Ang Dili Batok Kanako Dapig Kanako

MARCOS 9:38~41

• 38 Miingon si Juan: “Ginoo, nakakita mig tawo nga nagpalagpot sa yawa sa imong ngalan. Amo siyang gibadlong, kay dili ta siya kauban.” 39 Mitubag si Jesus: “Ayaw siyag did-i. Walay makahimog milagro sa akong ngalan nga mosultig daotan batok nako. 40 Ang dili supak nato dapig nato.
41 Sa pagkatinuod sultihan tamo, ang mopainom ninyog tubig, kay iya mo ni Cristo ug nagdala sa iyang ngalan, gantihan.


PAGPAAMBIT SA MENSAHE:

Ang maong ebanghelyo maoy pagpasabot laamng nga ang atong Diyos, Diyos sa paghigugma ug pakigdait, kinsa man kadtong nangita kaniya nan dili gayud niya hikawan ug dili niya ihikaw ang bendisyon ug panalangin. Diha niining maong ebanghelyo iyang gipasabot si Kinsa man ang nagsangyaw sa iyang ngalan dili kini batok kaniya, ug si kinsa man nga nagatabang sa iyang mga sumosunod nan nagapasidungog kaniya isip Diyos sa kamatuoran.

Nagpamatuod lamang kini mga igsoon nga si Jesu Cristo Diyos sa tanang tawo bisan niadtong wala makaila kaniya iyang gitagaan ug higayon diha sa pag-ila ug sa pagpaduol kaniya. Juan 14: 15 nanga-ingon “ Tumana ninyo ang akong mga sugo ug mangayo ako sa Amahan ug taga-an kamo niya ug laing manlalaban, “ Ang espriritu sa kamatuoran, nga magauban kaninyo hangtod sa kahangturan. Ang kalibutan dili makadawat kaniya kay wala man sila makaila ni makakita kaniya apan makaila kamo kaniya kay nagauban ug nagapuyo man siya diha kaninyo.

Mga igsoon ang ang Diyos kanunay nagpuyo diha kanato sa atong kasing-kasing ug panumduman, nan pinaagi diha sa atong mga pag-ampo ug pangaliya magahatag siya ug giya ug panalangin diha sa atong mga buhat. 1 Corinto 3: 16 “ Nagaingon ang lawas sa tawa maoy templo sa Diyos ug ang moguba sa templo sa Diyos nga mao kita nan pagalaglagon gayud sa Diyos. Pamalandungi igsoon, nga kitang tanan anaa ang Diyos nagauban kanato busa respetuhe ang matag tawo kay anaa kaniya ang imong Diyos ug kun unsa man ang imong gibuhat diha sa imong isigkatawo nan maoy imong gibuhat sa imong Diyos.

Bag-o Ug Karaang Kamatuoran

MATEO 13:51~52

51 Nangutana si Jesus: “Nakasabot ba mo ining tanan?” “Oo,” mitubag sila. 52 Busa, miingon siya: Makita ninyo nga ang tanang magtutudlo sa Balaod nga mahimong tinun-an sa Gingharian sama sa tagbalay nga makakuhag bag-o ug daang butang gikan sa iyang tipiganan.”

PAGPAAMBIT SA MENSAHE:

Ang maong ebanghelyo maoy pagpasabot lamang nga ang pagtulon-an sa Diyos kaniadto ug karon adunay pagkapareho. Kay ang mga pulong ug mga pagtulon-an sa Diyos Amahan niadtong unang mga panahun gisulti kini pinaagi sa tanghaga o sambingay aron sa ingon kadto lamang mga magtutuo nga anaa ang Diyos nagapuyo diha sa ilang kasing-kasing ang makahubad ug makasabot niini.

Mao kini ang nalangkob diha niining libro sa balaang kasulatan diin ang unang kasulatan nagasangyaw sa pulong sa Diyos Amahan pinaagi sa daghang mga propeta, diin usa na niini si Moises diin maoy panaka-inila ug pinakaduol sa Diyos Amahan sa unang kasulatan. Ang ikaduhang kasulatan o bag-ong kasulatan nagahisgot kini diha sa pagtulon-an ni Jesu Cristo diin nagpakatawo aron sa paggtuman sa kasugo-an sa iyang Amahang Diyos.

Ginaingon diha sa ubang pulong nga wala na unta kinahanglana pa ang bag-ong kasulatan kun wala pay kasaypanan diha sa daang kasulatan, kasaypanan diha sa pagtuman sa kasugo-an sa Diyos diha sa iyang mga tinahasan, Ang bag-o ug daan nga kasulatan maoy lihitimong pulong sa Diyos nga nagalangkob kini sa 72 ka libro diin mga tinagong mensahe kini sa unang mga propeta hangtod diha sa mag pagtulon-an ni Jesu Cristo

Tinuoray nga aron masabtan nato ang tipik diha sa kasugo-an ug kabubut-on sa Diyos ato gayong basahon ang bag-o ug ang daan nga kasulatan diin matod pa diha sa maong ebanghelyo nga sama sa tagbalay nga nagkuha ug bag-o ug daang mga butang diha sa iyang tipiganan. Kay aron sa ingon atong masabtan ang iyang mga pulong ug ang iyang mga kasugo-an

