Panamilit

EFESO 6: 21~23

21 Gusto sab ko nga masayod mo sa akong pagkabutang ug sa akong gi-buhat. Si Tikiko, ang atong pinalanggang igsoon ug maunongong alagad sa Diyos mosugilon ninyo sa tanan. 22 Gipadala ko siya aron balitaan mo bahin namo ug aron hupayon mong tanan.
23 Ang kalinaw, ang gugma ug ang pagtoo gikan sa Diyos Amahan ug ni Cristo Jesus, ang Ginoo, maanaa unta sa tanan nga kaigsoonang lalaki ug babaye. 24 Panalanginan unta mong tanan nga nahigugma ni Cristo Jesus, atong Ginoo, sa walay puas nga gugma.

PAGPAAMBIT SA MENSAHE

Ang maong ebanghelyo maoy pagpasabot lamang niadtong maong panahun diin ang mga unang tinawag na lamang maoy nagkannay ug sanyaw diah a pulong a Diyos diin pinagi sa giya sa espiritu santo, gitadalas nila ang upat ka suok sa kalibutan, apan lagi kay kabayo lamang ug kamelyo maoy ilang transportasyon niadtong mga panahuna, nan didto lamang gayud sila sa Galileya ug sa mga kasikbit niini nga nagasangyaw.

Dinhi sa maong ebanghelyo diin sa matag lugar nga pagaadtu-an sa mga apostoles sa kanunay ila kining gibalik-balikan diin sa kanunay ilang gipangomusta ang mga katawhan nga nagasunod sa pagtulon-an nga ilang gisangyaw. Diin anaa ang mga panamilit ngadto sa mga komunidad nga ilang nasangyawan sa dili pa sila molakaw, apan ang panamilit nga gipasabot sa maong ebanghelyo dili kini panamilit kay molakaw na kundili panamilit kini diha sa atong mga tinawhanon nga mga binuhatan, diha sa atong mga pagtulon-an nga nambitan nga puno sa espiritu santo kun maoy atong ipahari diha sa atong pagkinabuhi nan angayan tuod nga manamilit kita ngadto sa mga buhat nga tawhanon.

Diha sa ubang pulong sa Diyos nagaingon, “Mas maayo nga magapuyo ka nga langyaw niining kalilibutana apan haduol sa gingharian sa langit, diin biyaan nimo ang tanang mga kailibgon, ang mga tawhanon nga mga binuhatan ug maoy ipahari ang buhat nga espirituhanon. Apan kun mawili ka pa sa butang nga iya sa kalibutan diin maoy imong gipakaDiyos ang mga butang nga mapalit sa salapi, ug maoy imong gisimba ang salapi labaw kay sa matuod nga Diyos nan, bisan luyo diha niining mga kamatuoran nga imong nakita luyo diha sa mga milagro nga imong nasinati apan walay pulos ang tanan.

Angayan gayud nga atong pasidunggan ang Diyos diha sa mga milagro ug mga pagsulay nga atong naambitan, kay ang balaang kasulatan nagaingon, kun nagasunod ka sa kasugo-an ug pagtulon-an ni Cristo nan makaambit ka gayud sa mga paglutos. Busa angayan gayud nga sa pagsunod nato sa mga buhat nga iya ni Cristo nan. Atong hinumduman nga ang buhat nga iya sa dautan, iya niining kalibutan walay luna diha sa atong panumduman.

Miduaw Si Jesus Kang Maria Ug Marta

LUCAS 10 :38~42

• 38 Unya, samtang nanglakaw sila, misulod si Jesus sa usa ka balangay diin may babayeng ginganlag Marta nga midawat niya sa balay. 39 Ang igsoong babaye, si Maria, milingkod sa tiilan sa Ginoo ug namati sa iyang pulong. 40 Si Marta nagkapuliki sa pag-atiman sa bisita. Miduol siya ni Jesus ug miingon: “Ginoo, wala ka ba makamatikod nga gipasagdan ko sa igsoon kong babaye nga nag-inusarang magsilbi? Palihog, patabanga siya.”
41 Mitubag ang Ginoo: “Marta, Marta, nagkapuliki ka ug nabalaka sa daghang butang. 42 Usa ray gikinahanglan. Nakapili si Maria sa bililhong bahin nga dili kuhaon kaniya.”

PAGPAAMBIT SA MENSAHE:

Ang maong ebanghaelyo maoy pagpasabot lamang nga mas gikahimut-an sa Diyos ang pagpangalagad sa tawo ngdto kanila kay sa uban pang butang dinhi sa ibabaw sa kalibutan. Diha sa maong ebanghelyo gipakita ang duruha ka matang sa pagkinabuhi una ang pagpreparar sa materyal nga kalan-aon para sa materyal natong lawas ug ang ikaduha ang pag-alagad sa Diyos aron usab mabaskog ug mahimsog ang atong kalag.

Apan ang Diyos nga si Jesu Cristo wala magaingon diha niining maong ebanghelyo nga ensakto si Maria ug sayop si Marta kundili miingon lamang siya nga pasagdi Siya nakakaplag sa labing hinungdanong butang , ang pagpahimuot sa Diyos. Kini nagpasabot lamang diha sa ubang pulong sa Diyos nga nagaingon, Ang kamatuoran nagahatag kanato ug kagawasan, gihatag sa Diyos kanato ang kaalam diha sa pagbugtaw sa kaalam, diin maoy gayud ang gipili sa tawo ang iyang kaugalingon kabulahanan para sa tawhanon niyang mga pangandoy.

Apan kini nagapasabot lamang usab nga taas pa kaayo ang pasensiya sa Diyos diin, kitang tanan gitagaan gayud sa iyang kagawasan sa pagbugtaw sa kamatuoran diha sa tawahanong kaalam, ug diha sa espirituhanon nga mga pagtulon-an, Apan ang balaang kasulatan nagapasabot usab nga moabot gayud ang takna, ang oras ug ang ensaktong panahun nga moaabot ang Diyos diha sa imong kinabuhi sa paagi nga dili nimo damhon, ug ang mga katawhan nga tinawag ug pinili sa Diyos ,adunay nay naka-andam ang Diyos para kanila.

Lahi-lahi ang pagtawag sa Diyos kanato sa matag pagtulon-an, ingon nga dili ang tanan nga nagasangpit sa Diyos makasulod sa iyang gingharian, kundili kadto lamang nagatuman sa iyang kasugo-an, Busa angayan gayud diay nga dili nato hukman ang atong isigkaingon, kay kitang tanan makasasala man, diha sa atong pagpangalagad sa Diyos ikaw lamang ug ang Diyos maoy nasayod niini, diin ang gidag-on sa atong pagtuo sa Diyos diha sa atong pagpangalagad Diyos lamang usab ang makasukod niini tungod kay anaa man kini mahimutang sa atong kasingkasing ug panumduman.

Walay lain nga atong ibutang diha sa atong huna-huna nga ang Diyos sa kanunay nakadungog sa atong pangaliyupo ug pangamuyo, ug labaw sa tanan siya ang labing nasayod sa tanang butang dinhi sa ibabaw sa kalibutan, diha sa ubang sinulat nagaingon “Unaha ang gingharian sa Diyos ug ang tanan nga imong gipangayo ihatag ra kanimo. Kay dili gayud mahitabo nga motalikod ang Diyos kanato kun sa kanunay ato siyang gipapuyo sa atong kasingkasing.

