Salig Sa Diyos

LUCAS 12: 22~31

22 Miingon si Jesus sa iyang mga tinun-an: “Sultihan tamo, ayawg kabalaka sa inyong kinabuhi, unsay kan-on! o sa inyong lawas, unsay isul-ob! 23 Ang inyong kinabuhi labaw pa sa pagkaon ug ang lawas sa sinina. 24 Tan-awa ang mga uwak: wala ni magpugas ni mangani; walay mga kamalig ug bodega. Apan gipakaon sila sa Diyos. Mas bililhon kaayo mo kay sa mga langgam! 25 Kinsa man ninyo ang makadungag sa gitas-on sa iyang kinabuhi tungod sa kabalaka? 26 Kon dili mo makadumala sa sama ini kagamayng butang, nganong mabalaka man mo sa uban?
27 Tan-awa ang mga bulak nga ihalas: wala ni magbubod og hilo sa kalinyasan ni maghablon. Apan sultihan tamo, bisan si Solomon sa tanan niyang bahandi wala magsinina sa ingon. 28 Kon sa kaumahan gibistihan sa Diyos ang mga balili nga karong adlawa buhi pa, apan ugma itambog na sa hudno, unsa pa kaha mo, katawhan nga gamayg pagtoo!
29 Ayawg kaguol unsay inyong kan-on ug imnon. Wad-a ang kabalaka. 30 Pasagdi ang tanang kanasoran sa kalibotan nga mag-apas ining mga butanga. Ang inyong Amahan nasayod nga inyo ning gikinahanglan. 31 Pangitaa hinuon ang Gingharian sa Diyos ug kining tanan ihatag kaninyo nga pakapin.

PAGPAAMBIT SA MENSAHE:

Ang maong ebanghelyo maoy pagpasabot lamang diha sa ubang pulong sa balaang kasulatan diin ang Diyos nagaingon nga unsay may maarang sa tawo nga mabalaka man siya nga sa paghi-abot niya dinhi sa kalibutan hubo man siya ug walay dala ug inigtaliwan niya niining kalibutan biyaan man usab niya ang tanan. Kay matod pa usab diha sa ubang pulong sa balaang kasulatan …Datu man ang tawo kun kuntento lamang kita kun unsay anaa kanato.

Kay kun asa ang imong bahandi nan atua ang imong kasingkasing, kay kun magatigom ka ug bahandi nga iya niining kalibutana nan dinhi ka lang usab kutob. Apan kun ang imong bahandi nga gitigom iya sa gingharian sa langit nan bulahan kay mao kini ang mga bahandi nga walay taya nga magakutkot ug walay kawatan nga magasaka. Diin mao kini ang atong pagsimba didto sa iyang gingharian sa langit diin mao kini ang atong mga pag-ampo , paghalad ug mga sakripisyo.

Kini nagapamatuod lamang usab diha sa ubang pulong sa balaang kasulatan nga nagaingon, Lucas 20: 25 nagaingon si Jesus,..” Ihatag kang Cesar ang alang kang Cesar ug ihatag sa Diyos ang iya sa Diyos. Din nagpamatuod lamang kini nga ang mga materyal nga butang iya lamang kini dinhi sa kalibutan, ug ang mga butang nga iya sa Diyos mao kadtong mga bahandi nga dili makita ug mahikap, mga bahandi nga molungtad hangtod sa kahangturan.

Busa mga igsoon diha niining atong pagpangalagad sa Diyos maoy atong angay pamalandungan nga nasayod ang Diyos sa tanan natong gikinahanglan diin walay laing natong mahimo isip tawo lamang kundili ang pag-ampo, paghalad ug pagpangaliyupo ngadto sa Diyos kay ang Diyos miingon nganong dili ko man ihatag kun kini kaayohan man, ug ang balaang kasulatan nagaingon unaha ang gingharian sa Diyos ug ang tanan nimong gipangayo ihatag ra kanimo.