang niadtong wala maluwas apan alang kanatong giluwas nan gahum kini sa Dios. Angay pagahinuktukan nga ang maong krus dili simbolo sa kamatayon sa Dios kundili simbolo sa talagsaong gahum, angay sa pagpamalandong nga ang pagtulun-an nga gisangyaw ni Jesu-Cristo gasunod ang mga kasakitan nga sa ato pa mao kana ang kamatuoran nga ang pagtulun-an nga iya sa Dios anaa gayud ang mga paglutos.

Angay hinuktukan sa makadaghaan, ang pagdawat diha sa mga kasakitan ug mga paglutos sa kinabuhi mao lamay pagmatuod nga atong gipapuyo ug gipahari si Jesus Cristo diha sa atong kasingkasing, kay ang Dios miingon, “Ang iyang pulong dili pulong sa pagpasigarbo kundili Ang pulong sa Dios pulong sa pagpaubos”.

Salamat Sa Gasa

FILIPOS 4: 10~20

10 Naglipay ko diha sa Diyos tungod sa inyong pagpakabana nako. Tinuod nga nagpakabana mo kaniadto, apan walay higayon pagpakita ini. 11 Wala ko mag-ingon ini tungod sa panginahanglan. Nakat-on ko pagpakabuhi sa bisag unsa nga naa nako. 12 Nasayod kog unsa ang pagpanginahanglan ug ang pagkahupong sa tanan. Nasayod kog unsa ang kagutom ug kabusog; ang kabuhong ug kanihit. 13 Mabuhat unta nako ang tanan diha niya nga naglig-on nako.

14 Hinuon, husto sab ang inyong gibuhat sa pag-ambit sa akong mga pagsulay. 15 Kamong taga Filipos, hinumdomi nga sa sinugdan, sa una tang pagsangyaw sa Ebanghelyo, human ko mobiya sa Macedonia, kamo ray mitabang nako. 16 Sa didto pa ko sa Tesalonica, kaduha ko ninyo padad-i sa akong gikinahanglan.

17 Dili ang inyong gasa ang akong gipakabililhon, kondili ang nagdugang nga kaikag sa inyong bahin alang nako. 18 Karon, duna na koy igo alang nako ug labaw pa gani, uban sa tanang gidala ni Epafrodito sa inyong ngalan. Ako ning gidawat sama sa “Humot nga mga gasa nga makapahimuot sa Diyos.”

19 Ang Diyos mismo magpaangay ninyo sa tanang gikinahanglan, sumala sa iyang bahandi ug magpakita sa kamanggihatagon niya diha ni JesuCristo. 20 Himaya sa Diyos, atong Amahan, hangtod sa kahangtoran. Amen

PAGPAAMBIT SA MENSAHE:

Ang maong mensahe maoy pagpsalamat sa mga gasa nga materyal man o ma esoirithanon nga moabot digha sa atgsa-tagsa nato ka kinabuhhi. Diha niining maong ebanghelyo nagpasabot s iPablo diha sa mga kalisod nga iyang naagi-an, ug usab sa mga paglutos nga iyang nasinati apan lagi tungod sa mga pagtabang nga iyang nadawat diha sa iyang mga kauban sa pagtulun-an nga gisangyaw ni Cristo nan hamugaway siya bisan ug nagkalisod-lisod.

Apan ang gasa nga maoy labing importante diin sa kanunay nga atong ipasalamat sa Dios mao ang kahigayunan sa pag-ila sa matuod nga manluluwas ug sa pagpuyo nga iya ni Jesu Cristo. Mao kini ang pagtawag kanato diha niining tinago nga kamatuoran diin maoy ipasunod ug ipasubay kanato sa Dios.

Si Pablo niadtong panahuna sa iyang pagsangyaw, nakita niya ang tanang mga paglutos ug mga kalisod diin matod pa nagahulat kaniya ang prisuhan diha sa iyang matag abot sa lain-laing dapit, apan maoy iyang gibarugan ug gihimong inspirasyon ang gasa nga langitnon nga nagpa-abot kaniya didto sa laing kalibutan.