Mga Panan-awon Ni Pablo

2 CORINTO 12: 1~10

12 • 1 Walay kapuslanan ang pag panghambog, apan kon gikinahanglan, hisgotan ko ang pipila ka talan-awon ug pagpadayag sa Ginoo.
2 May gikaila ko nga Kristyano, 14 na ka tuig karon nga kanhi gibayaw sa ikatulong langit. 3 Kon sa lawas ba o sa makita ba lang sa gawas, wala ko masayod. Ang Diyos ray nasayod. 4 Gibayaw siya sa paraiso diin iyang nadungog ang mga pulong nga dili ikapanugilon: Mga butang nga ang tawo dili makasulti.
5 Bahin ining tawhana makapanghambog ko. Apan sa kaugalingon wala koy ikapanghambog gawas sa kahuyang. 6 Kon buot kong manghambog, dili ni binuang sa akong bahin, kay mosulti ko sa tinuod. 7 Apan mas maayo tingali nga mohunong lang ko basig may makahunahuna nga labaw ko sa iyang makita o madungog. Aron dili ko magmapahitas-on human sa daghan ug katingalahan kaayong pagpadayag, gihatagan kog tunok sa akong lawas, sulugoon ni Satanas, sa pagtamparos nako. 8 Sa makatulo nag-ampo ko sa Ginoo nga mawala ni nako. 9 Apan mitubag siya: “Paigo alang nimo ang akong grasya. Ang dako kong kusog gipadayag sa kahuyang.”
Hinunoa, malipayon ko nga mopasigarbo sa kahuyang aron maangkon ko ang kusog ni Cristo. 10 Magmaya ko kon akong matagamtaman ang kasakitan, pagbiaybiay, panginahanglan, panggukod tungod ug alang ni Cristo! Kay sa kahuyang, naa ang akong kusog.

PAGPAAMBIT SA MENSAHE:

Ang maong ebanghelyo nagpasabot lamang mga igsoon nga daan nang nakalatid ang maong mga pagtulon-an diin diha sa maong panan-awon ni Pablo nagpasabot man kini sa pagbayaw sa Diyos Jesu Cristo katorse (14) katuig gikan niadtong panahuna. Si Pablo mao man kini ang maisog nga sundalo sa gobyerno niadtong panahuna nga ginganlan ug Saulo diin tungod sa iyang kaalam nga nahuptan isip nagaiskuela ug usaka pariseo, natuhog gayud niya ang mga pagtulon-an ug mga balaod ni Moises.

Apan nakita usab sa Diyos ang talagsaon niyang pagtuo ngadto sa Kaniya nga dili makita ug mahikap, mao nga pinaagi sa panan-awon ug pinaagi usab sa pagtangtang sa iyang panan-aw sa makadiyot iyang gipasabot kang Saulo nga ang iyang gisimba nga Diyos ug ang iyang gilutos nga Diyos usa ra.

Hinay-hinay nga nakasabot si Saulo diin gihimo siyang Pablo ug nagasangyaw sa pagtulon-an ni Cristo sa mga pagtulon-ang nga iyang gilutos ug niining panahuna siya na usab ang gilutos sa iyang mag kauban sa gobyerno ka nakalahi na man usab siya. Daghan ang mga milagro ang iyang nakita, diin usa na kining maong panan-awon nga sa pagkabanhaw ni Jesu Cristo.

Si Pablo maoy gitahasan sa Diyos sa pagsangyaw niining maong pagtulon-an ngadto sa dili mga Judio ug diin si Pedro usab ang iyang gitahasan sa pagsangyaw ngadto sa mga Judio, ug 2000 kapin ka tuig na ang milabay nga ang maong pagtulon-an giila sa tibook uniberso diin gitawag kini ug universal nga relihiyon, kini nagpasabot lamang mga igsoon nag ang pagtulon-an nga tinukod sa Diyos moluntad gayud kini hangtud sa kahangturan.

Didto Sa Corinto

BUHAT 18: 1~17

18 • 1 Unya, si Pablo mibiya sa Ate- nas ug miadto sa Corinto diin nakita niya ang Judio nga si Aquila, lumad sa Ponto, bag-o lang nga naabot gikan sa Italya uban ang asawa, si Priscila. Mituman sila sa kasugoan ni Imperador Claudio, mobiya ang tanang Judio sa Roma. 3 Si Pablo miduaw, mipuyo ug mitrabaho uban nila, kay pareho man sila nga tighimog tolda. 4 Matag Adlaw sa Pahulay nakigkukabildo siya sa sinagoga. Gipaningkamotan niya ang pagdani sa mga Judio ug Griyego.
5 Sa pag-abot ni Silas ug Timoteo gikan sa Macedonia, migahin si Pablo sa tibuok panahon sa pagwali ug pagmatuod sa mga Judio nga si Jesus mao ang Mesiyas. 6 Usa ana ka adlaw, dihang misupak ug gibugalbugalan siya gitaktak niya ang abog sa iyang sinina isip pagtutol sa ilang gibuhat. Miingon siya, “Kamo mismoy manubag sa inyong gibuhat! Dili ko ninyo mabasol kon sukad karon moadto ko sa mga dili Judio.”
7 Busa, mibiya si Pablo. Miadto siya sa balay ni Tito Justo nga mahadlokon sa Diyos ug nagpuyo sa balay sunod sa sinagoga. 8 Mitoo sab sa Ginoo si Crispo, ug ang tibuok niyang banay. Inila siya sa sinagoga. Sa pagkadungog nila ni Pablo, daghan pa nga taga Corinto ang mitoo ug gibunyagan.
9 Usa ana ka gabii, may panan-awon si Pablo, Giingnan siya sa Ginoo, “Ayawg kahadlok. Padayon pagwali. Ayawg pakahilom, 10 kay daghan ang madani ko nga katawhan ining syudara. Kauban ta busa, walay makapanamastamas nimo.” 11 Si Pablo nagpabilig usa ug tunga ka tuig sa maong dapit. Nagtudlo siya sa Pulong sa Diyos.
12 Dihang nagobernador sa Acaia si Gallo, ang mga Judio nagkahiusa pagpakigbatok ni Pablo. Gitaral siya sa hukmanan ug mikiha sila batok niya, 13 “Gidani mi sa pagsimba sa Diyos sa paagi nga supak sa Balaod.”
14 Mosulti na unta si Pablo aron pagpanalipod sa kaugalingon, apan si Gallo miingon, “Kon daotan ning buhata o krimena, tagdon ko unta ang inyong kiha. 15 Apan kay away man ni sa pagtulun-an ug mga balaanong ngalan nga nalambigit sa kaugalingong balaod, kamo ra sab ang angayng mohusay ini. Dili ko mohukom ining mga butanga.” 16 Ug gipagawas sila sa hukmanan.
17 Unya, gidakop nila si Sostenes, inilang tawo sa sinagoga. Gibunalan siya sa hukmanan. Apan wala magpakabana si Gallo.

PAGPAAMBIT SA MENSAHE:

Ang maong ebanghelyo maoy pagpasabot lamang sa buhat sa mga apostoles diin sila misangyaw sa pulong sa Diyos sa upat ka suok didtong dapita ug sigun usab sa maabot sa ilang mga pagsangyaw. Si Pablo maoy usa sa mga maisog nga apostoles ni Jesu Cristo niadtong panahuna diin pinakaulahi nga natawag sa hanay sa mga apostoles apan siya maoy gitahasan sa Diyos sa pagsangyaw sa pagtulon-an ni Cristo.