Ang Pagtulon-an Sa Mga Katigulangan

MATEO 15: 1~9

15 • 1 Unya, pipila sa mga Pariseo ug magtutudlo sa Balaod nangabot gikan sa Jerusalem. Gialirongan nila si Jesus ug giingnan: 2 “Nganong wala man magsunod sa balansayon sa mga magulang ang imong mga tinun-an? Dili sila manghinaw sa dili pa mangaon.”
3 Si Jesus mitubag: “Ug kamo, nganong gilapas man ninyo ang sugo sa Diyos tungod sa inyong balansayon? 4 Ang Diyos nagsugo: Tahora ang amahan ug inahan. Patyon sab ang manunglo sa amahan o inahan. 5 Apan nagtudlo mo nga bisag kinsa maka-ingon sa amahan o inahan: ‘Dili ko makatabang nimo, kay ang tanang akoa gitagana alang sa Templo.’ 6 Ug sa ingon wala magtahod sa amahan ug inahan; may kagawasan siya. Wala ninyo tumana ang sugo sa Diyos tungod sa balansayon.
7 Mga tigpakaaron-ingnon! Husto gyod ang panagna ni Isaias mahitu-ngod ninyo sa iyang pag-ingon: 8 Kining mga tawhana nagpasidungog nako sa ngabil, apan layo ang ilang kasingkasing. 9 Ang pag-ampo nga ilang gihalad walay kapuslanan. Kay nagtudlo sila sa mga sugo nga hinimo sa tawo.

PAGPAAMBIT SA MENSAHE:

Ang maong ebangheyo nagpasabot lamang nga ang pagtulon-an nga nasunod sa mga kartigulangan nga mga Judio mga pagtulun-an diha sa mga gisangyaw ni Moises ubos sa giya sa Diyos Amahan, mao kining mga pagtulon-an nga gitawag ug Judaism diin hangtod iining panahuna anaa pa kini sa Jerusalem diin nagasangyaw ug nagatuo lamang kini sa Diyos Amahan.

Apan lagi tungod usab sa kaalam sa tawo niing kalibutana ang pagtulon-an nga nasawo-sawo na sa mga katigulangan nahimo na kining mesitizo kay daghan na man ang gidugang niini pinaagi diha sa pagestudyo sa mag pariseo o mga kapari-an nga nagatudlo sa pagtulon-an ni Moises.

Diin dako ang kahibulong niadtong mga pariseso kay ang ilang nasunod nga pagtulon-an sukwahi man diha sa pagtulon-an nga gisangyaw ni Jesus, diin daghan naman ang ilang gibag-o, Ug miingon si Jesus nga kining mga tawhana nagaalagd lamang sa Diyos sa pulong lamang apan halayo ang ilang kasingkasing kanako kay ang ilang gisangyaw ug gituohan binuhat naman sa tawo.

Angay diay mga igsoon nga atong respetuhan ang unsa man nga mga pagtulon-an sa mga katigulangan, ug ato lamang ihangad sa Diyos kay siya ang magpahiluna sa tanan, ug bulahan diha niining pagtulun-an nga atong gibarogan kay ato gayung madungog ang mga buhing pulong sa Diyos diin maoy mogabay kun nahasobra ug nagakulang ba kita diha sa pagtuman sa iyang kasugo-an.

Ayaw hukmi ang imong sigkatawo, i-ampo siya nga i-paabot sa iyang panumduman nga naghinubra ang iyang mga binuhatan, kay nakita sa Diyos ang tagsa tagsa kanato mao man ang kadako sa atong pagtuo, diin mao kini ang ilang gipanalanginan, kay matod pa sa buhing pulong sa Diyos, kun gitan-aw ko pa ang inyoang binuhatan nan wala na unta kamo niining panahuna, apan maoy akong gilantaw ang kadako sa inyoang pagtuo ngadto sa Diyos maoy hinungdan nga buhi pa kamo hangtod niining panahuna. Busa i-ampo ug ihalad ang matag-usa kay wala kita masayod diha sa matag-usa kanato kun asa ra kutob ang atong pagpuyo dinhi sa kalibutan. Atong lig-onon ang atong kalag ug espiritu kay mao kini ang importante diha sa atong pagkinabuhi didto sa laing kalibutan ang pagkinabuhi nga minando-an sa espiritu santo.

Ang Mga Piniling Sulogoon Sa Diyos

MATEO 12: 15~21

15 Apan si Jesus nasayod sa daotan nilang laraw busa, mipahawa siya. Misunod niya ang daghang tawo. Giayo niya ang tanang masakiton 16 ug higpit siyang mipahimangno sa dili pagpanugilon mahitungod niya.
17 Niining paagiha natuman ang panagna ni propeta Isaias: 18 “Ania ang pinili kong sulugoon, ang akong gihigugma ug gikahimut-an. Pakonsaron ko kaniya ang akong espiritu ug isangyaw niya ang akong hukom sa tanang kanasoran.
19 Dili siya makiglalis ni mosinggit, ni madungog ang tingog sa kadalanan. 20 Ang tigbaw nga nagupok dili niya balion. Ni palungon ang nagkaawop nga siga. Molahutay siya hangtod nga ang hustisya magmadaogon. 21 Ang tanang kanasoran maglaom niya.”

