Mga Makalilisang Nga Talan-awon

MATEO 24:15~28

15 Kon makita ninyo ang ngilngig nga kalaglagan sa balaang dapit nga gitagna ni propeta Daniel, (ang maka-basa makasabot ra unta!), 16 nan, ang naa sa Juda palayasa sa kabukiran. 17 Kon naa ka sa atop sa balay ayawg kanaog aron pagkuhag bisag unsa nga imong dad-on. 18 Kon tua ka sa uma, ayawg balik aron pagkuha sa imong kupo. 19 Pagkalisod unya sa mga babayeng nagsabak ug sa mga inahan nga may masuso! 20 Pag-ampo nga dili maatol sa tingtugnaw o sa adlaw sa pahulay ang inyong pagkagiw.

21 Kay panahon ni sa dagkong pag-sulay nga wala pa mahibaloi sukad sa sinugdan sa kalibotan hangtod karon ug dili na igdungog pag-usab. 22 Kon dili ni mub-an, walay mahibiling buhi. Apan gipamub-an ni sa Diyos tungod sa Iyang mga pinili. 23 Unya, kon may moingon: ‘Tan-awa! Ania ang Mesiyas! Tua siya didto!’ Ayawg too. 24 Kay ang mga Cristong bakak ug mga mining propeta manungha. Maghimo silag mga milagro ug katingalahan nga sarang makalimbong bisan sa mga pinili sa Diyos, kon mahimo pa. 25 Tan-awa, gitug-anan tamo sa tanan sa wala pa ang panahon.

26 Busa, kon may moingon ‘Tua siya sa kamingawan, ayawg adto.’ Kon moingon sila: ‘Naa siya sa awaawng dapit,’ ayawg too. 27 Kay ang pag-abot sa Anak sa Tawo mahisama sa kilat nga motadlas gikan sa silangan hang-tod sa kasadpan. 28 Nasayod mo sa pa-nultihon: ‘Hain gani ang patayng lawas, adto magpundok ang mga agila.’

PAGPAAMBIT SA MENSAHE:

Ang maong ebanghelyo maoy pagpasabot mga igsoon nga ania na kita sa gitawag nga Armagedon, diin mabasa kini sa Pinadayag 16:16. Apan nagpasabot kini ug mga kagubot, hari batok hari, gingharian batok gingharian ug pagtulon-an batok pagtulon-an diin magkaguliyang na ang mag katawhan sa tibuok kalibutan tungod sa kadaghanan nga walay mga pag-ampo.

Mga igsoon, atong pamalandungan ang atong kaugalingon diin mao na kining panahuna nga lig-onon nato ang atong pagtoo sa pagtulon-an nga atong gibarugan, alimahi sa pag-ampo ang imong kalag ug espiritu ug i-ampo ang imong mga kaigsoonan, kaparyentehan ug mga silingan, Pangayo-a ang giya sa Diyos, pangayo-a ang kalooy sa Diyos kay walay mahimo ang tawo kun kuhaon na gyud kita sa kahitas-an.

Pamalandungi ang mga pagtulon-an nga gisangyaw sa atong katigulangan ug pamalandongi ang pagtulon-an nga imong gibarugan. Hinumdumi lamang mga igsoon nga dili ang atong pagtulon-an maoy makaluwas kanato, kundili ang imong maayong binuhatan ug ang imong hugot nga pagtuo ngadto sa Diyos.

Juan 1: 17 nagaingon nga miabot ang balaod sa Diyos pinaagi kang Moises apan miabot ang grasya ug kamatuoran pinaagi kang Jesu Cristo. Kini nagpasabot mga igsoon nga wala utroha ni Jesus ang balaod ni Moises kundili iya lang gipasabot unsaon pagpahiduol sa gingharian sa iyang Amahan, tinuoray nga naluwas na kita pinaagi sa paglansang niya sa krus apan ang tawo nga nagpabiling buhi makasala gayud sa pulong sa huna-huna ug sa buhat.

Busa igsoon lig-ona ang imong pagtuo niining panahuna, Santiago 2: 26 nagaingon nga ang pagtuo sama sa lawas sa tawo nga patay kun walay espiritu nan ang pagtuo patay usab kun walay maayong binuhatan. Santiago 2: 24 nagaingon nga mas gikahimut-an sa Diyos ang tawo nga adunay maayong buhat kay sa mga tawo nga adunay pagtuo lamang.

Busa mga igsoon barugi ang lig-on nga pagtuo pinaagi sa mga maayong buhat, ipakita ang hiyas nga kristuhanon ug labaw sa tanan isul-ob ang hiyas sa espiritu santo ang hiyas sa pagkamapaubsanon, mapailubon diha sa kanunay nga mga pag-ampo ug pangaliya, ug timan-i ang mga kasugo-an diha sa balaang kasulatan kay walay balaod dinhi sa yuta ug sa langit nga imong masupak kun imong sundon kun unsay nahasulat niining maong basahon nga balaan.