Nagbinugtong sila sa pagsangyaw niadtong panahuna diin walay dala bisan usa ka diyot nga kuwarta, bugtong kaalam sa Diyos espiritu santo ang ilang balon, Nagakalain-laing mga paglutos ug mga pagsulay ang ilang naagian diin matod pa ni Pablo sa matag lugar nga iyang paga-adtuan nagahulat ang prisohan. Ug ang tanaan iyang giantos tungod sa iyang paghigugma sa Diyos.

Gipakaway bili nila ang ilang kinabuhi kay nahibalo man sila nga ang ilang gisunod ang matuod ug makagagahum nga Diyos. Si Pablo maoy gitahasan sa Diyos sa pagsangyaw ngadto sa mga dili Judio ingon nga si Pedro mao usay gitahasan sa Diyos sa pagsangyaw sa mga Judio

Silang taann nga mga apostoles nahiagom gayud sa kamatayon diha sa ilang pagsangyaw, apan wala nila kahadloki ang kamatayon, diin mao kini gipasabot diha sa ubang sinulat sa balaang kasulatan nga nagaingon, “ Ayaw kahadloki ang tawo nga mopatay sa imong lawas apan walay mahimo sa imomg kalag maoy kahadloki ang Diyos nga maoy mopatay sa imong kalag diha sa paglaglag niini sa kalayo didto sa impyerno.

Wala Motuo Ang Mga Kadagko-an Sa Mga Judio

JUAN 7: 45~52

45 Unya, ang mga gwardiya sa templo mibalik sa kadagkoan sa mga pari ug mga Pariseo ug nangutana, “Hain siya? Wala mo makadala niya?” 46 Mitubag sila, “Wala pay tawong nakasulti sama niya.” 47 Busa, miingon ang mga Pariseo, “Nailad ba sab mo! 48 May usa ba sa atong kadagkoan o sa mga Pariseo nga mitoo niya? 49 Ang mga tinunglo ra ug walay alamag sa balaod!”
50 Apan si Nicodemo, usa nila, nga sa sayo pa miadto ni Jesus, 51 miingon, “Mohukom ba ang atong balaod sa tawong wala pa madunggi ni masayri ang tanang hitabo nga may kalabotan niya? 52 Mitubag sila, “Dili ba, gikan ka man sa Galilea? Usisaha pag-ayo ug tan-awa. Wala pay propeta sa Galilea.”

PAGPAAMBIT SA MENSAHE:

Ang maong ebanghelyo maoy pagpasabot lamang nga ang propeta dili gayud ilhon bisan diha sa kaugalingon niyang lungsod. Ang pagpaila sa Diyos sa iyang bugtong anak maoy usa ka paagi diin bisan kinsa nga hupong sa kaalam nga tawhanon dilli gayud makatoo. Bisan diha sa ubang sinulat nga nagaingon nga nagpakatawo si Jesu Cristo didto sa pasungan sa mga baka, diin ang paghiabot ni Jesus Cristo dinhi sa yuta maoy pagpaila lamang nga anaa sa pagpaubos ug dili pagpasigarbo ang mga binuhatan sa Diyos.

Gipaila ni Cristo ang iyang iglisea sa kamatuoran diin walay bisan usa niya ka sundalo o mga alagad didto sa gingharian sa Diyos nga nagauban kaniya, nagbinugtong siya sa pagpaila sa iyang kagalingon ug iyang gipili ang una niyang mag apostoles pinaagi sa giya usab sa Diyos Amahan. Lunlon pagpaubos, ug mga paglutos ang nasinati ni Jesu Cristo diha sa iyang pagpaila sa iglisea sa kamatuoran ug niining maong pagtulon-an nga atong gibarugan.

Lahi ang nakita niadtong unang mga pariseo niadtong panahuna diin para kanila ang pagtulon-an nga gisangyaw ni Moises mao ra gayud ang matuod ug wala nay laing pagtulon-an nga mahisagol pa niini, ug labaw sa tanan wala nay laing binuhat pa nga magpaila nga anak sa Diyos, kun aduna man ugaling sila nga mga pariseo maoy una makahibalo, kay para kanila sila lamang ang labaw nga nasayod sa mga balaod sa Diyos.

Apan nagpasabot lamang usab kini diha sa uang sinulat nga nagaingon : “Moabot ang Diyos diha sa gutlo sa atong kinabuhi sa paagi nga dili nato damhon, ug ang mga pinili ug mga tinawag nga katawhan sa Diyos adunay nakaandam ang Diyos para kanila. Niadtong maong panahun, daan na nga nakalatid ang maong mga hitabo, diin mao gayuy gusto sa Diyos Amahan nga magaagi gayud sa paglutos ang magsangyaw sa iyang mga pulong, diha niining panahuna gipakita ni Jesu Cristo ang mga pagtulun-an nga maoy gusto sa iyang amahan nga ang pagsunod sa dalang ngadto sa gingharian sa langit wala kini magsumikad sa kinidlap sa salapi, wala kini magsumikad sa kaalam niining kalibutana, kundili nagsumikad kini sa giya sa espiritu santo sa Diyos nga anaa mokunsad sa mga katawhan nga iyang tinawag ug pinili.

Nagpasabot lamang kini mga igsoon nga ang atong pagpaduol sa Diyos dili atong kabubut-on kay ang Diyos maoy mikanaog dinhi sa yuta aron sa pagpangita ug pagluwas kanato, busa angay lamang nga atong pasidunggan ang Diyos pinaagi sa pagtuman sa iyang mga kasugo-an ug kabubut-on. Ug ang Diyos miingon nga mahibaw-An ninyo kun ako kanang pagtulon-an kay makaambit ka gayud sa mga paglutos. Nan igsoon ang mga kalisdana sa kinabuhi ug ang mga kasskitan sa kinabuhi nga atong maambitan nagpasabot lamang kana nga haduol ka sa gingharian sa Diyos kay ang balaang kasulatan nagaingon kun gusto nimong himayaon ug daygon didto sa gingharian sa langit nan puy-i ang kinabuhi nnga puno sa pagpaubos ug pagpasakit dinhi sa yuta, pas-ana ang imong krus ug sunod sa pagtulon-an nga gisangyaw ni Cristo kay bulahan ka nga nakaambit diha sa mga kasakitan ni Jesu Cristo diha sa paglansang niya sa krus kay makaambit ka usab sa himaya sa iyang pagkabanhaw didto sa iyang gingharian sa langit.

Gipasidaan Ni Jesus Ang Iyang Pag-antos Sa Kamatayon

MATEO 16: 21~28

• 21 Gikan adtong adlawa si JesuCristo nagsugod pagpatin-aw sa iyang mga tinun-an nga gikinahanglang mo-adto siya sa Jerusalem; ug nga paanto-son sa kagamhanang Judio, sa mga pangulong pari ug sa mga magtutudlo sa Balaod unya, patyon ug banhawon sa ikatulo ka adlaw.
22 Gidala siya ni Pedro sa unahan ug gibadlong: “Dili, Ginoo. Dili ni mahita-bo!” 23 Apan gitutokan siya ni Jesus ug giingnan: “Pahawa Satanas! Nakabal-da ka nako. Ang imong mga hunahuna gikan sa tawo, dili sa Diyos.”
24 Unya, miingon si Jesus sa Iyang mga tinun-an: “Ang buot mosunod nako, magpugong sa kaugalingon, magpas-an sa krus ug mosunod nako. 25 Kay ang maninguha pagluwas sa iyang kinabuhi mawad-an ini, apan ang mawad-an ini tungod nako, makabaton ini. 26 Unsay maganansya sa tawo kon mabuntog niya ang tibuok kalibotan, apan malaglag ang kaugalingon? Wala siyay ikahatag aron iya ning mabawi.
27 Kay ang Anak sa Tawo moanhi sa Himaya sa Iyang Amahan uban sa balaang mga anghel. Gantihan niya ang tanan sumala sa ilang binuhatan. 28 Sa pagkatinuod sultihan tamo, ang uban ninyo dili mamatay hangtod nga makita nila ang Anak sa tawo nga mo-anhi isip hari.”