Wala niya baliha ang tanan, wala niya igsapayan bisan kun naga-ungaw na siya diha sa baba sa kamatayon tungod kay nasayod man siya kun kinsa ang iyang gisunod, nasayod man siya nga walay bili kining atong tawhanon nga pagpakabuhi niining kalibutana, kay mag-unsa man tuod kun maimo ang bahandi nga iya niining kalibutan, apan diha sa imong pagbiya niining kalibutan biya-an mo man usab ang tanan.

Apan angay nato mahibalo-an nga dili tanan gitawag ug gipili sa Dios , kay matod pa diha sa ubang sinulat, ang Dios maoy nangita kanato aron maluwas dili kay kita maoy nangita sa Dios para maangkon ang kinabuhing dayun. Mao kini ang langitnong gasa nga gusto ipasabot sa Dios diha sa iyang mga piniling katawhan,

Diin diha sa unang sinulat nagaingon nga daghan ang matang sa gasa nga iyang giapod-apod ngadto sa iyang mga sumosunod, na-ay mga lideres, mga propeta, ebanghelista ug mga pastor, mga magtutudlo, apan usa ra ang Dios espiritu santo nga nagahatag sa gasa, diin angay natong amumahanon ug alimahan ang gipahulam nga gasa sa Dios pinaagi diha sa pagtuman sa iyang kasugo-an.

Nagaingon ang Dios nga kun siya mohatag dili kini hatag-bawi nga sa ato pa kana nga gasa nga imong gihuptan imo na kana hangtud sa kahangturan diin dili kini nimo ma-uli tungod kay nahiuban man kini sa imong kasing-kasing.

Angay lamang nga pasidunggan nato ang Dios diha sa iyang mga gasa nga atong nadawat, diha sa gasa nga iyang gipahulaman, Apan kay matod pa ang tawo dili man gayud makuntento samtang nagkinabuhi pa niining kalibutan, anaa gayud ang agpangplag para sa kabulahan nga materyal, Apan ang balaang kasulatan nagaingon, unaha ang gingharian sa langit ug ang tanan nga imong gipangayo ipaabot ra kanimo. Diin bulahan ka nga sa kanunay naga-ampo diha sa adlaw nga tanan para hapsay ug han-ay ang imong pagkinabuhi apan mas bulahan kadtong mga tawo nga maoy gipadala sa Dios isip tubag sa atong mga pag-ampo.

Ang Pagbalik Sa Ginoo

1 TESALONICA 4: 1~12

1 Dili na kinahanglang sulatan pa mo bahin sa nadugay ug anang panahona ug taknaa. 2 Nasayod na mo nga moabot ang Adlaw sa Ginoo sama sa kawatan sa kagabhion. 3 Kon ang mga tawo dunay paglaom ug kalinaw, kalit nga moabot nila ang kaalaot sama sa pag-antos sa babayeng manganak. Dili sila makalingkawas. 4 Apan kaigsoonan, wala mo sa kangitngit. Busa, dili mo makurat anang adlawa sama sa kawatan. 5 Mga lumolupyo mong tanan sa kahayag ug sa adlaw. Wala ta mahimutang sa kangitngit ug sa kagabhion. 6 Dili ta matulog sama sa uban, apan pabiling igmat ug malinawon.

7 Sa gabii natulog ang mga katulgon; sa gabii sab nahubog ang mga palahubog. 8 Kay nahimutang ta sa adlaw – isul-ob nato ang taming sa pagtoo ug gugma. Ug himoon natong helmet ang paglaom sa kaluwasan. 9 Kay dili gusto ang Diyos nga silotan ta apan, aron maluwas pinaagi ni Cristo Jesus nga atong Ginoo. 10 Namatay siya alang nato aron mosulod ta sa kinabuhi uban niya, buhi o patay. 11 Busa, dasiga ang matag usa. Lig-ona ang usag usa sama sa inyong gibuhat karon. 12 Mga igsoon, naghangyo mi nga pasalamatan ninyo ang naghago alang ninyo: ang nag-una ninyo sa dalan sa Ginoo, ug ang nagsaway ninyo

PAGPAAMBIT SA MENSAHE:

Ang maong ebanghelyo maoy pagpasabot lamang nga ang Ginoo misaad nga mobalik nan mobalik gayud siya. Diha 2 Pedro 3: 8, nagaingon siya nga ang 1 ka adlaw sama sa 1000 ka tuig apan ang 1000 ka tuig sama sa usab sa usa lamang ka adlaw diin kun makita sa Dios nag andam na ang tanan nan sa walay langan ipakanaog na niya ang iyang bugtong anak aron hukman kitang tanan.

