Ang Sambingay Mahitungod Sa Maayong Samariahanon

LUCAS 10: 25~31

25 May magtutudlo sa Balaod nga mibarog aron pagbitik ni Jesus. Miingon siya: “Magtutudlo, unsay buhaton ko aron pagbaton og kinabuhing walay kataposan?” 26 Mitubag si Jesus: “Unsay nasulat sa Balaod, ug giunsa mo pagsabot?” 27 Mitubag ang magtutudlo sa Balaod: “Higugmaa ang Ginoo nga imong Diyos sa tibuok mong kasingkasing ug sa tibuok mong kalag ug sa tibuok mong kusog ug sa tibuok mong hunahuna.” Nasulat sab: “Higugmaa ang imong silingan ingon sa kaugalingon.” 28 Miingon si Jesus: “Husto ang imong tubag. Buhata ni ug mabuhi ka.” 29 Apan buot mangatarongan ang magtutudlo busa, miingon siya ni Jesus: “Kinsay akong silingan?”

30 Mitubag ni Jesus: “May tawong milugsong gikan sa Jerusalem ngadto sa Jerico ug nahulog sa kamot sa mga tulisan. Gihuboan siya, gikulata dayon, gibiyaang himatyon. 31 Naatol sab nga naglugsong adtong dalana ang usa ka pari. Sa pagkakita niya sa tawo, misimang siya sa dalan. 32 May Levita pod nga milabay. Dihang nakita niya ang himatyon misimang pod siya sa dalan.

33 Apan may taga Samaria nga nagpanaw ug milabay sa nahimutangan sa himatyon. Sa pagkakita niya sa tawo, naluoy ug 34 miduol siya. Gibuboag lana ug bino ug gibugkosan niya ang mga samad. Gipasakay niya ang himatyon sa iyang hayop, gidala sa abtanan ug giatiman. 35 Sa sunod adlaw, mikuha ang Samariyanhon og duha ka denaryo, gihatag sa tag-iya sa balay ug miingon: ‘Atimana siya; bayran ko ang dugang nga gastos sa akong pagbalik.’” 36 Unya, miingon si Jesus: “Sa imong pagtoo, kinsa nila ang silingan sa nahulog sa kamot sa mga tulisan?” 37 Mitubag ang magtutudlo: “Ang naluoy niya.” Busa, miingon si Jesus: “Lakaw ug buhat sa ingon.”

PAGPAAMBIT SA MENSAHE:

Ang maong ebanghelyo nagpamatuod lamang nga kitang tanan igsoon atubangan diha kang Cristo Jesus. Diin kitang tanan nga giisip sa Diyos Amaahn nga igsoon ni Jesu Cristo kung gidawat nato si Jesus nga atong manlulawas ug bugtong anak sa Diyos.

Mao kini ang nagalangkob diha usa sa duha ka nag-unang mahinundanong sugo sa Diyos : Ang paghigugma sa imong isigkatawo sama sa paghigugma nimo sa imong kaugalingon , diin ang nahaunang sugo mao man ang Paghigugma sa Diyos labaw sa tanan ug dili kita magbaton ug laing Diyos gawas Kaniya. Diin asa niining duruha ka sugo ang imong masupak nan sama ra nga nasupak nimo ang tanang kasugo-an sa Diyos nga gisangyaw ni Moises.

Igsoon ang balaang kasulatan nagaingon diha sa 1 Corinto 3:16~17, Ang lawas sa tawo maoy templo sa Diyos ug ang mopasipala sa iyang templo iya gayung pagalaglagon. Nan nagpasabot lamang nga sa mata sa Diyos iya kitang templo ug ang Diyos nagapuyo diha sa tagsa-tagsa kanato. Diha sa ubang sinulat nagaingon usab nga ang imong gibuhat diha sa pinakaubos nga binuhat dinhi sa ibabaw sa kalibutan mao usab ang imong gibuhat ngadto sa Diyos.

Igsoon ayaw usiki ang gasa nga gipa-abot sa Diyos kanato ang gasa diha sa kamatuoran ngaa imong nakaplagan diin bisan pa sa tanan ang Diyos nagahatag gihapon kanimo ug kagawasan, gawasnon kita sa pagbuhat sa atong buhaton apan ayaw abusohi ug ayoha pagamit ang imong gasa kay ang tanan adunay kinutoban, nga matod pa kun puno na ang gantangan nan kalison gayud kini. Ayaw papa-abota nga tawgon ka pag-utro sa Diyos pinaagi sa laing balatian.

Matod pa ang ikaduhang pagtawag kanimo sa Diyos maoy ikaduhang pagpahimangno nga ikaw tawo tinawag ug pinili sa Diyos apan kinahanglan nga diha sa imong pagkapinili, imong tun-an ang bulohaton didto sa iyang gingharaian sa langit , ang pagsimba didto sa langit diin dinhi sa kalibutan, ang pagsimba sa Diyos maoy paghatag ug kalig-on sa imong kalag ug espiritu aron molahutay ka sa tanang pagsulay diin malig-on ang imong panumduman ug kasing-kasing ug sa kanunay magasunod sa iyang kasugo-an.