PAGPAAMBIT SA MENSAHE:

Ang maong ebanghelyo nagpasabot lamang nga nakalatid na daan ang mga panghitabo diha sa pagpakatawo ni Jesu-Cristo. Mao gayuy gusto sa Diyos Amahan nga mamuhunan gayud o magahago gayud ang tawo diha sa pag-ugmad paingon sa iyang kaugalingon kaluwasan
Daan na nga gipasabot diha sa ubang mga sinulat ug diha sa ubang mga propeta nga nagaingon nga ang atong manunubos mamatay gayud diha sa krus aron sa pagluwas kanatong tanan, diin diha sa mao natong kaluwasan gipakita usab sa Diyos ang iyang kabubut-on diin iyang gipakita nga ang tinuoray nga pagpangalagad ngadto kaniya dinhi sa yuta pagasukli-an gayud ug kamatayon.

Iyang gipakita nga dili importante ang estados nga imong nakaptan dinhi sa ibabaw sa kalibutan, kay ang labing imporatante mao man ang unsay imong makaptan didto sa laing kalibutan. Iyang gipakita nga ang labing dako didto sa iyang gingharian magasilbi gayud usab sa kinabag-an dinhi sa ibabaw sa kalibutan.

Nga ang pagpangalagad ngadto sa Diyos mao gayuy pagdawat sa mga kasakitan ug mga paglutos dinhi sa yuta, diin bulahan kun malatas mo ang tanang mga pagsulay dinhi sa ibabaw sa kalibutan kay aduna kay luna didto sa iyang gingharian sa langit.

Ang Ipatubo Sa Pan Sa Mga Pariseo Ug Mga Pariseo

MATEO 16:5~12

• 5 Sa pagtabok sa mga tinun-an sa lanaw, ilang nakita nga nakalimot sila sa pagdalag pan. 6 Ug naatol nga miingon si Jesus: “Pagbantay ug ayawg saligi ang patubo sa mga Pariseo ug Sadduceo.” 7 Ang mga tinun-an nag-ingnanay: “Nagpasabot siya sa pan nga wala nato madala.”
8 Si Jesus nasayod ini busa, miingon siya: “Mga dyotayg pagtoo! Nganong naghisgot mo sa pan nga wala ninyo madala? 9 Wala ba gihapon mo makasabot? Wala ba mo mahinumdom sa lima ka pan alang sa 5,000 ka tawo, ug pila ka bukag ang nahipos? 10 O ang pito ka pan alang sa 4,000, ug pila ka bukag ang napuno sa salin?
11 Nganong nasayop mo pagsabot? Wala ko maghisgot og pan sa akong pag-ingon: Pagbantay sa patubo sa mga Pariseo ug Sadduceo.” 12 Unya, nakasabot sila nga wala siya magsulti mahitungod sa patubo sa pan, kondili sa pagtulon-an sa mga Pariseo ug Sadduceo.

PAGPAAMBIT SA MENSAHE:

Ang maong ebanghelyo maoy pagpasabot lamang diha sa pagtulun-an ni Moises nga gisangyaw niadtong mga pariseo ug mga sadiseo nga diin tungod sa dugang nilang kaalam daghan ang gidugang ug nadugang diha sa mao nilang mga pagtulun-an ug diin pinaagi niini nahimo na hinuon nga ang maong pagtulon-an wala na mahimut-i sa Diyos diin nahimong lisod sundon usab sa mga katawhan.

Si Jesus miingon nga pagbantay sa mga patubo sa pan nga gidala sa mga pariseo ug mga saduseo, diin niadto pa lamang nga panahuna daan na nga ang pagtulon-an sa Diyos nahimo na nga mestiso diha sa atubangan sa katawhan kay saksak-sinagol na man kini, busa angayan diay kita nga magbantay, apan kini gitugotan usab sa Diyos aron masukod usab ang iyang mga katawhan nga sa tinuoray gayud nga nangalagad kaniya,

Diha sa ubang sinulat nagaingon, Lahi-lahi ang pagtawag ko kaninyo apan dili ang tanan nagatawag Diyos ko, makasulod sa iyang gingharian, kundili kadto lamang nagatuman ug nagasunod sa iyang kabubut-on ug kasugo-an. S a ato pa mga igsoon dili diay basehan ang imong pagtulon-an nga gibarugan aron mahiadto ka sa kinabuhing dayun, ug mas labaw nga dili basehan ang imong pagkapariseo o pagkasadiseo o pagkaalagad sa simbahan aron mahiadto ka sa kinabuhing dayun.

Kay sa tinuoray lamang bisan kita nga tinuoray nga nangalagad sa Diyos ug tinuoray nga naga-ampo nan dili nato masiguro nga mahilangit gayud ang atong kalag. Kay wala man kita masayod kun unsay atua didto sa la-ing kalibutan, nan unsa na kaha kadtong mga katawhan nga walay mga pag-ampo asa usab kaha intawon pangita-a ang imong kalag.

Ang kaluwasan nga gisaad ni Jesu-Cristo sa iyang mga katawhan dili kini siya premyo o ganti tungod sa maayong buhat kundili gasa kini nga langitnon, aron sa ingon walay magpasigarbo diha sa atubangan sa Diyos nga siya maluwas tungod sa maayong buhat, tungod kay ang kaluwasan gugma ug kalooy sa Diyos kanatong tanan.

Ang Pagsalig Sa Babaye

MATEO: 15:21~28

21 Dayon si Jesus mibiya adtong dapita ug miadto sa kayutaan sa Tiro ug Sidon. 22 Unya, may babayeng taga Canaan nga miabot ug mituwaw: “Ginoo, anak ni David, kaluy-i intawon ko! Gisakmit sa yawa ang anak kong babaye.” 23 Apan walay gisulti si Jesus. Busa, ang iyang mga tinun-an miduol ug miingon: “Papahawaa siya! Pagka-alingugngog niya nga nagsunod nato.”
24 Unya, si Jesus miingon sa babaye: “Gipadala ko alang ra sa nawalang kar-nero sa Israel.”
25 Apan ang babaye miluhod sa atu-bangan ni Jesus ug miingon: “Ginoo, tabangi ko!” 26 Si Jesus mitubag: “Dili makataronganon ang paglabay sa pagkaon sa mga anak ngadto sa mga iro.” 27 Ang babaye mitubag: “Tinuod na, Ginoo. Apan bisan ang mga iro makakaon sa mumho nga mahulog sa talad sa agalon.” 28 Unya, si Jesus miingon: “Babaye, pagkadako sa imong pagtoo! Mahimo ang imong gipangayo.” Ug ang anak sa babaye naayo adtong gutlo-a.

PAGPAAMBIT SA MENSAHE:

Ang maong mensahe nagpasabot lamang nga ang Dios nakakita ug nahibalo diha sa pagtuo sa matag tawo, diin diha niining maong ebanghelyo gipakita sa Diyos ang iyang kabubut-on, diin tungod sa dakong pagsalig sa maong babaye gipakaayo ug gitambalan sa Diyos Jesu-Cristo ang iyang anak nga giyawaan.

Matod pa diha sa ubang sinulat ang pagtuo maoy usa ka matang sa pagsalig ug paglaom ngadto sa binuhat o butang nga dili Makita ug mahikap. Ingon niini nag pagtuo nga gibarugan ni Abraham ang atong unang Amahan , diin tungod sa talagsaon niyang pagtuo ug pagsalig gisaraan siya sa Diyos nga hatagan ug yuta ang iyang mga kaliwatan ug bisan sa taas niyang edad mamahimo siyang amahan sa tanang mga kaliwatan sa kalibutan.

Ang atong pagsalig sa Diyos dili masukod sa tawhanon nga sukdanan kay anaa man kini nahimutang sa atong kasingkasing ug panumduman, apan masukod kini pinaagi sa Diyos kay siya may nasayod sa tanan. Busa dili diay nato angay hukman ang atong isigkatawo pinaagi sa unsay atong Makita diha kaniya kay ang pagsalig ug paglaom nato ngadto sa Diyos ikaw lamang ug ang Diyos ang nasayod, apan Makita kini sa uban pinaagi sa imong binuhatan.

Sanatiago 2: 26 nagaingon, Ang lawas sa tawo kun wala nay espiritu patay kini, nan ang pagtuo nga walay ipakitang binuhatan patay usab kini. Santiago 2: 24 nagaingon usab nga Isipon sa Diyos ang tawo nga matarong tungod sa binuhatan dili kay sa pagtuo lamang.

Ang Pagtulun-an Sa Mga Katigulangan

MATEO 15:1~9

1 Unya, pipila sa mga Pariseo ug magtutudlo sa Balaod nangabot gikan sa Jerusalem. Gialirongan nila si Jesus ug giingnan: 2 “Nganong wala man magsunod sa balansayon sa mga magulang ang imong mga tinun-an? Dili sila manghinaw sa dili pa mangaon.”
3 Si Jesus mitubag: “Ug kamo, nganong gilapas man ninyo ang sugo sa Diyos tungod sa inyong balansayon? 4 Ang Diyos nagsugo: Tahora ang amahan ug inahan. Patyon sab ang manunglo sa amahan o inahan. 5 Apan nagtudlo mo nga bisag kinsa maka-ingon sa amahan o inahan: ‘Dili ko makatabang nimo, kay ang tanang akoa gitagana alang sa Templo.’ 6 Ug sa ingon wala magtahod sa amahan ug inahan; may kagawasan siya. Wala ninyo tumana ang sugo sa Diyos tungod sa balansayon.
7 Mga tigpakaaron-ingnon! Husto gyod ang panagna ni Isaias mahitu-ngod ninyo sa iyang pag-ingon: 8 Kining mga tawhana nagpasidungog nako sa ngabil, apan layo ang ilang kasingkasing. 9 Ang pag-ampo nga ilang gihalad walay kapuslanan. Kay nagtudlo sila sa mga sugo nga hinimo sa tawo.

PAGPAAMBIT SA MENSAHE:

Ang maong ebanghelyo nagpasabot diha sa mga pagtulun-an diha sa unang kasulatan diin maoy gisunod sa mga katawhan nga nagasunod sa pagtulon-an ni Moises. Apan lagi kay ang tawo mao may pinakamaalam sa tanang binuhat sa Diyos nan nasagulan gayud sa kaalam nga tawhanon ang mga pagtulon-an nga gisangyaw ni Moises. Nahimong mestiso ang pagtulon-an nga iyang gibarugan, Ug kini nagpasabot lamang nga ang tawo wala gayuy katagbawan, diin kun anaa na gani sa tawo ang gahum , ang salapi nan makahimo na siya sa pagbuhat sa dugang mga balaod.

Kay matod pa maoy gusto sa tawo dinhi sa kalibutan nga ilhon ang labing maalam sa tanang butang, nan bisan ang mga balaod nga gisangyaw sa mga propeta, mga balaod nga gisangyaw ni Moises mamahimong walay pulos kay para kanila sila man ang balaod. Nan matod pa diha sa maong ebanghelyo mga maot sila, mga tigpkaaron-ingnon, nagasunod ug nagabasa sa balaod sa Diyos apan kutob lamang usab sa ngabil ug wala sa buhat.

Apan lagi kabubut-on sa Diyos ang tanan kay matod pa, kining mga butanga gitugotan sa Diyos aron gayud masukod ang naga-alagad kaniya sa tinuoray ug aron usab hinay-hinay nag masilhig kadtong mga masupilon. Bisan niining panahuna diin daghan na ang mga pagtulon-an nga nanggawas apan atong makita ug mapalandungan nga kadaghana gayud nagabuhat sa ilang pagtulon-an pinasikad sa ilang tawhanong kaalam.

Apan mao kini ang kabubut-on sa Amahan aron sa imong mapakita ug matuman ang ubang pulong sa balaang kasulatan nga nagaingon “ Lahi-lahi ang pagtawag sa Diyos kanato apan dili ang tanan nagatawag ug nagasangpit sa Diyos makasulod sa iyang gingharian kundili kadto lamang nagasunod ug nagatuman sa iyang kasugo-an.

Busa angay diay natong pagahinuktukan, nga Si Jesu-Cristo kaniadto, karon ug sa umaabot maora, walay kausaban, angay natong sundon usab ang mga pag-ampo nga gitudlo sa atong mga katigulangan, Ug labaw sa tanan dili nato tan-awon kun unsay gibuhat sa atong isigkatawo ug maoy atong siguroon ang atong kaluwasan.

Ang Mga Butang Nga Makahugaw Sa Tawo

MATEO 15:10~14

• 10 Unya, gipaduol ni Jesus ang katawhan ug giingnan: “Pamati mo ug ayohag sabot: 11 ang mosulod sa baba dili makahugaw sa tawo kondili, ang mogula ini.”
12 Sa wala madugay ang mga tinun-an mialirong ni Jesus ug miingon: “Nasayod ka ba nga naglagot ang mga Pariseo tungod sa imong gisulti?” 13 Si Jesus mitubag: “Ang tanang tanom nga wala itisok sa langitnon kong Amahan ibton.14 Ayaw silag panumba-linga! Mga buta sila nga nag-agak sa laing buta. Kon ang buta mag-agak sa laing buta, ang duha mahulog sa bung-aw.”


PAGPAAMBIT SA MENSAHE:

Ang maong ebanghelyo maoy pagpasabot lamang diha sa ubang sinulat sa Diyos nga nagkanayon nga ang tanang butang dinhi sa ibabaw sa yuta nakadawat na sa panalanagin sa Diyos mao nga dili kini maisip nga hugaw. Ang makahugaw sa tawo dili man ang unsay atong isulod sa atong tiyan kundili ang unsa may mosulod diha sa atong huna-huna ug mogawas diha sa atong baba.

Sa ato pa ang pulong hugaw nagpasabot kini nga hugaw diha sa pagsabot nga espirituhanon, diin mao man kini mga sala nga mamugna diha sa atong panan-aw ug panumduman diin kun imo pa kining litokon nan mas labing dako ang sala nga imong nahimo kun ang dautan nga anaa sa imong huna-huna ug kasing-kasing imo pa gayud nga ipamulong.

