Maayong Sundalo Ni Jesu Cristo

2 TIMOTEO 2: 1~26

1 Busa, anak ko, lig-ona ang kaugalingon sa grasya nga naa ni Cristo Jesus. 2 Isalig sa mga matinud-anon ang nadungog mo nako atubangan sa daghang sasi aron manudlo sila sa uban. 3 Pag-ugmad nga daw maayong sundalo ni Cristo Jesus. 4 Ang sundalo dili manginabuhi sama sa ordinaryong mga tawo, kay buot siyang makapahimuot sa labawng opisyal. 5 Walay magdudula nga purongpurongan hangtod nga nakigtigi na siya sa kaatbang. 6 Ang mag-uuma magbudlay una mopahimulos sa mga bunga. 7 Hunahunaa pag-ayo ang akong gisulti nimo: Ang Ginoo mopasabot sa tanan.

8 Hinumdomi si Cristo Jesus nga naggikan sa kaliwat ni David. Nabanhaw siya sumala sa atong Ebanghelyo. 9 Tungod ini nag-antos ug nagapos ko sama sa kriminal. Apan dili magapos ang pulong sa Diyos. 10 Giantos ko ang tanan tungod sa piniling katawhan. Sa ingon makab-ot nila ang kaluwasan ni Cristo Jesus ug makaambit sila sa walay kataposang himaya.

11 Tinuod kining pahayaga: Kon mamatay ta uban niya mabuhi sab ta uban niya; 12 kon mag-antos ta tungod niya, maghari sab ta uban niya; kon ato siyang ilimod, ilimod sab ta niya. 13 Kon dili ta matinud-anon, magpabilin siyang matinud-anon, kay dili man siya makalimod sa kaugalingon . Hunongon ang mga Lantogi

14 Pahinumdomi ang iyang katawhan ining mga butanga. Aghata sila atubangan sa Diyos sa paghunong sa panaglalis. Wala niy kapuslanan. Makalibog lang hinuon sa naminaw. 15 Paningkamoti nga malig-on ka nga sulugoon sa Diyos, trabahador nga walay daotang binuhatan, naggamit sa matuod nga pulong. 16 Likayi ang walay hinungdang panagsultisulti nga sukwahi sa pagtoo. Magdala ni sa labaw kadako nga kakulang sa pagtoo. 17 Mokatag ang maong balita sama sa ganggrena, labi na si Hemenio ug Fileto. 18 Mitipas na sila sa kamatuoran. Nagtoo sila nga naabot na ang pagkabanhaw. Sa ingon, nakabalisa sila sa pagtoo sa uban. 19 Apan nagbarog gihapon nga lig-on ang baroganan nga gipahimutang sa Diyos. Nasulat ini: nakaila ang Diyos sa iyaha, ug: patalikda sa kadaotan ang misangpit sa ngalan sa Ginoo.

20 Dili lang mga sudlanan nga hinimo sa bulawan ug plata ang naa sa dakong balay kondili, ang hinimo pod sa kahoy ug sa yuta. Ang pipila gigahin alang sa opisyal nga kagamitan, ang uban sa ordinaryo lang. 21 Kon ang tawo makalimpyo sa kaugalingon sa butang nga akong giingon, mahamili siyang sudlanan, mapuslanon alang sa Ginoo, giandam alang sa balaang katuyoan.


22 Likayi ang batan-ong kahilayan; pangitaa ang katarong, pagtoo, gugma ug kalinaw, uban sa magsangpit sa Ginoo sa lunsayng kasingkasing. 23 Likayi ang binuang ug way hinungdang panaglalis nga masangko sa way pagsinabtanay. 24 Dili palaaway ang nag-alagad sa Ginoo. Hinunoa, aghop sa tanan ug kaantigong maminaw. 25 Maayo siyang mobadlong sa kaatbang, tingalig basolon sila sa Diyos sa mga sala ug makaplagan nila ang kamatuoran. 26 Basig makalikay sila sa mga lit-ag sa yawa nga nagbihag nila sa kaugalingong kabubut-on

PAGPAAMBIT SA MENSAHE:

Ginaingon diha sa ubang sinulat nga si Jesus maoy buhing panagway sa dili makita nga Dios diin, maoy tumong sa pag-anhi ni Jesus sa kalibutan aron sa pagluwas natong mga makasasala, ubos usab sa kasugoan sa Amahan Dios ug kini tungod sa gugma ug kalooy sa Amahan kanato nga iyang mga katawhan. Sa ato pa dili tiaw ang paghuigugma ug pagmahal sa Dios kanatong tanan tungod kay siya man ang miduol ug nangita kanato.

