Ang Espiritu Santo Ug Ang Tawhanong Kinaiya

GALACIA 5: 16~26

16 Busa, sultihan tamo: panglakaw sumala sa Espiritu ug ayawg pahinonti ang mga lawasnong tinguha nga 17 makig-away sa Espiritu. Ang mga tinguhang Espirituhanon supak sa mga pangandoy sa unod. Ang duha nagkasumpaki. Busa, dili mo makabuhat sa buot buhaton. 18 Apan padumalaha ang Espiritu. Ayawg pasakop sa Balaod.
19 Dali ra ninyong mailhan ang binuhatan nga lawasnon: ang kadaotan, kalaw-ay ug kawalay-ulaw; 20 ang pagsimba sa mga diosdios ug ang salamangka, pagdumot, kasina ug panamastamas, kasuko, sobrang patanto, pagkabahinbahin; 21 ug ang pangigi, paghuboghubog ug mga ingon ini. Usbon ko pagsulti ang giingon ko na: ang magbuhat ini dili makapanunod sa gingharian sa Diyos.
22 Apan ang bunga sa Espiritu mao ang gugma, kalipay, kalinaw, pailob, pagsinabtanay, kaluoy ug kamakanunayon, 23 ang kalumo ug pagpugong sa kaugalingon. Alang ini walay Balaod o silot. 24 Alang sa mga sakop ni Cristo, gilansang na nila sa Krus ang unod uban ang mga bisyo ug tinguha ini. 25 Kon nagpuyo ta sa Espiritu, magpaagak ta sa Espiritu. 26 Dili ta magmaakuakohon. Ug wala untay palabwanay o kasina sa usag usa.

PAGPAAMBIT SA MENSAHE

Ang maong ebanghelyo maoy pagpasabot lamang nga ang atong pagpangalagad sa Diyos dinhi sa ibabaw sa kalibutan nakalatid na daan. Ang balaang kasulatan nagaingon, didto ka pa sa tago-angkan sa imong inahan tinawag ka nang daan. Sa ato pa mga igsoon ang pagkatinawag ug pagkapinili dili imong kabubut-on. Ang pulong sa Diyos nagaingon dili tanan nga katawhan sa kalibutan tinawag ug pinili nan kadtong wala tawga ug pili-a nan dinhi lang sila sa kalibutan.

Apan kadtong iyang mag tinawag nan pagapili-an pa kay samang panag-ingnan ang bulawan nga sulayan una sa kalayo kun kini puro ba nan ang tawo pa kaha nga dako pa ug bili kay sa bulawan nan pagasulayan gayud kini sa Diyos. Nan diha sa imong pagtuman unsaon man nato pagkahibalo nga atong nalatas ang pagsulay? Atong mahibaloan kun atong hingpit nga nadawat si Jesu Cristo diha sa atong kasing-kasing, kay ang atong mga kasakitan nga nasinati ang mga paglutos ug mga pagtamay nga atong naambitan wala kana magpasabot nga kita nagpakamartir kun kining tanan atong nadawat sa tibuok natong kinabuhi, kini nagpasabot lamang nga atong gipapuyo ug gipahari si Jesu Cristo dih sa atong kasingkasing.

Busa igsoon niining panahon karon diin halos tanan suok sa kalibutan anaa ang katalagman nan mao na kini ang senyales nga hapit na mobalik ang Diyos apan dili pa matapos ang kalibutan ania pa kita sa gitawag nga Armagedon diin nagpakita na ang mga dagkong katalagman nga nahitala diha sa mga panagna ni Juan sa Pinadayag. Busa igsoon gahini gayud ug pag-ampo ang imong kalag ug espiritu kay wala kita masayod kun kanus-a ang atong kataposan, mahabilin man ugaling atong materyal nga lawas apan ang atong kalag makaambit sa kaluwasn pinaagi kng Cristo Jesus.