Ang Pagkahimong Apostol Ni Pablo

GALACIA 1: 11~24

• 11 Buot ko nga magpahinumdom ninyo, mga igsoon, nga ang Ebanghelyo nga among giwali dili tawhanong mensahe; 12 wala mi makadawat ni makakat-on ini gikan sa tawo, hinunoa, sa pagpadayag ni Cristo Jesus. 13 Nakadungog mo sa akong pagkinabuhi kaniadto, sa sakop pa ko sa Judiong katilingban. Gigukod ko sa kapintas ang Simbahan sa Diyos ug gipaningkamotan nga maguba ni. 14 Labaw pa ko ka-deboto sa Judiong tinoohan kay sa daghang katalirongang Judio. Gilabanan ko ang mga tradisyon sa akong katigulangan. Hilabihan ko kapanatiko.

15 Apan usa ka adlaw gitawag ko sa Diyos tungod sa dako niyang gugma. Gipili ko niya gikan pa sa sabakan sa akong inahan. 16 Nahimuot siya pagpadayag nako sa iyang anak nga ipaila ko sa kanasorang pagano. Wala ko magpakitambag og tawo; 17 ni moadto sa Jerusalem aron makigkita sa mga apostol nga una pa nako. Miadto dayon ko sa Arabia; unya, mibalik sa Damasco. 18 Human sa tulo ka tuig, miadto ko sa Jerusalem aron makigkita ni Pedro nga akong gikuyogan sulod sa 15 ka adlaw. 19 Apan wala koy nakita nga laing apostol gawas ni Jaime, ang igsoon sa Ginoo. 20 Nagsulti ko ining tanan atubangan sa Diyos, ug sayod siya nga matuod ni.

21 Unya, miadto ko sa Siria ug Cilicia. 22 Ang mga simbahan ni Cristo sa Juda wala makaila nako. 23 Nakadungog lang sila: “Ang naggukod nato kaniadto nagwali na sa pagtoo nga buot niyang gun-obon.” 24 Gidayeg nila ang Diyos tungod nako.

PAGPAAMBIT SA MENSAHE:

Ang maong ebanghelyo maoy pagpasabot lamang mga igsoon nga kining maong pagtulon-an nga atong gisangyaw ug gibarugan nagsumikad diha sa unang mga tinawag , sa unang mga apostol. Diin si Pablo maoy usa ka apostoles nga gitawag sa Diyos nga wala mahiapil sa orihinal nga napulo ug duha, diin siya sa wala pa matawag usa ka manlulutos diha sa pagtulon-an nga gibarugan ni Jesu Cristo.

Kini nagpamatuod lamang nga kining maong pagtulon-an nga atong gisunod ug gipasidunggan naga-agi ug daghang mga paglutos, paglutos diha sa pagsangyaw ug diha sa mga katawhan nga nanagsangyaw. Dili usab tiaw ang nasinati ni Pablo diin pinaagi sa milagro sa Diyos ang pagtulon-an nga gusto niyang laglagon kay nahasupak sa doktrina sa Judaism, nahasupak sa balaod ni Moises, nahimo na man usab hinoon siya nga magsasangyaw niini, diin siya maoy gitahasan sa Diyos sa pagsangyaw sa kristiyanismo ngadto sa mga dili Judio ingon nga si Pedro mao usay gitahasan sa pagsangyaw niining maong pagtulon-an ngadto sa mga Judio.

Sa ato pa mga igsoon dili nato mahukman ang atong isigkatawo, sama kang apostol Pablo diin gibantog kini nga berdugo sa mga kristiyanos niadtong maong panahon, diin tungod kini sa iyang kadako sa iyang pagtuo diha sa pagtulon-an nga gisangyaw ni Moises ug ang Diyos nakakita sa mao niyang pagtuo ug siya maoy gigamit sa Diyos sa pagangyaw sa maong pagtulon-an sa upat ka suok sa kalibutan, diin niinining 2008~2009 gisaulog nato ang ika 2000 ka tuig nga kasaulogan ni Pablo nga maisugon nga nagasangyaw sa pulong sa Diyos