Si Jesus Ang Hinungdan Sa Pagkabahinbahin

LUCAS 12:49~53

49 Mianhi ko aron pagdalag kayo sa kalibotan ug naninguha nga maduslitan na ni. 50 Gikinahanglang magpabunyag ko, ug pagkadako sa akong kahingawa hangtod sa pagkahuman ini!

51 Nagtoo ba mo nga mianhi ko aron pagdalag kalinaw sa kalibotan? Dili. Ingnon tamo, inay kalinaw, panagsungi. 52 Gikan karon, sa usa ka panimalay lima ang magkabangi: tulo batok sa duha, duha batok sa tulo. 53 Mabahinbahin sila: ang amahan batok sa anak nga lalaki ug ang anak nga lalaki batok sa amahan; ang inahan batok sa anak nga babaye ug ang anak nga babaye batok sa inahan; ang ugangan batok sa binalaye ug ang binalaye batok sa ugangan.”

PAGPAAMBIT SA MENSAHE:

Ang maong ebanghelyo maoy pagpasabot lamang diha sa pagpakatawo sa atong Ginoong Jesu Cristo diin matod pa wala siya moanhi alang niadtong walay mga sala kundili ang iyang pag-anhi aron sa pagluwas kanatong mga makasasala.

Diin sukwahi ang pamaagi sa iyang pagpaila sa iyang kaugalingon isip anak sa Diyos kay kadto lamang adunay halapad nga kasingkasing, halapad nga pagsabot diha sa buhat sa espiritu santo makaila kaniya. Diin ang mga mabuot ug maalam nga katawhan diin serado na ang panghuna-huna dag-on gayud sila sa ilang tawhanong kaalam.

Busa ang mga katawahan mismo nga nagasunod sa usa ka Diyos nagasunod kang Jesu Cristo magkatibulaag gayud bisan usa ra ka basahon ang atong gisunod ang basahon nga balaan ug kini gituyo sa Diyos aron matuki gayud ang lain-laing kinaiyahan sa espiritu santo ug ang lain-laing milagro sa Diyos.

Duna nay 46,000 ka pagtulon-an sa tibuok kalibutan, diin nagasimba sa usa ka Diyos ang kadaghanan, ug nagatuo sa Diyos Amahan, ug kini kabubut-on sa Diyos aron maila ug makaila ang Tanan nga usa lamang ang Diyos. Lahi-lahi ang pagtawag sa Diyos kanato, Mateo 7:21 nagaingon dili ang tanan nagasangpit ug Ginoo ang makasulod sa gingharian sa langit kundili kadto lamang nagatuman sa kabubut-on sa Amahan.

Usa lamang ka pagtulon-an nga nahimong amahan sa tanang pagtulon-an nga gipaila sa Diyos nga anak, diin ang tanan nga pagtulon-an nagsumikad niini…apan adunay pagtulon-an nga gipaila sa Diyos espiritu santo nga hangtod niining panahuna nagatubo pa diin maoy kataposang pagtulon-an nga gitukod sa bugtong anak sa Diyos pinaagi sa espiritu santo sa kamatuoran.

Unsa kini nga pagtulon-an mga igsoon. Juan 4: 19~23 diin nagaingon si Jesu Cristo, “Toohi ako babaye, taliabot na ang panahun ug karon miabot na, nga wala nay magsimba sa Amahan niining bukira ni sa Jerusalem, kay ang matuod nga magsisimba sa Amahan magsimba una sa espiritu santo ug sa kamatuoran, kay sila ang mga magsisimba nga maoy gusto sa Amahan nga maoy magsimba ngadto Kaniya.