Apan matod pa daghan pa mga tinagong pulong nga gusto ipadayag sa Ginoo, kay mao gayuy gusto sa Dios nga walay malaglag diha sa iyang mga pinili nga katawhan diin diha unya sa adlaw sa paghukom silang tanan mahi-usa ngadto sa iyang gingharian.

2000 Kapin ka tuig na ang milabay, diin miingon si Jesu-Cristo nga kun giunsa siya pagbayaw nagdto sa langit nan mao usab unya kana ang iyang paghibalik diin maabli ang kalangitan ug maghudyaka ang mga anghel kay hapit man unya maghari ang Ginoo diin tukoron niya ang bag-ong Jerusalem didto sa iyang gingharian.

Diin matod pa 90 % na sa mga panagna diha sa balaan kasulatan nga natuman diin naa na kita karon sa Pinadayag nga bahin diin mao kini ang mga panan-awon ni Juan mahitungod sa kaluwasan ug umaabot nga paghukom. Miingon ang buhing pulong sa Dios nga wala nay laing siglo pa nga magpakatawo ang Dios mao lamang kini nga siglo nga milabay,

Labihan na kahugaw ang kalibutan ug angay na kining hugasan ug tubig ang gamiton sa Dios diha sa paghugas sa mga malapason, tubig ang iyang gamiton sa pagbanwas diha sa mga katawhan, busa kamo, kita nga mga pinili ug tinawag nga katawhan sa Dios dili gayud magbangay-bangay sa pag-ampo kay basin ug mahi-apil kamo sa pagbanwas.

Dako nga katalagman ang iyang gipasinati niadtong miaging Enero 2009, diin halos ang tibook Misamis Oriental nakatilaw sa maong tubig, diin bisan ang mga pinili ug mga mainampoon niyang mga katawhan nahiapil diha sa maong lunop ug ang Dios miingon nga naga-ampo man kamo apan ang inyong silingan wala man mag-ampo nan nahi-apil gayud kamo ug banwas.

Labing dako usab nga katalagman ang iyang gipasinati didtong dapita sa Manila diin makalilisang nga tubig nga hapit mahurot ug lunop ang sentro kamaynilaan, tubig nga milapas diha sa labay sa bubong sa matagbalay, daghang mga kinabuhi nga nakalas ug diin naa pay mga bagyo nga taliabot.

Mao na kini ang mga pasidaan sa Dios mahitungod sa iyang pagbalik diin anaa ang mga timailhan, Ug mao na kini ang panahun nga mobalik na kita ug magpaduol sa Ginoo, kay hapit na ang pagbalik sa iyang bugtong anank nga si Jesu Cristo diin bulahan kun sa matag-adlaw nga tanan himoon natong batasan ang pagsantos nga rosaryo sa adlaw ug sa gabii aron sa ingon hapsay ug andam ang atong kalag sa matag karon ug unya kay sama sa pagbalik sa Dios ang atong kamatayon usab moabot lamang usab sama sa kawatan nga dili lang mahibalo-an.

Nagdan-ag Ingon Nga Suga Sa Kalibutan

FILIPOS 2: 12~17

• 12 Busa, mahal kong kahigalaan, ingon nga kanunay mong nagsunod nako samtang uban pa ko ninyo, padayon mo labi pa karon nga layo na ko, sa pagbudlay alang sa inyong kaluwasan uban ang “Kahadlok ug pangurog.” 13 Ang Diyos nagdasig sa inyong pangandoy ingon man sa pagtuman sa makapahimuot niya. 14 Buhata ang tanan sa walay bagulbol, 15 sa ingon, maanak mo sa Diyos nga walay sayop ug dili mabasol; dili salawayon taliwala sa hiwi ug badlongong kaliwat. Kahayag mo taliwala nila, sama sa kabitoonan sa tibuok kalibotan nga 16 naghupot sa pulong sa kinabuhi. Mobati kog garbo nga ang inyong paningkamot ug kahago wala makawang. 17 Kon ibubo ko ang akong dugo isip gasa alang sa pagsaulog sa inyong pagtoo, magmaya ko ug magpadayon pag-ambit sa inyong kalipay.

