Ang Sambingay Mahitungod Sa Biyuda Ug Maghuhukom

LUCAS: 18: 1~8

18 • 1 Pinaagig sambingay gisultihan sila ni Jesus nga kinahanglang mag-ampo kanunay ug dili kawad-ag kadasig. 2 Matud pa niya: “May huwes sa usa ka syudad nga walay kahadlok sa Diyos, ug wala magtagad sa katawhan. 3 Ug may byuda nga naghangyo niya: ‘Hatagi kog hustisya batok sa akong kaaway.’ 4 Dihay panahon nga wala siya motugot, apan sa kataposan nahunahunaan niya: ‘Tinuod nga wala koy kahadlok sa Diyos ni pagtagad sa tawo, 5 apan hatagan ko gihapon og hustisya kining byudaha, kay gisamok ko niyag maayo sa pagpunayg balik. Tingalig mabuang ko tungod niya.”

6 Ug si Jesus mipadayon sa pag-ingon: “Pamatia ang gisulti sa dili makataronganong howes. 7 Dili ba, ang Diyos naghatag man sa hustisya sa nagsangpit niya adlaw ug gabii bisag magdugay siyag tubag nila? 8 Ingnon tamo, dihadiha hatagan silag hustisya. Apan sa pag-abot sa Anak sa Tawo, makakita kaha siyag pagtoo dinhi sa yuta?”

PAGPAAMBIT SA MENSAHE:

Ang maong ebanghelyo maoy pagpasabot lamang diha sa kabubut-on sa Dios diin diha niining maong ebanghelyo naga-ingon nga ang maong maghuhukom misugot sa hangyo sa maong biyuda tungod sa kahadlok nga madaut na hinon ang iyang pinsada kun sigihan siya ug duol sa among binuhat diin kini magpatabang sa iyang problema, diin ang ma-ong biyuda nangayo ug pabor nga mapanalipdan ang iyang katungod sa maong Huwes.

Diin diha sa kataposang bahin sa ebanghelyo nagaingon nga inigbalik sa Diyos kitang tanan makaambit gayud sa makiangayon nga paghukom apan ang pangutanan nga aduna pa ba kahay motuo sa Diyos sa higayon sa iyang paghibalik. Ginaingon diha sa ubang sinulat nga ang paghukom iya lamang sa Diyos, ug walay binuhat niining kalibutan nga iyang gitugotan sa paghukom sa iyang isigkatawo.

Apan ang Diyos mipatalinghog o mirespeto sa balaod niining kalibutan nga sa ato pa kining mga paghukom o mga maghuhukom sama sa gihisgutan niining ebanghelyo , iya lamang sa balaod sa tawo ug wala maga-agi sa panalangin sa Diyos apan matod pa iyang kabubut-on nga adunay mga paghukom nga kalibutanon kay usa kini sa pag-ayag sa iyang mga katawhan ug usa usab kini ka paagi sa pagsukod sa iyang mga pinili nga katawhan, ug ang labing ulahi mao nga gituyo kini sa Diyos isip usa ka paagi sa pagsilhig sa kalibutan.

Ang pamalaod sa tawo sukad pa niadtong panahun ni Kristo o niadto pang panahun ni Moises adunay kalambigitan ang balaod sa Diyos tungod kay halos tanan nga balaod ilabina niadtog panahun sa mga pariseo ug sa panggobyerno sa mga Judio, kinutlo kini gikan sa mga balaod nga gisangyaw ni Moises, apan lagi ang tawo adunay kagawasan diha sa pagbugtaw sa kaugalingon nga kaalam uban usab sa gahum nga iya sa panggobyerno ug sa gahum sa sa ilang pagtulun-an nan nahimo nga kumplikado ang balaod nga tawhanon

Diin matod pa sa kanunay mabintaha-an gayud kadtung walay mga tawhanon nga kaalam ug kadtong mga kabos, kay wala man silay salapi nga sarang ikasuhol niadtong mangabugar diha sa pagpanalipod kanila, apan matod pa lagi kining tanan, kabubut-on sa Diyos isip hinay-hinay usab nga pagsilhig sa mga malapason.

Dinhi sa atong nasod sa Pilipinas diin gitawag kini nga demokrasya nga panggobyerno , ug ang balaod sa demokrasya, gipanday sa mga tawo para sa mga tawo ug alang usab sa katawhan ug diin diha mga paghukom nga tawhanon inosente ug ipamatuod nimo kini sa labawng hukmanan, diin aduna kay manabugar kanimo, diin pinaagi usab diha sa balaod sa pamulis naay gitawag nga “ignorance of law excuses no one” nga sa ato pa bisan inosente ka o wala makahibalo sa maong balaod nga imong nasupak apan ikaw silotan gayud sumala sa gimbut-an sa maong balaod. Apan lahi ang balaod sa Diyos diin iyang gipasinati diha niining atong pagtulun-an nga gibarugan diin bulahan kadtong mga tawo nga anaa nahisalaag diha sa kangitngit kay ang Diyos aduna pay giandam nga pasaylo alang kanila, apan kita nga iyang mga katawhan nga nahibalo ug nasayod niining maong pagtulun-an apan sa higayun nga motalikod kita niini, nan wala nay pasaylo ang Diyos para kanato.

Apan niining higayuna, diin 2000 na katuig ang milabay sukad sa pagkatawo ni Jesus, sa gihapon ang Diyos halu-ag pa ang pasaylo kanatong tanan, diin pinaagi diha sa atong pagpangayo ug pasaylo ug kinasing-kasing nga mga pag-ampo, ang tanan natong mga sala magamay o madako adunay kapasaylo-an, kay matod sa Amahang Diyos nganong dili ko man ihatag kun kini kaayuhan man. Apan sa higayun unya nga mobalik na ang anak sa Diyos, nan wala nay pagpasaylo nga mahitabo diin kitang tanan maga-atubang sa kataposang paghukom sebo usab sa atong binuhatan.

Kamatuoran lamang mga igsoon ang nahasulat diha sa balaang kasulatan nga nagaingon, nga ang kaluwasan ngadto sa kinabuhing dayun nga gisaad ni Jesu Cristo dili kini premyo o ganti tungod sa maayong binuhatan, kundili usa kini ka grasya, o gasa nga hinatag sa Diyos, aron sa ingon walay si bisan kinsa nga magapasigarbo diha sa atubangan sa Diyos nga siya maluwas gumikan sa iyang maayong buhat, kundili ang kaluwasan ngadto sa kinabuhing dayun naga-agad sa grasya ug kalooy sa Diyos.