Si Jesus Gilimod Ni Pedro

MATEO 26:69~75

• 69 Sa laing bahin, samtang nag-lingkod si Pedro sa nataran may batan-ong babaye, usa sa mga sulugoon sa balay, nga miduol niya: “Dili ba, kauban ka man ni Jesus, ang Galileo?” 70 Apan iya ning gilimod atubangan sa tanan sa pag-ingon: “Wala ko maka-sabot sa imong gisulti.”

71 Sa mogawas na unta si Pedro sa pultahan, may laing babaye nga sulugoon nga nakakita niya ug miingon sa nanagbarog: “Kauban kining tawhana ni Jesus, ang Nazareno.”

72 Sa ikaduhang higayon, milimod si Pedro nga nanumpa: “Wala ko makaila anang tawhana.”

:

73 Human sa pipila ka gutlo ang nagbarog didto miduol ni Pedro ug miingon: “Galileo gyod ka! Ang imong sinultihan nagpadayag og kinsa ka.” 74 Si Pedro nangatarongan ug namalibad. Nanunglo siya ug nanumpa nga wala siya makaila sa tawo. Dihadiha mituktugaok ang sunoy.

75 Nahinumdom si Pedro sa pulong ni Jesus: “Sa dili pa motuktugaok ang sunoy ilimod ko nimo sa makatulo.” Ug milakaw siya nga naghilak sa tumang kapait.

:

PAGPAAMBIT SA MENSAHE:

:

Ang maong ebanghelyo maoy pagpasabot sa kabubut-on sa Dios diin dinhi sa maong ebanghelyo sa maka-usa pa gipakita niya ang iyang kabubut-on diin gipasidaan na daan ni Jesus nga gilimod siya ni Pedro sa dili pa motuktugaok ang sunoy nga manok.

:

Nagpasabot lamang diha sa ubang pulong sa Dios Amahan nga kun nalatid nang daan ang mga pagsuway ug mga paglutos sa imong kinabuhi nan mosugot ka ug dili, matuman gayud kini. Kay matod pa kun ang Dios maoy mohatag sa pagsulay nan matuman gayud kini.

Bisan diha sa ubang pagtulun-an diin moingon sila nga dili sila magpaduol kanunay sa Dios, dili sila magpaduol kanunay sa simbahan o magpakita diha sa mga sinagoga, kay matod pa ang tawo nga kanunay magpaduol sa Dios kanunay gayud makaambit sa pagsulay.

:

Apan ang Dios Amahan nagpasabot nga mosimba ka man ug sa dili kun nalatid na daan ang mga pagsulay sa imong kinabuhi nan, makaambit ka gayud niini. Diin bulahan kun aduna kay mga pag-ampo ug mga paghalad diin imong mahalad sa kanunay ang mag pagsulay nga imong masinati.

:

Kay matod pay walay laing paagi diin makaestorya kita sa Dios mao ra gayud ang mga pag-ampo, Ang unang mga tinawag nga mga apostoles naga-ampo ngadto sa Dios diin mao kini ang ilang bugtong taming, ug mismo si Jesu Cristo naga-ampo ngadto sa iyang Amahang Dios aron dunggong ang iyang mga panalangin.

:

Nan kita usab kun hingpit ang atong pagtoo ug pagsalig sa Dios pinaagi diha kang Jesu Cristo nan dunggon usab kita, kay matod pa sa Dios nga “ Nganong dili ko ihatag kun ugaling kaayuhan man”. Sa ato pa mga igsoon walay laing taming diha sa atong mga pagsulay ug mga paglutos kundili mao ra gayud ang mga pag-ampo, kay matod pa duha o tulo nag naga-ampo sa Amahan sa ngalan ni Jesu Cristo nan, anaa siya nnagauban kaninyo.

: