Pagtulon-an Bahin Sa Panapaw

MATEO 5: 27~30

27 Nakadungog mo nga ginaingon: Ayawg panapaw. 28 Apan sultihan tamo: ang motan-aw sa babaye aron pagtagbaw sa iyang ulag, sa kasingkasing nakapanapaw na.
29 Busa, kon ang tuo mong mata makaangin nimo sa pagpakasala, lugita ni ug ilabay. Mas maayo pa nga kawad-an kag bahin sa lawas, kay sa itambog ang tibuok mong lawas sa impyerno. 30 Kon ang tuo mong kamot makaangin nimo sa pagpakasala, putla ni ug ilabay! Mas maayo pa nga kawad-an kag bahin sa lawas, kay sa itambog ang tibuok mong lawas sa impyerno

PAGPAAMBIT SA MENSAHE:

Ang maong ebanghelyo maoy pagpasabot lamang diha sa mga pagtulon-an nga gisangyaw sa Diyos Jesu Cristo, diin kun gidawat mo sa hingpit si Jesu Cristo sa imong kasingkasing nan puy-i ang kinabuhi nga puno sa pagpaubos puno sa pagkamangindawaton ug puno usab sa mga pag-ampo. Puy-i ang kinabuhi nga sama sa langyaw niining kalibutana apan ha-om didto sa iyang gingharian sa langit, biyai ang tanang tawhanong kailibgon, sama niining pagpanapaw.

Ang balaang kasulatan nagaingon bisan kinsa nga naghuna-huna ug malaw-ay ngadto sa usa ka binuhat nga adunay bana o sa usa ka babaye nakapanapaw na, kay ang pagpakasala dili lamang diha sa buhat lamang kundili ang pagpakasala anaa usab mahimo diha sa imong pulong ug huna-huna.

Diha niining maong ebanghelyo nagpasabot ang Diyos nga kun ang imong mata maoy nakaangin sa pagpakasala nan lugita kana ug ilabay kay maayo pa kanimo nga kawad-an ug usa ka mata kay sa tibuok nimong lawas maoy mahiadto sa impyerno. Diin nagpasabot lamang kini mga igsoon sa usa ka sambingay diin kinahanglan gayud nga likayan nato nga ang parte sa atong lawas ang makasala kini kay ang Diyos maoy mopahimatngon niini pinaagi diha sa balatian o pinaagi sa sakit.

Ayaw paabota nga ang ginagmayng sala mamahimo kining dakong sala diin mosangpot kini sa kamatayon kay matod pa diha sa pulong sa Diyos ang silot sa sala kamatayon. Busa igsoon pamalandungi sa makadaghan nga ang atong pagkinabuhi dinhi sa ibabaw sa kalibutan temporaryo lamang diin aduna pay kinabuhi human niini ug mao kadto pangandami. Ang pagkinabuhi ngadto sa kinabuhing dayun diin lunlon kalipay ug walay mga kasakitan.