Kinsa Ang Angay Kahadlukan

LUCAS 12: 4~12

4 Sultihan tamo, kahigalaan, ayawg kahadlok sa makapatay sa lawas, apan human ana wala nay mahimo. 5 Sultihan tamo sa angayng kahadlokan: ang makapatay ug makabalhog ninyo sa impyerno. Kahadloki siya. 6 Dili ba, makapalit man mog lima ka goryon sa duha ka dako? Apan walay usa nila nga nalimtan sa Diyos. 7 Bisan ang buhok sa inyong ulo naihap. Busa, ayawg kahadlok: dili ba, mas bililhon man mo kay sa linibo nga goryon?

PAGPAAMBIT SA MENSAHE:

Ang maong ebanghelyo maoy pagmatuod lamang sa gahum ug kabubut-on sa Diyos, diin mao kini nga mga giya nga gibarugan niadtong unang mga tinawag, niadtong mga mabuot nga apostoles, diin wala silay kahadlok nga nagasangyaw sa pulong sa Diyos, diin miingon si apostol Pablo nga diha sa iyang pagsangyaw sa matag lugar nga iyang adtu-an nagapaabot kaniya ang prisuhan, apan tungod sa talagsaon niyang pagtuo wala niya kahadloki kining tanan tungod kay nasayod siya kun kinsay iyang gialagaran ug nasayod siya kun kinsay iyang gisunod. Kay matod pa diha sa maong ebanghelyo, dili ka angay mahadlok sa tawo nga makapatay lamang sa imong tawhanon nga lawas apan walay mahimo sa imong kalag nan maoy kahadluki ang Diyos nga dako ug mahimo diha sa kaluwasan sa imong kalag.

Mao kini nga mensahe ang gipakuyanap niadtong una ug ikaduha nga siglo, unang siglo mao man kadton panahun ni Moises, ug ikaduhang siglo mao man kadtong pagpakatawo sa aong Diyos Jesu Cristo, diin gibandilyo ug gisangyaw sa mga apostoles nga adunay kalag ang tawo ug mao kini modawat sa kataposang paghukom, diin matod pa sa atong langitnong Amahan nga tulo ka matang sa kinabuhi ang iyang gihatag sa matag tawo nining kalibutan, una mao ang imong pagkinabuhi uban sa imong materyal nag lawas diin anaa kanimo ang tanang kagawasan, apan diha sa imong kamatayon ang imong lawas mobalik sa abog.

Ang ikaduahng kinabuhi mao ang atong espiritu diin mao kini mismo ang nagahatag kanato ug kinabuhi ,diin matod pa dako ug bulohaton ang atong espiritu sa matag katulog sa tawo kay mobalik kini sa Diyos ug maoy mosumbong sa iMong mga kahimu-an dinhi sa ibabaw sa yuta, ug ang ikatulo ug maoy importante mao ang atong kalag diin maoy moatubang sa kataposang paghukom ug maoy pasul-oban sa espirituhanong nga lawas ug maoy magapuyo ngadto sa gingharian sa Diyos , apan kun masilotan ang imong kalag ngadto sa impyerno nan maimo ang kamatayon ug kasakitan nga walay kataposan.

Dinhi niining ikatulo nga siglo mao na kini ang gina-ingon nga kataposang siglo diin wala nay pagpakatawo sa Dios nga mahitabo, apan matod pa nga mao na kini usab ang pagpasinati sa Diyos diha sa iyang espiritu santo sa kamatuoran nga sa kanunay nagabalik-balik dinhi sa kalibutan, mao kini ang iyang gipasinati sukad pa niadtog 1984 dihi pinaagi diha sa “apparition” mipakita ang anak sa Diyos didto sa kalangitan niadtong adunay gasa sa panan-awon, ug mao kini ang katumanan diha sa pulong sa Diyos Jesu Cristo niadtong usa ka babaye nga taga-Samaria, diin miingon Si Jesus, (Juan 4: 21~23) tuhoi ako babaye niining bukira wala nay magasimba sa amahan ni sa Jerusalem, kay tali-abot na ang panahun, ug karon miabot na nga ang matuod nga magsisimba sa Amahan, magasimba sa espiritu santo ug sa kamatuoran, kay sila ang mga magsisimba nga magasimba sa Amahan ngadto Kaniya.

Sa ato pa mga igsoon sa kanunay gayud atong isalig ug i-ampo ang atong kaugalingon ngadto sa Diyos pinaagi niining pagtulun-an nga atong gibarugan kay mao na kini ang kataposang pagtulun-an nga gipabarug sa Diyos espiritu santo, Juan 14:15 naga-ingon Paghigugmaay kamo ug tumana ninyo ang akong mga sugo kay mangayo ako sa Amahan ug tagaan kamo niya ug laing manlalaban, ang espiritu santo sa kamatuoran nag molaban kaninyo hangtod sa kahangturan,ang kalibutan dili makadawat kaniya kay dili man siya makita ni makaila kaniya. apan makaila kamo kaniya kay nagapuyo ug makig-uban man siya diha kaninyo.

Si Jesus Ug Si Saqueo

LUCAS 9: 1~15

19 • 1 Misulod si Jesus sa Jerico ug misuroy sa syudad 2 diin nagpuyo si Zaqueo, ang pangulong dato sa mga kobrador sa buhis 3 nga buot makakita ni Jesus, apan mubo siyang tawo; dili makakita tungod sa daghang tawo. 4 Busa, midagan siya aron makauna sa pundok ug mikatkat sa igera aron sa paglabay makita niya si Jesus. 5 Sa diha na si Jesus tungod sa nahimutangan ni Zaqueo, mihangad siya ug miingon: “Zaqueo, kanaog dayon. Karong adlawa anha ko sa imong balay.” 6 Busa, nagdali siyag kanaog ug malipayong midawat ni Jesus.

7 Ang tanang tawo nga nakakita nagbagutbot ug miingon: “Midayon siya sa balay sa usa ka makasasala.” 8 Apan mibarog si Zaqueo ug miingon sa Ginoo: “Ginoo, ihatag ko sa mga kabos ang katunga sa akong katigayonan. Kon may gitikasan ko, makaupat ko pilupiloon ang akong ibayad.” 9 Miingon si Jesus nga nagtan-aw niya: “Karong adlawa miabot ang kaluwasan sa tibuok mong panimalay. Kining tawhana anak pod ni Abraham. 10 Kay mianhi ang Anak sa Tawo aron pagpangita ug pagluwas sa nawala.”

PAGPAAMBIT SA MENSAHE:

Ang maong ebanghelyo maoy pagpasinati lamang diha sa kabubut-on sa Diyos diin mianhi siya sa kalibutan aron sa pagluwas sa tanang katawhan, ug matod pa diha sa ubang sinulat mianhi siya para niadtong mga makasasala.. Sa maong ebanghelyo usa ka kubrador sa buhis nga ginganlan ug Saqueo ang naningkamot nga makakita sa Ginoo, pinaagi sa pagkatkat sa kanoy tungod kay siya mubo man. Usa ka inila ug kuwartahan nga tawo si Saqueo apan daghan ang naglagot kaniya tungod kay daghan usab ug kahiwi-an nga iyang nabuhat ngadto sa iyang isigkatawo.

Apan tungod usab sa iyang pagtuo ngaddto kang Jesu Cristo diin nagpaka-ubos siya sa iyang kaugalingon ug miuban sa hugpong sa mga kabos aron lamang makakita ni Jesu- Cristo nan gipasidunggan siya sa Diyos. Nagpasabot lamg kini mga igsoon nga dili nato hukman ang atong isigkatawo, tungod kay makasasala man siya sa atong panan-aw apan wala man kita masayod sa kadako usab sa iyang pagtuo ug pagsalig sa Diyos.

