Gugma

1 Corintho13 : 1 ~ 13

13 • 1 Kon makasulti ko sa pinulongan sa mga tawo ug mga anghel, apan walay gugma, sama ra ko sa naglanog nga tumbaga o nagtaginting nga piyangpiyang. 2 Kon may gasa ko sa pagkapropeta nga nasayod sa tanang tinagoan uban ang tanang kahibalo; kon may pagtoo ko nga ingon kadako nga makatumpag og mga bukid, apan walay gugma, wala koy nada. 3 Kon akong ihatag sa mga kabos ang tanang kabtangan lakip ang lawas aron lang dayegon, ug dili tungod sa gugma, wala ni pulos alang nako.

4 Ang gugma mapailubon, maluluy-on, dili masinahon. Ang gugma dili mapahitas-on o garboso. Ang gugma dili way batasan, dili mangita sa kaugalingong interes. 5 Ang gugma dili masuko ug mopasaylo sa mga kasilo. 6 Ang gugma dili mahimuot sa daotang gibuhat, apan malipay sa kamatuoran. 7 Ang gugma nagpasaylo sa tanan, nagtoo sa tanan, naglaom sa tanan, ug nag-antos sa tanan.

8 Ang gugma dili matapos. Ang mga panagna makawang, ang gasa sa nagkalainlaing pinulongan mahilom, ug ang kahibalo mawagtang. 9 Kay nahibalo ta sa usa lang ka bahin, dili hingpit. Mao sab ang atong panagna. 10 Kon ang hingpit moabot na, ang dili hingpit mahanaw. 11 Sa bata pa ko, binata pod ang panghunahuna ko ug pangatarongan. Apan sa dako na ko, akong gihiklin ang binata. 12 Sa pagkakaron lubog ang atong tinan-awan sama nga pinaagi sa bildo. Apan unya, sa atubangan gyod, sa nawongay. Karon usa lang ka tisok ang akong nahibaloan. Apan unya, mahingpit ang akong kahibalo. 13 Karon nia ang pagtoo, paglaom ug gugma. Kining tulo. Apan ang labing dako mao ang gugma.

PAGPAAMBIT SA MENSAHE:

Ang maong ebanghelyo diin nagpasabot kini sa pulong gugma, ug matod pa sa sulat ni Pablo ngadto sa taga Corintho, kun magkigsulti siya sa pinulongan sa mga tawo ug sa mga anghel diha sa iyang pagsangyaw apan walay gugma diha sa iyang gimbuhaton nan sama lamang siya sa usa kapiyang-piyang nga masaba.

Sa ato pa mga igsoon ang tanan butang nga atong pagabuhaton dinhi sa kalibutan, espirituhanon man o tawhanon kun wala magikan sa atong kasing-kasing nan wala kini pulos kay wala man diha ang gugma sa atong pagbuhat nianang mga butanga.

Giingon diha sa ebanghelyo nga ang gugma dili hakog, dili mapahitas-on ug dili garboso ug kini nga mga hiyas sa pulong nga gugma maoy mga hiyas sa espiritu santo sa Dios nga maoy gisul-ob ni Jesu Cristo diha sa iyang pagpakabuhi niining kalibutan, ug mao usab ang mga hiyas nga iyang gipasunod sa iyang mga apostoles sa pagsangyaw nila niining tinago nga kamatuoran sa panahun ni Jesu-Cristo.

Atong mapalandungan nga ingon diay niana ang gustong ipasabot sa Dios nga maoy buhaton sa iyang mga katawhan sa ilang pagpakabuhi niining kalibutan. Kay para sa Dios ang tawo maoy panaka-pinalangga niya nga nilalang nga iyang gihimo dinhi sa ibabaw sa kalibutan. Ug diin tungod sa daghang mga kasal-anan sa tawo gipakanaog sa Dios ang iyang bugtong anak aron sa pagluwas sa atong mga kasal-anan. Nga sa ato pa tungod sa gugma sa Dios kanato Siya pinaagi sa iyang bugtong anak maoy nangita ug nagpaduol kanato.

