Ang Atong Pagkabanhaw

1 CORINTO 15:12~34

12 Busa, kon giwali nga si Cristo nabanhaw sa minatay unsaon man sa uban pag-ingon nga walay pagkabanhaw? 13 Kon wala pay pagkabanhaw, si Cristo wala unta mabanhaw. 14 Kon si Cristo wala mabanhaw, ang among giwali kawang ingon man ang inyong pagtoo. 15 Nasaksi ta nga bakakon ang Diyos; ug nagmatuod nga ang Diyos mibanhaw ni Cristo, apan wala diay, kon ang patay dili mabanhaw. 16 Kon ang patay dili mabanhaw, si Cristo wala sab mabanhaw. 17 Kon si Cristo wala mabanhaw, kawang ang inyong pagtoo. Naa gihapon mo sa sala. 18 Ang nakatulog na diha ni Cristo wala sab maluwas. 19 Kon naglaom ta ni Cristo ini lang nga kinabuhia, labing alaot ta sa tanang tawo.

• 20 Apan si Cristo nabanhaw gyod sa minatay. Siya ang una, ug ang unang bunga sa nangamatay. 21 Sanglit miabot ang kamatayon pinaagi sa usa ka tawo, sa usa pod ka tawo miabot ang pagkabanhaw sa minatay. 22 Ingon nga ang tanan namatay diha ni Adan, diha sab ni Cristo ang tanan makadawat og kinabuhi, 23 ang matag usa hinuon sa kaugalingong panahon. Una si Cristo unya, ang iyang katawhan, sa iyang pagbalik.

24 Sa pagkahuman moabot ang kataposan, kon ikatugyan ni Cristo ang Gingharian sa Diyos ngadto sa Amahan inigkagun-ob sa tanang kamandoan, awtoridad ug kagahoman. 25 Kay maghari siya hangtod nga ikabutang niya sa iyang tiil ang tanang kaaway 26 ug magun-ob niya ang kamatayon. 27 Kay sumala sa Kasulatan:ang Diyos nagbutang sa tanan ubos sa iyang tiil. Sa pag-ingon nato, ang tanan, klaro kaayo nga gawas ni sa Amahan nga nagbutang sa tanan ubos niya. 28 Diha nga gibutang sa Amahan ang tanan ubos niya, ang Anak pod mipahimutang sa iyang kaugalingon ubos sa nagdumala sa tanan. Sa ingon, ang Diyos mahimo nga tanan diha sa tanan.

29 Kon dili, unsay buhaton sa gibunyagan sa ngalan sa mga patay? Kon ang minatay dili mabanhaw, nganong buot silang bunyagan alang sa patay? 30 Ug kami, nganong kanunay man namong gibutang sa piligro ang kinabuhi? Ang kamatayon adlaw adlaw kong kauban. 31 Ako ning gipahayag tungod sa akong kalipay alang ninyo diha ni JesuCristo nga atong Ginoo. 32 Kon nakigbisog ko sa mga ihalas nga mananap sa Efeso sumala sa tawhanong interes lang, unsay akong makuha kon ang minatay dili mabanhaw? Mangaon ta ug mag-inom, kay ugma mangamatay na ta! 33 Ayaw mog palingla. Ang daotang pagbinayloay sa hunahuna makadaot sa maayong pamatasan. 34 Pagmata mo sa katarong ug ayawg pakasala. Ang pipila ninyo ignoranti kaayo bahin sa Diyos. Ako ning gisulti aron maulawan mo.

PAGPAAMBIT SA MENSAHE:

Ang maong ebanghelyo naghisgot diha sa atong pagkabanhaw, diin matuod nga nga adunay pagkabanhaw, diin mao kini ang kamatuoran nga gipadayag ni Jesus diha sa pagpakamatay diha sa krus diin diha sa ikatulo ka adlaw nabanhaw siya gikan sa mga patay. Siya ang una nga binuhat nga nabanhaw diha sa kasaysayan sa balaang kasulatan. Apan ang iyang pagkalabanhaw nagdala ug kadaugan, kay mao man kadto ang gitahas sa iyang Amahang Dios. Diin matod pa diha sa iyang pagkamatay nianang krus namatay kita uban kaniya ug namatay usab ang atong mga sala, apan sa iyang pagkabanhaw, nabanhaw usab kita uban kaniya apan nagpabilin nga patay ang atong mga sala. Nan sa ato pa mga igsoon kun gidawat ug gipapuyo mo si Jesu Cristo diha sa imong kasing-kasing nan nabanhaw ka usab uban kaniya.

Sa ato pa ang pagkabanhaw nga gihisgutan diha niining maong ebanghelyo dili ordinaryo nga pagkabanhaw kundili usa ka espirituhanon nga pagkabanhaw, pagkabanhaw gikan sa usa ka makasasala ngadto sa usa ka matuod nga kristuhanon diin nagasunod sa mga kasugo-an ug kabubut-on sa Dios. Kay matod pa usab diha sa ubang sinulat nagaingon nga ayha na kita magpuasa sa dihang mibalik na si Jesu Criso ngadto sa iyang Amahang Dios diin mao kini ang paglikay nato sa pagpakasala diin ibalaan nato ang atong kaugalingon aron dili masayang ang pagkamtay ni Jeus Cristo diha sa krus ug labaw sa tanan dili masayang ang pagbanhaw kanimo gikan sa imong mga sala,

Gibag-o na ni Krsito ang imong kinabuhi diin mahal ang lukat niya kanato kay gihalad man niya mismo ang iyang lawas ug dugo. Apan lagi kay ang tawo matod pa makasasala man gayud pinaagi diha sa atong huna-huna, sa pulong ug sa buhat nan nabanhaw ka apan wala pay siguro ang imong kaluwasan ang kaluwasan diha sa imong kalag, kay matod pa temporaryo lamang kita niining kalibutana, ug aduna pay kinabuhi labaw niini nga kinabuhi diin mao kadto ang katumanan diha sa atong kaluwasan ang matuod nga pagkabanhaw diin himayaon ka didto sa gingharian sa Dios.

Nan sa ato pa wala nay panahun kun didto kana maghinulsol sa laing kalibutan , diin dako na ug kakulangon sa imong pagkatawo diin matod pa diha sa imong pagpauli sa matuod nga kalibutan ug matuod nga kinabuhi mabahin bahin ang imong pagkaikaw, ang imong lawas magpabilin dinhi sa yuta ug mobalik sa abog ug ang imong espiritu maoy mobalik sa Dios diin maoy magasumbong sa imong mga ksal-anan niadtong nagkinabuhi kapa. Ug ang imong kalag maoy mopadayun ngadto sa laing kalibutan diin maoy magahulat sa kataposang paghukom ug maoy tagaan o sul-oban sa espiritu mong lawas diha sa imong pagkabanhaw.

Kamatuoran lamang ang ginaingon diha sa balaang kasulatan nga nagaingon, “ Kun gusto nimong daygon ug himayaon ddto sa gingharian sa langit nan puy-I ang kinabuhi nga puno sa pagpaubos ug puno sa mga paglutos dinhi sa yuta, diin bulahan ka nga nakaambit diha sa mga paglutos ug mga kasakitan ni Jesu Cristo didto niadtong krus, Kay makaambit ka usab sa himaya sa iyang pagkabanhaw didto sa iyang gingharian sa langit.