PAGPAAMBIT SA MENSAHE:

Ang maong ebanghelyo maoy pagpasabot nga matag usa kanato adunay tahas diha sa atong pagkinabuhi nga kristuhanon, diin mao kini ang pagkinabuhi nga ubos sa giya sa espiritu santo sa Dios. Matod pa diha sa mensahe sa mahal nga Birhen Maria didto sa iyang nabantog nga milagro didto sa Fatima , Portugal kaniadtong May 13, 1917.

Miingon siya ngadto sa tulo ka inosenteng mga binuhat nga matuod nag adunay impyerno ug matuod nag adunay kinabuhi human sa kamatayon, ug miingon siya nga ang tanang magtoto-o, adunay tulobagon ngadto sa Dios kun sa higayon nga adunay binuhat na natunaw diha ngadto sa kalaglagan sa kalayo sa impyerno tungod lamang kay wala kini masangyawi sa kaluwasan niadtong panahun nga buhi pa kini ug haduol pa kini kaniya.

Apan bulahan ka usab kun diha sa imong pagsangyaw usa ka kalag o usa ka binuhat ang imong naluwas diha sa imong ebanghelyo sa maayong balita kay sama ra nga naluwas mo ang imong kalag . Kay matod pa ikaw o kita nga maoy nakakita sa maayong balita maoy nakakita sa kahayag ngadto sa kinabuhing dayun ,aduna ka gayuy tulobagon o tulomanon sa pagsangyaw diha sa imong pamilya, diha sa imong igsoon ug diha sa imong mga silingan o kumunidad nga gibarugan.

Apan lagi matod pa usab diha sa ubang sinulat sa balaang kasulatan lahi-lahi ang pagtawag sa Dios diha sa iyang mga sumosunod, apan dili ang tanan nagasangpit ug Dios, makasulod sa iyang gingharaian sa langit kundili kadto lamang nagasunod sa iyang kabubut-on.

Bisan diha sa mga misyon ug pagsangyaw ngadto sa lagyong dapit mipasabot gayud ang Dios, diha sa iyang mga magsasangyaw, nga isangyaw ang pulong sa Dios sa makaduha ug makatulo lamang kundili maminaw biya-i sa walay paglingi ug itak-tak ang abog sa imong sandalyas kay wala ipamugos sa Dios ang iyang gingharian sa langit ug mas labaw nga wala niya ipamugos ang kaluwasang dayun nga gisaad ni Jesu Cristo.

Diha sa ubang mga pulong nagaingon, daghan ang nakakita apan nagpakabuta, ug daghan ang nakadungog apan nagpaka bungol, nagpasabot lamang kini mga igsoon nga ang pagpamati ug ang pagsulod niining pagtulun-an nga gisangyaw sa Dios ang Tinagong Kamatuoran, dili kabubut-on lamang sa maong mga katawhan kundili kabubut-on mismo sa Dios, kay matod pa dili tanan katawhan dinhi sa kalibutan gitawag ug gipili sa Dios diin maayo lang kun adunay katunga nga gipili sa Dios apan kadtong wala pili-a sa Dios nan dinhi lang sila sa kalibutan, apan kadtong tinawag ug pinili aduna silay kahigayunan sa pagkinabuhi ngadto sa kinabuhing dayun nga gisaad sa Dios, apan matod pa ang pinili, pagapili-an pa.

Sa ato mga igsoon dili atong kabubut-on nga nakasulod kita niining maong pagtulun-an, kundili kabubut-on sa Dios, kay matod pa diha sa ubang sinulat ang Dios maoy miduol kanato aron kita luwason, Diha sa ubang pulong miingon usab ang Dios nga tawgon ko ang akong katawhan pinaagi sa balati-an kay mao lamang kana ang bugtong paagi nga sila moduol sa Dios labi kun ang maong balatian lisod na pagatambalan sa medisina.

