Ang Pagsalig Sa Usa Ka Babaye

MATEO 15: 21~28

21 Dayon si Jesus mibiya adtong dapita ug miadto sa kayutaan sa Tiro ug Sidon. 22 Unya, may babayeng taga Canaan nga miabot ug mituwaw: “Ginoo, anak ni David, kaluy-i intawon ko! Gisakmit sa yawa ang anak kong babaye.” 23 Apan walay gisulti si Jesus. Busa, ang iyang mga tinun-an miduol ug miingon: “Papahawaa siya! Pagka-alingugngog niya nga nagsunod nato.”

24 Unya, si Jesus miingon sa babaye: “Gipadala ko alang ra sa nawalang kar-nero sa Israel.”

25 Apan ang babaye miluhod sa atu-bangan ni Jesus ug miingon: “Ginoo, tabangi ko!” 26 Si Jesus mitubag: “Dili makataronganon ang paglabay sa pagkaon sa mga anak ngadto sa mga iro.” 27 Ang babaye mitubag: “Tinuod na, Ginoo. Apan bisan ang mga iro makakaon sa mumho nga mahulog sa talad sa agalon.” 28 Unya, si Jesus miingon: “Babaye, pagkadako sa imong pagtoo! Mahimo ang imong gipangayo.” Ug ang anak sa babaye naayo adtong gutloa.

PAGPAAMBIT SA MENSAHE:

Ang maong ebanghelyo maoy pagpasabot lamang nga ang pagdungog sa Diyos diha sa atong pag-ampo ug paghangyo nagaagad sa kadako usab sa atong pagtuo sa Diyos. Hebreo 11:1 nagaingon Ang kahulogan sa atong pagtuo mao nga adunay kitay pagsalig sa Diyos nga atong gilaoman apan dili nato Makita.

Matod pa ang atong pagtuo ngadto sa Diyos dili kini masukod pinaagi sa tawhanon nga sukdanan apan masukod kini sa espirituhanon nga sukdanan kay anaa man kini ipahimutang sa Diyos sa atong huna-huna ug kasing-kasing, busa dili nato hukman ang atong isigka-tawo diha sa ilang pag-alagad sa Diyos tungod kay Diyos lamang ang nahibalo kun unsa ang gidak-on sa ilang pagtoo, sama nga Diyos lamang usab ang nahibalo sa atong kaugalingong pagtoo.

Apan ang Diyos sa kanunay nagasukod sa iyang mga katawhan nga pinili, ug tinawag, kay aron masukod kun asa ra kutob ang ilang pailob ug pag-antos luyo sa inyong dakong pagtuo sa Diyos. Santiago 1: 2~3 nagaingon: Mga igsoon isipa nga bulahan kamo kung ang tanang matang sa pagsulay moabot kaninyo kay nasayod kamo nga ang inyong pagtuo gisulay lamang aron kamo mahimong mainantuson.

1 Pedro 1:6~7, 9 Tungod niini paglipay kamo bisan tuod sa pagkakaron kinahanglan nga masubo kamo sa mubong panahun tungod sa daghan ninyong alantuson. Ang tuyo niini mao nga ang pagsulay kaninyo sa Diyos kun tinuod ba gyud ang inyong pagtuo, kay bisan gani ang bulawan nga lumalabay lamang sulayan man pinaagi sa kalayo. Ang inyo usab nag pagtuo nga bililhon pa sa bulawan labi pang sulayan aron malig-on. Tungod kay makadawat man kamo sa bunga sa inyong pagtuo nga mao inyong kaluwasan.