Gipakita ni Jesus dinhi sa yuta ang sumbanan sa usa ka maayong lider diha sa usa ka relihiyusong pagtulon-an, iyang gisangyaw ang maayong balita sa walay pagsapayan nga daw sama siya sa ulipon diin nagasilbi ug nagagiya ug nagahatag ug mga milagro sa iyang mga sumosunod. Usa ka gimbuhaton nga iyang gipakita ug gipasunod niadtong mga mabuot ug mga putli niyang apostoles diin pinaagi sa paghatag kanila sa pan ug bino niadto kataposang panihapon iyang gipasabot nga magapadayon sila sa pagsangyaw sa maong gimbuhaton ang pagpakaon sa mga katawhan sa espirituhanong kalan-on diin nagasimbolo kini sa pan ug bino.

Misangyaw ang mga apostoles sa upat ka suok sa kalibutan diin walay laing hinagiban ug gisaligan gawas lamang sa mga pag-ampo ug mga armadora inubanan sa kaalam nga iya sa espiritu santo diin ilang gibaktas, ilang gilatas ang mga kabukiran ug ang mga siyudad sama sa siyudad sa Roma nga maoy sentro sa sibilisasyon niadtong panahuna, ug maoy usay mga manlulutos sa mga sumosunod ni Kristo diin kadaghanan sa mga maalamon niadtong panahuna gihimong Dios ang ilang bahandi ug misimba sa Dios-dios ug nahimong segundo lamang ang pag-ila nila sa Dios Amahan nga maoy nasunod nila sa ilang mga katigulangan ug sa mga propeta niadtong panahuna.

Apan lagi kay ang nagsugo niadtong mabuot nga mga apostoles ni Kristo niadtong panahuna, dili man tawo apan Dios nga matuod ug maoy bugtong manunod sa trono sa iyang Amahan didto sa langit, nan maisogon sila sa pagsangyaw sa ngalan ni Kristo bisan nagkahulugan kini sa ilang kinabuhi. Usa ka kamatuoran diha sa balaan kasulatan sa Mateo 17: 24~25 nga nagaingon: Kun gusto nimong mahimong estudyante ni Jesus nan kalimti ang imong kinabuhi, pas-ana ang imong krus ug sunod sa pagtulon-an nga gisangyaw ni Jesus kay bulahan ka nga makaambit sa iyang mga kasakitan diha nianang krus kay makaambit ka usab sa himaya sa iyang pagkabanhaw didto sa gingharian sa Dios.

Usa kini ka kamatuoran niining bag-ong panahun karon diin daghan nga nanggawas nga pagtulon-an, daghan ang nagsangyaw sa iyang ngalan kay lagi gustong moambit himaya didto sa langit diin ang balaang kasulatan nagaingon, daghan ang iyang gitawag apan pipila lamang ang naminaw, daghan nakabati apan pipila lamang ang nakadungog, ug daghan ang gusto mahimong sundalo ni Jesus sumala sa ebanghelyo apan wala makasabot kun unsaon pagsunod sa kabubut-on sa Dios.

:

Ang balaan kasulatan nagaingon kun gusto nato nga himayaon didto sa gingharian sa Dios nan puy-i ang kinabuhi nga puno sa mga paglutos, pagdaug-daug ug mga kalisod diha sa kinabuhi diha sa mga pagsulay dili lamang diha sa pagtulon-an nga imong gibarugan dili lamang diha sa imong pamilya, kundili diha usab sa imong pagtuman sa kabubut-on sa Dios, kini nagtimaan lamang sa kalisod sa pagsulod sa gingharian sa Dios ug mas masayon ang pagsunod sa dalan sa kalaglagan sa atong mga kalag diin mao na kanang mga tawhanon nga kailibgon diha sa palibot diin anaa ang mga kahilayan ug mga tawhanon nga mga binuhatan, apan bulahan pa sila mga igsoon kay inosente pa sila sa kamatuoran, apan kita nga nasayod ug nakatukib niining maong pagtulon-an nga atong gibarugan kun motalikod niini, wala nay pasaylo ang Dios para kanato.
:

: