Walay Nasayod Sa Adlaw Ug Sa Takna Sa Iyang Pagbalik

• 33 Busa, pagtukaw ug pagbantay, kay wala mo masayod kanus-a ni moabot. 34 Kon ang tag-iya sa balay mobyaheg layo, inigbiya niya motudlo siyag mga tinugyanan ug mohatag og katungdanan sa matag-usa. Unya, patukawon niya ang gwardiya sa pultahan. 35 Busa, pagtukaw, kay wala mo masayod kanus-a moabot ang Ginoo sa balay – sa gabii ba o sa tungang gabii, sa pagtuktugaok ba sa manok o sa dili pa ang kaadlawon. 36 Sa ingon, dili ka makit-ang natulog kon sa hinanali moabot siya.
37 Ang akong gisulti ninyo, akong isulti sa tanan: Pagbantay mo!

PAGPAAMBIT SA MENSAHE:

Ang Maong ebanghelyo maoy pagpasabot lamang diha sa kabubut-on sa Diyos diin kini gipanag-ingnan niining maong sambingay diha sa agalon sa balay diin diha sa iyang paglakaw daghan ang iyang piyalan ug diin diha sa iyang pagbalik walay makahibalo kun kanus-a busa matod pa diha sa maong ebanghelyo magbantay gayud aron sa ingon dili makatulog sa pagbalik sa maong agalon. Mao kana ang gusto ipasabot sa Diyos diha niining mao niyang pasidaan nga ang iyang mga katawhan magbantay gayud ug magmaigmat.

Diha sa ubang sinulat. 2 Pedro 3 : 8 ~11 nagaingon ang Dios nga ang 1000 ka tuig sama lamang kini sa usa ka tuig apan ang usa ka tuig sama lamang usab kini sa 1000 ka tuig diin ang Dios nga misaad nga mobalik nan mobalik gayud siya apan daghan pa ang mga pulong nga madayag diin matod pa nga mao gayuy gusto sa Diyos nga walay malaglag diha sa iyang mga pinili nga katawhan diha unya sa iyang pagbalik diin kitang tanan magaatubang gayud sa tukmang oras ug takna diha sa iyang pagbalik.

Daan nang gipasabot diha sa balaang kasulatan nga kun giunsa ni Jesus pagbayaw ngadto sa langit diin naabli ang langit ug mitabo ang mga anghel nga nagkanta diha sa pagsaka niya sa langit nan mao usab unya kana ang mahitabo unya diha sa iyang pagbalik dinhi sa yuta diin diha unya nianang higayuna wala nay pagpasaylo pa nga mahitabo, diin ang tanan gayud magaatubang sa Diyos diha sa dakong paghukom ug sa ingon kitang tanan manubag diha sa atong mga kasal-anan.

Diin diah sa ubang sinulat nagaingon nag bisan ang anak wala mahibalo sa iyang pagbalik diin bugtonag ang Amahan lamang ang nahibalo diha sa pagbalik sa anak. 2000 na katuig ang milabay ug diin matod pa wala nay laing siglo pa nga magpakatawo ang Ginoo pagbalik, mao lamang kini nga siglo, apan daan na gipadayag diha sa ubang sinulat, Juan 14:15 nagaingon si Jesus, “Tumana ninyo ang akong mga sugo ug mangayo ako sa Amahan ug tagaan kamo niya ug kataposang manlalaban nga molaban kaninyo hangtod sa kahangturan, ang kalibutan dili makaila kaniya kay dili man siya makita ni mahikap apan makaila kamo kaniya kay makig-uban ug magpuyo man siya diha uban kaninyo.


Sa ato pa mga igsoon, Ang espiritu santo nga maoy kataposang manlalaban diin maoy gitahasan sa Diyos diha sa pagsangyaw sa ilang mga kasugo-an , mao kini ang pagtulun-an sa tinago nga kamatuoran nga mao gayuy sentro diha sa espirituhanong kaluwasan sa matag katawhan niining kalibutan.

