MARCOS 6: 30 ~43
30 Namalik ang apostoles ug nangasoy kang Jesus sa tanan nga ilang nahimo ug natudlo. 31 Miingon si Jesus: “Pangadto mo sa dapit nga awaaw aron pagpahulay.” Dinhay daghang tawo nga nangabot ug nanglakaw. Wala nay panahon ang mga apostol bisan gani sa pagpangaon. 32 Busa, nanakay sila sa sakayan paingon sa awaawng dapit.
33 Apan nakit-an sila sa katawhan ug may daghan nga nakatag-ag asa sila padulong. Busa, gikan sa tanang lungsod nanglakaw ang mga tawo paingon sa adtoan sa mga apostol. Nag-una pa silag abot. 34 Sa pagkawas ni Jesus, nakita niya ang dakong pundok sa katawhan. Naluoy siya, kay sama sila sa toril nga way magbalantay. Unya, misugod siyag tudlo og daghang butang.
• 35 Sa hapon na kaayo nanuol ni Jesus ang iyang mga tinun-an ug miingon: “Awaaw ning dapita ug hapon na kaayo. 36 Palakta ang katawhan ug paadtoa sa mga uma ug sa silingang kabalangayan aron pagpalit og pagkaon.”
37 Mitubag si Jesus: “Pakan-a sila. Kamoy pakaon nila.” Mitubag ang mga tinun-an: “Manglakaw ba mi aron pagpalit og pan nga balig 200 ka salapi alang nila?” 38 Apan si Jesus miingon: “May pan ba mo? Pila kabuok? Adtoa ug susiha.” Nasayran ni sa mga tinun-an ug miingon: “May lima ka pan ug duha ka isda.”
39 Gisugo sila ni Jesus pagpalingkod sa katawhan sa lunhawng balili. 40 Gipapundokpundok ni sa tagmanggatos ug tagsingkwenta. 41 Unya, gikuha ni Jesus ang lima ka pan ug duha ka isda. Mihangad siya sa langit ug nanalangin. Gipikaspikas niya ang pan ug gihatag sa iyang mga tinun-an aron ibahinbahin sa katawhan. Iya sab nga gipapud-apod ang mga isda.
42 Nangaon ang tanan ug nabusog. 43 Unya, ang mga tinun-an nakahipos og 12 ka baskit nga puno sa mga piraso sa pan ug isda. 44 5,000 ka lalaki ang nangaon.
PAGPAAMBIT SA MENSAHE:
Ang maong ebanghelyo maoy pagpasabot lamang diha sa mga milagro sa Diyos diin iyang gipakita ang pagpakaon sa bagang duot sa mga katawhan pinaagi lamang diha sa lima ka pan ug duha ka isda. Usa ka panag-ingnan diin diha sa maong milagro gipakita ni Jesus pinaagi diha mismo sa pan ug isda diin wala gayud kini mahurot hinunu-a nasubrahan pa kini ug pila ka bukag.
Wala buhata sa Diyos ang milagro pinaagi diha sa hangin kundili pinaagi diha sa pan ug isda, nga sa ato pa ang grasya nga ihatag sa Diyos kanato nagsumikad diha sa material nga butang apan ang panalangin magsumikad diha sa atong dakong pagtuo kaniya.
Kay ang milagro sa Diyos makita lamang nato ug ipakita lamang sa Diyos kun kita mismo nga nangayo sa milagro adunay dakong pagtuo sa Diyos kay epektabo lamang ang milagro diha sa tagsa-tagsa nato ka kinabuhi kun kita mismo nagatoo sa Diyos ug motuo sa maong milagro.
Ang dakong milagro nga atong nasinati mao man ang atong pagkinabuhi dinhi sa kalibutan diin nagpabilin kitang nagbarog nga dakong buhi, diin nahiusa pa ang atong lawas , kalag ug espiritu. Kay matod pa sa Diyos kun gitan-aw pa niya ang atong binuhatan nan wala na unta kita niining panahuna apan nakita usab sa Diyos ang atong dakong pagtuo ngadto kaniya ug mao kina dakong grasya nga atong lantawon sa matag-adlaw ang nagpabiling buhi hangtod niining panahuna.
No comments:
Post a Comment