Kay matod pa ang pagtuo sa Diyos maoy usa ka pagsalig ug paglaom ngadto sa Diyos nag dili nato makita ni mahikap, nan sa tawhanong sukdanan, dili nato masukod ang pagtuo sa tawo ngadto sa Diyos nga makakagagahum, apan masukod kini sa espirituhanon nga sukdanan kay anaa man kini ipahimutang diha sa atong panumduman ug sa atong kasingkasing, Diyos lamang ang makakita sa atong pagtuo ngadto kaniya.

Sa ato pa magauna gayud ang imong pagtuo sa Diyos ayha ang buhat, kay unsaon man tuod kun naghinubra ang imong buhat nga Diyosnon o buhat nga alang sa Diyos apan haguka ang imong pagtuo, kun nagabuhat ka lamng diha sa mag buhat sa kaluoy o diha sa mga pagtabang sa imong isigkatawo apan adunay kay gitawag nga “hidden agenda” o adunay kay laing tumong diin gusto usab nimo nga mailhan ka dinhi sa ibabaw sa yuta, ang balaang kasulatan nagaingon sa pagbuhat nimo sa ingon nan gibayran ka na dinhi sa yuta, ug kun mangayo ka ug bayad sa imong mga maayong binuhatan dinhi sa yuta nan wala kanay katungod sa pagpangayo ug bayad sa imong binuhatan didto sa iyang gingharian sa langit.

Ang pagpangalagad sa Diyos wala magkihanglan ug taas nga panahun, kundili nagkinahanglan lamang kini ug bug-os ug tinud-aany nag pagpangalagad sa Diyos. Kay matod pa diha sa ubang sinulat didto ka pa sa tago-angkan sa imong inahan gitawag ka ng daan, ug daghan usab ang gipili sa Diyos dinhi sa ibabaw as kalibutan, apan dili usab tanan ang gipili sa Diyos ug kadtong wala pili-a nan dinhi lang sila sa kalibutan. Sa atu pa mga igsoon ang maong ebanghelyo nagpasabot lamang nga gipili nang daan sa Diyos si Saqueo diin bulahan diha tukmang takna sa pagpakita ni Jesus kaniya iyang gidawat ug gikalawat ang pagtulun-an ug ang grasya nga gipa-abot sa Diyos kaniya.

Ingon usab niana ang pagduol sa Diyos kanato diin bisan luyo sa atong pagkamakasasala apan atong gipatalinghugan ang iyang pagtawag kanato, matod pa sa Diyos Amahan, tawgon ko ang akong katawhan pinaagi sa balatian kay mao lamang kana ang hiagayon nga kanunay silang mahinumdom kanako. Ang balaang kasulatan nagaingon nga moabot ang panahun nga magpakita ang Diyos sa iyang mga pinili sa paagi nga dili nato damhon ug ang mga tinawag ug pinili nga katawahan sa Diyos aduna gayuy giamdam ang Diyos para kanila.

Panabang Alang Sa Isigka-Kristuhanon

2 CORINTHO 9: 1:15

9 • 1 Wala kinahanglana nga sulatan tamo bahin sa hinabang alang sa mga santos. 2 Nahibalo ko nga naikag mo. Tungod ini gidayeg tamo didto sa Macedonia. Nag-ingon ko: “Sa Acaia andam na sila sa pagtabang sa miagi pang tuig.” Ang inyong kadasig nakaaghat sa kadaghanan nila. 3 Busa, akong gipadala kining atong mga igsoon. Hinaot nga ang tanan kong pagdayeg dili makawang ining higayona. Mangandam unta mo sumala sa akong giingon. 4 Kon dunay taga Macedonia nga mokuyog nako hinaot nga dili mo maabtang nagtanga. Pagkadako unyang kaulawa nako ug tingali ninyo – human sa tumang pagsalig.

5 Busa, nakahunahuna ko paghangyo sa atong igsoon pag-una namo ug pagpakigkita ninyo aron pag-organisa ining balaang gimbuhaton nga inyong gisaad, gikan sa inyong kamanggihatagon, dili kay gisugo. 6 Hinumdomi nga ang dyotay rag gipugas, dyotay pog anihon. Apan daghag anihon ang daghag gipugas. 7 Mohatag ang tanan sumala sa kabubut-on, ug dili magdikidiki daw pinugos. Ang Diyos nahigugma sa sayong mohatag. 8 Makapuno Siya ninyo sa grasya aron dili mo makulangan sa bisag unsa. Makahupong siyag kabtangan ni bisag kinsa tungod sa maayong binuhatan.

9 Ang Kasulatan nag-ingon: Nag-apud-apod siya: Mihatag siya sa mga kabos; ang mga maayog binuhatan magpadayon hangtod sa kahangtoran. 10 Ang Diyos nga naghatag og liso sa namugas, mohatag sab og tinapay nga makaon. Mopadaghan siya sa liso alang ninyo ug sa bunga sa mga maayong buhat. 11 Maadunahan unta mo sa tanang paagi ug makapanghatag nga walay sukodsukod. Pinaagi namo ang inyong ihatag mahimong pasalamat sa Diyos.

12 Kining balaan nga pagtabang, human makahatag sa mga santos sa gikinahanglan, mosangpot sa dakong pasalamat sa Diyos. 13 Mosulay ni nila. Magpasalamat sila, kay mituman mo sa sugo sa ebanghelyo ni Cristo ug sa pagpaambit nila ug sa tanang katawhan. 14 Mag-ampo sila sa Diyos alang ninyo ug mobati, kay ang grasya sa Diyos nagtugob ninyo. 15 Oo, pasalamti ang Diyos tungod sa dili matukib niyang gasa!

PAGPAAMBIT SA MENSAHE:

Ang maong ebanghelyo maoy pagpasabot lamang diha sa katuyu-an ni Jesus Cristo diha sa iyang pagpakabuhi dinhi sa kalibutan, Anak siya sa Diyos nga nagpakatawo aron ipakita kun unsa ang kahimanungdanon diha sa mga pagsakripisyo aron maangkon ang kinabuhing dayun, diin pinaagi diha sa kasugo-an sa Amahan iyang gisangyaw ang katuyo-an sa Amahan ug gisangyaw ang iglisea niining tinago nga kamatuoran.

Diin mao gayuy gitaga-ag importansya sa Diyos ang pakigsandurot ug paghigugmaay sa iyang mga katawhan. Iyang gitudlo nga dili bahandi niining kalibutan ang importante sa tawo ug iyang gipakita nga ang pagtinabangay diha sa isigka kristuhanon maoy bililhong hiyas nga iyang mapakita sa iyang mga katawahan ug mga tinawag ug pinili.

Mao kini ang mga hiyas usab nag gisunod sa iyang mga sumosunod , labina niadtong una niyang mga tinawag, kay mao man gayud ang bililhon para sa Diyos kun giunsa nimo pagpasidungog ang Diyos diha sa mga kasakitan, nga imong naagian ug kun giunsa nimo pagpasidungog ang imong isig ka kristuhanon sa ngalan ni Jesu- Cristo.

Ang balaan kasulatan nagaingon nga kun maghatag kita ug gamay nan balosan ka usab ug gamay, apan kun magahatag ka ug dako nan balusan ka usab ug dako, kay matod pa ang Diyos mahimuot sa mga tawo nag nagahatag nga malipayon. Ug bulahan ang mga katawhan nga sa kanunay nagapasidungog diha sa grasya nga iyang gihatag kanila, apan mas bulahan usab ang mga katawhan nga maoy gipadala sa Diyos isip maoy tubag sa atong mga pag-ampo.

Mga Asawa Ug Mga Bana

1 PEDRO 3: 1~7

3 • 1 Sa samang paagi, ang mga asawa magmasinugtanon sa bana. Kon may mosupak sa Pulong, madaog ra sila bisag walay mga pulong, tungod sa batasan sa asawa. 2 Igo na kaayo nga makita nila ang maakohon ug ang dili masaway mong gihimo.