Mao nga sa kanunay ang Diyos espiritu santo nagapasabot nga sa matag-adlaw kita nga mga katawhan kinahanglan gayud nga maghinulsol sa iyang mga kasal-anan kay bisag unsaon pa sa tawo makasala gayud siya sa pulong sa huna-huna ug sa buhat. Apan ang atong Diyos sa kanaunay masinabuton sa Tanan, diin hangtod niining panahuna diin 2000 na katuig ang milabay gikan sa pagkamatay ni Jesu-Cristo apan sa kanunay naga-aghat gayud kanato sa pag-ampo, sa pagpangayo ug pasaylo.

Diha sa ubang sinulat ug pulong sa Diyos nagaingon, Kun ang ato pang binuhatan ang gitan-aw sa Diyos nan niining panahuna wala na unta kita Apan kay lagi iya man gitan-aw ang kadako sa atong pagtuo ngadto kaniya nan maoy hinungdan nga ani-a pa kita dakong buhi niining panahuna.

Ang Labing Hinungdanong Sugo

MARCOS 12: 28~34

• 28 May magtutudlo sa Balaod nga miabot ug naminaw ining pagsukliay sa hunahuna. Nakadayeg siya sa tinubagan ni Jesus; miduol siya ug nangutana: “Unsang sugoa ang una sa tanan?”
29 Mitubag si Jesus: “Kini ang una: Pamati Israel! Usa ra ang Ginoo nga atong Diyos. 30 Higugmaa ang Ginoo, imong Diyos, sa tibuok mong kasingkasing, sa tibuok mong kalag, sa tibuok mong hunahuna ug sa tibuok mong kusog. 31 May lain pa human ini: Higugmaa ang imong isigkatawo sama sa imong kaugalingon. Walay lain nga mas dako pa.
32 Miingon ang magtutudlo sa Balaod: “Maayong pagkasulti, Ginoo. Husto ka sa imong pag-ingon nga usa ra ang Diyos ug way lain. 33 Ang paghigugma niya sa tibuok kasingkasing, sa tibuok salabotan ug sa tibuok kusog, ug ang paghigugma sa isigkatawo ingon sa kaugalingon labi pang mahinungdanon kay sa bisag unsang halad-sinunog o sakripisyo.”
34 Miuyon si Jesus ining tubaga ug miingon: “Dili ka layo sa Gingharian sa Diyos.” Sa pagkahuman, wala nay nangahas pagpangutana niya.

PAGPAAMBIT SA MENSAHE:

Ang maong ebanghelyo maoy pagpasabot lamang diha sa mga katuyuan sa Diyos diha sa mga tahas nga iyang gihatag ngadto sa iyang bugtong anak, diin siya mikunsad ug nagpakatawo diha sa ibabaw sa yuta aron gayud sa pagluwas sa atong mga kasal-anan ug ang usa usab sa mga importanteng bulohaton ni Cristo Jesus mao gayud ang pagpasabot sa kasugo-an sa iyang Amahang Diyos sumala sa nahisulat sa unang kasulatan, ilabina ang napulo ka sugo nga gisangyaw ni Moises diin maoy mga sugo nga gipakuyanap sa tibuok pagtulon-an nga Judio ug Judaism.

Matod pa diha sa ubang sinulat nga ang napulo ka kasugo-an nga gisangyaw ni Moises, nagkahulugan lamang kini ug duha ka mga importanteng sugo, Una ang paghigugma sa Diyos labaw sa tanan ug ikaduha ang paghigugma usab sa imong isigkatawo sama sa paghigugma nimo sa imong isigkaingon. Ug kon Masupak nimo ang bisan asa niining mga sugo-a nan sama ra nga nasupak nimo ang tanang kasugo-an sa Diyos.

Kay ang tanang sugo sa Diyos nagsugo gayud sa usa lang ka kasugo-an sa paghigugma, kay ang Diyos , Diyos man sa paghigugma, Diha sa ubang sinulat nagaingon, Kung moingon ka nga nahigugma ka sa Diyos apan nagdumot ug nasuko ka sa imong isigkatawo, sa imong igsoon o sa imong silingan, nan ang Diyos nagaingon nga namakak ka kay giunsa man nimo paghigugma sa Diyos nga wala nimo nakita ni mahikap apan nagadumot ka sa imong isigkatawo ug silingan ng sa tanang adlaw imong makita, ug ma-istorya.

Ang balaang kasulatan nagaingon nag kun nahigugma ka sa Diyos ug nagasunod sa pagtulon-an ni Cristo apan angadumot gihapon sa imong isigkatawo o aduna ka pay pagdumot diha sa imong kasingkasing ug panumduman nan wala ka pa magpuyo sa kahayag anaa ka pa sa kangitngit. Diha sa ubang sinulat, 1 Corinto : 3:16 nagaingon, ang lawas sa tawo maoy templo sa Diyos espirito santo, ug ang molaglag sa templo sa Diyos nga mao kita iya usab nag pagalaglagon, sa ato pa mga igsoon, nangita ug nagpasidungog ka sa Diyos apan imong gilutos ang imong isigkatawo nan ang imong gilutos dili ang imong isigkatawo kundili ang templo mismo sa Diyos nga anaa sa matag tawo.

Busa diha niining maong ebanghelyo nagasugo gayud ang Diyos diha sa paghigugma sa atong isigkatawo, apan dili nato kini mabuhat kun ipatigbabaw nato ang atong garbo, diin gipakita sa Diyos Amahan ang panag-ingnan diha sa iyang bugtong anak, Philipos 2: 8~11 nagaingon nga diha na kaniya ang kinaiya sa usa ka Diyos apan wala niya ipamugos ang iyang pagka Diyos pinaagi sa kusog , ug hinunu-a gihubo niya ang tanan ug mitipon diha sa iyang mga katawhan nga kabos ug dinaugdaog.

Walay tawo nga makahimo diha sa maong mga sakripisyo nga gipakita ni Jesus sumala sa gipadayag sa ubang sinulat sa balaan kasulatan, apan usa lamang ka pagtulon-an diha sa mga sumosunod ni Cristo nga kun anaa ka kang Cristo nan makaambit ka gayud sa mga paglutos, Diha sa ubang sinulat nagaingon, Kun gusto nimong daygon ug himayaon didto sa gingharian sa langit nan puy-i ang kinabuhi nga puno sa mga paglutos ug pagdaug-daug dinhi sa yuta, pas-ana ang imong krus ug sunod sa mga pagtulon-an nga gisangyaw ni Cristo kay bulahan ka nga nakaambit diha sa mga kasakitan ni Kristo diha sa krus kay makaambit ka usab sa himaya sa pagkabanhaw didto sa langit.

Ang Pangutana Mahitungod Sa Pagkabanhaw

MARCOS 12: 18~27

18 Ang mga Sadduceo nanuol sab ni Jesus. Kay dili man sila motoo sa pagkabanhaw, gipangutana nila si Jesus: 19 “Ginoo, sa kasulatan naghatag si Moises ining balaora: ‘Kon may lalaking mamatay nga nagbilig asawa, apan walay anak, pangasaw-on ni sa igsoon sa namatay aron mahatagag anak ang namatay.’ 20 Karon, may pito ka managsoong lalaki. Ang kamagulangan naminyo, apan namatay nga way anak. 21 Gipangasawa sa ikaduha ang babaye, apan namatay sab nga way anak. Mao gihapon ang nahitabo sa ikatulo. 22 Sa kataposan nangamatay silang pito nga way anak. Unya, namatay sab ang babaye. 23 Sa pagkabanhaw na, kang kinsa siyang asawa? Ang pito nakapangasawa niya.”
24 Mitubag si Jesus: “Tingalig nasayop mo ining bahina. Wala ninyo hisabti ang Kasulatan ni ang gahom sa Diyos. 25 Sa pagkabanhaw sa mga patay, ang mga lalaki ug babaye dili na magminyo. Hinunoa, mahisama sila sa mga anghel sa kalangitan.
26 Ug, mahitungod sa pagkabanhaw sa mga patay, wala ba mo makapamalandong sa basahon ni Moises nga naghisgot sa Diyos nga misulti pinaagi sa sampinit nga nagdilaab? Giingnan siya: Ako mao ang Diyos ni Abraham, ang Diyos ni Isaac ug ang Diyos ni Jacob. 27 Diyos siya dili sa mga patay kondili, sa mga buhi. Sayop mo kaayo.”

PAGPAAMBIT SA MENSAHE:

Ang maong ebanghelyo maoy pagpasabot lamang nga ang kamatuoran nga adunay pagkabanhaw ug ang pagkabanahaw maoy kinabuhi human sa kamatayon, ug mao kini nga kinabuhi ang gipangandaman ug giandam sa Diyos niadtong mga tinawag ug pinili nga katawhan. Kay matod pa kun gusto nimo nga mahiadto ka sa langit nan kinahanglan ka una nga mamatay aron makalangit, apan kadaghanan, gusto makalangit apan dili gusto mamatay.

Wala pay tawo nga nakatugkad sa pagkabanhaw ug pagkinabuhi didto sa laing kalibutan kay mao na man unya kini ang gingharian sa Diyos diin kita mabanhaw ngadto sa kinabuhing dayun, diha niining maong ebanghelyo nangutana ang mga Saduceo ngadto kang Jesus kabahin sa babaye nga naminyo ug kapito diin inigkamatay niya ug inig-abot niya sa laing kalibutan hain man sa pito ang iyang mabana. Diin miingon si Jesus nga wala masabti sa tawo ang kamatuoran dihA sa pagkabanhaw diin magkinabuhi na ang tawo sama sa mga anghel didto sa laing kalibutan.

Diha sa ubang sinulat sa pinadayag diha sa pagkabanhaw diha na unya nato makita ang kamatuoran diha sa pagsimba didto sa langit diin pulos pag-aampo ug mga pag-awit ang bulohaton sa mga katawhan sa Diyos, nan dinhi niining kalibutan mao kini ang pagtulun-an nga gihatag sa Diyos diha sa atong pagpakiglambigit sa Diyos. Ang mga pag-ampo ug mga bulohaton nga balaan mao kini mga tawhanon natong preparasyon alang unya sa atong pagkinabuhi nga balaan didto sa langit.

Ang pangutana siguro naba ang atong kaluwasan ngadto sa pagkabanhaw sa kinabuhing dayon diha sa atong pagpangalagad sa Diyos? Ang balaang kasulatan nagaingon, “ Bisan kadtong mga katawhan nga sa kanunay naga-ampo ngadto sa Diyos apan diha unya sa ilang kamatayon, dili nila masiguro ang ilang kalag kun siguro ba gayud kining mahiadto sa kinabuhing walay kataposan, nan unsa na man unya kaha kadtong mga katawhan nga walay mga pag-ampo, asa na man unya kaha pangita-a ang ilang mga kalag. Mao nga ang Diyos dinhi niining pagtulon-an nagaaghat gayud diha a pag-ampo sa santos nga rosaryo ilabina sa dili pa matulog, aron sa ingon adunay giya ang imong kalag kun atua kana sa laing kalibutan.

Kay ang kaluwasang dayun nga gisaad sa Diyos ngadto sa iyang katawhan pinaagi sa bugtong niyang anak dili kini ganti o premyo tungod sa atong mga maayong buhat aron sa ingon walay magpasigarbo diha sa atubangan sa Diyos nga siya maluwas tungod sa maayong binuhatan, kay ang kaluwasan grasya kini nga gihatag sa Diyos ngadto sa iyang mga katawhan tungod sa dako niyang gugma ug kalooy kanatong Tanan

Ang Pangutana Mahitungod Sa Mesiyas

MARCOS 12: 35~37

35 Samtang nanudlo si Jesus sa Templo miingon siya: “Matud pa sa mga magtutudlo sa Balaod ang Mesiyas anak ni David. Unsaon man pagkaingon ini? 36 Si David mismo, linamdagan sa Espiritu Santo misulti: Ang Diyos nag-ingon sa akong Ginoo: Lingkod sa akong tuo hangtod nga ibutang ko ang imong mga kaaway ubos sa imong tiil. 37 Kon si David mismo nagtawag niya nga Ginoo, sa unsang paagiha nga ang Ginoo iyang Anak?”
Nanuol ang daghang katawhan kang Jesus ug malipayong namati

PAGPAAMBIT SA MENSAHE:

Ang maong ebanghelyo maoy pagpasabot lamang diha sa mga milagro nga gipakita sa Diyos diin diha niining ebanghelyo nagaingon man nga unsaon man kuno pagkahimo sa Mesiysas nga kaliwat ni David nga si David mismo nagatawag man kaniya ug Ginoo. Ang pulong nga miesya nagakahulogan kini nga dinihugan o “anointed one” sa inengles apan dili kini dinihugan sa lana, niadtong panahuna sa kinaiya sa mga Hebrew kun dihugan ka ug lana, nan mokunsad kanimo ang espiritu santo ug anaa kanimo ang kaalam nga langitnon pinaagi sa mga pag-ampo ug pangaliya, apan ang Mesityas nga gipasabot dinhi mao nga direkta nga mikunsad kaniya ang Espiritu santo sa Diyos.

Atong mabasa mismo diha sa ubang sinulat , nga gikan sa panahun ni David paingon sa panahun ni Jesus miagi una kini ug napulo ka kaliwatan, kun usa ka kaliwatan aduna 20 anyos nga distansya sa ato pa gikan ni David paingon ni Jesus adunay 200 ka tuig.

Ang milagro nga gipakita sa Diyos diha sa pagpakatawo kang Jesus mao man ang pakunsad sa espiritu santo diha sa sabakan ni Birhen Maria diin sa mata sa tawo napa-angkan siya nga mismo ang iyang pamanhunon wala masayod. Sa ato pa mga igsoon diha sa pagapakatawo ni Jesus sa sabakan ni Maria nagsumikad ang iyang pagkakagikan ni David kay mismo si Maria hanay man sa kaliwatan ni David.

Apan tungod kay espiritu santo man ang nagatisok ngadto sa sabakan ni Maria nan Diyos usab siya nga matuod, diin usa kini sa mga kaagi diha sa balaang kasulatan nga napuno sab sa libak ug pagbiay-biay sa ubang pagtulon-an kay daghan ang nagakwestyon sa pagkabirhen ni Maria ug labaw sa tanan daghan ang nagtuki diha sa pamaagi sa pagpakatawo ni Jesus diin nakabutang man nga anak siya sa gawas.