Ang Panihapon Sa Ginoo

MARCOS 14: 22~25

22 Samtang nangaon sila mikuha si Jesus og pan, mipanalangin, mipikaspikas, mihatag ini ug miingon: “Dawata ni. Ako ning lawas.” 23 Unya, gikuha niya ang kupa. Humag pasalamat, iya ning gitunol nila ug nanginom ang tanan. 24 Unya, miingon siya: “Ako ning dugo, ang dugo sa kasabotan nga iula alang sa daghang katawhan. 25 Sa pagkatinuod, sultihan tamo, dili ko motilawg usab sa bunga sa paras hangtod nga mainom ko ang bag-ong bino sa Gingharian sa Diyos."

PAGPAAMBIT SA MENSAHE:

Ang maong ebanghelyo maoy pagpasabot diha sa kabubut-on sa Diyos diin pinaagi sa iyang bugtong anak makaangkon kitang tanan diha sa kaluwasang dayun kun atong kalawaton si Jesu Cristo diha sa atong kasingkasing ug huna-huna diin pinaagi diha niining iyang gipakita nga bulohaton diha sa kataposang panihapon diin gihimo niyang sambingay ang usa ka pan nga iyang lawas, ug iyang gipaambitan sa iyang mga apostoles ug ingon man ang maong bino, diin nagsimbolo kini sa iyang dugo.

Mao na kini mga igsoon ang santos nga mesa nga maoy iyang gipatuman diha sa katolikong pagtulon-an nga pinaagi diha sa giya sa espiritu santo sa Diyos ang santos nga mesa nagpasabot kini sa atong paghandum sa mga sakripisyo sa atong Diyos nga Jesu Cristo. Nagpasabot kini nga gipabalik-balik gayud sa Diyos diha sa matagsemana sa matag bulan ang pamaagi diha sa paghandum sa mga milagro sa atong Diyos. ug nagkahulugan kini diha sa paghugas sa atong kalag diin maoy makabinipisyo niini aron sa ingon hinlo ug andam ang atong kalag diha sa unsa may modangat sa atong kinabuhi.

Sa ato pa mga igsoon ang pagdawat sa lawas ug dugo ni Cristo diha sa santos nga misa pinaagi diha sa pagpangalawat dili kini tiaw-tiaw lamang ng seremonyas, nagpasabot kini nga andam ka nga mosunod sa mga kasugo-an sa Diyos ug nagpasabot usab kini nga hingpit ang imong pagkakristiyano. Nga gidawat ug gikalawat mo si Jesu- Cristo nga imong manluluwas ug imong Diyos.

Dako ang kahulugan diha sa pagdawat mo diha sa espirituhanong nga lawas ug dugo ni Cristo kay mao man kini ang makapalig-on sa imong kalag ug makalig-on usab sa imong espiritu. Matod pa diha sa ubang sinulat mao kini ang mga pagsimba nga gituki ug gipakita kang Juan diha sa pinadayag diin didto unya sa gingharaian sa Dios lain-laing mga pagsimba ug mag pagdayeg ang bulohaton ng iyang ipadangat sa iyang mga katawhan apan hagkap na man kining daan kay didtong dapita wala na man unya gahum ang mga dautan.

Apan dinhi sa ibabaw sa yuta ania ang gahum sa dautan diin kun ang espiritu santo anaa sa imong tuo ang dautan usab anaa sa imong wala nan kun wala kay mga pagpalig-on sa imong kalag ug espiritu nan dali ka kaayong malingla sa dautan, mao nga ang matag kristiyano ug ang matag katoliko sa kanunay magasimba gayud ug mo-ambit diha sa grasya ug himaya sa lawas ug dugo sa atong manunubos.

