Mga Tawong Bulahan

MATEO 5:3~12

3 Bulahan ang mga kabos tungod sa Espiritu, kay ila ang gingharian sa langit.
4 Bulahan ang nagsubo, kay lipayon sila.
5 Bulahan ang mapaubsanon, makapanag-iya sila sa yuta.
6 Bulahan ang gigutom ug giuhaw sa kaangayan, kay busgon sila ug tagbawon.
7 Bulahan ang maluluy-on, kay kaluy-an sila.
8 Bulahan ang putlig kasingkasing, kay makakita sila sa Diyos.
9 Bulahan ang nagbudlay alang sa kalinaw, tawgon silag mga anak sa Diyos.
10 Bulahan ang gilutos tungod sa kaangayan, kay ila ang gingharian sa Langit.
11 Bulahan mo, kon bugalbugalan ug lutoson sa katawhan; ug magsulti sila sa tanang matang sa daotan batok ninyo, kay mga tinun-an tamo. 12 Paglipay ug pagmaya, kay dako ang ganti nga gitagana kaninyo sa Diyos. Giingon sab ini pagpasipala ang mga propeta nga nauna ninyo.

PAGPAAMBIT SA MENSAHE:

Ang maong ebanghelyo maoy pagpasabot ug pagpdayag diha sa kabubut-on sa Diyos diin iya mismong gipakita nga ehemplo ang iyang kaugalingong anak diin diha sa pagpakatawo niini dinhi sa kalibutan wala kini magpaila pinaagi sa iyang bahandi ug gahum kundili iyang gipaila ang iyang pagkaanak sa Diyos pinaagi sa tumang pagpaubos, ug puno sa mga kasakitan.

Iyang gipamatuod nga ang magpaubos dinhi sa ibabaw sa yuta himoong ipataas ug labing dako didto sa gingharian sa Amahan ug labaw sa tanan ang nag-alagad sa labing daghan dinhi sa ibabaw sa yuta mamahimong pinakadako didto sa gingharaian sa langit.

Iyang gipakita ang sumbanan isip nga pinalangga ug pinili nga anak sa Diyos diin makaambit gayud kini sa mga kasakitan ug mga panlutos dinhi sa ibabaw sa yuta apan bulahan diha sa maong kadaugan diha sa mga pagpanlutos kay maimo ang himaya sa gingharian sa langit.

Dili kini masabtan niadtong mga tawo nga wala ang Diyos diha sa ilang kinabuhi ug labaw sa tanan dili kini masabtan niadtong mga tawo nga wala ipahari ang Ginoong Diyos nga si Jesu-Cristo diha sa ilang tagsa-tagsa ka kasing-kasing. Ang maong ebanghelyo mga igsoon nagpamatuod lamang nga adunay nagpaabot nga dakong gasa inig-abot nato didto sa gingharian sa langit kun atong madaug ang mga paglutos dinhi sa ibabaw sa yuta.

Nagapasabot lamang kini mga igsoon nga temporaryo lamang ang atong pagkinabuhi dinhi sa ibabaw sa yuta, diin atu-a didto sa gingharian sa langit ang matuod natong pinuy-anan kun malatas nato ang tanan, busa angay natong pamalandungan ug magkinabuhi kita nga langyaw niining kalibutan apan haom didto sa gingharian sa langit diin anaa kanunay ang pagtamod sa mga pulong sa balaang kasulatan nga maoy atong sumbanan isip usa ka matuod nga Cristuhanon.