Ang Sambingay Bahin Sa Dato Nga Buang-Buang

LUCAS 12:13~21

13 Unya, usa sa kauban nila misulti ni Jesus: “Ginoo, sugoa ang akong igsoon sa paghatag nakog bahin sa kabilin sa among amahan.” 14 Mitubag siya: “Akong higala, kinsay nagtudlo nako nga imong maghuhukom?” 15 Miingon si Jesus sa katawhan: “Pagbantay mo ug likayi ang tanang matang sa hinakog. Bisag daghan mog kabtangan, ang inyong kinabuhi wala mag-agad ini.”

16 Mipadayon si Jesus pagsultig sambingay: “May dato nga daghag naani. 17 Nakahunahuna siya: ‘Unsay buhaton ko? Kulang ang akong kamalig alang sa ani.’ 18 Busa, nagplano siya: ‘Gub-on ko ang akong mga kamalig. Magtukod kog mas dagko pa kaayong kabutangan sa tanan kong abot. Mao ni ang akong bahandi. 19 Makaingon na unya ko sa akong kaugalingon:

Higala, daghan ang maayong butang nga imong natigom alang sa daghang katuigan. Pahuway, kaon, inom ug paglipay!’ 20 Apan miingon ang Diyos: ‘Buangbuang! karong gabhiona mamatay ka. Ambi, kinsay makasunod sa tanan mong natigom:’ 21 Kini ang sangpotan sa nagtumpitumpi sa katigayonan, apan wala madato alang sa Diyos.”

PAGPAAMBIT SA MENSAHE:

Ang maong ebanghelyo maoy pagpasabot lamang nga ang bahandi nga iya niining kalibutana dinhi lang kana sa kalibutan, diin ang Diyos nagaingon nga ang unang misyon sa tawo sa pagkinabuhi dinhi sa kalibutan mao gayud ang pagahin ug oras ug panahun alang sa Diyos ug sa mga pag-ampo

Diha sa ubang sinulat nagaingon, Unsa may maarang sa tawo diin diha sa iyang pagkatawo dinhi sa kalibutan hubo man siya sa bahandi ug diha unya sa iyang pagtalikod niining kalibutana biyaan man usab niya ang tanang bahandi.

Ang maong ebangheyo mga igsoon nagpasabot lamang mga igsoon nga kun magpakadato kita diha sa mga bahandi niining kalibutana, nan walay pulos kun wala nato maandam ang atong kaugalingon alang sa himaya sa Diyos.

Ang balaang kasulatan nagaingon nga ayaw pagtigom ug bahandi niining kalibutana diin pagakutkuton lamang sa taya ug pagasak-on lamang sa kawatan, mas maayo nga magtigom ka ug bahandi nga iya sa Diyos ang bahandi nga dili makita ug mahikap. Diin maoy bahandi nga imong mabitbit didto sa iyang gingharian sa langit.

Ang mga pag-ampo ug mga pangaliya diin maoy atong komunikasyon ngadto sa atong langitnong Amahan. Diin mao kini ang proteksyon sa atong kalag ug makapalig-on sa atong espirito diha sa atong pagsunod sa kasugo-an sa Amahan.

Ang balaang kasulatan nagaingon kun asa gani ang imong bahandi nan atua usa ang imong kasingkasing, nan kun ang imong bahandi dinhi lang sa kalibutan nan dinhi kalang usab kutob sa kalibutan, paningkamuti ang pagtigom sa bahandi nag langitnon aron mao kini ang panalipod sa imong kalag inig-abot unya nga mobiya kana dinhi sa walog sa mga buhi ug mahi-usa diha sa pagkinabuhi nga minando-an sa espiritu sa Diyos.