Daghan ang gipakita nga milagro sa Dios pinaagi sa pag-ayo sa masakiton diha sa mga misyon nga gipadala kami sa Dios sa lagyong dapit, apan kini nagadepende sa tawo, ug kun ang Dios aduna laing plano diin gusto niya nga ikaw mamahimo gayud nga iyang magsasangyaw, gusto gayud nga mga dan-ag ka ingon nga suga niining maong pagtulun-an nan ipatidlom gayud sa Dios ang doktrina niining maong pagtulun-an sa imong huna-huna ug lasing-kasing.

Sa atopa ayaw pagkapuol igsoon, ayaw pagtapol diha sa pag-ampo kay matod pa sa pulong sa Dios mao na kini nga bulohaton sa mga pag-ampo nga imong nasinati ang mga bulohaton usab sa iyang mga katawhan didto sa iyang gingharian sa langit, apan lagi kay kalibutan pa man kini nan anaa gayud ang mga pagsulay, anaa gayud ang mag kalisdanan, diha sa paagi nga ang Dios ra ang nasayod, apan isalig sa Dios ang tanan, hugta ang imong pag-ampo kay ang Dios miingon “Nganong dili ko man ihatag ang inyong gipangayo kun kini kaayuhan man”.

Ang Matuod Nga Pagkamatarong

FILIPOS 3: 1~11

3 1 Sa kataposan, mga igsoon, pag lipay sa Ginoo.
• Dili bug-at alang nako ang pagsulat pag-usab bahin sa sama gihapong butang, ug alang ninyo mas wala ni peligro. 2 Pagbantay sa mga iro, sa daotang mamumuo ug sa mga tinuli. 3 Kitay tinuod nga tinuli, kay nag-alagad ta sa Diyos sumala sa espiritu ug ang atong pagsalig naa ni JesuCristo, inay sa kaugalingong katakos.

4 Ako, sa akong kaugalingon, wala makulangi ining tawhanong hiyas nga gisaligan sa katawhan. Kon ang uban nila ingog miangkon sa maong hiyas, unsa pa kaha ko! 5 Gituli ko sa walo ka adlaw ang idad ug natawo sa kaliwat ni Israel, sa tribu ni Benjamin. Hebreo ko, natawo sa mga Hebreo. Kabahin sa Balaod, Pariseo ko, ug 6 ingon ang akong kasibot alang sa Balaod nga gigukod ko ang simbahan. Sa katarong sumala sa Balaod, walay ikasaway nako.

7 Apan sa pagkakaplag ko ni Cristo, ang tanang butang nga gitan-aw ko untang ganansya, giisip nako nga alkansi. 8 Gawas pa, ang tanang butang ingon nga baleg wala lang alang nako, kon itandi sa kahibawo ni JesuCristo, akong Diyos. Tungod niya, giwagtang ug gitan-aw ko ang tanan nga daw basura, kon ugaling maangkon ko si Cristo. 9 Diha niya makit-an unta ko nga walay kaugalingong katakos o kabalaan sa pagtuman sa Balaod, apan may kabalaan nga gikan sa pagtoo ni Cristo, ang kabalaang hinatag sa Diyos nga nagsandig sa pagtoo diha ni JesuCristo. 10 Buot kong makaila niya, makasinati sa gahom sa Iyang pagkabanhaw, makaambit sa iyang pag-antos ug mahisama niya diha sa kamatayon. 11 Modangat unta ko, kon motugot ang Diyos sa pagkabanhaw sa mga patay.

PAGPAAMBIT SA MENSAHE:

Ang maong ebanghelyo maoy pagpasabot lamang nga pagsunod sa balaod dinhi sa yuta dili maoy sumbanan sa pagkamatarong diha sa mata sa Dios, kay matod pa ang matuod nag pagakamaatrong mao ang paghinlo diha sa imong kaugalingon diha sa mga sala ug mga hiyas nga diin ikaw usa na kamatuod nga alagad sa Dios ug usa na ka matuod nga pagkamatarong.

Nan unsaon man nato pagkasayod nga kita matarong, unsaon man nato pagkasayod nga ang mga katawhan nagmatarong na diha sa pag-alaagad diha sa Dios pinaagi kang Cristo Jesus. Dili kita makahukom mismo sa atong ka-ugalingon, ug mas labaw nga dili nato makita ang pagkamatarong sa usa ka tawo pinaagi lamang sa iyang pamarog ug pamiste.