3 Ayawg padani sa bayhong makita sa gawas: urog sa buhok, bulawang kwentas, ug mga sinina. 4 Adunay mas malungtaron pa nga mogilaw gikan sa kailadman sa tawo: Ang lumo ug malinawong kinaiya, bibilhon gyod sa mata sa Diyos. 5 Ingon ini ang pagpamisti sa mga balaang babaye kaniadto. Misalig sila sa Diyos ug nagmasinugtanon sa bana, 6 sama sa pagtahod ni Sara kang Abraham, nga gitawag niyang ginoo. Mga anak mo kon buhaton ninyo ang tarong ug dili mahadlok.

7 Sa inyong bahin, pagmatinagdanon mo sa kinabuhi uban sa asawa. Pagmasinaboton sa kasayoran nga mas huyang ang kinaiya sa babaye, ug pareho mong nagsalo sa gasa sa kinabuhi. Kon buhaton ni, motubag ang Diyos gilayon sa inyong pag-ampo

PAGPAAMBIT SA MENSAHE:

Ang maog ebanghelyo maoy pagpasabot lamang sa kahinungdanon sa panaghiusa sa bana ug asawa diha sa atubangan sa Diyos isip maoy pinaka-mahinungdanon nga alagad sa pagtulon-an nga inyong gibarugan. Ginaingon diha sa ubang sinulat nga ang gihi-usa sa Diyos dili mamahimong bulagon lamang sa tawo ug ang buotan nga asawa gasa kini gikan sa Diyos.

Apan ang pagdili pagsinabtanany diha sa kaminyoon maoy pagpasabot lamang nga wala magapuyo ang espiritu santo sa Diyos diha sa matag-usa ka kasingkasing sa magtiayon, kay sa mata sa Diyos ang bana ug ang asawa usa lamang kini diha sa kabubut-on sa Diyos. Apan tungod sa garbo ug sa dili pagkasinabtanay maoy hinungdan diha sa pagkabungkag sa kamiyoon.

Diha sa doktrina sa ubang nasod , ilabina sa Japan duna silay gitawag nga “Masakatsu Agatsu” , o “Greatest Victory is Victory Over One Self” diin nagpasabot kini nga ang Pinakadako kuno nga kadaugan sa tawo mao ang iyang kadaugan batok sa iyang kaugalingon, ug modaug ka diha sa imong kaugalingon kun tumban nimo imong garbo diin ipahari nimo ang pagpailob ug pagkamapaubsanon diha sa kaugalingon diin , diha sa ubang pinulongan nagaingon kini nga you have to go with the force of nature o ang kusog diha sa kinaiyahan, sa ato pa nga ang kinaiyahan sa matag tawo apil na kini diha sa kinaiyaan sa kalibutan , sama nga aron dili ka makakita ug lalis o away nan likayan nimo kini.

Nagpasabot kini igsoon nga ang pagkinabuhi nga iya ni Cristo diha sa sacramento sa kamiyoon mao gayud usab ang pagsul-ob sa kinaiyahan sa espiritu santo, nga mao ang pagkamangindawaton, ug ang kanunay nga pag-ampo diin, sa kanunay nga pag-ampo ug pagtuman sa kabubt-on sa Diyos ang imposible mamahimong posible.

Ang Katawhan Sa Dios

1 PEDRO 5: 1~11

5 • 1 Nakigsulti ko karon sa inyong mga magulang. Magulang sab ko ug saksi sa mga pag-antos ni Cristo. Sa ingon, makaambit unta mo sa ipadayag nga himaya. 2 Atimana ang toril nga gisalig kaninyo sa Diyos. Bantayi ni, dili supak sa inyong buot, apan sa dakong kahimuot alang sa Diyos. Dili ingon sa nangitag ganti, apan sa kasingkasing nga manggihatagon. 3 Ayawg harihari sa imong gialimahan. Hinuon, paninguhaa nga masumbanan ka sa imong toril. 4 Unya, kon ang Labawng Magbalantay magpakita, purongpurongan ka sa himayang walay paglubad.

5 Sa samang paagi, patahora ang mga batan-on diha ninyo sa awtoridad sa mga magulang. Kamong tanan, pagmapaubsanon mo sa pagtagad sa usag usa. Ang Diyos supak sa panghambog, apan mohatag sa iyang grasya sa mapaubsanon.
6 Busa, yukbo atubangan sa gahom sa Diyos aron ituboy ka sa gitakdang panahon. 7 Ibutang kaniya ang tanan mong kabalaka, kay giatiman ka.
8 Pagmaligdong ug pagmabinantayon, kay ang kaaway, ang panulay, nagsuroysuroy nga daw liyong nagngulob, nangitag tukbonon.

9 Sukol uban sa kalig-on sa pagtoo. Nasayod mo nga ang atong kaigsoonan nga nakatagkatag sa tibuok kalibotan, nag-atubang sa samang panglutos. 10 Ang Diyos nga naghatag sa tanang grasya nagtawag ninyo sa pag-ambit sa walay kinutobang Himaya ni Cristo. Human sa gamayng pag-antos, dad-on ka sa kahingpitan. Momatuod siya, molig-on ug mopasukad ninyo hangtod sa hangtod. 11 Ang himaya ihatag kaniya hangtod sa kahangtoran. Amen.

PAGPAAMBIT SA MENSAHE:

Ang maong ebanghelyo maoy pagpasabot lamang nga ang tanan nga katawhan dinhi sa ibabaw sa kalibutan ubos gayud sa gugma ug panalangin sa Diyos diin kadtong unang mag tinawag nga apostoles sama ni Pedro, Juan ug uban pa aduna gayuy katungdanan diha sa iglisea nag ilang gibarugan, ug kini mao ang pagkinabuhi nga minando-an sa espiritu santo sa Diyos.

Unsa man ang hiyas nga gibatunan sa espiritu santo sa Diyos? Mao kini ang hiyas nga gisul-ob sa atong manunubos, diin anaa ang pagkamangindawaton, pagpaubos ug ang pag-ampo ngadto sa Amahan sa kanunay. Sa laktod biyaan ang tanang mga buhat nga tawhanon ug maoy ipahari ang bulohaton nga Diyosnon.

Ang Diyos miingon nga bulahan kung nagapuyo ka nga langyaw niining kalibutana apan ha-om diha sa kabubut-on sa Diyos kay mahatagan ka ug grasya ug panalangin didto sa ginghari-an sa Amahan apan kun sa kanunay ipasulabi nato ang atong mga tawhanon nga mga kailibgon ug nagapuyo nga iya pa niining kalibutan nan wala kay luna didto sa gingharian sa Diyos..

Ang buhing pulong sa Diyos nagaingon” Kun nasayod pa unta kamo kun unsay atu-a sa gingharian sa langit nan biyaan unta niyo ang tanan ug dili na kamo mangaplag pa ug dugang bahandi ug maoy inyong siguroon kun unsaon nato paghiabot sa gingharian sa langit. Diin bulahan kun sa kanunay ato gayud nga unahon ang gingharian sa Dios kaY ang uban nato nag gipangayo ihatag ra unya kanato.

Busa sa kanunay kun atong gidawat nga kita katawhan sa Diyos nan ipakita nato kini dili lang diha sa mga bulahaton nga balaan kun dili diha usab sa pagpakita sa kadako sa atong pagtuo ngadto sa Diyos pinaagi sa pagbalaan sa atong kasingkasing ug huna-huna. Kay matod pa maga-una gayud ang atong pagtuo ayha ang buhat kat haguka ang imong pagsalig ug pagpangalagad kun maoy imong gipakita ang mga maayong buhat pinaagi diha sa pagpangalagad ug sa mga pag-ampo kun aduna kay pagdumot ug kasuko sa imong isigkatawo ug haguka ang imong pagpangalagad sa Diyos kun sa tago nagabuhat ka ug mga salawayon nga buhat. Nan ang Diyos miingon wala ka pa magpuyo sa kahayag, Anaa ka pa sa kangitngit.