Ang Sambingay Mahitungod Sa Kumbira Sa Kasal

MATEO 22: 1~14

22 • 1 Si Jesus mipadayon pagsultig mga sambingay. 2 “May hari nga nagsaulog sa kasal sa iyang anak nga lalaki. 3 Nagpadala siyag mga sulugoon aron pagtawag sa mga dinapit. Apan mibalibad sila. Dili makatambong. 4 Nagpadala siyag laing mga sulugoon aron pagpahibalo: ‘Andam na ang kombira, giihaw na ang pinatam-bok nga mga baka ug ang uban pang hayop. Karon andam na ang tanan. Dali mo sa bangketi sa kasal.’ 5 Apan wala sila magtagad ug nanglakaw, ang uban sa uma; ang uban sa trabaho. 6 Samtang gidakop sa uban ang mga sulugoon sa hari, gipakaulawan ug gipatay.

7 Nasuko ang hari. Iyang gipaadto ang mga sundalo aron paglaglag sa mamumuno ug pagsunog sa ilang syudad. 8 Unya, giingnan niya ang mga sulugoon: “Ang hikay sa kasal andam na. Apan dili takos ang dinapit. 9 Lakaw sa kasuokan sa kadalanan ug dapita sa kombira ang tanan nga inyong makita.”

10 Ang mga sulugoon nangadto dayon sa kadalanan ug gidala ang tanang nakita, ang maayo ug daotan. Ug ang balay napuno sa mga dinapit. 11 Ang hari miduol aron pagtan-aw sa nanambong sa kan-anan, apan nakakita siyag tawo nga walay sinina sa kasal. 12 Busa, iya ning giingnan: “Higala, giunsa mog sulod nga wala ka may sapot sa kasal?” Apan ang tawo nagpakahilom. 13 Busa, misugo ang hari sa iyang ginsakpan: “Gaposa ang kamot ug tiil ug ilabay siya sa ka-ngitngit diin dunay bakho ug kagot sa ngipon.’ • 14 Hibaloi nga daghan ang gitawag, apan dyotay ra ang napili.”

PAGPAAMBIT SA MENSAHE:

Ang maong ebanghelyo nagpasabot kini diha sa pagtawag sa Dios sa iyang mga katawhan diin kadtong mga pinasidunggan ug adunay mga kaalam wala magpatalinghug sa pagtawag kanila, kay mas importantae man sa tawo ang iyang bahandi nga iya niining kalibutan kay mao man kini makapahimo niyang tinahod ug inila dinhi sa ibabaw sa yuta. Apan matod pa wala ipamugos sa Diyos ang iyang gingharian didto sa langit diin kinsa kadtong wala magpatalinghug sa maong pagtawag sa Diyos adunay kagawasan kay mao man kana ang sumbanan isip tawo nining kalibutan ang tawo man gayud ang adunay kagahum sa pagmando sa iyang kaugalingon samtang nagkinabuhi pa.

Apan diha sa ubang sinulat. 1 Corinto : 1:28~30 nagaingon maoy gipili sa Diyos ang mga tinamay ug mga sinalikway, ug ilabina niadtong mga katawhan nga gituohan sa uban nga walay pulos niining kalibutana nga maoy mosangyaw sa iyang pulong, kay aron iyang ipakita sa tanan nga ang mga tawhaanon nga kaalam ug tawhanon nga kinaadman walay gamit didto sa iyang gingharian busa dili kini angay ipasigarbo.

Diha niining maong ebanghelyo gipakita sa Diyos nga kadto lamang andam mosunod sa iyang kasugo-an ang adunay lugar didto sa iyang ginghari-an sa langit, kay matod pa dili ang tanan nga mga katawhan dinhi sa kalibutan, tinawag ug pinili sa Diyos nga sa ato pa kadtong wala tawga ug pili-a nan dinhi lang sila sa kalibutan, apan kadtong gitawag ug gipili sa Diyoa nan pagapili-an pa usab sila. Nagapasabot lamang mga igsoon nga dili sayon ang pagsulod sa gingharian sa langit, diin diha sa pagpakabuhi sa ato niining kalibutana, pinili ka man tuod sa Diyos apan aduna kay kagawasan sa imong pagabuhaton diin kun magkulang ka sa imong pagpangalagad nan tulobagon mo kana inig-abot sa tukmang higayon.