Apan kining tanan gibuhat sa Diyos sa akong pagsabot aron makita nga ang tawo dinhi sa kalibutan, dili angay hukman sa iyang isigkatawo sumala sa unsay atong nakita, kay ang pagtuo ug pagtahod nato sa Diyos dili kini masukod sa tawhanon nag sukdanan , apan masukod kini diha sa espirituhanon nga sukdanan kay anaa man kini gibutang sa atong kasing-kasing ug panumduman.

Busa mga igsoon bulahan diay kadtong nagaampo ug nagatahod sa Diyos nga nagagikan gayud sa atong kasingkasing, kay matod pa Diyos lang ang nasayod sa tanan, kay siya may naayod diha sa matag tawo, gihimong sumbanan ang paghiabot sa mesiyas nga nagagikan sa mga kaliwat nga Diyosnon, aron ipakita nag dili babag ang unsa man nga mga paglutos ug mga pagsulay ug mga kasakitan nga imong ma ambitan dinhi sa kalibutan, ang importante diha sa laing kalibutan nahiusa kita kang Kristo Jesus ang atong mesiyas.

Ang Halad Sa Biyuda

MARCOS 12: 41~44

41 Unya, milingkod si Jesus atbang sa panudlanan sa Templo ug mitan-aw sa katawhang nanghulog og salapi sa panudlanan. Dihay daghang adunahan nga namutang og dagkong halad. 42 Apan miduol ang kabos nga byuda ug mihulog og duha lang ka dako.
43 Gitawag ni Jesus ang iyang mga tinun-an ug giingnan: “Sa pagkatinuod, sultihan tamo. Kining kabos nga byuda nakahatag og labaw sa tanan. 44 Kay ang tanan nanghatag gikan sa ilang kaadunahan. Apan naghatag siya sa iyang kakabos. Gihalad niya ang tanan nga iyaha, ang iyang kabuhian.”

PAGPAAMBIT SA MENSAHE:

Ang maong ebanghelyo maoy pagpasabot lamang diha sa kabubut-on sa Diyos diin diha sa paghatag nato sa hinabang ngadto sa simbahan o ngadto ba sa atong isigkatawo, alang sa Diyos dili basehan kun unsa kadako o kagamay sa imong gihatag kundili diha sa atong paghatag ato usab nga gihatag ang atong gugma ug panagdait sa wala pagsapyan o walay paghulat ug bawas niini.

Usa ka panag-ingnan niining maong biyuda nga bisan sa iyang kakabos apan nakahimo pa siya sa paghatag ug duha ka sentabos ngadto sa panudlanan sa templo, sa walay pagsapayan kun aduna pa bay mahabilin kaniya, diin kadtong mag adunahan nagahatag sila apan pinisik lamang usab sa ilang bahandi. Ang grasya ug panalangin nga atong madawat sa kahitas-an diha sa atong pagtabang sa atong isigka-kristuhanon o sa atong simbahan o iglisea nga gibarugan nagadepende usab diay kini diha sa atong paghatag nga gikan gayud sa atong kasingkasing.

Usa ka pagtulun-an ang gipakita niadtong biyuda nag dili diay kita angay maguol nga gamay lamang ang atong mapaambit ngadto sa Diyos kun kini nagagikan sa atong kasingkasing nan malipayon ang Diyos nga manalangin sa imong gibuhat. Ang balaang kasulatan nagaingon, 2 Corinto 9:7 magahatag nga malipayon ug dili magbagutbot, kay ang mohatag ug daghan pagabalosan usab ug makadaghan apan ang nagahatg ug diyutay nan diyutay lamang usab ang mobalik, apan mga igsoon ang maong biyuda maisisp nato nga nagahatag ug daghan kay dili man lang nga mao-mao niyang sentabos ang iyang gihatag kundili hasta usab ang iyang kasingkasing ang iyang gihatag ug maisip nga gihatag na niya ang tanan niyang bahandi.

Ang paghalad diay ngadto sa Diyos makagagahum, dili pasikaran ang materyal nga kadaghanon kun dili ang paghatag ngadto sa atong mga halaran usa kini ka halad nga espirituhanon ug langitnon kay dili man sumbanan ang materyal nga kadako sa bahandi kundili ang kadako usab sa imong kaaghop ug kamaya sa imong buot nga walay pagpagutbot ni paghulat ug bayad niini.

Gitagna Ni Jesus Ang Pagkagun-ob Sa Templo

MARCOS 13: 1~2

13 • 1 Sa mibiya na si Jesus sa Tem- plo usa sa iyang mga tinun-an miingon: “Tan-awa Ginoo, ang dagkong bato ug nindot nga mga balay.” 2 Mitubag si Jesus: “Nakita ba nimo kining nagbuntaog nga kabalayan? Walay bato nga mahibilin sa nahimutangan ini. Lumpagon ang tanan!”

PAGPAAMBIT SA MENSAHE:

Ang maong ebanghelyo maoy usa ka sambingay nga nagpasabot nga ang templo mismo nagahisgot diha sa lawas sa atong Ginoong Jesus diin moagi gayud kini ug kamatayon una kini makabarog pagbalik kay mao man kini ang kabubut-on sa Diyos Amahan nga mismo ang iyang bugtong anak diha sa pagtukod ug pagsangyaw diha sa iglisea ug simbahan nga iyang gibarugan moagi gayud kini ug mga paglutos diin ang painakabug-at nga mahitabo mao gayud mismo ang kamatayon.

Panag-ingnann ang usa ka liso nga aron kini motubo kinahanglan una kining mamatay aron moturok ug mamunga ug daghan. Ang Diyos nagapasabot gayud nag ang iyang mga pagtulon-an nga iyang gisangyaw makaambit gayud sa mga paglutos ang nagasunod niini ug kana maoy timaan nga ang maong pagtulon-an iya sa Diyos.

Usa ka panag-ingnan nga diha sa pagpaduol mo sa Diyos nan anaa gayud ang kalisod, ang kapait, ug ang pagtuki diha mismo sa kamatu-oran nga imong nakaplagan kun iya ba kini sa Diyos, kay matod pa sa uban kun Diyos pa kini nga matuod nan wala untay mga paglutos , wala untay mga ka sakitan, apan ang kamatuoran mao nga kun nagasunod ka sa pagtulon-an nga gisangyaw ni Cristo, ug kun iya ka ni Cristo nan makaambit ka gayud sa kalisdanan sa kinabuhi dinhi sa ibabaw sa yuta.

Nagapamatuod lamang kini mga igsoon nga ang dalan ngadto sa kinabuhing dayun, ang dalan ngadto sa gingharian sa Diyos lisod gayud agi-on kay hagip-ot kini ug batoon diin daghan ang dili gayud molahutay sa kalisod niini. Sa ingon ang Templo ug simbahan nga gitukod sa Diyos dinhi sa yuta tinu-oray magun-ob man siya apan mobarog ra usab pagbalik kay kini nga pagtulon-an mga igsoon dili man tinukod sa tawo kundili iya man sa Diyos nga labing gamhanan.

Diha sa ubang sinulat, Mateo 16: 18 nagaingon Simon ikaw Si Pedro ug ibabaw niining bato itungtong ko ang akong simbahan ni ang kamatayon dili makabuntog niini. Si Jesus mao ang ulo sa maong simbahasn ug kitang mga katawhan mao ang lawas nan , maguba tuod kitang iyang mga katawhan sa Diyos nga mao ang templo o puy-anan sa espiritu santo apan, mobalik ra kita diha sa pagkabanhaw sa kinabuhing dayun.