Ang Dakong Panon Sa Katawhan

GIPADAYAG 7: 9~17

9Tapus niini mitan-aw ako, ug ania karon, dihay usa ka dakung panon sa katawhan nga walay bisan kinsa nga makaihap, gikan sa tanang kanasuran, gikan sa tanang kabanayan ug katawhan ug pinulongan, nga sa atubangan sa trono ug sa atubangan sa Cordero nanagtindog sila nga nanagsul-ob ug maputi ug tag-as nga mga bisti, ug nanagdalag mga palwa sa palmera diha sa ilang mga kamot,

10ug nanagsinggit sa makusog nga tingog nga nag-ingon, "Ang kaluwasan gikan sa atong Dios nga nagalingkod sa trono, ug gikan sa Cordero!" 11Ug ang tanang mga manolunda nanagtindog nga nanag-alirong sa trono ug sa mga anciano ug sa upat ka mga buhing binuhat, ug unya mihapa sila sa atubangan sa trono ug ang Dios ilang gisimba 12nga nanag-ingon, "Amen! Ang pagdalayeg, ug ang himaya, ug ang kaalam, ug ang pagpasalamat, ug ang kadungganan, ug ang pagbulot-an ug ang kagahum ipahinungod ngadto sa among Dios hangtud sa kahangturan! Amen."

13 Unya gisultihan ako sa usa sa mga anciano nga nag-ingon, "Kinsa man kini sila nga nanagsul-ob ug mga bisting maputi ug tag-as, ug diin man sila gikan?" 14Ug ako mitubag kaniya, "Senyor, nasayud ikaw." Ug siya miingon kanako, "Mao kini sila ang nanagpakalabang sa dagkung kasakitan; ang ilang mga tag-as nga bisti gilabhan nila ug gipaputi diha sa dugo sa Cordero. 15Tungod niini anaa sila sa atubangan sa trono sa Dios, ug nagaalagad kaniya sa maadlaw ug sa magabii sulod sa iyang templo; ug ang nagalingkod sa trono magapanalipod kanila pinaagi sa iyang pagkaanaa.

16Sila dili na gutomon, ug dili na usab pagauhawon; dili na sila pagahasulon sa Adlaw, ni sa bisan unsang makasunog nga kainit. 17Kay ang Cordero nga anaa sa gitaliwad-an sa trono mamahimong ilang magbalantay, ug siya magatultol kanila ngadto sa mga tuboran sa mga tubig nga nagahatag ug kinabuhi; ug pagapahiran sa Dios ang tanang luha sa ilang mga mata."


PAGPAAMBIT SA MENSAHE:

Ang maong ebanghelyo maoy pagpasabot diha sa takna ug panahun nga gitagal sa Ginoo diin kitang tanan pagahukman sa Dios sebo sa iyang kabubut-on ug sebo usab sa atong binuhatan, diin miingon ang usa sa didto sa maong gingharian nga kinsa man kini sila ug si Juan mitubag nakaila ka man kanila Sir, apan ako wala, kay ang maong mga panon sa katawhan mga igsoon mao man kadtong gisaaran sa Dios diha sa kinabuhing dayun tungod sa ilang pagsunod sa kasugo-an ug mga tahas sa Dios sa walay pagmakuli.

Ang maong panan-awon ni Juan mao lamay pagpasabot sa mga katawhan nga kristyanismo sa sinugdangan diha sa tanan nilang pagpaningkamot ug tungod usab sa ilang kanunay nga pagsunod sa kabubut-on sa Dios ug sa mag tahas nga gisangon diha kanato.
Mao diay kini ang buot niyang atong pagahinuktokan diha sa pagpakatawo niining kalibutan, diin diha sa atong pag-abot dinhi sa kalibutan hubo kitang daan ug sa atong pagtalikod diha sa kamatayon atong ibilin ang tanan nga atong nahuptan nga mga butang niining kalibutana, pagpamatuod lamang sa pulong as Dios diha sa 1 Corinto, 1:28 nga nagaingon, walay bili ang mag tawhanon nga bahandi ug kaalam didto sa langit busa dili diay nato kinai ipasigarbo, ug kun aduna may atong ipasigarbo diha sa atubangan sa Dios kadto lamang mga milagro nga iyang gipasinati diha sa atong pagkinabuhi.

Ang maong ebanghelyo nagpasabot sa pagsaka sa atong kalag ngadto sa gingharian sa Dios diin matod pa kadto lamang sila, ang nakapasar o nakalabang sa kasakitan diha sa ilang pagkinabuhi diin ilang gipaputi ang ilang mga biste pinaagi sa paghugas niini kanunay ginamit ang dugo sa nati nga karnero, diin nagasabot kini diha sa pagkinabuhi nato nga espirituhanon uboss sa giya sa espiritu santo sa Dios diin nagsumikad usab kini diha sa pagpaubos sa atong pagkatawo ug pagpaubos sa atong mga garbo. Usa ka kamatuoran diha sa pulong sa Dios nga nagaingon kun gusto nimong himayaon ug daygon didto sa gingharian sa Dios nan puy-i ang pagpakabuhi nga puno sa pagpasakit, ppagpaubos ug pagdawat sa mga paglutos diha sa imong pagkinabuhi dinhi sa kalibutan diin maoy mahimo nimong tuko ug gabay ang kanunay ug hinay-hinay nga mga pag-ampo. Diin bulahan ka nga nakaambit diha sa mga kasakitan ni Jesus diha sa krus kay makaambit ka usab sa himaya sa pagkabanhaw ni Jesus didto sa langit.