Apan ang Dios nga labing gamhanan sa tanan nasayod sa tanan butang dinhi sa ibabaw sa kalibutan, nga sa sa ato pa siya lamang ang nasayod kun tinuoray ba gayod nga atong pagkamatarong o tinuoray ba gayud ang atong pag-alagad sa Dios.

Diha sa ubang simula nagapasabot si Jesu- Cristo nga sa daan mobalik na siya ngadto sa gingharian sa iyang Amahan nan mao na unya kana ang higayon nga ang iya nga mga katawhan , ang iyang mga sumosunod magasugod na sa pagpuasa, sa mga kasal-anan, diin likayan nato ang pagpaksala ug atong ibalaan ang atong huna-huna ug kasing-kasing aron sa kanunay dili kita dag-on sa mga tentasyon.

Sa ato pa ang pagbalaan ugang paglikay diha sa pagbuhat sa mga kasal-anan, maoy usa ka sumbanan nga magmatarong ang usa ka tawo , apan kun nagbuhat ka ug mga kasal-anan ug diin nagapakasala ka sa tago ug imo lang gililong sa imong mga kaigsoonan, ug kunohay tabunan nimo sa mas daghan nga pag-ampo ug paghalad nan ang balaang kasulatan naga-ingon nga mas dako ang imong tulobagon sa Dios.

Nagpamatuod lamang nga malisod gayud ang pagsunod kang Cristo ug mas malisod usab ang pagsulod sa iyang gingharian diin tunukon kini ug batuhon ug labihan ka tungason ug dyutay ra ang nagakaplag niini ug mas dyutay ang nagaagi niini. Mao kini ang mga kalisdanan sa atong pagkinabuhi dinhi niing kalibutana diin matod pa diha sa ubang sinulat:

“ Kun gusto nimong mahimong tinun-an ni Cristo nan kalimti ang imong kinabuhi ug pas-ana ang imong krus ug sunod sa pagtulon-an nga gisangyaw ni Jesus, diin bulahan ka nga nawad-an ug kinabuhi diha sa pagtuman mo sa kasugo-an sa Dios kay mahatagan ka pa ug dugang kinabuhi apan kun nagdumili ka sa pagtuman sa iyang kabubut-on sa kahadlok nga mawad-an ug kinabuhi nan basin ug kawad-an ka niini.”

Apan ang dalan paingon sa kalaglagan sa imong kalag, halu-ag kini ug daghan ang nagaagi nii, diin sa kanunay , masaba ug magahub daw sama sa piyang-piyang, ug mao na kana ang atong makita nga mga patay-sindi ang ilaw nga makita nato sa kadaplinan, apan bulahan pa ang mga binuhat nga nahisalaag dihang nianang dapita kay inosente pa sila sa kamatuoran ug aduna pay pasaylo ang Dios para kanila apan kita nga nahigmata na niining maong kamatuoran ug sa higayon nga motalikod niini ug magpadala sa mga lingla sa mga kalibutanon nga mga kailibgon nan wala nay pasaylo ang Dios para kanato.

Pagdagan Paingon Sa Dag-anan

FILIPOS 3: 12~21

12 Wala ko motoo nga nakab-ot ko na ang tumong, ni hingpit kong nakita ang kaugalingon nga hingpit. Apan mipadayon ko hangtod nga akong naangkon si JesuCristo, kay gipangita ko niya. 13 Dili, mga igsoon, wala ko mag-ingon nga nakab-ot ko na ang akong tumong. Mao ra ni ang akong isulti: Sa pagkalimot sa nangagi, midagan ko ug miatubang sa akong tumong. 14 Ang akong mata naa na sa ganti, alang sa unsa gitawag ta sa Diyos gikan sa kahitas-an diha ni JesuCristo. 15 Himoa nga kitang tanan nga nag-ingon nga hingpit siya dunay samang pamaagi sa panghunahuna. Apan kon dunay butang sa unsa nalahi mo, hinaot nga mopatin-aw ini ang Diyos.

