Ang Sambingay Mahitungod Sa Baling

MATEO 13: 47~50

• 47 Ang gingharian sa langit sama sab sa dakong baling nga gitaktak sa dagat ug nakakuha sa tanang matang sa isda. 48 Inigkapuno sa baling, bitaron ni sa baybayon. Unya, ang mga tawo manglingkod ug manghagpat sa ma-ayo nga ilang isulod sa mga bukag, ug isalibay ang way pulos. 49 Kini ang mahitabo sa kataposan sa panahon. Ang mga anghel manganhi aron pag-lain sa maayo ug sa daotan 50nga itambog sa nagdilaab nga hudno. Didto maghilak sila ug magkagot sa ngipon.”

PAGPAAMBIT SA MENSAHE:

Ang maong ebanghelyo nagpasabot lamang diha sa ubang pulong sa Diyos Amahan nga daghan ang iyang tinawag ug pinili nga mga katawhan dinhi sa ibabaw sa kalibutan, sukad pa sa pagsukod niining maong kalibutan ug hangtod niining panahuna, diin sama kini sa balas sa baybayon ang mga katawhan nga tinawag ug pinili sa Diyos, diin sama niining maong sambingay nga panag-ingnan sa baling nga tanan klase nga isda nakasulod sa maong baling diin pagapili-an pa kini ug ang dili maayong isda ibalibag kay walay pulos.

Ingon niana ang mga katawhan nga pinili sa Diyos, ug nagapasabot kini mga igsoon nga dili tanan masulod sa baling nga sa ato pa dili pod tanan nga katawhan tinawag ug pinili sa Diyos, maayo lang kun adunay katunga nga pinili ug tinawag sa Diyos, nan kadtong wala tawga ug pili-a nan dinhi lang sila sa kalibutan, apan kadtong pinili ug tinawag sa Diyos pagapili-an pa pag-usab.

Sa ato pa mga igsoon, ang katawhan nga mga pinili sa diyos paga-alig-igon una ug ang mabilin maoy mahatagan ug kinabuhing dayun didto sa iyang gingharian sa langit, Sa ato pa mga igsoon diha sa pagtulon-an nga imong nakaplagan diin sa kanunay nagasunod ka sa mga pagtulon-an nga gisangyaw ni Jesu-Cristo, wala kini magpasabot nga sigurado na ang imong kaluwsan, kay matod pa dili ang imong relihiyon ang makaluwas kanimo kundili ang imong pagsunod sa mga kasugo-an ug kabubut-on sa Diyos.

Pangutana, hain man nga pagtulun-an ang makasiguro ka sa imong kaluwasan, Aduna ba? Ang pulong sa Diyos nagpasabot nga mga giya lamang ang gitudlo sa matag pagtulon-an ngadto sa dalan sa kaluwasan apan daghan usab nga mag pagtulun-an niining panahuna nga nahimong salingkapaw ang ilang pagpadayag sa matuod nag kaluwasan kay nabutahan sila sa mga butang nga kalibutanon diin ilang gitukod ang gingharian sa Diyos ginamit ang mga tawhanon nga kaalam.

Ang pulong sa Diyos naga-ingon, mahibaw-an ninyo kun ako kanang pagtulon-an nga inyong gibarugan kay maka-ambit gayud kamo sa mga paglutos, Diha sa balaang kasulatan nagpasabot usab nga kun katawhan ka ni Jesu-Cristo nan makaambit ka gayud sa mga paglutos. Kini nga pagtulun-an nga atong gibarugan ang tinago nga kamatuoran maoy pinaka-ubos nga pagtulon-an dinhi sa ibabaw sa yuta apan pinakataas didto sa gingharian sa Dios kay tinukod kini sa espiritu santo sa kamatuoran, nga maoy gisaad ni Jesu Cristo diha sa iyang pulong sa Juan 14: 15 nga miingon siya, “ Tumana ninyo ang akong mga sugo kay mangayo ako sa Amahan ug hatagan kamo niya ug lain manlalaban, Ang espiritu sa kamatuoran nga magauban kaninyo hangtod sa kahangturan. Ang kalibutan dili makadawat kaniya kay dili man Sila makakita ni makaila kaniya apan makaila kamo kaniya kay nagauban ug nagapuyo man siya diha kaninyo”.