Ang Tinuod Nga Kabulahanan

LUCAS 11: 27~28

27 Human makasulti si Jesus niini may usa ka babaye nga mituwaw taliwala sa mga pundok sa mga tawo ug miingon kaniya,” Bulahan ang babaye nga maoy nagsabak ug nagpasuso kanimo!”
28 Apan si Jesus mitubag bulahan hinuon sila nga namati sa pulong sa Diyos ug nagtuman niini.”

PAGPAAMBIT SA MENSAHE:

Ang maong ebanghelyo maoy pagpasabot lamang nga labing bulahan ang tawo nga nakabati sa pulong sa Diyos ug naningkamot sa pagtuman niini. Diha sa ubang pulong sa balaang kasulatan nagaingon, ang (Juan 1:14) Ang pulong nahimong tawo ug mipuyo uban kanato. Pinaagi kang Jesus Cristo natuman ang maong pulong diha sa bag-ong kasabotan kay siya man ang nagpakatawo ug mipuyo uban kanato arong pagpasabot sa mga kasugo-an sa Amahan.

Wala moanhi si Jesu-Cristo tungod lamang sa iyang kaugalingon nga kabubut-on kundili tungod sa tahas nga gisangon sa Amahan kaniya, ang pagluwas kanatong tanan pinaagi sa iyang kamatayon sa krus ug labaw sa tanan aron sa pagpasabot sa kasugo-an nga gihatag sa Diyos ngadto kang Moises ang kasugo-an sa paghigugma sa Diyos ug sa paghigugma sa isigkatawo sama sa paghigugma nato sa atong kaugalingon.

Mateo 5:17 nagaingon wala ako maonhi aron sa pagsalikway sa mga balaod ni Moises ug sa mga pagtulon-an sa mag propeta kundili aron sa pagpasabot sa ensaktong kahulugan niini. Kay samtang may langit pa ug yuta wala gayuy gamay nga parte ni kudlit sa balaod nga saylo-an hangtod dili matuman ang tanan. Kay si kinsa kadtong nagasupak sa gamay nga parte sa balaod ug nagatudlo sa uban sa pagbuhat niini nan mamahimong iwit didto sa gingharian sa langit apan si kinsa man ang nagatuman sa balaod sa Diyos ug nagatudlo sa uban sa pagbuhat niini nan mamahimong labing dako didto sa gingharian sa langit. Busa sultihan ko kamo dili gayud kamo makasulod sa gingharian sa Diyos kun ang inyong pagtuman sa iyang kasugoan sama lamang nianang gibuhat sa mga pariseo ug mga magtutudlo sa balaod.

Nagpasabot lamang kini mga igsoon nga ang atong pagtuo ngadto sa Diyos nga dili makita ug mahikap pagaubanan gayud kini sa buhat. Kay ang pulong sa Diyos nagaingon (Santiago 2: 24) Mas gikahimut-an sa Diyos ang mga tawo nga adunay maayong buhat kay sa mga tawo nga adunay pagtuo lamang. Busa mga igsoon kun nakabati ka sa pulong sa Diyos niining adlawa nan ayaw na patig-aha ang imong kasing-kasing paningkamot nga makaambit ka sa grasya ug bendisyon pinaagi sa pagsunod sa iyang kasugo-an.