Pagtulon-an Mahitungod Sa Kasuko

MATEO 5:21~26

21 Nakadungog mo nga giingnan kaniadto ang atong katawhan: Ayawg patay. Ang makapatay kinahanglang moatubang sa hukmanan. 22 Apan sultihan tamo karon: Ang masuko sa igsoon, kinahanglang hukman. Ang manginsulto sa igsoon angayng taralon sa konseho ug dad-on sa hukmanan. Ang magpakaulaw sa igsoon ibalhog sa kalayo sa impyerno. 23 Busa, kon maghalad ka sa gasa sa altar ug mahi-numdom nga ang imong isigkatawo nasilo nimo, 24 biyai ang gasa. Lakaw dayon ug pasig-uli niya. Unya, balik ug halad sa gasa sa Diyos.
25 Ayawg kalimot: Pasig-uli sa imong kaaway sa dili pa paatubangon sa hukmanan. Kon dili, itugyan ka sa maghuhukom nga, sa iyang bahin, motugyan nimo sa pulis, ug ibalhog ka sa bilanggoan. 26 Matanggong ka didto hangtod nga makabayad sa kataposang dyot sa multa

PAGPAAMBIT SA MENSAHE:

Ang maong ebanghelyo maoy pagpasabot lamang nga ang mga katawhan nga nagasunod sa pagtulon-an nga kristuhanon, nagasunod sa giya sa espiritu santo sa Diyos sa kanunay magalikay sa pagpakasala, magalikay sa pagkasuko ngadto sa iyang isig katawo. Matod pa diha sa ubang pulong sa balaang kasulatan ayaw palungtara hangtod sa sunod adlaw ang imong kasuko ug kayugot sa imong isisgkatawo. Sa dili pa mosalap ang adlaw niining adlawa pakig-uli sa imong maayong buot ngadto sa imong igsoon

Kay kun moingon ka nga nahigugma ka sa Diyos apan nagdumot ug nasuko ka sa imong isigkaingon, imong igsoon o imong isigkamagtutuo nan ang balaang kasulatan nagaingon nga namakak ka kay giunsa nimo paghigugma ang Diyos nga wala nimo makita ug mahikap apan ang imong mga kaigsoonan nga sa kanunay , sa adlaw tanan imong hikit-an apan imo mang gikontrahan, igsoon wala ka mahigugma as Diyos ang imong kaugalingon garbo maoy imong gihigugma.

Ang labing importanteng sugO sa Diyos nagaingon Una Higugmaa ang Diyos labaw sa tanan ug ikaduha higugmaa ang imong isigkatawo sama sa paghigugma nimo sa imong isigkaingon, diin kun malapas nimo ang bisan asa niining mga sugo-a nan nalapas usab nimo ang tanang kasugo-an sa Diyos. Busa igsoon hinoktuki sa makadaghan, ang gugma kanato sa Diyos ug labaw sa tanan ang pasensya nga gitagana kanato sa Diyos diin kitang tanan adunay kapasaylo-an sa atong mga sala kun aton kining pangayoon sa tumang pagpaubos.