Si Jesus Mao Ang Pagkabanhaw Ug Ang Kinabuhi

JUAN 11 : 17~27

17 Sa pag-abot ni Jesus, nasayran niya nga upat na ka adlaw sukad paglubong ni Lazaro. 18 Kay duol ra man ang Betania sa Jerusalem, mga tulo ka kilometro, 19 may daghang Judio nga miduaw ni Marta ug Maria aron paghupay sa ilang kaguol gumikan sa kamatayon sa igsoon. 20 Sa pagkadungog ni Marta nga taliabot si Jesus, misugat siya. Si Maria nagpabilin sa balay. 21 Miingon si Marta kang Jesus: “Ginoo, kon dinhi ka pa, dili unta mamatay ang akong igsoon.

22 Hinuon, nasayod ko nga bisag unsay pangayoon nimo sa Diyos, ihatag ni. 23 Miingon si Jesus: “Mabanhaw ang imong igsoon.” 24 Mitubag si Marta: “Sayod ko nga mabanhaw siya sa pagkabanhaw sa mga patay sa kataposang adlaw.” 25 Apan miingon si Jesus: “Ako ang pagkabanhaw. Ang motoo nako, bisag patay siya, mabuhi. 26 Ang nabuhi tungod sa pagtoo nako, dili na mamatay. Motoo ka ba.” 27 Mitubag si Marta “Oo, Ginoo. Mitoo ko nga ikaw ang Cristo, ang Anak sa Diyos nga mianhi sa kalibotan.”

PAGPAAMBIT SA MENSAHE:

Ang among ebanghelyo maoy pagpasabot sa Diyos diha sa balaang kasulatan nga nagaingon nga Si Jesu-Cristo mao ang mesiyas nga sa dugayng panahun gipaabot sa mga propeta ug sa mga maalamon, diin ginaingon nga moabot ang mesiyas nga hari sa mga hari nga maoy magaluwas sa tibuok kalibutan.

Diha niining ebanghelyo nagpasabot ang Diyos nga siya ang pagkabanhaw ug ang kinabuhi, pagkabanhaw tungod kay siya man ang mesiyas nga gipakanaog sa Diyos diin maoy nagpakatawo ug mitipon diha sa iyang mga katawhan diin ginaingon ng daan nga ang anak sa tawo pagadagmalan ug ilansang sa krus aron mamatay, ug mabanhaw ang iyang tawhanong lawas ug ibayaw ngadto sa kalangitan.

Philipos 2 : 8~ 11 nagaingon nga diha na kaniya ang kinaiyahan sa usa ka Dios apan wala niya ipamugos ang iyang pagka Diyos pinaagi sa kusog hinunua gihubo niya ang tanan ug nagpakaubos ug mitipon sa mga katawhan nga kabos ug dinaugdaug. Hari siya sa mga hari apan siya mao ang nangunay sa pagsangyaw sa pagtulun-an sa iyang Amahan pinaagi sa pagpanudlo sa maayong buhat pinasikad sa giya sa espiritu santo ug ang pagsangyaw sa maaayong balita uban sa pagpakita sa mga milagro.

Mao kana ang iyang gipakita ngadto sa mga Judio niadtong panahuna, patay na ang iyang amigo nga si Lazaro diin matod pa upat na kaadlaw ang iyang kamatayon apan iyang gibanhaw pinaagi usab sa kabubut-on sa iyang Amahang Diyos aron iyang ipakita nga Siya gayud ang anak sa Diyos nga maoy gitahasan sa Amahan sa pagsangyaw pinaagi diha sa mga milagro ug mga maayong pagtulun-an.

Naagpakita lamang kini nga Diyos sa kamatuoran ug walay kataposan nga pagkaDiyos ang atong gialagaran, kay ang nagatuo nga si Jesu Cristo anak sa Diyos nan makangkon sa kinabuhi nga walay kamatayon tungod kay si Jesu Cristo matuod nga anak sa Diyos ug Diyos sa mga buhi, tungod kay pinaagi kaniya ug diha kaniya gisalig sa Amahan ang iyang gahum ug kaalam, walay mahiabot didto sa gingharian sa Amahang Diyos kundili mo-agi sa atubangan ni Jesu Cristo, tungod kay siya ang sinugdanan ug ang kataposan ang Alpha ug ang Omega.