Si Jesus Ang Kahayag Sa Kalibutan

JUAN 8: 1~11

• 12 Miingon si Jesus, “Kahayag ko sa kalibotan. Maiya sa mosunod nako ang kahayag ug kinabuhi. Dili na sila maglakat sa kangitngit hinuon, makapanag-iya sa kahayag ug kinabuhi.”
13 Mitubag ang mga Pariseo, “Karon, nagsulti ka sa imong kaugalingon. Ang imong pagsaksi walay kapuslanan.
14 Mitubag si Jesus, “Bisan pag misaksi ko sa akong kaugalingon, tinuod ang akong gisulti, kay nasayod ko diin ko gikan ug asa ko padulong. Apan wala mo masayod diin ko gikan ug asa paingon.
15 Naghukom mo sa tawhanong paagi, apan dili ko mohukom ni bisag kinsa. 16 Kon maghukom ko, matinud-anon ang akong hukom, kay wala ko mag-inusara kondili, nag-uban nako ang akong Amahan nga nagpadala nako. 17 Nasulat sa inyong balaod nga tinuod ang gisulti kon may duha ka saksi. 18 Nagsaksi ko sa akong kaugalingon ug nagsaksi sab nako ang Amahan nga nagpadala nako.”
19 Nangutana sila, Hain ang imong Amahan?” Mitubag si Jesus, “Wala mo makaila nako ni sa akong Amahan. Kon nakaila pa mo nako, nakaila sab mo sa akong Amahan.”
20 Gisulti ni Jesus kining tanan samtang nagtudlo siya sa dapit sa templo diin gidawat ang mga halad. Apan walay midakop niya, kay wala pa moabot ang iyang panahon.

PAGPAAMBIT SA MENSAHE:

Ang maong ebanghelyo maoy pagpasabot diha sa tahas ug pagtulun-an nga gisangyaw ni Jesus diha sa iyang pagpakabuhi dinhi sa ibabaw sa kalibutan. Ang pagtulun-an nga gisangyaw ni Jesus maoy tahas nga iyang gisunod diha sa atong Amahan sa langit. Diin si Jesus nagpakatawo dili lang pagluwas kanato sa atong mga sala kundili aron usab siya maoy magagiya diha sa atong pagpakabuhi dinhi sa ibabaw sa kalibutan. Talagsaon ang maong tahas nga gipasinati ni Jesu Crsito, diha sa iyang mga sumosunod.

Nagpakatawo siya ingon nga ubos ug yano nga tawo ug nagsugod sa pagsangyaw sa edad nga 30 ug mipaila nga anak sa Diyos ug mao ang mesiyas nga gipaabot sa mga propeta. Siya ang gitawag diha sa ubang pinulongan nga “ Gloria in Excelsius Deo, nga sa ato pa diha sa iyang pag-abot siya ang gitahasan sa Diyos Amahan nga nagdala sa kalinaw sa kalibutan ug kaayuhan sa tanang nilalang.

Sa iyang pagbalik didto sa gingharian sa Amahan Dios miingon siya diha sa mga mabuot niyang mga sumosunod sumala sa Juan 14: 15 , miingon siya tumana ninyo ang akong mga sugo ug mangayo ako sa Amahan ug tagaan kamo niya ug laing manlalaban, ang espiritu sa kamatuoran nga magauban kaninyo hangtod sa kahangturan. Ang kalibutan dili makadawat kaniya kay dili man sila makakita ni makaila kaniya apan makaila kamo kaniya kay nagauban ug mipuyo siya uban kaninyo.

1 Corinto 3: 16 nagaingon usab nga nasayod ba kamo nga ang lawas sa tawo maoy templo sa Diyos espiritu santo ug ang mopasipala sa templo sa Diyos nga mao kita nan iya usab nga pagalaglagon. Sa ato pa mga igsoon ang kahayag nga gidala ni Jesu Cristo dinhi sa ibabaw sa kalibutan dili ordinaryo nga kahayag kay anaa kini niya gipapuyo diha sa atong tagsa-tagsa ka kasing-kasing, sa ato pa mga igsoon dili na kinahanglan nga pangitaon mo ang Diyos, dili na kinahanglan nga mangita ka ug kahayag kay ikaw mismo, kita mismo instrumento sa kahayag nga gisangyaw ni Jesu Cristo gikan pa sa iyang paghiabot hangtod na niining panahuna.

Kun mangutana kita nga kun kita mismo maoy kahayag nganong daghan man ang criminal, nganong daghan man ang wala makaila sa Diyos ug nganong daghan man ang wala makaila sa ilang giampo-an. Ang kamatuoran mao nga giaghat usab sa Diyos ang dautan sa pagsamok dinhi sa kalibutan apan siya nagauban ug nagagiya sa matag katawahan nga anaa niing kalibutan, ug ang balaan pulong sa Diyos nagaingon nga kun sila anaa sa imong to-o nan ang dautan anaa sa imong wala, sa ato pa mga igsoon ang tanan nga ania niining kalibutan kabubut-on sa Diyos aron sa pag-ayag ug pagsukod usab sa iyang mga katawhan.