Hunumdumi igsoon nga ang Diyos anaa ra magpuyo diah sa atong kaugalingon, 1 Corinto 3; 16 nagaingon, Ang lawas sa tawo maoy templo sa Diyos espirotu santo ug ang mopasipala sa templo sa Diyos nga mao kita nan iya usab nga pagalaglagon.

Ang Mamumuo Sa Parasan

MATEO 20: 1~16

20 • 1 May tawong yutaan nga misa- yog lakaw aron pagpangitag kasuholan alang sa iyang parasan. 2 Ang mga mamumuo miuyon sa suhol nga usa ka salapi ang adlaw. Busa, gipaadto sila sa parasan. 3 Mibalik siya sa mga alas nwebe sa buntag. Ug nakita niya sa kadalanan ang mga tawo nga walay buhat. 4 Miingon siya: “Lakaw pod mo sa akong parasan ug suholan tamo sa husto.” Ug miadto sila.

5 Ang tag-iya misuroy pag-usab sa pagkaudto ug sa alas tres sa hapon. Nangita siyag dugang pang mamumuo. 6 Sa kataposan migawas siya sa kinaulahiang takna sa pamuo ug nakita niya nga may ubang nagtindugtindog lang. Busa, giingnan sila: “Nganong wala moy gibuhat sa tibuok adlaw?” 7 Mitubag sila: “Walay mipatrabaho namo.” Ang agalon mitubag: “Lakaw ug trabaho sa akong parasan.”

8 Sa gabii ang tag-iya miingon sa tigdumala: ‘Tawga ang mga mamumuo ug suholi sugod sa naulahi ngadto sa nauna.’ 9 Ang nagtrabaho sa kata-posang takna nangabot, ug gihatagag tagsa ka dinaryo (usa ka salapi) ang matag usa. 10 Naghunahuna ang unang gipatrabaho nga makadawat silag la-baw. 11 Apan nakadawat sab silag tagsa ka dinaryo, ug nagbagulbol. 12 Miingon sila: ‘Ang naulahi wala gani makatrabaho bisag usa ka oras. Apan imo silang gisuholan og sama sa nadawat namo nga nag-antos sa ka-budlay ug kainit!’

13 Ang tag-iya mii-ngon sa usa nila: ‘Higala, wala tikaw lupigi. Dili ba, nagkasabot man ta sa usa ka dinaryo ang adlaw? 14 Busa, dawata ang imoha ug lakaw. Buot kong mohatag sa naulahi og sama sa akong gihatag ninyo. 15 Wala ba koy katungod sa pagbuhat sa akong gusto sa akong salapi? Nganong nasina ka sa akong kaayo?’
16 Sa ingon, ang ulahi mauna, ang una maulahi.”

PAGPAAMBIT SA MENSAHE:

Ang maong ebanghelyo maoy pagpasabot lamang nga ang gingharian sa Dios didto sa langit adunay boluhaton ang iyang mga pinili ug mga tinawag nga katawhan diin gipanag-ing sa Dios sa parasan ang iyang gingharian nga nagkinahanglan siya ug mga trabahante matag balaang ng oras. Diha sa ubang sinulat nagaingon ang Diyos nga ang mga pagkanta, paghalad ug mga pag-ampo nga iyang gitudlo sa iyang mag pinili nga katawhan dinhi sa yuta, mao usab unya ang mga bulohaton sa mga pinili nga didto sa iyang gingharrian diin gitawag kini sa Diyos nga mga pagsimba didto sa langit

Ang mga pag-ampo nga gitudlo sa Dios dinhi sa yuta mo usab unya nga mga pag-ampo nga iyang ipabuhat sa iyang mga tinawag nga katawhan didto sa langit, diin lahi-lahi nga mga pag-ampo ang gitagana sa matag pagtulun-an diha sa iyang mga katawhan. Ang Diyos miingon nga dinhi lamang nga pagtulun-an sa tibook kalibutan nga naga-ampo ug sama niini. Kay matod pa diha sa ubang sinulat Juan 4: 21 ~23 Miingon si Jesus sa usa ka babaye nag taga Samaria, “ Tuohi ako babaye, Wala nay magsimba sa Amahan niining bukira ni sa Jerusalem, kay ang panahun taliabot na ug karon miabot na nga ang magsisimba sa Amahan magsimba gayud sila sa espiritu santo ug sa kamatuoran, kay sila ang mga magsisimba nga maoy gusto sa Amahan nag magsimba ngadto kaniya.

Ang pangutana kadtong uban nga nagasimba sa amahan madungog ba usab sila sa Dios? Ang balaang kasulatan nagaingon, “ Lahi-lahi ang pagtawag ko kaninyo. Apan dili ang tanan nga nagsangpit sa Diyos makasulod sa iyang ginghatraian, kundili kadto lamang nagatuman sa iyang kabubut-on.

Sa ato pa mga igsoon daghan mga pagtulun-an ang gitawag sa Dios aron maoy motrabaho sa iyang parasan, ug dagahan usab sa mga pagtulun-an nga nagpasidungog diha sa pag-ampo sa Diyos, Kay ang Diyos miingon walay tawo dinhi sa kalibutan nga wala madungog sa Diyos ang iyang mag pag-ampo, apan dili ang tanan nakadawat sa iyang panalangin, kay ang kadaghanan nga naga-ampo, anaa lamang sa tumoy sa ilang dila wala magasumikad sa iyang kasingkasing.

Apan ang gingharian nga giandam sa Dios para kanato alang lamang kini niadtong adunay dakong pagtoo sa Dios kay mag-unsa man tuod ang imong pagpangalagad sa Dios kun haguka ang imong pagtuo, kay matod p sa balaang espiritu mag-una gayud ang pagtoo ayha ang buhat, Sa ato pa usab mga igsoon ang pagpangalagd sa Dios dili kini masukod diha sa imong dagkong binuhatan, ni sa kadak-on a atong pagtuo, Kay ang dios miingon dli masukod sa tawhanon nga sukdanan ang atong pagtoo, apan masukod kini sa espirituhanon nga sukdanan kay makita man kini sa Diyos diha sa atong kasingkasing ug huna-huna.

Daghan ang nag-una apan naulahi, ug naa usab naulahi apan nag-una, matod pa diha sa sumbingay ni Jesus, sa ato pa mga igsoon ang gitagan-an diha sa kaluwasang dayun didto sa langit dili kini masukod diha sa kataas sa imong pagpangalagad kundili mao gayuy gusto sa Dios nga ang iyang mga pinili magpuyo dinhi sa kalibutan nga haom diha sa kabubut-on sa Dios.

Ang Pag-antos Gumikan Sa Pagka-Kristuhanon

1 PEDRO 4: 12~19

• 12 Pinanggang katawhan, ayawg katingala nga gisulay mo sa kalayo; dili ni talagsaon. 13 Hinunoa, angay mong malipay nga makaambit sa mga pag-antos ni Cristo. Sa adlaw nga ang iyang Himaya ipadayag, hingpit pod ang inyong pagmaya. 14 Bulahan mo kon giinsulto sa ngalan ni Cristo. Ang Espiritu sa Himaya mikunsad ninyo. 15 Sa akong hunahuna walay kinahanglang mag-antos tungod sa pagkamamumuno, pagkakawatan, pagkakriminal o pagkahilabtanon sa uban. 16 Apan kon may nag-antos tungod sa pagkakristyano, ayaw siyag pakaulawa. Hinunoa, pahimayaa siya sa Diyos.

