Ang Sambingay Mahitungod Sa Kwarta Nga Bulawan

LUCAS 19:11~27

• 11 Nagkaduol na si Jesus sa Jerusalem. Nagtoo ang mga nanguyog nga mopadayag na siya sa Gingharian sa Diyos. Samtang namati sila, misulti si Jesus og laing sambingay: 12 Miingon siya: “May bantogang tawo nga mipanaw sa layo kaayong kayutaan aron mapiling hari. Mobalik siya inigkahuman. 13 Iyang gitawag ang 10 niya ka sulugoon, gihatagag 10 ka salapi ang matag usa ug giingnan: Inegosyo ni hangtod sa akong pagbalik. 14 Naligutgot niya ang mga lungsoranon. Busa, nagpadala silag mensahe alang niya: ‘Dili mi buot nga magmando namo kining tawhana.’

15 Apan bisan pa ini, mibalik siya sa napili na siyang hari. Gipatawag niya ang 10 ka sulugoon nga gihatagan sa 10 ka salapi aron masayrag pilay naganansya sa matag usa. 16 Miatubang ang una ug miingon: ‘Ginoo, nakaganansyag 10 ang salapi nga imong gihatag.’ 17 Mitubag siya: “Maayo, buotang sulugoon! Kay nagmatinud-anon ka man sa gamayng butang, magdumala ka sa 10 ka syudad.” 18 Miabot ang ikaduha ug miingon: ‘Ginoo, nakaganansyag lima ang imong salapi.’ 19 Miingon ang agalon: ‘Magdumala ka sa lima ka syudad.
’
20 Miabot ang usa pa ug miingon: ‘Ginoo, nia ang imong salapi nga akong giputos sa panyo ug gitipigan. 21 Nahadlok ko, kay kutikutihan kang pagkatawo, mangobra sa wala mo ideposito ug mangani sa wala itanom.’ 22 Giingnan siya sa agalon: “Walay hinungdan nga sulugoon, hukman tikaw sa kaugalingon mong pulong. Nasayod ka man diay nga kutikutihan ko, nga mangobra sa wala ko ideposito ug mangani sa wala itanom, 23 nganong wala man nimo gipautang ang akong salapi? Makakobra unta ko ini apil ang tubo sa akong pagbalik. 24 Giingnan niya ang nanambong: ‘Kuhaa kaniya ang salapi ug ihatag sa may 10.’ 25 Mitubag sila: ‘Apan, Ginoo, may 10 na siya.’


26 Sultihan tamo: Ang duna hatagan pa og daghan; ug ang wala kuhaan, bisan ang naa na niya. 27 Dad-a nganhi ang akong mga kaaway nga dili buot nga maila kong hari ug patya sila sa akong atubangan.”

PAGPAAMBIT SA MENSAHE :

Ang maong ebanghelyo maoy pagpasabot lamang diha sa atong mga tahas sa usag-usa kanato, diin ang una gayong tahas sa tawo diha sa iyang pagpakabuhi dinhi sa kalibutan mao gayud ang paggahin ug panahon pinaagi sa pag-ampo ngadto sa Diyos.

Ang atong langitnong inahan diha sa iyang milagro nga gipakita didto sa Fatima, Portugal kaniadtong May 13, 1917 nagaingon diha sa iyang mga mga mensahe nga kamatuoran nga adunay impyerno ug kamatuoran nga adunay kinabuhi human sa kamatayon.

Busa katungdanan gayud sa matag magtutuo ang pagsangyaw sa kamatuoran nga iyang nakaplagan ngadto sa iyang pamilya ngadto sa iyang mga igsoon ug sa komunidad nga iyang gibarugan.

Apan tulobagon usab sa usa ka magtutuo kun dunay kalag nga natunaw didto sa kalayo sa impyerno tungod lamang kay wala niya masangyawe sa maayong balita, Apan bulahan usab diha sa imong pagsangyaw niining maong pagtulon-an nga imong gibarugan diin adunay naluwas nga mga kalag kay sama ra man unya nga ang imong kalag ang imong naluwas.

Mga igsoon ang ebanghelyo maoy pagpamalandong lamang diha sa tagsa-tagsa kanato ka tulobagon ngadto sa Diyos, diin atong isangyaw ang iyang pagtulon-an pinaagi diha sa pagsugod mismo sa imong kaugalingon. Diin atong ipakita nga atong gipahari si Jesu - Cristo diha sa atong kinabuhi.

Ang pangutana… Unsaon man pagpahari Si Jesu Cristo diha sa tagasa-tagsa nato ka kinabuhi, nan igsoon isulo-ob ang iyang kinaiyahan ang kinaiyahan sa espirito santo sa Diyos, diin anaa ang pagpaubos, pagkamangindawaton ug labaw sa tanan ang kanunay nga mga pag-ampo.

Barogi ang bug-os nga pagtuo diha sa pagtulon-an nga imong nakaplagan, diin ang Diyos nagaingon mahibaw-an ninyo kun ako kining pagtulon-an kay makaambit gayud kamo sa mga paglutos.

Ang balaang kasulatan nagaingon nga kun gusto nimong daygon ug himaya-on didto sa ginghari-an sa langit nan puy-i ang kinabuhi nga puno sa pagpa-ubos ug tun-i ang pagdawat sa mga paglutos, dangop kanunay sa mga pag-ampo, pas-ana ang imong krus sa kinabuhi ug sunod sa pagtulon-an nga gisangyaw ni Jesus.

Kay bulahan ka nga makaambit diha sa mga kasakitan sa pagpas-an ni Jesu Cristo sa iyang krus didto sa kalbaryo kay maka-ambit ka usab sa himaya sa iyang pagkabanhaw didto sa iyang gingharian sa langit.