Nga sa ato pa mga igsoon ang himaya nga gisaad sa Dios wala dinhi niiniing kalibutan nga atong gipuy-an kundili atu-a kini sa laing kalibutan, ang ato lamang kalag maoy mahiabot didto kay ang atong espiritu mobalik man sa Dios ug ang atong tawhanon nga lawas mobalik man kini sa abog, nga sa ato pa kawang lamang diay ang mga kalipay ug mga kaharuhay nga atong naangkon niini nga kinabuhi kay mawala man kini ug nga matapos ra diay kini, diin mas maayo diay nga atong mapalangdungan ang pagkinabuhi didto sa laing kalibutan diin mao kini ang kinabuhi nga gasubay sa kabubut-on sa Dios. Nga sa ato pa kun gusto kita nga mahiadto sa kinabuhi nga puno sa himaya ug mga kadasig didto sa laing kalibutan nagkahulugan kini nga una, magpaduol kita sa Dios ug ang ikaduha dili kita mahadlok mamatay kay kun gusto ka moadto sa gingharian sa Dios nan moagi ka una ug kamatayon aron mahimulag ang imong kalag imong espiritu ig imong tawhanon nga lawas.

Apan ang tawo mahadlok gayud sa kamatayon tungod kay una wa man siya makahibalo diha sa iyang buhaton diha sa iya unyang pagbiya sa kalibutan isip usa na ka espirituhanon, ikaduha mahadlok siya mahiadto as empiyerno ug ikatulo mawili pa gayud ang tawo diha sa pagkinabuhi nga tawhanon. Wala tinuod kasiguro-an ang pagkinabuhi sa kalag sa tawo didto sa laing kalibutan, diin bisan kadtong mga katawhan nga sa kanunay nagaampo ug nagpasidungog sa Dios apan diha sa ilang kamatayon walay siguro kun asa makapaingon ang ilang kalag, nan labi na ciguro kadtong mga katawhan nga walay mga pag-ampo mosamot gayud nga wlay kasiguro-an ang iyang kaluwasan.


Angay natong mahibaloan nga diha sa atong ikaduhang kinabuhi ang atong panumduman madala sa atong kalag, nga sa ato pa makadumdom kita diha sa mga tawhanon natong binuhatan sa nagkinabuhi pa kita. Angayan lamang nga diha sa atong pagkinabuhi niining kalibutan siguroon nato ang atong kalag nga adunay mga pag-ampo ug mga sakripisyo nga nahibaloan, diha sa pagsimba sa Dios sa Kamatuoran ug ingon man usab diha sa kanunay nga pag-ampo sa santos nga rosaryo alang sa kaluwasan dili lang sa atong kaugalingon kundili alang usab sa kasigurohan sa atong kalag.

Diin diha sa atong pagkinabuhi niining kalibutanA, diha sa pagpaduol nato kanaunay sa Dios nagpasabot kini sa pag-ambit nato sa mga kasakitan ni Jesus diha sa krus, nga sa ato pa kun haduol kita kanunay sa Dios, haduol ka sa pagsulay, kay matod pa diha sa ubang sinulat kun unsa kakusog ang espiritu santo diha sa imong pagkatawo nan mao usab kakusag ang dautan nga gustong motumba kanimo, diin walay laing tambal ug walay laing sagang ug taming gawas lamang sa mga pag-ampo ug uban sa bug-os ug hugot nga pagtuo sa Dios uban sa pagsalig ug paglaom, nga sa ato pa kanunay ka nga nagabuhat sa ma butang nga ikahimuot as Dios.

Ang uban moingon dili sila magpaduol sa Dios ug dili sila bisan paglili na lang diha sa mga sinagoga ug mga simbahan , o sa mga organsasyon nga makaDios kay dili nila gusto nga makasinati sa mga pagsulay sa kinabuhi, ang espiritu santo nagaingon bisan pa kun magpalayo ka sa Dios aron mahalikay sa sa mga paglutos apan kun nalatid nang daan sa Amahan ang imong kapalaran maagian gayud nimo an mga pagsulay diin bulahan kun aduna kay mga pag-ampo kay matukhan man ang mga pagsulay diha sa imong hugot nga pagtuo ug pag-ampo, Kay ang Amahan nga langitnon dili gayud mosugot nga moabot ang kataposang gutlo diha sa imong kinabuhi nga dili ka makaduol kaniya kun ikaw usa ka tinawag ug pinili sa Dios.

Kinsa man kining mga tinawag ug pinili sa Dios? Sila mao kanang mga panon sa katawhan diha sa ebanghelyo nga nakalatas sa pagsulay diha sa kinabuhi, diin kamatuoran lamang diha sa balaang kasulatan nga nagaingon daghan ang pinili sa Dios diin sama kini kabaga sa balas sa baybayon ug ang pinili pagapili-an pa, sa laing bahin sa sinulat nagaingon kini: Lahi-lahi ang pagtawag sa Dios kanato, ug dili ang tanan nga nagasangpit sa Dios ang makasulod sa iyang gingharian kundili kadto lamang nagasunod sa iyang kabubut-on.