17 Ang panahon sa paghukom miabot na ug nagsugod sa balay sa Diyos. Kon ang sinugdan ini makahasol pag-ayo, unsay sangpotan sa wala motoo sa Ebanghelyo? 18 Kon ang tarong igo lang maluwas, unsay mahitabo sa makasasala ug sa wala motoo? 19 Busa, kon nag-antos mo sumala sa kabubut-on sa Diyos, isalig ang kaugalingon sa Matinud-anong Magbubuhat, ug padayon pagbuhat sa tarong.

PAGPAAMBIT SA MENSAHE:

Ang maong ebanghelyo maoy pagmatuod lamang diha sa unang mga pulong sa Diyos nga nagaingon “ Kumg gusto nimo nga daygon ug himayaon didto sa gingharian sa langit nan puy-i ang pagkinabuhi nga puno sa mga paglutos ug pag-antos dinhi sa yuta, pas-ana ang imong krus ug sunod sa pagtulun-an nga gisangyaw ni Kristo,

Kay bulahan ka nga nawad-an ug kinabuhi diha sa pagsunod mo sa iyang kabubut-on kay mahatagan ka pa ug dugang kinabuhi apan kun magadumili ka sa pagsunod sa iyang kabubut-on sa pagsunod mo sa iyang kasugo-an nan basin kawad-an ka niini.

Diha sa ubang sinulat nagaingon usab nga bulahan ka nga nakaambit diha sa mga kasakitan ni Jesus Cristo didto sa krus kay makaambit ka usab sa iyang himaya sa pagkabanhaw didto sa iyang gingharian sa langit.

Matod pa nga ang atong kaluwasan walay siguro apan ang kamatayon ta sigurado, nagpasabot lamang mga igsoon nga ang kaluwasan nga gisaad ni Cristo kanatong tanan dili kini premyo o ganti tungod sa maayong buhat kundili grasya kini nga gihatag gikan sa Amahan aron sa ingon walay makapasigarbo diha sa atubangan sa Diyos nga siya maluwas gumikan sa maayong binuhatan, kundili ang kaluwasan ngasumikad diha sa gugma ug grasya gikan sa Diyos.

Maayong Sundalo Ni Cristo

2 TIMOTEO 2: 1~13

2 ¹ Busa, anak ko, lig-ona ang kau galingon sa grasya nga naa ni Cristo Jesus. ² Isalig sa mga matinud-anon ang nadungog mo nako atubangan sa daghang saksi aron manudlo sila sa uban. ³ Pag-ugmad nga daw maayong sundalo ni Cristo Jesus. ⁴ Ang sundalo dili manginabuhi sama sa ordinaryong mga tawo, kay buot siyang makapahimuot sa labawng opisyal. ⁵ Walay magdudula nga purongpurongan hangtod nga nakigtigi na siya sa kaatbang. ⁶ Ang mag-uuma magbudlay una mopahimulos sa mga bunga. ⁷ Hunahunaa pag-ayo ang akong gisulti nimo: Ang Ginoo mopasabot sa tanan

:

⁸ Hinumdomi si Cristo Jesus nga naggikan sa kaliwat ni David. Nabanhaw siya sumala sa atong Ebanghelyo. ⁹ Tungod ini nag-antos ug nagapos ko sama sa kriminal. Apan dili magapos ang pulong sa Diyos. ¹⁰ Giantos ko ang tanan tungod sa piniling katawhan. Sa ingon makab-ot nila ang kaluwasan ni Cristo Jesus ug makaambit sila sa walay kataposang himaya. ¹¹ Tinuod kining pahayaga:

:

Kon mamatay ta uban niya mabuhi sab ta uban niya; ¹² kon mag-antos ta tungod niya, maghari sab ta uban niya; kon ato siyang ilimod, ilimod sab ta niya. ¹³ Kon dili ta matinud-anon, magpabilin siyang matinud-anon, kay dili man siya makalimod sa kaugalingon

:

PAGPAAMBIT SA MENSAHE:

:

Unsa may buhaton sa sundalo ni Cristo nga ang mga pagtulon-an nga gisangyaw niya nagasunod gayud sa kabubut-on sa Diyos Amahan diin mao gayuy gisul-ob ni Jesus ang kinaiyahan sa espiritu santo sa Diyos diin anaa ang pagpaubos ug pagkamangindawaton, ingon sab niana ang mga sundalo ni Cristo sama niadtong unang mga apostoles, diin nagpuyo nga minandu-an sa espiritu santo.

:

:Ang balaang kasulatan nagaingon, bulahan kun nagapuyo ka nga langyaw niining kalibutana apan ha-om diha sa kabubut-on sa Diyos, apan kun mapatuyangon ka diha sa mga tawhanon nga mga kailibgon nan ayran ka sa Dios ug dili ilhon nga anak didto sa iyang gingharian.

:

Ang Dios miingon usab nga walay tawo nga perpekto dinhi sa kalibutan, kay wala man kini itugot sa Diyos, sa ato pa mga igsoon ang mga maayong sundalo ni Cristo, ordinaryong tawo sama kanato, apan masinugtanon diha sa kasugo-an sa Amahan.

:

Apan dayag usab diha sa ubang sinulat ng nagaingon nga kun nagasunod ka sa pagtulon-an ni Cristo nan makaambit ka sa mga paglutos, kay ingon niana ang pamaagi sa Dios mga igsoon, diha sa atong pagsunod sa mga kasugoan sa Dios mao kana ang pagtuman usab nato diha sa mga pagsulay ug paglutos diha atong kinabuhi.

:

Apan ang sundalo sa Dios mga igsoon dili mga hinagiban nga iya niining kalibutana ang atong mga gamit kundili mga langitnong hinagiban o armadura sama sa balaang lana balaang tubig ug mga pag-ampo gikan sa balaang espirito ug labaw sa tanan ibalaan ag atong huna-huna ug kasing-kasing kay aron mabuntog nato ang kaaway sa Dios nga dili Makita ug dili mahikap.

::

Ug labaw sa tanan ang Dios miingon nga ang mga sundalo sa Dios sumala pa diha sa 1 Corinto 1:28~30 nagaingon : gipili sa Dios ang mga tinamay ug mga sinalikway, kadtong mga katawhan nga giisip sa uban nga walay pulos, aron sa ingon mapakita sa Dios nga ang mga tawhanon nga kaalam ug kinaadman nga iya niining kalibutana walay gamit didto sa langit busa dili nato angay nga ipasigarbo, kay mao lamay atong ipasigarbo sa Dios ang mga milagro nga atong nasinati diha sa atong tagsa-tagsa ka kinabuhi

Ang Kinaiya Ug Ang Buhat Ni Cristo

COLOSAS 1:15~23

15 Larawan siya sa Diyos nga dili makita, ang panganay sa tanang binuhat. 16 Diha niya gibuhat ang tanang butang nga makita ug dili makita: ang mga trono, mga hari, mga gahom... ang tanan gihimo pinaagi niya ug alang niya. 17 Siya na ang Siya, sa wala pa ang tanan, ug diha niya ang tanang butang. 18 Ulo siya sa lawas, ang Simbahan; ang sinugdan, ang unang gibanhaw sa mga patay aron mag-una sa tanan. 19 Kay nahimuot ang Diyos nga ang kahingpitan magpabilin niya.

20 Gimbut-an sa Diyos nga pinaagi ni Cristo mapahiuli ang tanan diha ug pinaagi niya, sa iyang pagpaagas og dugo sa Krus, gimugna sa Diyos ang kalinaw dinhi sa yuta ingon man sa Langit. • 21 Kamo mismo layo ug masinupakon sa Diyos kaniadto tungod sa daotang binuhatan.

22 Apan karon gipahiuli namo. Ang Diyos nagpahiuli ninyo pinaagi sa pagtugyan sa kamatayon sa lawas ni Cristo, aron makaatubang mo niya nga walay sala, balaan ug putli. 23 Barog nga lig-on sa sukaranan sa pagtoo ug pabilin sa gilaoman. Ibutang sa hunahuna ang Ebanghelyo nga nadungog. Kay gitudlo ni sa tanang binuhat ubos sa langit. Ako, si Pablo, ang nag-alagad niya.

