Gamita Ang Imong Lawas Sa Paghimaya Sa Dios

1 CORINTHO 6:12~20

Ang tanan gitugot kanako sa balaod. Apan dili ang tanan makatabang nako. Ang tanan gitugot kanako sa balaod, apan dili ko magpaulipon sa bisag unsa. 13 Ang pagkaon alang sa tiyan, ug ang tiyan alang sa pagkaon, apan ang Diyos molaglag ini. Ang lawas hinunoa, dili alang sa pamuta kondili, sa Ginoo; ug ang Ginoo alang sa lawas. 14 Ang Diyos nga nagbanhaw sa Ginoo, mobanhaw sab nato pinaagi sa iyang gahom.

15 Wala ba mo masayod nga ang inyong lawas mga bahin ni Cristo? Himoon ba ninyo ang maong bahin nga bahin sa puta? Dili motugot ang Diyos! 16 Wala ba mo masayod nga ang nakighilawas sa puta, nahiusa niya? Ang Kasulatan nag-ingon: Ang duha usa ka lawas. 17 Sa laing bahin, ang nahiusa sa Ginoo nahimong espiritu uban niya.18 Likayi sa hingpit ang pamuta. Ang ubang sala nga buhaton sa tawo wala maggamit sa lawas. Apan ang namuta nakasala batok sa kaugalingong lawas

19 Wala ba mo masayod nga ang inyong lawas templo sa Espiritu Santo nga naa sulod ninyo, hinatag sa Diyos? Dili na mo tag-iya sa inyong kaugalingon. 20 Hinumdomi ang presyo sa gibayad alang ninyo. Busa, himayaa ang Diyos sa lawas ug sa espiritu nga iya sa Diyos.



PAGPAAMBIT SA MENSAHE:

Ang maong ebanghelyo nagpasabot diha sa atong pagpakabuhi dinhi niining kalibutan diin sa nagkinabuhi pa kita ang utok nga kabahin sa atong tawhanon nga lawas mao nagamando diha sa kinatibuk-an a atong pagkatawo diin pinaagi diha sa tong mga nakita, nadungog o nabasahan ang atong panghuna-huna mouban gayud diha sa unsay anaa sa palibot. Nga sa ato pa samtang buhi pa , kita gayud ang hari sa atong kaugalingon, diin atong madiktahan ang atong kalag ug espiritu kay lagi tawo pa paman kita,

Diin ang balaang kasulatan nag-ingon diha sa 1 Corinto, 3: 16, nga ang atong lawas maoy templo sa Dios , ug si kinsa man nga molaglag sa templo sa Dios nga atong lawas nan iya sab nga pagalaglagon. Nga sa ato pa ang espiritu sa Dios nagauban kanato sa kanunay isip maoy maghatag ug giya diha sa atong pagkinabuhi niining kalibutana

Ang atong lawas samtang nagkinabuhi pa sangkap sa tulo ka elemento, atong tawhanon nga lawas, atong kalag ug sa atong espiritu, diin sa higayon unya nga motalikod na kita niining kalibutana, mahabilin ang atong lawas diin mobalik kini sa abog ug ang atong espiritu maoy mobalik ngadto sa Dios ug maoy moreport sa atong mga kasal-anan, ug
ang atong kalag , maoy maghulat sa kataposan paghukom diin maoy mangatubang sa Dios ug maoy pagasul-oban sa espirituhanong lawas kun maangkon nato ang himaya sa langit.

Sa ato pa ang atong tawhanon nga lawas temporaryo lamang niining kalibutana diin diha sa imong pagkinabuhi kun nagpalabi-labi ka diha sa mga kahilayan nan alaot ang imong kalag kay maglutaw man siya didto sa limbo ug wala kahibalo kun unsay iyang buhaton, kay ang naandan man lang nga bulohaton mao lamang ang mga tawhanon nga kailibgon diin wala man maandam diha sa espirituhanong pagpanlihok sama sa mga pag-ampo ug mga sakripisyo, nan angay lamang diay nga atong gamition ang atong lawas diha sa mga gimbuhaton nga ikahimuot sa Dios kay sa higayon nga mobiya na kita dinhi sa kalibutan aduna ray mabit-bit ang imong kalag, diin nga nagaingon usab ang atong panumdoman ipauban sa imong kalag diha sa imong pagtalikod sa kalibutan diin madumduman nimo ang imong mga kalapasan diin wa kanay mahimo kay wala na man kanimo ang imong tawhanon nga lawas ug ang imong espiritu mibalik na sa Dios diin ikaw na lamang nga kalag ug ang imong panumduman maoy maghinuktok diha sa limbo sa laing kalibutan.

Wala na kita kapas bisan diha sa atong mag pag-ampo kun kalag na kita adunay kakulangon kay wala na man kitay espiritu diin dugay na mahiabot ang mag pag-ampo. Angayan diay nga samtang buhi pa atong gahinan ang Dios diha sa mga pag-ampo sa pagtabang sa atong isigkaingon ug labaw sa tanan diha sa pag-alagad gayud sa Dios pinaagi sa pagtabang niadtong nanginahanglan.

Ang balaang kasulatan nagaingon, ayaw na pangandoy pa ug dugang bahandi, insakto na ang anaa kaninyo, kay ako nga inyong Dios dili, gayud mahitabo nga motalikod kaninyo. Kay unsa may arang sa tawo nga sa iyang pag-abot niya dinhi sa kalibutan naghubo man lang siya ug wala siyay dala, ug sa iyong pagbiya, mabilin man usab ang unsa man nga iya sa buhi pa siya, walay bahandi nga iya sa kalibutan nga iyang mabitbit, gawas lamang sa mga pag-ampo ug mga langitnong hiyas nga iyang madala ug isukip diha sa iyang kasingkasing.

Nga sa ato pa usa kini ka pagtulun-an nga dili angay nga magpalabi-labi kita diha sa atong isaigkatawo, dili angay nga magpagkadautan kita ug magpakabuta bungol diha sa nanginahanglan kay pag-abot sa panahun tubagon mo kini atubangan sa Dios Amahan. Angayan diay nga pangandaman nato ang atong pagkinabuhi didto sa laing kalibutan aron kahimut-an ug pasidunggan kita sa Dios pag-abot sa oras nga iyang gitakda.