Daghan man ang dili molingi diha sa mga templo ug mga sinagoga kay lagi kun haduol ka sa Diyos nan haduol ka man sa mga paglutos, apan ang Diyos Amahan miingon, kun nalatid na daan ang mga paglutos ug pagsulay sa imong kinabuhi nan molikay ka man sa Diyos makaambit ka gihapon niini, diin bulahan kun imo kining mahalad ug ma-ampo sa kanunay kay hagkap man ang tanan, kay matod pa sa pulong sa balaang espiritu, sa Ginoong Jesus Cristo, tukhi ang mga pagsulay sa mga pag-ampo kay ania ako manalipod kaninyo.

Ang balaang kasulatan nagaingon kun gusto nimong daygon ug himaya-on didto sa iyang gingharian sa langit nan puy-i ang kinabuhi nga puno sa mga paglutos ug mga pag-antos dinhi sa yuta, pas-ana ang imong krus ug sunod sa mga pagtulon-an nga gisangyaw ni Kristo, kay bulahan ka nga naka-ambit diha sa mga kasakitan ni Cristo didto sa paglansang niya sa krus sa kalbaryo kay makaambit ka usab diha sa iyang himaya sa pagkabanhaw didto sa langit.

Gitagna Ni Jesus Ang Ilang Silot

MATEO 23: 29 ~ 36

• 29 Pagkaalaot ninyo, mga magtutudlo sa Balaod ug mga Pariseo, tigpakaaron-ingnon! Nagpatukod mog mga lubnganan alang sa mga propeta ug gidayandayanan ninyo ang mga bantayog sa mga balaan. 30 Nag-ingon mo: kon nagpuyo pa mi sa panahon sa atong katigulangan, dili unta mi mouyon nga ang mga propeta patyon. 31 Apan gisugid ninyo nga mga kaliwat mo sa nagpatay sa mga propeta. 32 Taposa karon ang nasugdan sa inyong katigulangan!

33 Mga bitin, kaliwat sa mga bitin! Unsaon ninyo paglikay sa silot sa impyerno? 34 Gikan karon, padad-an tamog mga propeta, mga maalamon, ug mga magtutudlo. Apan inyo silang punggotan sa ulo ug ilansang. Latoson ang uban sa mga sinagoga o hinginlan sa usa ka dakbayan ngadto sa lain.

35 Tungod ini, kamoy manubag sa giulang dugo sa way sala sa kalibotan. Gikan sa dugo ni Abel, ang tarong, ngadto sa dugo ni Zacarias, anak ni Barequias, nga inyong gipatay sa halaran sa Templo. 36 Sa pagkatinuod sultihan tamo: Ang kaliwatan karon magbayad ining tanan.

PAGPAAMBIT SA MENSAHE:

Ang maong ebanghelyo maoy pagpasabot lamang nga ang sala dinhi as ibabaw sa kalibutan adunay kabayaran, kundili man dinhi sa ibabaw sa yuta apan didto sa gingharian sa amahang Diyos aduna gayuy paninglan ka sa tanan. Daan na nga gipasabot sa Amahan nga dili gayud magakauyon ang tawhanon nga kaalaam ug ang spirituhanon nga kaaalam. Matuod man nga ang tanan nga ania niining kalibutan maingon man didto sa langit iya sa Diyos apan maoy tuyo gayud sa Diyos nga iyang mapili ug maayag ang tanan nga iyang pinili.

Apan ang pabugbugtaw diha sa kaalam nga espirituhanon ug kaalam nga langitnon wala ihatag sa Diyos diha sa mga maalam ug mga makinaadmanon niining kalibutana, kay unsaon man kuno pagpakita sa milagro sa Diyos. 1 Corinto 1 : 28 ~ 30 naga-ingon gipili sa Diyos ang mga tinamay ug mga sinalikway, ug kadtong mga katawhan nga giisip sa uban nga walay pulos niining kalibutana, diin maoy gitagaan ug kaalam nga langitnon, maoy gihatagan niya sa iyang pulong aron iyang mapakita sa tibook kalibutan nga didto sa iyang gingharian walay gamit ang ilang tawhanon nga kinaadman busa dili kini angay ipasigarbo.

Gipasabot sa Diyos nga bisan pa diha sa uban niyang mga tinawag niadtong unang panahun, diin pulos mga mapaubsanon nga tawo ni walay materyal nga bahandi apan hupong sa kaalam nga langitnon. Iyang gipakita nga ang importante sa tawo dili ang bahandi nga iya niining kalibutan kundili ang bahandi nga iya sa langit diin mao kini ang bahandi nga dili Makita ug mahikap ug maoy bahandi nga molungtad hangtod sa kahangturan.

Apan ang tawo sa iyang pagpakabuhi niining kalibutana anaa gayud ang pagduha-duha, anaa gayud ang pagpasulabi , ug anaa ang paglingi sa kaibutan kay gipasabut ng daan sa balaang bata Sr. Santo Niño nga kitang tawo makasala gayud sa pulong sa huna-huna ug sa buhat, nan diha niining maong ebanghelyo gipasabot lamang sa Amahan nga kitang tanan sukad pa sa sinugdanan sa kalibutan sa kanunay gibantayan sa sa amahan sa diha sa atong pagpakabuhi diin kun anaa ang pagpasulabi nan anaa gayuy tugbang nga sala diin ang balaang kasulatan nagaingon ang silot sa sala kamatayon.

Ang Pangutana Mahitungod Sa Mesiyas

MATEO 22: 41~ 46

41 Dihang nagkatigom na ang mga Pariseo, 42 si Jesus nangutana nila: “Unsay inyong hunahuna bahin ni Cristo? Kinsa siyang anak?” Mitubag sila: “Ni David.” 43 Unya, nangutana si Jesus: “Nganong si David, linamdagan sa Diyos, nagtawag man ni Cristo og Ginoo? Kay nag-ingon siya sa usa ka salmo: 44 Ang Diyos nag-ingon sa akong Ginoo: Lingkod sa akong tuo hangtod nga ibutang ko ang imong kaaway ubos sa imong tiil. 45 Kon si David nagtawag niyag Ginoo, unsaon man niya pagka-anak ni David?” 46 Walay usa nga mitubag, bisag usa na lang ka pulong. Sukad adtong adla-wa wala nay nakaako sa pagpangutana niya

PAGPAAMBIT SA MENSAHE:

Ang maong ebanghelyo maoy pagpasabot lamang diha sa kabubut-on sa Diyos, diin daan na nga gipanagna diha sa mga unang propeta nga taliabot ang mesiyas nga maoy mamahimong hari sa mga hari, ug diha niining maong ebanghelyo gipasabot sa usa ka sambingay nga unsaon man kuno ni Jesus pagkaanak ni David nga gitawag man siya ni David ug Ginoo.

Diha sa ubang sinulat nagapadayag nga si Jesu Cristo kaliwat diha sa han-ay ni Abraham ngadto kang Moises ug paingon kang David, kining mga tawhana mga yano nga tawo apan gihimo sa Diyos nga balaan tungod sa talagsaon nilang pagtuo ngadto sa Diyos nga dili makita ug mahikap.

Si Jesu Cristo gipakatawo sa Diyos diha sa sabakan ni Birhen Maria pinaagi sa lalang sa espiritu Santo nga mikunsad ngadto sa iyang tago-angkan. Sa ato pa si Jesu Cristo usa ka matuod nga Diyos ug matuod usab nga tawo, diha sa ubang sinulat nagaingon usab nga siya ang propeta sa tanang mga propeta diin ang pulong sa Amahan Diyos maoy mogula diha sa iyang baba. Ug diha usab sa ubang sinulat nagaingon nga ang Diyos nga amahan ug ang Diyos nga anak usa ra. Diin usa kini ka talagsaon nga gahom nga diin ang Diyos lamang maoy nahibalo niini.

