Pag-ampo Ug Pasalamat

ROMA 1: 8~ 15

8 Una sa tanan, nagpasalamat ko sa akong Diyos pinaagi ni JesuCristo tungod ninyong tanan: ang inyong pagtoo giila sa tibuok kalibotan. 9 Ang Diyos nga akong gialagaran pinaagi sa pagwali sa Maayong Balita sa iyang Anak, saksi nga naghandom ko ninyo sa akong pag-ampo sa tanang panahon. 10 Sa kanunay nag-ampo ko nga kon buot siya, tugtan ko niya sa pagduaw ninyo. 11 Naghigwaos ko sa pagpakigkita ninyo ug pagpaambit og mga espirituhanong panalangin aron paglig-on ninyo. 12 Sa ingon, magdasigay ta sa pag-ambitay sa pagtoo nga atoang tanan.

13 Kinahanglang mahibawo mo, mga igsoon, nga sa makadaghan naglaraw ko sa pag-anha ninyo. Apan hangtod karon napugngan ko. 14 Ang akong tuyo mao ang pag-anig mga bunga gikan ninyo. Kini pod ang gihimo nako sa ubang nasod. MaGriyego o langyaw, edukado o ignoranti, akong giisip nga may katungdanan ko sa tanan. 15 Mao nga dako ang akong tinguha pagpalambo sa Ebanghelyo diha sab ninyo, mga Romano

PAGPAAMBIT SA MENSAHE:

Ang maong ebanghelyo maoy pagpasabot lamang sa kabilihon sa pag-ampo isip maoy atong pagpakig estorya sa Diyos , kay bisan si Jesu Cristo sa iyang pagpakatawo dinhi sa kalibutan sa kanunay naga-ampo ug nangaliya sa Amahan didto sa bukid sa Olibo. Nan kita usab diha sa atong mga pag-ampo maoy atong papangayo ug mga giya ug mga paghangyo diha sa atong tagsa-tagsa ka kinabuhi.

Matod pa nga ang Diyos sa kanunay nakadungog sa tanan katawhan nga naga-ampo kaniya, tanan nga mga katawhan , bata ug tigulang nga naga-ampo kaniya sa kanunay nadungog sa Diyos apan dili ang tanan nakadawat sa panalangin sa Diyos kay ang kadaghanan kuno nga naga-ampo anaa ra sa tumoy sa ilang dila wala magsumikad sa ilang kasing-kasing.

Ang mga pag-ampo didto sa bukid sa santa krus ug mga pag-ampo diha sa dagkong templo walay kalainan, kay ang Diyos man maoy atong giampo-an ug gialagaran, apan adunay kulang ang kadtong naga-ampo diha sa dagkong templo, kulang ang ilang sakripisyo.

Kinahanglan ba gayud nga kita magsakripisyo diha sa atong mga pag-ampo ug pangalagad? Ang balaang kasulatan nagaingon kun gusto nimong himaya-on ug daygon didto sa gingharian sa langit, nan puy-i ang kinabuhi nga puno sa mga pag-antos ug mga kasakita dinhi sa yuta, pas-ana ang imong krus ug sunod sa mag pagtulon-an nga gitudlo ni Jesu Cristo, kay bulahan ka nga nakaambit diha sa mga paglutos ug mga pag-antos diha sa pagpas-an sa iyang krus ngadto bukid sa kalbaryo kay makaambit ka usab sa himaya sa iyang pagkabanhaw didto sa iyang gingharian sa langit.