Ang Tabang Alang Sa Isigka-Cristuhanon

1 CORINTO 16:1~4

16 • 1 Bahin sa kolekta alang sa mga santos, sunda ang mga lagda nga gihatag ko sa mga simbahan sa Galacia. 2 Matag Dominggo, ang matag usa maggahin sa iyang mahimo. Sa ingon, inig-anha nako, dili na kinahanglang mangolekta. 3 Kon naa na ko uban ninyo, pagpilig mga tawo nga pinaagi sa mga sulat-pagpaila, hatagag gahom sa pagdala sa inyong mga gasa sa Jerusalem. 4 Kon mas maayo nga moadto ko, mouban sila.

PAGPAAMBIT SA MENSAHE:

Ang maomg ebanghelyo maoy pagpasabot lamang diha sa pagtinabangay sa matag-usa nga maoy giya nga gihatag sa Diyos Amahan pinaagi sa iyang bugtong anak. Kini nagalangkob diha sa nahaunang kasugo-an sa Diyos diha sa unang kasulatan sa pagahin gayud ug kapulo nga bahin sa imong abot aron adunay itabang sa iglisea o simbahan nga imong gibarugan.

Sa unang kasulatan, nahiapil kini diha sa mga libro ni Moises nga gitawag nga Book of Torah or ang nabantog nga Mosaic Law o ang mga balaod ni Moises. Nagalangkob kini sa lima ka libro, Genesis, Exodus, Leviticos, Numbers ug Deutronomy, diin sa wala pa ang gitawag nga biblia mao kini ang nabantog nga mga libro diha sa pagtulun-an nga Judaism ang pagtulun-an nga nagasimba sa Diyos Amahan.

Diha sa maong Mosaic law nahitala ang unang mga balaod sa Diyos nag gisangyaw ni Moises, diin ang sugo sa ikapulo, mabasa diha niining mga libroha ug diha sa mga pagtulun-an sa mga propeta. Ang propeta nga si Malaquias maoy nagahatag ug detalyado nga mag pahayag diha sa maong kasugo-an sa ikapulo, ug si Malaquias maoy kataposan propeta diha sa kasaysayan sa unang kasulatan ayha nagpakatawo si Jesu Cristo. 100 ka tuig ang distansya gikan kang propeta Malaquias ug diha sa pagpakatawo ni Jesu Cristo.

Malaquias 3:8 Nagaingon: Dad-a ang insaktong ikapulo ngadto sa templo aron adunay pag-kaon didto, Sulayi ako ninyo ug ablihan ko ang mga bintana sa langit ug ipadagayday ko nga madagayaon ang grasya ug panalangin. Mga igsoon kining maong mga pagkaon nga gihisgutan mao kini ang abot sa ikapulo nga bahin nga ilang ibutang sa tigumanan didto sa templo diin adunay bodega nga gipahigayon didto.

Apan diha niining bag-ong kasulatan nagaingon ang balaang kasulatan , Juan 1: 17 Ang balaod miabot dinhi sa kalibutan pinaagi kang Moises apan ang grasya ug kamatuoran miabot pinaagi kang Jesu Cristo. Galacia 2: 16 nagaingon usab, Apan nasayod kita nga ang tawo isipon sa Diyos nga matarong pinaagi lamang sa iyang pagtuo kang Jesu Cristo ug dili sa pagtuman sa balaod, kay walay tawo nga isipon sa Diyos nga matarong pinaagi sa pagtuman sa balaod. 21 kay kon ang tawo isipon sa Diyos nga matarong pinaagi sa balaod nan nagkahulugan kini nga nakawang lamang ang kamatayon ni Jesu Cristo.

Roma 3:28 Kay Giingon ko na ang tawo himoong matarong sa Diyos pinaagi lamang sa pagtuo ug dili sa pagtuman sa balaod 31 Nagapasabot ba kini nga gisalikway nato ang balaod pnaagi sa atong pagtuo? Wala , Hinunua gipalig-on nato kini.

Ug unsa man ang pulong ni Jesu Cristo sa dihang nagasugod na siya sa pagsangyaw diha sa kasugo-an sa iyang Amahan: Mateo 5: 17 nagaingon si Jesu Cristo: Wala ako moanhi aron sa pagsalikway sa mga balaod nga gisangyaw ni Moises ni sa pagsalikway sa mga pagtulon-an nga gitudlo sa mga propeta kun dili ang akong pag-anhi maoy pagpasabot sa insaktong kahulogan niini, Kay samtang may langit pa ug yuta walay gamay nga badlis ni gamay nga parte sa balaod nga saylo-an hangtod dili matuman ang tanan. Kay si kinsa kadtong nagasupak sa gamay nga bahin sa balaod ug nagatudlo sa uban sa pagsupak niini nan mamahimong labing iwit didto sa gingharian sa langit apan kun si kinsa man usab ang nagatuman sa maong balaod ug nagatudlo sa uban sa pagbuhat sa ingon nan mamahimong labing dako didto sa gingharian sa Diyos. Kay sultihan ko kamo dili gayud kamo makasulod diha sa gingharian sa langit kun ang inyong pagtuman sa kabubut-on sa Diyos sama lamang nianang gibuhat sa mga magtutudlo sa balaod ug sa mga pariseo.

Mateo 23:23 Pagkaalaot ninyo, mga magtutudlo sa Balaod ug Pariseo, tigpakaaron-ingnon! Wala mo malimot sa mga lamas sama sa herbabwena, sa anis ug sa kaningag dihang nagbayad mo sa ika-10 nga bahin. Apan wala ninyo tumana ang labing importanti sa Balaod sama sa hustisya, kaluoy, ug pagtoo. Kinahanglan ning buhaton, sa walay pagsalikway sa uban. 24 Mga giya nga buta! Salaon ninyo ang lamok, apan lamyon ang kamelyo.

Lucas 11: 42 42 Mga Pariseo, alaot mo! Nanghatag mo alang sa Templo sa ika-10 nga bahin sa tanang butang lakip sa salapi, sa mga lamas ug sa ubang hilba, apan gisalikway ninyo ang hustisya ug gugma sa Diyos. Gikinahanglan ning bansayon sa walay pagsalikway sa uban. 43 Mga Pariseo, tinunglo mo! Gihigugma ninyo ang labing maayong lingkoranan sa mga sinagoga. Ganahan mong yukboan sa katawhan sa tyanggihan. 44 Tinunglo mo! Sama ra mo sa lubnganan sa mga patay nga dili mamatikdan. Naghugawhugaw ang mga tawo sa kaugalingon sa pagtunobtunob ini.”

Lucas 18:12~13 12 Nagpuasa ko’g makaduha sa usa ka semana og naghatag sa ika-10 nga bahin sa akong kabtangan.’ 13 Diha sa likod ang kobrador sa buhis nga wala gani mohangad sa langit. Mipukpok siya sa dughan ug miingon: ‘O Diyos, maluoy ka, kay makasasala ko. 14 Ingnon tamo nga ang kobrador sa buhis miuli nga puno sa grasya sa Diyos, apan dili ang Pariseo. Kay ipaubos ang tanang magpahitaas ug ibayaw ang magpaubos.”

Sa ato pa mga igsoon ang pagpanagalagad sa Diyos mahingpit lamang kun aduna kitay pagpakabana diha sa atong isigkakristuhanon ug aduna kitay pag-alagad sa Diyos sa tibuok natong kasingkasing ug huna-huna. Ug labaw sa tanan sa pagtuman usab nato sa atong katungdanan diha sa gobyerno nga atong gibarugan. Lucas 20: 24~25 nagaingon: : 24 “Pakit-a kog usa ka denaryo. Kinsay nahulagway dinhi, ug kinsa siya?” Mitubag sila: “Si Cesar.” 25 Busa, miingon siya: “Ihatag kang Cesar ang iya ni Cesar, ug sa Diyos ang sa Diyos.”

Apan mga igsoon ang Diyos wala magkwenta sa kadako ug kagamay sa imong nahatag, ang labing importante ang imong paghatag nga nahiuban ang imong tibuok kasingkasing ug huna-huna. Lucas 21:1~4 (Ang Halad Sa Byuda) 21 1 Mianinaw si Jesus ug nakita niya ang mga dato nga nanghulog og mga halad sa panudlanan. 2 Nakita sab niya ang kabos nga byuda nga nagbutang og duha ka dako. 3 Busa, miingon siya: “Sa pagkatinuod ingnon tamo, nakahalad kining kabos nga byuda og labaw kay kanilang tanan. 4 Kini sila nanghalad sa Diyos gikan sa kabuhong, samtang ang kabos nga byuda naghalad gikan sa kawad-on, sa kinatibuk-an sa iyang panginabuhi.”

Usa lamang ang labing importante, nga naningkamot ka sa paghatag ug pagtuman sa tanang kasugo-an sa Diyos, maunsa man ka gamay ug kadako gumikan sa imong dakong gugma ug pagtuo sa Diyos 2 Corinto 9: 6~7 Nagaingon Ang nagpugas ug Dyutay moani ug Dyutay, apan ang nagpugas ug daghan moani usab ug daghan, busa kinahanglan nga maghatag ang tagsa-tagsa sumala sa iyang gusto sa walay pagbagutbot ni sa paghuna-huna nga gipugos siya kay ang Diyos malipay sa maghatag nga malipayon. 8 ug makahatag ang Diyos kaninyo sa tanan ninyong kinahanglanon ug tungod niini makabaton kamo sa tanan ninyong kinahanglanon ug sobra pa gani sa tanan ninyong maayong buhat.

Lucas 6:38 38 nagaingon usab Panghatag ug hatagan pod mo; makadawat mo sa igong takos, dakson pa, paawason gani, nga ibubo nila sa inyong sabakan. Kay ang taksanan sa inyong paghatag mao poy taksan sa inyong madawat.” Busa igsoon pagpangalagad sebo sa kabubut-on sa Diyos, ayaw tan-awa ang imong isigkatawo, dagan paingon sa dag-anan ug siguroha ang imong kaluwasan.