Nan diha sa ebanghelyo nagaingon nga unsaon man pagkaamahan ni David nga gitawag man niya si Jesus ug Ginoo, nagpasabot lamang kini sa kamatuoran diha sa nahasulat sa ubang mga tinagong pulong sa Diyos , diha sa Colosas 2: 15 nagaingon nga si Jesu Cristo ang buhing larawan sa dili makita nga Diyos. Panganay siya sa tanang mga binuhat. Ang pagkaamahan ni David ngadto kang Jesus maoy hubad lamang isip si David maoy unang nahiabot dinhi sa kalibutan, kay sa pagpakatawo ni Jesus apan ang pagka Diyos ni Jesus maoy gahum nga langitnon nga gihatag kaniya sa Amahan ug dili kini masabtan sa mga tawo nga wala kanila ang giya sa spiritu santo sa Diyos.

Puno sa tanghaga ug pasumbingay ang mga pagpakabuhi sa atong Ginoong Diyos nga si Jesus sa iyang pagpakabuhi isip tawo, kini kun atong pamalandungan ang iyang mga kahimu-an diha sa iyang mga milagro ug pagpasabot sa mga pagtulun-an sa iglisea sa kamatuoran. Bisan diha sa iyang kamatayon sa krus nagdala kini ug dako kaayong pangutana ug mga pagbiay-biay niadtong mga Judio ug kadtong mga wala motuo kaniya, ilabina niadtong wala makaila sa matuod nga Diyos, kadtong nagsimba sa mga bato ug mga hayop sa laktod kadtong mga tawo nga ang ilang pagtuo mao na kini ang kinabuhi nga ilang pagapuy-an ug human niini wala nay kinabuhi nga imo pang pagaadtu-an. Nagpasabot lamang mga igsoon nga kadto lamang usab ang mga katawahn nga gipili sa Diyos ang makaila kaniya ug kamatuoran lamang diha sa ubang pulong nga nag kanayon, moabot ang Diyos diha sa atong kainabuhi sa paagi nga dili nato damhon apan kadtong mag tinawag ug pinili nga katawhan sa Diyos aduna nay gi-andami ang Diyos para kanila.

Ang Dakong Sugo

MATEO 22: 34~40

34 Nakita sa mga Pariseo giunsa ni Jesus pagpahilom ang mga Sadduceo. Busa, nagkauyon sila sa pagtigom libot niya. 35 Ang usa nila nga magtutudlo sa Balaod misulay pagbitik niya ining pangutanaha: 36 “Magtutudlo, unsay labing bililhon nga sugo sa Balaod?”

37 Mitubag si Jesus: “Higugmaa ang Ginoo nga imong Diyos sa tibuok kasingkasing, sa tibuok kalag, ug sa tibuok salabotan. 38 Kini ang una ug ang labing importanti nga sugo. 39 Apan may lain nga sama ini: Higug-maa ang isigkatawo sama sa kaugalingon. 40 Ang tibuok Balaod ug mga Propeta nagsukad ining duha ka sugo.”

PAGPAAMBIT SA MENSAHE:

Ang maong ebanghelyo maoy pagpasabot lamang diha sa kabubut-on ug katuyu-an sa Dios diin nagpaila lamang nga mahinungdanon ug pinalangga gayud sa Diyos ang tawo nga nga maoy iyang giisip nga pinakaamaalam nga binuhat nga iyang gimugna dinhi sa ibabaw sa kalibutan. Ginaingon diha sa ubang sinulat nga wala na unta kinahanglana ang ikaduhang kasulatan, kun wala pa untay mga kasaypanan, diha sa unang kasulatan.