PAGPAAMBIT SA MENSAHE:

Ang maong ebanghelyo maoy pagpasabot lamang sa talagsaong gahum sa Dios diin matod pa si Jesus mao ang buhing larawan sa dili makita nga Dios, diin nagpasabot kini nga ang Dios nga amahan ug Dios nga anak usa ra, diin dili kini masabtan sa iyang mga sumosunod apan nagpasabot lamang gayud nga diha sa walay kataposan nga gahum sa Dios diin nagpamatuod lamang nga dili gayud matugkad ang iyang kabubut-on.

Diha sa ubang sinulat nagaingon nga dinhi na si Jesu Cristo sa wala pa buhata ang kalibutan, ug dinhi na usab siya sa dihang migawas ang mga Israelita gikan sa Ehipto paingon sa yuta sa mga saad nga mao ang Capernaum, Jesu Cristo kadtong bato nga nagahahatag ug giya ug naga-uban diha sa mga katawhan ni Moises.

Giingon diha sa ubang sinulat nga wala na unta kinahanglana pa ang ikaduhang kasulatan kun wala pay kasaypanan ang nahaunang kasulatan, diin mao kini ang mga tahas ni Jesu Cristo diha asa iyang pagpakatawo, diin dili lamang mao ang pagluwas kanato ngadto sakinabuhing dayun apan mao usay gusto sa Dios nga masabtan ang iyang mag kasugo-an nga gisangyaw ni Moises diin ang napulo ka sugo nga gisangyaw ni Jesus nagpasabot kini sa duha ka kasugo-an, una mao ang Paghigugma sa Diyos labaw sa tanan ug ang ikaduha mao ang paghigugma sa atong isigkatawo sama sa paghigugma sa atong kaugalingon.

Diin ang duruha ka kasugo-an nagapasabot gayud sa pulong nga gugma, kay ang kasugo-an sa Dios kasugo-an sa paghigugma. Ingon niana ang gipakita ni Jesus diha sa iyang pagpakatawo dinhi sa kalibutan diin hubo sa materyal nga bahandi apan hupong sa espirituhanong bahandi,ang gugma ug pakigdait nga maoy iyang gisangyaw diha sa iyang mga katawhan ug sa tanan nga mga Judio ug bisan niadtong dili mga Judio.

Piliphos 2; 8~11 magaingon, nagpaubos siya ug nagmasinugtanon hangtod sa kamatayon sa krus, Tungod niini gituboy siya sa Diyos ngadto sa kinats-ang dapit sa kalangitan,ug gitagaan siya ug ngalan nga labaw sa taannag ngalan, Busa mangluhod ang tanang binuhat nga atua sa langit, sa yuta ug sa ilalom sa yuta, sa pagpasidungog sa ngalan ni Jesus.

Pagpakamatay Ug Pakinabuhi Uban Ni Kristo

COLOSAS 2: 20~23 3: 1~4

20 Kon tinuod nga namatay mo uban ni Cristo ug nakalingkawas sa mga baroganan sa kalibotan, nganong nagpatudlo man mo nga morag sakop pa sa kalibotan? 21 “Ayawg kan-a, ayawg tilawi, ayawg hikapa...” 22 Mga tawhanong lagda ni ug pagtulon-an mahitungod sa mga butang nga malata, madugta ug mahanaw. 23 Morag lawom ang maong mga pagtulon-an, kay gahisgot mag relihiyon, pagpaubos ug pagsalikway sa kaugalingon. Apan ang tinuod, walay kapuslanan sa pagbuntog sa kahakog!

Ang mga butang langitnon

3 • 1 Busa, kon nabanhaw mo uban ni Cristo, pangitaa ang tua sa, diin si Cristo naglingkod sa tuo sa Diyos. 2 Tinguhaa ang mga butang nga naa sa ibabaw, dili ang kalibotanon, 3 kay namatay na mo, ug natago diha sa Diyos ang inyong kinabuhi uban ni Cristo. 4 Sa pag-padayag ni Cristo, atong kinabuhi, sa kaugalingon, ipadayag pod mo uban niya sa Himaya.

PAGPAAMBIT SA MENSAHE:

Ang maong ebanghelyo nagpasabot lamang diha sa pagkinabuhi nga iya na ni Jesu- Cristo ug mao kini ang pagkinabuhi nga minando-an sa espiritu santo sa Diyos. Dos mil kapin ka tuig ang milabay nagpakamatay si Jesu Cristo didto sa krus sa kalbaryo aron sa pagluwas sa atong mga kasal-anan, namatay kita uban kaniya ug nabanhaw usab kita uban kaniya apan diha sa atong pagkabanhaw nagpabilin nga patay ang atong mga kasal-anan, niadtong tungora naluwas kita,

Apan ang pangutana mao naba kadto ang kaluwasan ngadto sa kinabuhing dayun? Dili pa kadto mao kay matod pa sa balaang bata Sr Santo Nino , Ang tawo samtang buhi pa niining kalibutan, makasala gayud kita sa kasing-kasing, sa huna-huna ug sa buhat. Diha sa atong kaluwasan sa pagkalansang ni Jesus sa krus mora lamang kita ug misakay ug barko diin pag-abot nato sa tunga sa lawod natagak ka sa barko ngadto sa dagat ug gipunit ni Jesus ug gipabalik sa pagpasakay, apan wala ka pa mo-abot sa imong pagadulngan diin daghan pa nga mga kakulian ug mga pagsuway nga imong maagian.

Nipasidaan na daan ang Dios nga sa takna unya sa paghibalik niya didto sa iyang gingharian sa langit, nan mao na usab unya kini ang pagsugod sa iyang mga katawhan sa pagpu-asa o paglikay sa pagpakasala. Ug dili kita moundang diha pagpuasa hangtod unya sa iyang pagbalik. Dinhi niining pagtulun-an nga atong gibarugan ang tinago nga kamatuoran, mao gayuy gitudlo sa Dios ang mga bulohaton sa mga pag-ampo diin mao unya usab kini ang mga bulohaton didto sa gingharian sa langit diin mao kini ang mga bulohaton diha sa pagsimba didto sa langit.

Apan ang Dios naga-ingon nag kun sumosunod ka ni Kristo gidawat mo siya nga imong Dios nan ang balaang kasulatan nagaingon nga makaambit ka gayud sa mag paglutos kay matod pa sa balaang kasulatan, Mahibaw-an ninyo ang pagtulon-an nga iya sa Dios kay makaambit ka gayud sa mga paglutos. Apan kun nagsunod ka ni Kristo apan kun nagadumot ug naglagot ka sa imong isigkatawo nan wala ka pa magpuyo sa kahayag anaa kapa sa kangitngit. Usa ka pagtulun-an ang gibilin sa atong bantugan nga senador si kanhi Senador Binigno “Ninoy” Aquino Jr, miingon siya sa pinulongan nga inengles, “ “Its better to die in a meaningful death than tolive in a meaningless life” Sa ato pa nga pagkasulti nagkahulugan kini nga mas maayo pa nga mamatay nga mamahimong pagtulun-an ang imong kamatayon kay sa magpakabuhi nga sama ka sa kahoy nga gatubo nga walay bunga, a pan ang balaang bata miingon, ( Sr Santo Nino) “ Unsa may maayo buhaton sa punoan sa kahoy nga gatubo apan walay bunga?

Ang Daan Ug Ang Bag-ong Kinabuhi

COLOSAS 3: 5~17

5 Busa, patya ang kalibotanon sa inyong kinabuhi. Sa ato pa, ang kahilayan, kalaw-ay, ang mapatuyangong kauwag, ang mga daotang tinguha ug kahakog, usa ka paagi sa pagsimba sa mga diosdios. 6 Kini ang nakapasilaob sa kapungot sa Diyos! 7 Sulod sa usa ka panahon inyo ning gisunod, ug nagkayamokat ang inyong pagpuyo. 8 Busa, isalikway ang tanan: ang kapungot, ang yawan-ong tinguha ug pagdumot. Ayawg litok og abusadong mga pulong. Ayawg pamakak sa usag usa.

• 9 Gihuboan mo sa daang pagkatawo ug sa panghunahuna ini aron 10 isul-ob ang bag-o padulong sa kahingpitan sa kahibawo. Gibag-o ni sumala sa kasamahan sa Magbubuhat. 11 Busa, walay kalainan tali sa mga Judio ug Griyego, tinuli ug pisot. Wala nay dumuduong, luog, ulipon o gawasnon. Hinunoa, si Cristo ang tanan ug naa siya sa tanan.
12 Busa, sul-obi ang kaugalingon sa angay sa katawhang pinili sa Diyos, kay balaan ug pinangga mo niya. Isul-ob ang kaluoy, kaaghop, paubos, kalumo ug pailob. 13 Magpailobay mo sa usag usa ug magpasayloay, kon dunay panagbangi. Ingon nga ang Ginoo nakapasaylo ninyo, magpasayloay mo. 14 Kon nasul-ob na ninyo kining tanan, ibakos ang gugma aron mahingpit ang sinina. 15 Hinaot nga ang kalinaw ni Cristo mag-awas sa inyong kasingkasing. Tungod ini gitawag mo aron mausa ka lawas. Ug pagpasalamat mo.

16 Papuy-a diha ninyo ang pulong sa Diyos sa iyang kabuhong. Panudlo ug pamadlong sa usag usa pinaagi sa mga pulong sa kaalam. Uban sa mapasalamatong kasingkasing awiti ang Diyos og mga salmo, himno ug tiunayng pagdayeg. 17 Bisag unsay inyong buhaton o isulti, buhata ni sa Ngalan ni Jesus, ang Ginoo. Pasalamati ang Diyos nga Amahan pinaagi niya.

PAGPAAMBIT SA MENSAHE:

Ang among ebanghelyo maoy pagpasabot lamang diha sa pagtawag ni Jesus Cristo diha sa mga pinili niyang mga katawhan diin naha-om usab niining bag-ong 2010, sa wala pa nato mailhi si Jesu Crsito siguro kadaghan kanato anaa gayud diha sa pagpatuyang diha sa mga kalibutanon ug mga tawhanon nga kailibgon. Miingon ang Diyos Amahan nga tawgon niya ang iyang mga katawhan pinaagi sa mga balati-an diin mao lamang kini ang bugtong paagi nga mangita kita sa Diyos isip maoy pamasin diha sa kaayuhan sa atong mga sakit. Apan daghan usab ang nangita sa matuod nga dalan sa kinabuhi diin mao lamay ilhon ug simbahon ang matuod nga Diyos.

Ang balaang kasulatan maoy bugtong basahon nga mailhan nato ang matuod nga Diyos apan dili ang tanann nakabasa nini ug ang uban kulang usab sa pagtoo, diin ginaingon diha nga wala na unta kinahanglana pa ang ikaduhang kasulatan kun wala pay mga kasaypanan ang unang kasulatan. Mao kini ang unang pagtulun-an nga gisangyaw ni Jesus niadtong unang panahun ang pagsunod gayud sa kinabuhi nga kristuhanon, ang pagpuyo sa bag-ong kinabuhi diin nagpasabot kini sa mga pagsunod sa mga kasugo-an sa Amahan nga gisangyaw ni Moises sa unang kasulatan diin nagpasabot usab si Jesu Cristo diha sa ikaduhang kasulatan nga ang napulo ka sugo sa Dios nagalangkob lamang sa duha ka sugo Una ang paghigugma sa Diyos labaw sa tanan ug dili na magbaton ug laing Diyos ug ang ikaduha mao ang paghigugma sa imong isigkatawo sama sa paghigugma nimo sa imong kaugalingon diin diha niini nga duha ka kasugo-an nagalangkob ang mga kasugo-an sa Dios nag gisangyaw ni Moises diin nagpasabot lamangg kini sa usa ka kasugoan, o usa ka pulong ang pulong nga gugma kay ang Dios nagkahulugan ug gugma, Si Jesus miingon kun nahigugma kamo kanako nan tumana ninyo ang kakong mga sugo nga mao ang paghigugmaay sa usag-usa, ug mao kini ang bagong kinabuhi nga gusto ipasunod ni Jesus diha sa pagsul-ob nato sa kinaiyahan sa espiritu santo sa Dios.

Kay matod pa diha sa ubang pulong , Mas bali pa nga magapuyo kita nga langyaw niining kinabuhi-a apan ha-om didto sa iyang gingharian sa langit , kay sa ha-om ug iya sa kalibutan nga pagkinabuhi apan ayran didto sa gingharian sa langit. Diha sa ubang sinulat nagaingon nga lahi-lahi ang pagtawag ko kaninyo apan dili ang tanan nagsangpit ug nagatawag sa Diyos makasulod sa iyang gingharian apan kadto lamang nagatuman sa iyang kabubut-on. Sa ato mga igsoon daghang mga pagtulun-an dinhi sa kalibutan diin aduna na siyay mga pinili diha sa matag pagtulun-an, apan bulahan nga nakakaplag ka niining pagtulun-an nga pinakaubos dinhi sa yuta apan maoy pinakataas ug pinalabi didto sa gingharaian sa langit tungod kay tinukod man kini sa espiritu santo sa kamatuoran, pinaagi diha sa mga mensahe ni Kristo Jesus.

Juan 4 :21~23 miingon si Jesus ngadto sa usa ka babaye nga taga Samaria, tuhoi ako babaye, taliabot ang panahun ug karon miabot na nga walay magasimba sa Amahan niining bukira ni sa Jerusalem, kay ang matuod nga magsissmba sa amahan magasimba sa espiritu santo ug sa kamatuoran kay sila ang magsisimba nga maoy gusto sa Amahan nga magasimba ngadto kaniya. Juan 14 : 15 miingon usab si Jesus Cristo, nga nagkanayon “Kun nahigugma kamo kanako, Tumana ninyo ang akong mga sugo, mangayo ako sa Amahan ug hatagan kamo niya ug laing manlalaban ang espiritu sa kamatuoran nga makig-uban kaninyo hangtod sa kahangturan, ang kalibutan dili makadawat kaniya, kay dili man kini makakita ni makaila kaniya apan nakaila kamo kaniya kay nag-uban siya ug nagpuyo diha kaninyo”.

Mao na kini nga pagtulun-an mga igsoon ang gitukod sa espiritu sa kamatuoran diin pinaagi sa giya sa espiritu santo nga nga namulong diha sa mga propeta madayag ang mag tinago nga pulong. Ang kasusaban diha sa bagong kinabuhi dili makita diha sa tag-as nga sulat sa mga New Years Resolution kundili makita kini diha sa pag-usab sa kinatibuk-an sa imong pagkatawo ang pagsunod ug ang pagsul-ob sa kinaiyahan ni Kristo. Ang bagong kinabuhi mga igsoon wala diha sa bahandi nga iya niining kalibutana kundili ang kausabana diha sa imong pagkinabuhi nga minando-an sa espiritu santo sa Dios, diin anaa ang pagdawat sa mga paglutos sa tanang mga kasakitan sa kinabuhi ug ang pagpapuyo ug pagpahari sa Diyos diha sa atong tagsa-tagsa ka kasingkasing.