Ang balaang kasulatan nagaingon, : si Jesus Cristo maoy buhing panagway sa dili makita nga Dios, nga sa ato pa ang Dios ug si Jesus usa ra ug usa kini ka tanghaga nga dili matubag sa tawo kay matod pa, walay tawo niining kalibutan nga gitugotan sa Dios sa pagtugkad sa iyang kaalam.

Maoy tuyo ni Jesu Cristo dili lang sa pagluwas sa atong mga kasal-anan apan ang usa ug importante niya nga tuyo mao ang pagpasabot sa kasugo-an sa iyang Amahan, nga gisangyaw ni Moises sa iyang panahun, ang nabantog nga napulo ka sugo. Diin ang napulo ka kasugo-an sa Dios mahimo lang kini nga Duha ka kasugo-an. Una mao ang Paghigugma sa Dios labaw sa tanan ug dili na magsimba ug laing Dios gawas kaniya. Ikaduha: Higugmaa ang imong isigkaingon sama sa paghigugma nimo sa imong kaugalingon, ug kining duha ka kasugo-an nagpasabot lamang kini sa usa lamang ka kasugo-an, ang paghigugmaay sa usag-usa

Gipakita ni Jesu-Cristo ang sumbanan sa iyang paghigugma kanatong tanan, diin nagpakatawo siya nga kabos ug didto nagpakatawo sa kamaleg sa belen diin ang iyang inahan sa iyang pagmabdos gi-akusahan nga hugaw nga pagkababaye kay nagmabdos man kini nga walay matudlo nga amahan diin niadtong panahuna walay mitoo sa iyang istorya nga ang iyang anak lalang sa espirito santo.

Sa ato pa nagpakatawo si Jesus nga walay garbo o dungog ug walay bahandi nga masandigan. Apan ang balaang kasulatan nagaingon moabot ang Dios diha sa tagsa-agsa nato ka kinabuhi sa paagi nga wala nato damha, ug ang iyang mga pinili ug tinawag nga mga katawhan aduna siyay giandam para kanila. Diha sa ubang sinulat sa Philipos 8~10 nagaingon nga wala niya ipamugos ang iyang pagka Dios hinunu-a, nagapakaulipon siya sa iyang maga katawahan, pinaagi sa pagsangyaw sa maayong balita ug sa pagbuhat ug mga milagro ngadto sa masakiton.

Iyang gihalad ang iyang lawas ug dugo didto niadtobg krus sa kalbaryo tungod sa gugma kanatong mga katawhan, tingali sa pagapakamatay para sa kaluwasan sa mga binuhat nga imong gihigugma, masabtan nato kini apan ang pagpakamatay usab alang sa kaluwasan niadtong mga katawhan nga naglutos kaniya , dili gayud nato kini masabtan. Nga sa ato pa ang gugma gipakita sa Dios kanato nga iyang mga katawhan mao kini gitawag sa inengles nga “unconditional love”, o gugma nga walay kaping kabubut-on.

Kay para sa Dios dili dautan ang matag tawo kay kitang tanan nahiabot niining kalibutan, sebo man sa iyang kabubut-on o nag-agi sa iyang pagbuot, ug kun dunay dautan dili ang tawo kundili ang iyang binuhatan, ug dautang binuhatan dili kana iya sa Dios, iya kana sa dautang espiritu.

Nga sa ato pa ato lang mapakita ang gugma ngadto sa atong isigkatawo kun kalimtan ug tumban nato ang atong garbo ug maoy ipakita ang pagtulun-an sa espiritu santo sa Dios nga maoy gustong isul-ob ni Jesus Cristo sa iyang mga sumosunod.

Apan ang buhing pulong sa Dios nagaingon nga ang tawo bisan unsaon pa niya makasasala gayud siya kay tawo pa man kita, makasala kita sa pulong , sa huna-huna ug sa buhat, nan walay laing sulbad aron madaug nato ang kasugo-an sa Dios nga mao ang paghigugma sa usag-usa gawas lamang sa mga pag-ampo, ihalad ug iampo ang tanan ngadto sa Dios Amahan. Kay Ang Dios lamang ang makapausab sa dagan sa hitabo dinhi sa kalibutan diin ang imposible mamahimong posible.