Mao kini ang usa sa mga hinungdan nganong gipakanaog sa Diyos ang iyang bugtong anak aron dili lang sa pagluwas kanatong tanan diha sa mga kasal-anan kundili ipasabot usab ang dakong sugo. Sa panahun ni Moises iyang gisangyaw ang napulo ka sugo sa Amahang Diyos diin gihatag kaniya didto sa bukid sa Sinai pinaagi diha sa tinabliya nga bato. Apan matod pa diha niining maong ebanghelyo miingon si Jesus nga ang napulo ka sugo mahimo lamang kining duha, Una mao ang paghigugma sa Diyos sa tibook nimong kasingkasing ug sa tibook mong kalag, ikaduha mao ang paghigugma sa imong isigkatawo sama sa paghigugma sa imong kaugalingon, diha nianang mga sugo-a nagalihok ang napulo ka sugo sa Diyos ug diha nianang mga sugo-a mamahimong haduol ka sa Diyos.

Apan kun atong tuki-on pag-ayo ang duha ka sugo naglangkob lamang kini sa usa ka pulong ang pulong nga gugma. Sa ato pa ang Dios puno sa gugma, mao kana ang gusto niya ipasabot sa iyang mga katawhan diin pinagi sa iyang bugtong anak itudlo niini ang paghigugma ngadto sa iyang mga katawhan kun unsaon ang paghigugma sa iyang isigkaingon o isigkatawo.

Gipakita sa Diyos diha sa pagpakatawo sa iyang anak wala kini magdala ug bahandi nga iya niining kalibutan, wala kini magdala ug mga sundalo ni mga manlalaban, ug wala kini magpasugat sa tibook katawahan isip pasidunggan nga siya anak sa Diyos nga sa ato pa wala siya magpagarbo sa iyang kaugalingon. Nagpuyo ug naagtubo diha sa mga kabos diin anaa ang mga kalisod diha sa mga paglutos ug mga pagtamay diha sa iyang pagpakatawo ug bisan diha sa iyang paghimugso didto siya magpakatawo sa pasungan sa baka, usa ka pagtulon-an nga bugtong ang Diyos lamang usab ang nahibalo.

Nagpasabot lamang kana mga igsoon nga ang gugma nga gustong itisok nii Jesu- Cristo walay presyo , ug walay kauban nga bahandi kundili usa ka tinuoray nga gugma diin ang makadawat ug ang makasabot kadto lamang usab ang mga pinili ug tinawag niya nga katawhan. Ang pagpakamatay sa krus para sa imong mga mahal sa kinabuhi tingali masabtan nato kini apan ang pagpakamatay diha sa krus aron maluwas dili lamang kadtong mitoo kaniya kundili hasta usab kadtong wala mitoo ug nagalutos kaniya, dili kini nato masabtan ug sa laktod usa kini ka bulohaton nga Diyosnon.

Usa ka pagtulon-an nga angay sa pagpamalandong diin wala diay kinahangalana ang mga tawhanon nga kina-adman ug kaalam aron makita ug matultulan nato ang gingharian sa Diyos ang imporatnate lamang makamao ka sa iyang duha ka sugo ug ang importante nga nahigugma ka sa Diyos labaw sa tanaan. Apan kun moingon ka nga nahigugma ka sa Diyos apan nagdumot ka sa imong igsoon ug sa imong mga silingan nan ang Diyos miingon nga bakakon ka kay giunsa nimo paghigugma ang Diyos nga wala nimo makita ni mahikap apan nagdumot ka diha sa imong isigkatawo nga sa kanunay ug sa matag adlaw imong hikit-an….Wala ka mahigugma sa Dios kundili ang imong garbo lamng maoy imong ipatigbabaw, kay matod pa kun nagsunod ka ni Cristo apan nagdumot ug nanghimara-ot ka sa imong isigkatawo nan wala ka magpuyo sa kahayag anaa ka pa sa kangitngit.