Si Jesus Ang Pangulong Pari

HEBREO 8: 1~13

8 • 1 Ang mahinungdanong bahin sa atong gihisgotan mao nga duna tay usa ka labawng pari nga nag­­ling­kod sa tuo sa diyosnong Ka­ma­halan sa Langit. 2 Nag-alagad siya isip ministro sa tinuod nga templo ug santwaryo nga gimugna sa Ginoo, dili sa mga tawo. 3 Ang labawng pari gitudlo aron pag­halad sa Diyos og gasa ug sak­ripisyo. Kinahanglang mo­halad si Jesus og mga sakripisyo. 4 Kon nag­pabilin pa sa kalibotan, dili unta siya mapari, kay may uban nga nang­halad og mga gasa sumala sa Balaod. 5 Sa pag­ka­­tinuod, ang mga halad nga gihimo adtong mga paria sinuon ug anino lang sa halad nga langitnon. Nasayod ta sa pulong sa Di­yos kang Moises mahitungod sa pag­tukod sa balaang tolda. Nag-i­ngon siya: Buhata ang tanan sumala sa gila­tid ko kanimo didto sa bukid.

6 Karon hinuon, si Jesus nagbaton sa mas hamiling ministeryo tungod sa mas maayong kasa­botan nga gipa­si­kad sa mas maayong mga panaad. 7 Kon hingpit pa ang unang kasa­botan, wala na kina­hang­lana ang lain. 8 Apan sa pagkakita sa Diyos nga may kaku­langan ni, mi­ingon siya: Nagsingabot na ang mga adlaw – pulong sa Ginoo – nga mag-umol kog bag-ong kasabotan uban sa kataw­han sa Israel ug sa katawhan sa Juda. 9 Dili ni sama sa kasabotan nga akong gipanday uban sa ilang katigu­la­ngan sa adlaw nga giagak ko sila ug gipagawas sa Ehipto. Wala nila tuma­na ang among kasabotan. Busa, gipa­sagdan ko sila, matud pa sa Ginoo.

10 Apan kini ang kasabotan nga akong himoon uban sa umaabot nga kataw­han sa Israel. Isilsil ko ang ba­laod sa ilang ulo ug isulat sa ilang kasing­­kasing. Ako ang ilang Diyos ug sila ang akong katawhan. 11 Walay usa nila nga manudlo sa ka­­taginasod o moingon sa ilang igso­on: Ilha ang Ginoo. Kay makaila sila nako gikan sa kinaubsan ngadto sa kinadak-an. 12 Pasayloon ko ang ilang kasal-anan ug dili ko hi­num­doman ang ilang kasaypanan. 13 Dinhi gipadayag kanato ang Bag-ong Kasabotan: nagpasabot nga ang nahiuna wala nay kapuslanan. Sa ka­du­­gayan mawagtang ra ang Daan

PAGPAAMBIT SA MENSAHE:

Ang maong ebanghelyo maoy pagpasabot lamang diha sa kabubut-on sa Amahan diin iyang gipakita kun giunsa niya pagmahal ug pagpasidungog ang tawo dinhi sa ibabaw sa kalibutan diin iyang gipakana-og ang iyang bugtong anak ug napakatawo 2000 kapin ka tuig na ang milabay. Nagpakatawo diha sa pasungan diin larawan sa tumang pagpaubos ug walay dagko nga tawo nga gisandigan diha sa iyang pagpakatawo ni ang iyang inahan gilutos diha sa mga harianon ug mga maykatungdanan sa unang panahun

Sa edad nga 30 nagsugod sa pagsangyaw sa ma-ayong balita ug nagpalansang sa krus arong sa pagluwas sa mga sala, ginaingon diha sa ubang mga sinulat nga diha sa kamatayon ni Jesu-Cristo wala na dawata sa Diyos ang halad sa mga mananap nga sinunog kay humana na ihalad ni Jesu Cristo ang iyang lawas ug dugo ngadto sa atong langitnong Amahan aron sa pagtubos sa atong nga kasal-anan.

Diha sa unang mga sinulat nagaingon nga si Jesu Cristo ang Alpha ug ang Omega ang sinugdanan ug ang kataposan diin walay mahiabot ngadto sa Amahan kun dili moagi diha kang Jesu Cristo, kay pinaagi kaniya ug pinaagi sa atong pagtuo nga si Jesu Cristo anak sa Diyos nan aduna kay kahigayunan nga makaangkon ngadto sa kaluwasan sa kinabuhing dayun. Diha niinin ebanghelyo ginaingon nga si Jesu Cristo ang pangulong pari kanatong mga katawhan nga nagasimba ung nagatuo kaniya. Apan dili usab ordinaryo ang pagkapari ni Jesu Cristo, kay matod pa diha niining ebanghelyo nga pari siya nga linya ni Melquisidec ug magpabilin siyang pari hangtod sa kahangturan.

Sa ato mga igsoon si Jesus pangulong pari dili lang dinhi sa ibabaw sa yuta kundili hangtod didto sa iyang gingharian. Atong mahinumduman nga Si Jesu Cristo maoy gatukod niining maong kristuhanong pagtulon-an 2000 na kapin ka tuig na ang milabay. Pinaagi usab diha sa iyang gipangtahasan nga mga una niyang tinawag ug mga pinili nga mga tinun-an, sama kang Simon, Andres ug uban pa. Timoteo 17: 18 miingon siya sa una niyang Apostoles , Simon ikaw si Pedro ibabaw niining maong bato ituntong ko ang akong iglisea ni ang kamatayon dili makabuntog niini. Ang pulong Pedro sa pinulongang Hebrew nagkahulugang kini ug Petros nga sa ingles gitawag kini ug hard rock ug sa binisaya batong bantiles, sa ato pa pinangulohan sa iyang una nga apostoles uban kang Pedro nga mao gayod ang magaagak sa iglisea o simbahan ni Jesu Cristo diha upat ka suok sa kalibutan diin miabot una ang 600 ka tuig ayha hingpit nga nasangyaw kini nga pagtulon-an sa upat ka suok sa kalibutan.

Niining panahuna misulod na kita sa ikatulo nga siglo diin matod pa 95% na diha sa mga panagna sa balaang kasulatan ang natuman na diin matod pa niining panahuna ani-a na kita sa pinadayag nga bahni diin nagpadayag kini diha sa mga panan-awon ni Juan, sa ato pa mga igsoon ang pagkapangulong pari sa atong ginoong Jesus, diin nagpasabot kini ng sa kanunay gitagaan-an gayud kita ug pasaylo sa atong mga kasal-anan pinaagi diha kang Jesus. Mao na kini ang kamatuoran diha sa ubang pulong sa balaang kasulatan nga nagaingon (Juan 14:15) nag nagkanayon “Kun nahigugma kamo kanako, Tumana ninyo ang akong mga sugo, mangayo ako sa Amahan ug hatagan kamo niya ug laing manlalaban ang espiritu sa kamatuoran nga makig-uban kaninyo hangtod sa kahangturan, ang kalibutan dili makadawat kaniya, kay dili man kini makakita ni makaila kaniya apan nakaila kamo kaniya kay nag-uban siya ug nagpuyo diha kaninyo”.

Sa ato pa mga igsoon Si Jesu Cristo maoy atong sumbanan diha sa kinaiyahan sa espiritu santo sa Diyos. Tinuoray nga daghan ang dili makadawat sa kamatuoran nga ang mga sumosunod ni Kristo o ang mga magasunod sa kinabuhi nga kristuhanon makaambit gayud sa mga paglutos, apan sumala pa sa balaang kasulatan, “ Kun gusto nimong daygon ug himayaon didto sa iyang gingharian sa langit nan puy-i ang kinabuhi nga puno sa mga paglutos ug mga pag-antos dinhi sa yuta kay bulaan ka nga nakaambit diha sa mga kasakitan ni Jesu Cristo didto sa kalbaryo diha sa pagkalangsang niya sa krus kay makaambit ka usab sa himaya sa iyang pagkabanhaw didto sa iyang gingharian sa langit.