Si Jesus Ang Pan Nga naghatag Ug Kinabuhi

JUAN 6: 25~59

25 Dihang nakita nila siya sa tabok sa lanaw, nangutana sila, “Maestro, kanus-a ka miabot?” 26 Si Jesus mitubag: “Sultihan tamo, gipangita ko ninyo dili tungod sa mga milagro nga akong nahimo kondili, tungod sa pan nga inyong nakaon nga nakabusog ninyo. 27 Paghago mo, dili alang sa kalan-on nga madunot kondili, sa molungtad ug makahatag sa kinabuhing dayon. Ang Anak sa Tawo mohatag ini kaninyo kay ang gipatikan sa Diyos nga Amahan
.

28 Gipangutana siya sa mga Judio, “Unsay among buhaton? Unsay ipabuhat kanamo sa Diyos?” 29 Mitubag si Jesus, “Nga motoo mo sa iyang gipadala.” 30 Busa, miingon sila, “Pakitaa mig mga kahibulongan aron makatoo mi. Unsay imong timailhan? 31 Ang among katigulangan nangaog manna sa kamingawan. Sumala sa kasulatan, Gihatagan silag pan gikan sa langit nga ilang makaon”.

32 Si Jesus miingon, Sultihan tamo, dili si Moises ang mihatag og pan gikan sa langit. Ang Akong Amahan naghatag ninyo sa tinuod nga pan. 33 Ang pan nga gihatag sa Diyos mao Siya nga nanaog gikan sa langit ug naghatag og kinabuhi sa kalibotan.” 34 Busa, miingon sila, “Ginoo, hatagi mi kanunay sa maong pan.”

35 Si Jesus miingon, “Ako ang pan nga naghatag og kinabuhi.” Ang moduol nako dili na gutomon ug uhawon. 36 Apan sumala sa giingon ko na, nakakita na mo, apan midumili mo pagtoo. 37 Gani ang gihatag kanako sa akong Amahan moari nako, ug ang moari nako dili ko isalikway. 38 Kay nanaog ko gikan sa langit dili aron pagbuhat sa akong kabubut-on kondili, sa kabubut-on sa nagpadala nako. 39 Ang kabubut-on sa nagpadala nako mao nga dili ko kawad-an bisag usa sa iyang gihatag nako hinunoa, banhawon ko kini sa kataposang adlaw. 40 Kini ang kabubut-on sa akong Amahan, Ang makakita sa Anak ug motoo niya makabaton sa kinabuhing dayon, banhawon ko siya sa kataposang adlaw.”

41 Ang mga Judio nagbagulbol, kay miingon si Jesus, “Ako ang pan gikan sa langit.” 42 Miingon sila, “Dili ba, si Jesus man siya, ang anak ni Jose? Dili ba, kaila man nato ang iyang amahan ug inahan? Nganong miingon man siya nga gikan siya sa langit?” 43 Mitubag si Jesus ug miingon, “Ayawg bagulbol. 44 Walay makaduol nako gawas kon dad-on siya sa Amahan nga nagpadala nako, ug ban-hawon ko sila sa kataposang adlaw. 45 Nasulat sa mga propeta, Tudloan silang tanan sa Diyos. Busa, ang mamati sa Amahan ug makat-on gikan niya, moduol nako
.
46 Walay nakakita sa Amahan gawas sa gikan sa Diyos. Siya ray nakakita sa Diyos. 47 Sultihan tamo, ang motoo nako may kinabuhing dayon. • 48 Ako ang pan sa kinabuhi. 49 Mikaon sa manna ang inyong katigulangan, apan nangamatay sila. 50 Ania ang pan gikan sa langit. Ang mokaon ini dili mamatay. 51 Ako ang pan sa kinabuhi gikan sa langit. Ang mokaon ini mabuhi sa kahangtoran. Ang pan nga akong ihatag mao ang akong unod aron mabuhi ang kalibotan.

52 Naglalis ang mga Judio ug miingon, “Unsaon man ining tawhana paghatag sa iyang unod aron kan-on? 53 Miingon si Jesus “Sultihan tamo, kon dili mo mokaon sa unod sa Anak sa tawo ug moimnon sa iyang dugo, dili mo makabaton sa kinabuhi. 54 May kinabuhing dayon ang mokaon sa akong unod ug moinom sa akong dugo. Banhawon ko siya sa kataposang adlaw.

55 Ang akong unod tinuod nga kalan-on ug ang dugo tinuod nga ilimnon. 56 Ang mokaon sa akong unod ug moinom sa akong dugo magpuyo dinhi nako ug ako diha niya. 57 Ingon nga ang Amahan nga mao ang kinabuhi, nagpadala nako ug nagkinabuhi ko diha niya, sa samang paagi, ang mokaon nako mabuhi. 58 Kini ang Pan nga gikan sa langit, lahi sa pan nga gikaon sa inyong katigulangan nga nangamatay. Ang mokaon sa maong pan mabuhi sa kahangtoran.” 59 Kini ang gisulti ni Jesus sa Cafarnaum sa pagtudlo niya sa sinagoga.

PAGPAAMBIT SA MENSAHE:

Ang maong ebanghelyo maoy pagpasabot lamang nga ang tawo dili mabuhi diha sa tawhAnon nga pagkaon lamang, gikinahanglan nato usab ang pagkaon para sa atong kalag ug espiritu. Ang espirituhanon nga pagkaon para sa atong kalag, diin mao kini ang kahulugan diha niining maong ebanghelyo karon, Si Jesu-Cristo ang pan nga naghatag ug kinabuhi…Ang kinabuhing dayon mga igsoon.

Kay matod pa dili kini lamang nag kinabuhi ang atong pagapuy-an, diin aduna pay kinabuhi human niining kinabuhi-a dinhi sa kalibutan, ang kinabuhi nag minando-an sa espiritu santo, ang kinabuhi diin atong gikinahanglan ang kaluwasan diha sa kinabuhing dayun, Mao kini ang pan diin si kinsa man ang makakaon niini dili na gayud gutumon hangtod sa hangtod.

Igsoon hinuktuki, kun asa ang bililhon, ang pagkinabuhi ba nga hupong sa tanang bahandi dinhi sa kalibutan apan walay kasiguro-an ang imong kalag didto sa kinabuhing dayon nga gisaad ni Jesus o sa magpakabuhi ka nga daw sa langyaw niining kalibutana apan haom didto sa gingharian sa Diyos.

Igsoon ang pulong sa espiritu santo nagaingon, pinaagi sa balaang bata senyor santo niño “ Kun nasayod palang unta kamo kun unsay atua didto sa gingharian sa langit nan dili na unta kamo mangandoy pa ug dugang bahandi ni-ining kalibutana, nan biyaan na unta ninyo ang tanan ug maoy inyong siguroon kun unsaon paghiabot didto sa gingharian sa Diyos.