16 Sa pagkakaron, ampingan ta ang atong nakab-ot. 17 Paghiusa mo sa pagsuon nako, mga igsoon, ug tan-awa ang nagsubay sa dalan nato sa kinabuhi. 18 Kay daghan ang nabuhi isip kaaway sa Krus ni Cristo. Kadaghan na ko makasulti ini. Karon balikon ko pagsulti uban sa mga luha: 19 Nagpaingon sila sa katumpagan. Ilang dios ang ilang tiyan ug mibati silag garbo nga angayang ikaulaw. Ang ilang gihunahuna mao ra ang mga butang nga kalibotanon. 20 Alang nato, ang atong pagkalumad tua sa langit, ug gikan didto hulaton nato ang pag-abot sa atong Manunubos, si JesuCristo, ang Ginoo. 21 Usbon niya ang atong lawas, hinimo nga sama niya, sanag tungod sa himaya, pinaagi sa iyang gahom nga nagbuntog sa tanan alang niya.

PAGPAAMBIT SA MENSAHE:

Ang maong ebanghelyo maoy pagpasabot lamang diha sa tumong ug tuyo diha sa pagkinabuhi nga iya na sa espiritu santo diin nagpasabot kini nga langyaw kana niining kalibutana, ug dili kana iya sa kalibutan, diin matod pa ha-om kana didto sa iyang gingharian sa langit.

Kay ang pagdagan paingon sa dag-anan mao ang pagkinabuhi nga minando-an sa espiritu santo sa Dios ug ang pagkinabuhi nga nagasunod sa pagtulun-an ni Kristo, ug ang balaang kasulatan nagaingon, kung gidawat mo si Jesu Cristo nga maoy imong Ginoo ug manluluwas naa maka-ambit ka gayud sa mga pagpanlutos.

Ang balaang kasulatan nagaingon Kung gusto nimong daygon ug himayaon didto sa iyang gingharian sa langit nan puy-i ang pagkinabuhi nga puno sa pagpanlutos, mga pagdaug-daug ug mga kasakitan dinhi sa ibabaw sa yuta, pas-ana ang imong krus ug sunod sa pagtulun-an nga gisangyaw ni Cristo.

Sa ato pa mga igsoon. isentro gayud si Jesu Cristo diha sa imong kinabuhi, diin bisan diha sa mga paglutos ug mga kasakitan nga imong nasinati apan ayaw kini baliha kay mao man kini ang timailhan nga ang pagtulun-an nga imong gibarugan iya kini sa Dios, kay ang Dios Amahan nagaingon mailhan ninyo ang akong pagtulun-an kay makaambit ka gayud sa mga pagpanlutos.

Walay sarang kabalak-an diha sa pagpakabuhi niining kalibutana kun ang imong kasingkasing gihalad mo ngadto sa Dios, kay miingon ang Dios , nga dili gayud sila motalikod nagdto sa mga katawhan nga sa kanunay nagasangpit ug mipapuyo sa Dios diha sa ilang kasing-kasing.

Diha sa ubang pulong nagaingon usab ang Dios “Kun nahibalo pa lamang kamo kun unsay atua didto sa gingharian sa langit nan dili na unta kamo mangita pa ug dugang bahandi niining kalibutana, biyaan ninyo ang tanan, ug maoy inyong siguroon, kun unsaon ang paghiabot didto sa gingharian sa langit.

Sa ato pa mga igsoon ang gipasinati sa Dios kanato nga pag-ampo ug mga pangaliya, mao man usab unya nga bulohaton sa iyang mga katawhan didto sa iyang gingharian, apan ang mga kasakitan ug mga paglutos nga imong nasinati dinhi lang kana sa kalibutan, diin mao kini ang pagsukod ug pag-alig-ig sa Dios sa iyang mga pinili nga katawhan kay matod pa pagasulayan man gani ang bulawan pinaagi sa kainit sa kalayo nan ang tawo pa kaha nga mas dako pa ug bili sa bulawan.

Mao kini ang atong angay nga hinuktukan, nga kawang lamang ang atong mga paningkamot, ang atong mga bahandi nga iya sa kalibutan kun mamatay na kita biyaan ta man ang tanan, nan mas maayo gayud nga magtigum kita ug bahandi nga langitnon diin atong madala ngadto sa laing kalibutan, mao kini ang importante diha sa atong pagdagan paingon sa dag-anan , ang himaya diha sa grasya ug gugma sa Dios ngadto sa kinabuhing dayun.