Ang Buhat Sa Espiritu Santo

JUAN 16:5~14

5 Apan karon taliadto na ko sa Nagpadala nako ug walay usa ninyo nga nangutana asa ko paingon, 6 kay naguol kaayo mo sa akong gisulti.
7 Toohi ko. Tinuod ang akong gisulti: mas maayo alang ninyo nga mobiya ko. Kay samtang nia ko, dili moanhi ang inyong Maglilipay. Mobiya ko aron ikapadala ko siya.
8 Inig-abot, ipadayag niya ang bakak sa kalibotan. Ipakita niya sa dayag ang sala ini, ang dalan sa katarong ug giunsa pag-abot sa hukom.
9 Ang sala? Wala sila motoo nako. 10 Ang katarongan? Moadto ko sa akong Amahan, ug dili na mo makakita nako. 11 Ang hukom? Gihukman na ang prinsipe ining kalibotana; gisilotan na.
12 Daghan pa kog igsusulti, apan dili pa mo makadawat sa tanan. 13 Inig-abot sa Espiritu sa kamatuoran, agakon mo niya sa tibuok kamatuoran.
Dili siya mosulti sa iyang kaugalingon kondili, sa iyang nadungog, ug ipahayag niya ang umaabot. 14 Himayaon ko niya, kay nakadawat siya sa akoa nga iyang pong ipakita ninyo. Sa maong paagi maghimaya siya nako.

PAGPAAMBIT SA MENSAHE:

Ang maong ebanghelyo maoy pagpasabot lamang diha sa tinago nga kamatuoran nga hinay-hinay na nga gipadayag niining panahona. Juan 14:15 nagaingon Tumana ninyo ang akong mga sugo ug mangayo ako sa Amahan ug taga-an kamo niya ug laing manlalaban, Ang espiritu santo sa kamatuoran nga magauban kaninyo hangtod sa kahangturan. Ang kalibutan dili makadawat kaniya kay dili man sila makakita ni makaila kaniya apan makaila kamo kaniya kay nagapuyo ug nagauban man siya diha kaninyo.

1 Corinto 3:16 nagaingon Ang lawas sa tawo maoy templo sa Diyos ug ang molaglag sa templo sa Diyos nga mao kita nan pagalaglagon usab sa Diyos. Anaa sa matag tawo ang Diyos espirito santo, nga sa ato pa ang nagapuyo diha sa imong isigkatawo ug bisan diha kanimo ang Diyos espiritu. Nan kini ang kataposang manlalaban nga gipapuyo sa Diyos diha sa matag-usa kanato, apan dili modugay ang Espiritu sa Diyos diha kaninyo kun wala ang mga pag-ampo ug pagbalaan. Dili modugay ang espiritu santo sa Diyos diha kaninyo kun wala ninyo isul-ob ang hiyas mismo sa espiritu santo ag hiyas ni Jesu Cristo.

Kun ang espirito santo sa Diyos anaa sa imong tuo nan ang dautan nga espiritu anaa usab sa imong wala, nagahulat lamang sa iyang panahun, busa kinahanglan gayud sa matag tawo ang sa kanunay maga-ampo ug magahalad ngadto sa Diyos, diin niining kamatuoran nga atong gibarugan giaghat ang tanan sa pagsantos rosaryo matag-adlaw ug gabii, din ang santos rosaryo sa adlaw alang kana panalipod sa imong trabaho sa tibook adlaw, ug ang santos rosaryo sa gabii mao kana ang panalipod sa imong kalag ug espiritu.

Ang tahas gayud sa tawo sa iyang pagpakabuhi dinhi sa kalibutan mao gayud ang pagahin ug mga pag-ampo ug pagahin ug panahun ngadto sa Diyos. Kay bisan unsaon pa sa tawo nan mobalik gayud siya sa abog ug ang iyang kalag maoy magahulat sa pagbalik sa Diyos Jesu Cristo, diin mao kini ang atong kanunay nga pangandaman ang mga pagsimba didto sa gingharian sa langit, kay dili kini ang kalibutan nga atong pagapuy-an hangtod sa kahangturan kay aduna pay kinabuhi human niini ug mao kadto ang importante ang pagkinabuhi nga minando-an sa espiritu.