Ang Pagtulon-an Ni Jesus Mahitungod Sa Pag-ampo

LUCAS 11:1~12

11 • 1 Usa ana ka adlaw, nag-ampo si Jesus. Human ini miingon niya ang usa sa iyang mga tinun-an: “Ginoo, tudloi mi sa pag-ampo ingon nga gitudloan ni Juan ang iyang mga tinun-an.” 2 Miingon si Jesus: “Ingna ini pag-ampo:
Amahan namo, naa sa langit ang imong ngalan, moabot ang imong gingharian.
Matuman ang imong kabubut-on
didto sa langit ingon man dinhi sa yuta.
3 Hatagi mi sa adlaw adlaw namong pan.
4 Pasayloa mi sa among mga sala;
kay pasayloon sab namo ang tanan nga nakahimo namog sayop; ayaw mig itugyan sa panulay, ug luwasa mi sa daotan.”
• 5 Miingon si Jesus: “Kon ang usa ninyo may higala nga iyang giadto sa tungang gabii ug giingnan: ‘Higala, pabayloa kog tulo ka pan, 6 kay mao pay pag-abot gikan sa byahe sa akong higala ug wala koy ikapakaon niya.’ 7 Hayan tubagon ka sa naa sulod sa balay: ‘Ayaw kog tugawa. Nanrangka na ko sa pultahan. Nanghigda na mi ug ang mga bata. Dili na ko mobangon aron paghatag nimo sa pan.’ 8 Ingnon tamo, kondili siya mobangon tungod sa ilang pagkahigala, mobangon siya ug ihatag ang gikinahanglan tungod sa pamugos.
9 Ingnon tamo: pangayo ug hatagan mo, pangita ug inyong makaplagan, panuktok ug ablihan alang ninyo ang pultahan. 10 Makadawat gyod ang mangayo; makakaplag ang mangita ug ablihan ang manuktok.
11 Kinsa ninyong mga amahan ang mohatag og bitin sa anak nga nangayog isda? 12 Kinsay mohatag og tanga kon itlog ang gipangayo? 13 Kon kamong mga daotan mahibawong mohatag og maayong mga gasa sa anak, unsa pa kaha ang Amahan sa langit? Mohatag siya sa balaang Espiritu sa mangayo niya.”

PAGPAAMBIT SA MENSAHE:

Ang maong ebanghelyo maoy pagpasabot lamang diha sa mga pag-ampo nga maoy atong bugtong paagi sa pagpakig-istorya sa Diyos. Diha niining maong ebanghelyo nagpasabot ang Ginoo nga diha sa balaang kasulatan ang pag-ampo nga iyang gihan-ay para sa iyang mga sumosunod mao man gayud ang Amahan Namo.

Bisan si Jesu Cristo diha sa iyang pagpakatawo dinhi sa ibabaw sa kalibutan naga-ampo sa langitnong Amahan diin mao kini ang iyang paagi sa pagpakig-istorya ngadto sa Amahang Diyos.

Kita nga iyang mga katawhan ug mga sumosunod diha niining kristuhanon nga pagtulon-an giaghat usab sa Diyos diha sa kanunay nga pag-ampo. Ang pangutana madungog ba kaha sa Diyos ang atong mga pag-ampo? Ang Diyos Amahan miingon , pinaagi sa iyang mga propeta, Nga walay pag-ampo dinhi sa ibabaw sa kalibutan nga wala niya madunggi, ang tanan iyang hidunggan, Apan matod pa niya nga dili ang tanan nakadawat sa iyang panalangin kay matod pa kadaghanan sa mga naga-ampo ngadto kaniya wala magsumikad gikan sa iyang kasingkasing kundili nagsumikad lamang sa tumoy sa ilang dila.

Matod pa diha sa ubang sinulat nga mas bulahan kun kita nga nagaampo ngadto sa atong langitnong Amahan, Ikaw ra ug ang Diyos maoy nasayod sa ato pa mag-ampo kita diha sa tago nga lugar, diin mas maayo nga magaampo kita diha sa sulod sa atong kuwarto, iluhod nato ang atong mga tiil ug ibayaw nato ang atong mga kamot, diin mangaliyupo kita sa kaluoy sa Diyos ug mas maayo nga hilakan nato ang kaluoy sa Diyos.

Apan bisan asa nga dapit matod pa anaa ang Diyos naminaw ug nakabati diha sa atong mga pag-ampo, kay matod pa diha sa ubang sinulat, usa, duha ug tulo nga naga-ampo diha sa atubangan anaa si Jesu Cristo nagauban kanato. Diin bulahan nga sa kanunay kita naga-uban sa Diyos kay sa kanunay usab makadawat sa panalangin ang atong kalag, ug bulahan usab nga sa kanunay atong mga pag-ampo gidungog kini sa Diyos kay matod pa sa buhing pulong sa Diyos nganong dili ko man ihatag ang imong gipangayo kun kini kaayuhan man.