PAGPAAMBIT SA MENSAHE:

Ang maong ebanghelyo nagpamatuod lamang sa sinulat sa mga unang mga propeta diin gipasabot ng daan ang paghiabot sa anak sa Diyos diin pagabiay-biayon ug pakaulawan. Usa ka pagtulon-an nga angay sa pagpamalandong nga ang tinawag ug pinili sa Diyos makaambit gayud sa mga paglutos ug mga kasakitan sa kinabuhi diin diha niining maong ebanghelyo gipakita lamang nga nagbarog si Jesu Cristo ingon nga tawo dili pinaagi diha sa mga bahandi niining kalibutana ni sa mga dungganan ug mga maalamong sakop sa panggobyerno kundili nagabarog kini pinaagi sa kabubut-on sa iyang Amahan diha sa pagpakita ug mga milagro ug diha sa pag-ayo sa mga masakiton, pag-ayo dili ang sa ilang materyal nga lawas kundili ayuhon usab ang ilang nagkaluya nga kalag.

Sa ato pa mga igsoon ang pagsangyaw diha sa pagtulon-an sa Diyos pinaagi kang Cristo Jesus dili nato kini masukod diha sa maalamon niyang mga sumosunod ni sa mga bahandianon niyang mga katawhan kundili ang kinabag-an diha sa iyang gisangyawan ug giatiman nga mga katawhan kabos ug labing ubos dinhi sa ibabaw sa kalibutan. Usa ka sukdanan nga ang mga adunahan dili makasabot ni ang mag katawhan nga wala makaila sa Diyos dili usab motuo kay para kanila ang Diyos haduol kanila nga adunay katakos sa pagpasidungog sa Diyos pinaagi sa bahandi niining kalibutana.

Igsoon ang mga paglutos ug mga kasakitan sa kinabuhi nga atong nasinati nagpasabot lamang kana nga tinawag ug pinili ka sa Diyos kay mao gayuy gusto sa Diyos nga ang iyang pinili ug tinawag nga katawhan sa kanunay makahinumdom kaniya diha sa mga pag-ampo ug pangaliya aron magbarog ang atong espirituhanon nga kalig-on diha sa atong kasingkasing ug panumdoman.

Kay ang tawo nga puno sa pagtuo ug sa espiritu santo walay butang o babag dinhi sa kalibutan nga dili niya malatas. kay matod pa diha sa ubang pulong sa balaang kasulatan (Mateo 10:28) , Ayaw kamo kahadlok niadtong tawo nga mopatay sa lawas apan dili makapatay sa kalag, hinunua kahadloki ninyo ang Diyos nga makalaglag sa lawas ug kalag didto sa impyerno.

Mga Pagtintal Sa Pagpakasala

MATEO 18: 6~9

6 Ang makaangin sa pagpakasala sa usa ining mga gagmay nga nagtoo nako, maayo pa nga itambog siya sa kinailadman sa dagat, hiniktan og dakong galingan ang liog.
7 Pagkaalaot sa kalibotan tungod sa daghang iskandalo! Moabot ning mga butanga, apan alaot ang makadaldal sa uban sa pagpakasala.

8 Kon ang kamot mo o tiil makaangin nimo sa sala, putla ni ug ilabay. Mas maayo nga mosulod ka sa kina-buhi nga walay kamot o tiil kay sa itambog sa walay kataposang kalayo nga sangkap sa kamot ug tiil. 9 Kon ang mata makaangin nimo sa pagpaka-sala, lugita ni ug ilabay. Mas maayo nga mosulod ka sa kinabuhi nga usa ray mata kay sa itambog sa kalayo sa impyerno nga sangkap sa duha ka mata

PAGPAAMBIT SA MENSAHE

Ang maong ebanghelyo maoy pagpasabot lamang nga ang tanan nga tinawag ug pinili nga katawhan sa Diyos sa kanunay, paga-alig-igon ug pagapili-an pa. kay matod pa daghang ang mag tinawag ug pinili nga katawahan sa atong Amahang Diyos diin matod pa sama kini kabaga sa balas sa baybayon, diin dili tanan tinawag ug pinili ug kadtong wala tawga ug pili-a nan dinhi lang sila kutob sa kalibutan.

Ang importante sa Diyos mao gayud ang atong kalag, diin mao kini iyang sigurohon sa pagluwas. Kay kun makita sa Diyos nga tungod sa imong mag tawhanong binuhatan dinhi sa yuta nan maangin ang kaluwasan sa imong kalag diha sa kainabuhing dayun nan, sigurohan gayud sa Diyos pagluwas ang imong kalag, mas palabihon pa sa Diyos nga makuhaan ka ug usa ka tiil o usa ka kamot o usa ka mata kay sa tibuok nimong lawas ug ang makasala diin maoy hinungdan sa pagkatunaw sa imong kalag sa kalayo sa impyerno.

Busa igsoon atong hinumduman nga dili lamang kining kinabuhi-a ang atong puy-an kay aduna pay kinabuhi human niini ug mao kini ang kinabuhi nga iya sa Diyos ang pagkinabuhi nga minando-an sa espiritu santo sa Diyos.

