Hukom Sa Diyos

ROMA 2: 1~16

2 • 1 Busa, wala kay katarongan, bi- sag kinsa ka pa, sa paghukom sa uban. Sa imong paghukom sa isigkatawo, nagkondenar ka sa kaugalingon, kay gibuhat nimo ang imong gihukman. 2 Nahibawo ta nga ang silot sa Diyos moabot sa naghimo sa ingon. 3 Nagtoo ba mo nga malikayan ninyo ang hukom sa Diyos sa paghukom sa uban nga inyo man nang gihimo?

4 Gipahimuslan ninyo ang Diyos ug ang walay kinutoban niyang kaayo, pailob ug kamasinabtanon. Wala mo makaamgo nga ang Diyos maayo aron madani mo. 5 Hinuon, kon magmagahi gyod ang inyong kasingkasing ug magdumili mo pag-usab, nagtigom lang mo alang sa kaugalingon og dakong silot sa adlaw sa hukom kanus-a ang Diyos tarong nga mohukom.

6 Hatagan niya ang usag usa sa angay sumala sa nabuhat. 7 Mohatag siya sa kinabuhing dayon sa nangita sa himaya, kadungganan ug tunhayng kinabuhi ug sa nagtubay sa pagbuhat og maayo. 8 Apan kapungot ug panimalos ang maangkon sa wala mag-alagad sa kamatuoran, hinunoa sa panglupig. 9 May pag-antos ug kayugot alang sa nagbuhat og daotan, una sa mga Judio unya, sa mga Griyego. 10 Apan ang Diyos mohatag og himaya, kadungganan ug kalinaw sa nagbuhat og maayo, una sa mga Judio, unya sa mga Griyego. 11 Kay ang una dili lahi sa ikaduha atubangan sa Diyos.

12 Ang nagbuhat og sala nga wala makahibawo sa Balaod, mamatay nga walay Balaod. Ang nagbuhat og sala nga nakahibawo sa Balaod, hukman sa maong Balaod. 13 Ang makapatarong nato atubangan sa Diyos dili ang pagpaminaw sa Balaod kondili, ang pagsunod ini. 14 Kon ang dili Judio nga walay balaod nagbuhat sa gisugo sa Balaod, naghatag silag balaod sa kaugalingon, 15 nagpasabot ni nga ang mga sugo sa Balaod napatik sa ilang salabotan. Ang ilang konsensya nga nagsulti sulod nila nagpasabot sab ini, sa pagkondenar o pag-aprobar sa ilang gibuhat. 16 Sumala sa akong ebanghelyo, mao pod ang mahitabo inighukom sa Diyos, sa sikretong mga buhat sa mga tawo diha sa persona ni JesuCristo.

PAGPAAMBIT SA MENSAHE:

Ang maong ebanghelyo maoy pagpasabot lamang nga diha sa atong pagpangalagad sa Diyos wala tay laing tan-awon, ikaw lamang ug ang imong Diyos. Kay matod pa kitang tanan makasasala gyod atubangan sa Diyos sa pulong sa huna-huna ug sa buhat.  Apan Diyos lamang ang adunay katungod sa paghukom, kay kun kitang tawo naghukom diha sa atong isigkatawo apan nagbuhat usab sa ilang gibuhat, nagbuhat usab sa pagpakasala nan sama ra usab nga gihukman nato ang atong kaugalingon.