Ang balaang kasulatan nagaingon, nga bisan kadtong mga tawong mainampoon, ang ilang kalag dili nila masiguro ang kaluwasan ngadto sa kinabuhing dayun, kay ang kaluwasan nga gisaad ni Jesu-Cristo diin dili kini ganti o premyo tungod sa maayong binuhatan aron sa ingon walay magpasigarbo diha sa atubangan sa Diyos nga siya maluwas tungod sa iyang mga maayong buhat kundili ang kaluwasan gasa kini nga langitnon ug grasya nga hinatag sa Diyos Amahan pinaagi sa iyang anak.

Busa igsoon bulahan diay nga makulangan ang parte sa imong materyal nga lawas diin masiguro nimo ang imong adtu-an ug masiguro nga ikaw nagkinabuhi nga langyaw niining kalibutana apan haom didto sa gingharian sa Diyos, unsaon mo man ang mga materyal nga kabulahanan ug mga tawhanong bahandi apan mahiuban ka man usab sa pagkabilin dinhi sa kalibutan, mas maayo nga wala kay bahandi nga iya niining kalibutana apan puno sa mga bahandi nga langitnon ug esprituhanon ang bahandi nga madala nato hangtod sa laing kalibutan.

Ang Pagdili Ug Ang Pgtugot

MATEO 18: 18~20

18 Ingnon tamo, ang inyong gaposon dinhi sa yuta, gaposon sab sa Langit, ug ang inyong hubaran dinhi sa yuta, hubaran sab sa Langit. 19 Sa samang paagi, kon dinhi sa yuta ang duha magkahiusa sa pagpa-ngayo sa bisag unsa, ihatag ni sa langitnon kong Amahan. 20 Kay kon may duha o tulo nga magkapundok sa akong Ngalan, naa ko taliwala nila.”

PAGPAAMBIT SA MENSAHE:

Ang maong ebanghelyo maoy pagpasabot lamang mga igsoon nga unsay mga bulohaton sa ngalan sa Diyos nga atong gibuhat dinhi sa yuta basata atong gibalaan ug atong gipasidunggan ingon nga atong gibuhat sa ngalan sa Diyos nan makadawat gayud sa panalangin nga langitnon.

Nagpasabot lamang mag igsoon nga ang Diyos sa akanuany najkakita sa atong mag buhat ug mga pag-laagd nadto kanila, Diin matod pa duha o tulo nga nagaampo sa ngalan sa Diyos nan anaa siya nakig-uban kanato.

Busa igsoon angayan gayud nga magakahugpong kita diha sa pag-ampo ngadto sa Diyos kay masdali madungog ang atong mga pag-ampo, Ang hinugpong nga pag-ampo diha sa santos nag rosaro diha sa balaang oras madungog hangtod sa gingharian sa langit.

Igsoon padayun sa pagpangalagad, padayun sa pag-ampo ug padayon diha sa mga bulohaton nga Diyosnon, Ipadayaon ang imong pagtabang sa imong mag igsoon apan sa apgbuhat mo sa inon, pakasama nga waal mahibalo ang imog walangkamot diah sa gibuhat as imong tuo nag kamot sa ingon ikaw lamang ug ang Diyos ang nasayod, Ang imong Langitnon maahn mao ra ang magbalos kanimo.

Diha sa atong mag pag-ampo manirado kita a atong kuarto, ipikp nato ang atong mga tuhod ug ibayaw ang atong mga kamot atubangan sa altar, ug pangayo-a ang kalooy sa Diyos ug kun mahimo hilaki ang kalooy sa Diyos.

Ang Sambingay Mahitungod Sa Sulogoon Nga Wala Mopasaylo

MATEO 18: 23~35

, Si Pedro nangutana: “Ginoo, kapila ko ba pasayloa ang nakasala kong igsoon? Kapito ba?” 22 Si Jesus mitubag: “Dili lang kapito, kondili kapito pilupiloa ang 70.”

• 23 May hari nga nakighusay sa utang sa iyang mga sulugoon. 24 Ang una nakautang og 10,000 ka salapi. 25 Sanglit ang tawo wala may ikabayad, ang hari nagsugo sa pagbaligya niya isip ulipon uban sa asawa, mga anak ug tanang kabtangan. Ibayad ang halin. 26 Ang sulugoon miluhod sa tiilan sa hari ug miingon: “Kon hatagan ko nimog igong panahon, bayran tikaw sa tanan.” 27 Naluoy ang hari. Dili lang kay gilugwayan siya, kondili gipasaylo ang utang
.
28 Unya, ang maong tawo mibiya sa atubangan sa hari. Nahibalag niya ang kauban nga nakautang niyag mga 100 ka salapi. Iyang gigunitan ang liog ini ug gisinggitan: “Bayri ko sa imong utang!” 29 Ang kauban miluhod sa tiilan ug mihangyo: “Kon hatagan ko nimog higayon, bayran tikaw sa tanan.” 30 Apan wala siya mosugot. Gipabi-langgo ang nakautang hangtod nga mabayran ang tanan. 31 Nakakita ang uban sa nahitabo. Nangasuko sila ug misumbong sa agalon.

32 Gipatawag sa agalon ang sulugoon ug giingnan: “Pagkabanyaga nimo, gipasaylo tikaw sa tanan mong utang, kay nagpakiluoy ka. 33 Dili ka ba maluoy sa imong kauban, ingon nga naluoy ko nimo?” 34 Ang agalon nasuko. Busa, gitaral niya ang sulugoon sa hukmanan hangtod nga mabayran ang tanan.” 35 Midugang pa si Jesus: “Kini ang buhaton kaninyo sa Amahan kong langitnon gawas kon mapasaylo ninyo sa kinasingkasing ang mga igsoon.”

PAGPAAMBIT SA MENSAHE:

Ang maong ebanghelyo maoy pagpasabot lamang nga ang tanang sala nga atong nabuhat ngadto sa Diyos magamay ug madako adunay kapasaylo-an. Kun ato lamang pangayoon ang pasaylo sa kinasingkasing gayud apan kinahanglan una nga makamao ka mopasaylo diha sa nakasala kanimo kay matod pa nga diha magsumikad ang kapasaylo-an sa imong mga sala sa paghatag kanimo ug pasaylo ngadto sa imong isigkatawo.

Sa ato pa mga igsoon kamatuoran ang pulong nga nagaingon ang pagpakasala tawhanon apan ang pagpasaylo balaanon. Busa kinahanglan nga atong luagon ang atong pasensya ug pailob diha sa atong isigkaingon kay matod pa ang Diyos nagahatag ug pasaylo sa ika ptoan ug pito ka higayon.

Kay matod pa diha sa atong kapasaylo-an sa atong mga sala ang silot sa atong sala magapadayon apan dili na didto sa kalayo sa impyerno kundili didto na sa purgatoryo. Busa ang angay natong buhaton sa kanunay modangop kita sa pag-ampo nga gitudlo kanato sa Diyos , ug atong iampo ang atong mga kaigsoonan ilabi na kadtong wala motuo sa Diyos, kadtong mga katawhan nga wala makaila sa ilang Diyos kay kun kabubut-on gayud sa Diyos, nan mopasilong gayud sila sa landong sa espiritu santo sa Diyos, kay Diyos lamang ang adunay gahum sa pagpahumok sa matig-a nga kasingkasing sa tawo

Ang Dakong Sugo

MATEO 22: 34~40

34 Nakita sa mga Pariseo giunsa ni Jesus pagpahilom ang mga Sadduceo. Busa, nagkauyon sila sa pagtigom libot niya. 35 Ang usa nila nga magtutudlo sa Balaod misulay pagbitik niya ining pangutanaha: 36 “Magtutudlo, unsay labing bililhon nga sugo sa Balaod?”
37 Mitubag si Jesus: “Higugmaa ang Ginoo nga imong Diyos sa tibuok kasingkasing, sa tibuok kalag, ug sa tibuok salabotan. 38 Kini ang una ug ang labing importanti nga sugo. 39 Apan may lain nga sama ini: Higug-maa ang isigkatawo sama sa kaugalingon. 40 Ang tibuok Balaod ug mga Propeta nagsukad ining duha ka sugo.”

PAGPAAMBIT SA MENSAHE:

Ang maong ebanghelyo maoy pagpasabot lamang diha sa usa sa mga katoyu-an ni Jesu-Cristo diha sa pagpakatawo niya dinhi sa kalibutan diin maoy usa nga gusto niyang mapasabot ang napulo ka sugo sa iyang Amahan nga gisangyaw ni Moises. Diin ang napulo ka sugo mamahimo lamang duruha. Una higugmaa ang Diyos sa tibuok mong kasingkasing, sa tibuok mong kalag ug sa tibuok mong huna-huna. Ug ang ikaduhang sugo mao ang paghigugma sa imong isigkatawo sama sa paghhigugma nimo sa imong kaugalingon.

Apan kun masupak nimo ang bisan usa niining maong duha ka sugo nan sama ra nga nasupak nimo ang tanang kasugo-an sa Diyos.kay ang balaang kasulatan nagatudlo gayud diha sa paghigugma sa Diyos ug sa paghigugma sa imong isigkatawo. Ingon niana ang panag-ingnan nga gipasabot ni Jesus diha sa iyang pagsangyaw sa maayong balita diin iyang gipakita ang kabubut-on sa iyang Amahan nga ang paghigugma diha sa imong isigkatawo maoy pagpakita sa usa ka gugma nga puno sa pagpaubos , pagkamangindawaton ug tugob sa pagpailob.

Apan mga igsoon sayon litokon apan lisod kini buhaton kun wala nimo ipapuyo ug ipahari si Jesu Cristo diha sa imong kasing-kasing, Unsaon nato pagpahari si Ginoong Jesus mga igsoon, atong isul-ob ang iyang kinaiyahan, ang kinaiyahan sa espiritu santo sa Diyos. Diin sa kanunay mangindawaton , mainantuson ug mainampo-on. ug labaw sa tanan tumban nato ang atong garbo ug maoy atong ipahari ang pagkamangindawaton diha sa mga pagsaway ug mga paglutos.

Mao kini ang mga kinaiyahan nga gusto sa Diyos nga atong sundon diin atong tun-an ang pagkinabuhi nnga langyaw niining kalibutana apan ha-om didto sa iyang gingharian sa langit, atong tun-an ang pag-ampo ug ang pagsimba didto sa iyang gingharian sa langit, kay matod pa wala gayuy balaod dinhi sa yuta ug sa langit nga atong masupak kun ato gayung sundon ang mga pagtulon-an nga nahasulat dinhi sa balaang kasulatan.

Kinsa Ang Angay Kahadlokan

MATEO 10: 26~31

26 Walay tinabonan nga dili ukban, ug walay tinagoan nga dili mahibaloan. 27 Ang akong gisulti sa ngitngit, isulti sa hayag. Ug ang kamo ray nakadungog, isinggit sa mga atop sa kabalayan.
• 28 Ayawg kahadlok sa mopatay sa lawas ra, apan dili sa kalag. Kahadloki hinuon ang makalaglag sa kalag ug sa lawas sa impyerno. 29 Sa pipila ka salapi, makapalit mog duha ka sayaw. Apan walay usa ini nga mahulog sa yuta kon dili motugot ang inyong Amahan. 30 Ug kamo, ang matag lugas sa buhok sa inyong ulo giihap. 31 Busa, ayawg kahadlok. Labaw mo kaayog kabililhon sa daghang sayaw.

PAGPAAMBIT SA MENSAHE:

Ang maong ebanghelyo maoy pagpasabot lamang nga ang atong pagkinabuhi dinhi sa kalibutan nakalatid na daan, nga sa ato pa ang Diyos nagahatag kanato ug tulo ka matang o aspeto sa kinabuhi samtang ania pa kita sa kalibutan, una ang atong materyal nga lawas ug ang ikaduha ang atong kalag ug ang ikatulo ang atong espiritu.

Diha sa atong pagkinabuhi, nalangkob ang atong espiritu ug kalag diha sa tawhanon natong lawas diin kita mismo sa atong pagkatawo maoy nag-administer diha sa atong pagkinabuhi nga tawhanon pinaagi diha sa kaalam nga gihatag sa Diyos kanato.

Apan sa higayon unya nga mamatay na kita, ang atong materyal nga lawas, mobalik kini sa abog kay sa abog man kini gikan, ang atong espiritu mobalik ngadto sa Diyos kay iya man kini, diin mao kini ang nagahatag kanato ug kinabuhi ug mao kini usab ang nahibalo sa atong mga binuhatan sugod sa pagkahimugso nato sa kalibutan, nan ipahibalo usab kini sa atong espiritu ngadto sa Diyos diin itali kini sa libro sa kinabuhi.

Ang atong kalag, maoy magapabilin ug maoy mahiadto didto sa laing kalibutan ug magkinabuhi nga espirituhanon o magkinabuhi nga minando-an sa espiritu, diin mao kini ang magahulat sa kataposang paghukom didto sa lugar nga giandam sa Diyos kanato. Ang pangutana unsaon man paghiadto sa imong kalag didto sa dapit nga giandam kanimo sa Diyos nga ikaw mismo sa imong pagkakalag dili man nimo kini matultulan.

Walay laing makatabang kanimo igsoon kundili ikaw ra mismo ugang imong mga bahandi nga natigom sa nagkinabuhi ka pa dinhi sa kalibutan. Ang atong panumduman sa buhi pa ipadala sa atong kalag, nan ang atong mga pag-ampo nga atong ginabuhat sa buhi pa kita ato usab kining mahiumduman ug mabuhat kun nagkinabuhi na kita didto sa laing kalibutan, sa ato pa mga igsoon adunay pag-ampo ang mga kalag, apan dugay madungog ang ilang mga pag-ampo, tungod kay dili na man sila kumpleto, wala na kanila ang ilang espiritu nga maoy mensahero gikan sa tawo ngadto sa Diyos ug wala na ang iyang materyal nga lawas nga maoy moabaga sa mga pagpinitensya, ug mga pag-antos.

Kitang mga buhi nga kumpleto sa lawas , espiritu ug kalag, maoy ilang gisaligan sa mga pag-ampo, ug labing importante nga magakahugpong kita diha sa mga pag-ampo diha sa pagpangaliya para kaluy-on ang usa ka kalag, kay matod pa diha sa balaang kasulatan, duha o tulo nag naga-ampo diha sa ngalan sa Diyos nan anaa siya nagauban kanato. Ug matod pa usab nga ang nagakahugpong nga mga pag-ampo ug pangaliya madungog kini hangtod sa gingharian sa langit, mao nga importante nga sa kanunay atong hiusahan sa pag-ampo ang atong igsoon aron dili siya mababagan sa iyang panaw ug aron magiyahan siya diha sa iyang agian hangtod didto sa ganghaan sa gingharian sa Diyos .

Busa igsoon ang ebanghelyo nagaingon nga ayaw kahadloki ang tawo nga mopatay sa imong lawas apan walay mahimo sa imong kalag. Maoy kahadluki ang Diyos nga makapatay sa imong lawas ug kalag didto sa impiyerno. Busa igsoon pamalandungi, nga dili kini ra ang kinabuhi nga atong pagapuy-an ug aduna pay laing kinabuhi huma niini, ug ang kamatayon maoy sinugdanan diha sa pagkinabuhi nga iya sa espiritu, ang pagkinabuhi nga minando-an sa espiritu santo sa Diyos, busa igsoon ayaw usiki ang panahon, ayaw usiki ang pasensya sa Diyos ayaw usiki ang kinabuhi nga gihatag kanato dinhi sa yuta ato kining gamiton diha sa pagkinabuhi nga daw sama sa langyaw niining kalibutana apan ha-om didto sa kabubut-on sa Diyos, atong tun-an ang mga bulohaton didto sa langit ug usa na niana ang pagsimba didto sa gingharian sa Diyos.

Dili Kalinaw Kundili Espada

MATEO 10: 34~39

• 34 Ayawg hunahunaa nga mianhi ko aron pagdalag kalinaw sa kalibotan. Dili kalinaw kondili, espada. 35 Mianhi ko aron ang anak nga lalaki makigba-tok sa amahan ug ang anak nga babaye sa inahan; ang mga binalaye sa ugangang babaye. 36 Ang inyong kaa- way ang sakop ra pod sa panimalay.

37 Ang nahigugma sa amahan ug inahan labaw kay kanako dili angay nako. Ang nahigugma sa anak nga lalaki o babaye labaw kay kanako, dili takos nako. 38 Ang dili mopas-an sa krus ug mosunod nako, dili angay nako. 39 Ang nag-atiman sa iya rang kinabuhi, kawad-an hinuon ini. Apan ang kawad-an sa kinabuhi tungod nako, nakakaplag ini

PAGPAAMBIT SA MENSAHE:

Ang maong ebanghelyo nagpasabot lamang sa usa ka sambingay, nagpasabot kini nga ang pag-anhi ni Jesus sa kalibutan maoy hinungdan sa pagkabahinbahin sa iglisea nga gisangyaw ni Moises niadtong unang panahun, diin si Jesus mismo giakusahan nga impostor diin nagpaka-anak sa Diyos.

Gatusan ka katuigan ang nanglabay, 600 A.D. hingpit nga nasangyaw ang pagtulun-an nga kristuhanon sa upat ka suok sa kalibutan, ug hinay-hinay usab nga misulod pag-abot sa 1500A.D. ang nagkalain-lang pagtulon-an diin silang tanan nagsangyaw sa kaluwasan ug silang tanan naghubad sa balaang kasulatan kabahin sa kinabuhing dayon ug sa kaluwasan diha kang Cristo Jesus.

Miabot na sa 46,000 kapin ka pagtulun-an sa tibuok kalibutan, kini nagatuki dili lamang sa balaang kasulatan kundili hasta na usab diha sa kamatuoran sa Diyos. Daghang tinuoray ang nagkabingkil diha sulod ug gawas sa panimalay, diha sa mga komuniadd ug diha mismo sa usa ka iglisea batok sa usa ka iglisea kay silang tanan gigamhan sa tawhanon kaalam ug garbo diin ang matag-usa maoy gusto ilhon nga kamatuoran, ug maoy gusto ilhon nga matuod ang iglisea ug iglisea nga makaluwas.

Kabubut-on sa Diyos igsoon nga modagsang ang nagkalain-lang pagtulon-an, aron madayag ang kamatuoran nag usa lamang ang Diyos , diin ang matag iglisea nga nagasangpit sa Diyos dili garantiya sa kaluwasan kundili nagaagad kini mismo diha kanimo tawo,kun unsay imong binuhatan dinhi sa ibabaw sa kaibutan.

Ang Diyos miingon mahibaw-an ninyo kun ako kanang pagtulon-an kay kamo nga nagasunod niini, makaambit gayud sa mga kasakitan, Usa ka panag-ingnan ang pagpakatawo ni Jesu Cristo diin wala gayud siya lung-i sa mga paglutos gikan sa iyang pagkabata hangtod sa iyang pagkahingkod diin giula niya ang iyang lawas ug dugo alang sa kaluwassn natong tanan.

Ang balaang kasulatan nagaingon, nga kun nagsunod ka ni Jesu Cristo , ug nasangyaw sa buhat nga kristuhanon nan igsoon makaambit ka gayud sa mga paglutos. Sa ubang sinulat nagpasabot nga kun nahigugma ug nagasunod ka sa Diyos Jesu-Cristo apan nagdumot ka gihapon sa imong isigkatawo, sa imong silingan ug sa imong mga igsoon nan wala ka pa hingpit nga nagpuyo sa kahayag anaa ka pa sa kangitngit.

Ang Pangutana Mahitungod Sa Pagpuasa

MARCOS 2:18~27

18 Usa ana ka adlaw, samtang nagpuasa ang mga tinun-an ni Juan, ang Magbubunyag, ug ang mga Pariseo, gipangutana si Jesus sa pipila ka tawo: “Nganong nagpuasa ang mga tinun-an ni Juan nga Magbubunyag ug ang sa mga Pariseo, apan ang imoha, wala?” 19 Si Jesus mitubag: “Magpuasa ba diay ang mga dinapit sa kasal samtang naa pa ang pamanhonon? Naa pa gani ang pamanhonon dili sila magpuasa. 20 Apan moabot ang panahon nga kuhaon ang pamanhonon. Niana magpuasa na sila.

21 Walay motapak og bag-ong panapton sa karaang sinina. Ang bag-ong tapak mokulo ug magisig samot ang sinina. 22 Wala poy mobutang og bag-ong bino sa karaang sudlanan nga hinimo sa panit. Ang bag-ong bino mopabaliskad sa karaang sudlanan; mausik ang mga sudlanan ug ang bino.

PAGPAAMBIT SA MENSAHE:

Ang maong ebanghelyo maoy pagmatuod lamang nga ang pagpu-asa dili kini sa paglikay lamang diha sa mga materyal nga kalan-on, kay matod pa ni Jesu-Cristo magpu-asa lamang ang iyang mga sumosunod sa higayon nga mobalik na siya ngadto sa gingharian sa langit.

Diha na unya nianang panahuna magapuasa kita sa atong mga kasal-anan, puasa dili lamang sa materyal nga mga kalan-on kundili puasa diha sa paglikay sa pagbuhat ug mga kasal-anan. Himoon nato ang pagkinabuhi nga langyaw niining kalibutana apan ha-om didto iyang gingharian sa langit diin atong likayan ang mga tawhanon nga mga kailibgon ug dili kita maoundang sa pagpu-asa hangtod sa pagbalik sa atong Ginoong Jesu-Cristo.

Diin panag-ngnan ang pagsul-ob sa sinina nga walay tapak nga sa ato pa diha sa atong pagpuasa atong hingpit nga isurender ang atong daang mga hiyas ug maoy atong isul-ob ang hiyas ug kinaiyahan ni Jesu-Cristo, ang kina-iyahan sa Diyos espiritu santo, nga anaa ang pagkamangindawaton, mainantuson ug ana-a sa kanunay sa pag-ampo.

Nagaingon usab diha sa maong sambingay nga dili magabutang ug bag-ong bino sa daang sudlanan aron dili maguba ang daan nga sudlanan, kinahanglan gayud nga bag-ohon nato ang atong panudlanan o ang atong panumduman pinaagi diha sa mga pag-ampo ug ibalaan ang atong huna-huna ug kasing-kasing aron ang mogawas nga mga huna-huna ug mga pulong ug mga binuhatan mamahimong pagtulun-an ug kapanaminan sa uban.

Kinsa Ang Labing Dako?

MATEO 18:1~5

18 • 1 Niadtong panahona ang mga tinun-an miduol ni Jesus ug nangutana: “Kinsay labing dako sa gingharian sa Langit?”
2 Mitawag si Jesus og gamayng bata nga gibutang taliwala sa mga tinun-an 3 ug miingon: “Akong ikapaniguro ninyo nga gawas kon magbag-o mo ug mahisamag kabataan dili mo maka-sulod sa gingharian sa langit. 4 Ang naghimo sa kaugalingon nga sama ining bata maoy labing dako sa gingharian sa Langit. 5 Ang nagdawat anang bataa sa akong ngalan, nagdawat nako.

PAGPAAMBIT SA MENSAHE:

Ang maong ebanghelyo maoy pagpasabot usab diha sa ubang pulong sa balaang kasulatan nga nagaingon Ang labing dako didto sa gingharian sa langit kinahanglan nga mamahimong pinaka-ubos dinhi sa ibabaw sa kalibutan diin magasilbi siya sa daghang mga katawhan.

Dinhi sa maong ebanghelyo gipasabot ni Jesus nga kun mamahimo nato ang atong kabuot sama sa usa ka bata nan masayon kanato ang pagsulod sa ginghari-an sa langit. Kay mataod pa ang gingharian sa langit iya sa mga bata, kay ang mga anghel nga maoy guardia sa mga bata sa tanang adlaw atua gayud nagalingkod sa tiilan sa Diyos Amahan ug sa kanunay nakadawat sa grasya ug panalangin.

Sa ato pa mga igsoon kung gusto nato nga mamahimong labing dako didto sa langit nan, mgapakaubos ka dinhi sa ibabaw sa kalibutan ug magasilbi sa daghang katawhan pinaagi diha sa mga pag-ampo ug mga paghalad. Diin atong isul-ob ang kinaiyahan ni Jesu-Cristo ang kinaiya sa espiritu santo, diin anaa ang pagpaubos, pagkamangindawaton ug labaw sa tanan ang kanunay nga mga pag-ampo.

Kay ang mapahitas-on dinhi sa yuta mamahimong labing ubos ug dili ilhon sa Diyos didto sa iyang gingharian sa langit. 1 Corinto 28~30 nagaingon: Gipili niya ang mga sinalikway ug mga tinamay ug gipakawalay bili sa mga tawo aron pagpaila nga walay bili ang giisip nga hinungdanon sa mga tawo, aron wala gayuy magpasigarbo sa atubangan sa Diyos. Busa ang buot magpasigarbo kinahanglan nga magpasigarbo sa mga milagro nga gipasinati kanato sa Diyos diha sa tagsa-tagsa nato ka kinabuhi.