Ang Tinuod Nga Kabulahanan

LUCAS 11::27~28

• 27 Samtang nagsulti pa si Jesus, may babaye gikan sa katawhan nga namulong: “Bulahan ang nagsabak ug ang nagmatuto nimo!” 28 Mitubag si Jesus: “Sa labing tinuod, bulahan ang naminaw ug namati sa pulong sa Diyos ug nagtuman niini.”

PAGPAAMBIT SA MENSAHE:

Ang maong ebanghelyo nagpamatuod lamang nga bulahan ang mga tawo nga naminaw sa pulong sa Diyos, diin ila kining gibutang sa ilang kasingkasing ug panumduman. Kay matod pa diha sa ubang sinulat kadaghanan sa pulong nga gipadayag sa Diyos Amahan nagaagi kini ug sambingay, sa ato pa dili ang tanan nakaambit, makadungog ug makasabot sa pulong sa Diyos aron sa ingon kadtong wala tawga ug pilia sa Diyos dili gayud makasabot sa iyang mga pulong.

Diha sa ubang sinulat nagaingon nga moabot sa Diyos sa usa ka gutlo sa atong kinabuhi sa paagi nga waal nato damha kay matod pa ang pinili ug ang mga tinawag nga ka tawhan sa Diyos sa kanunay adunay nakaandam ang Diyos para kanila, Diin bulahan kadtong nakabati lamang sa mga pulong sa Diyos ug mito-o bisan wala sila makakita ni makaila kaniya.

Ug diha sa ubang sinulat nagaingon usab nga lahi-lahi ang pagtawag kanato sa Diyos, diin dili pod tanan nga nagasangpit sa Diyos ang makasulod sa iyang gingharian kundili kadto lamang nagasunod sa iyang kabubut-on. Sa laing bahin nagaingon usab ang Diyos nga tawgon niya ang iyang mga pinili nga katawhan pinaagi sa balatian kay mao lamang kini ang bugtong paagi nga maningkamot ang tawo sa pag-ila sa Diyos ilabina kun ang iyang balatian wala nay kaayuhan.

Ang mahinungdano sa Diyos mao gayud ang kaluwasan sa atong kalag kay matod pa mao man kini ang mangatubang diha sa kataposang paghukom diin pagasul-oban sa espirituhanong lawas, apan dinhi niini walog sa mga buhi ang Diyos matod pa nagahatag kanato ug tulo ka matang sa kinabuhi, una ang atong materyal nga lawas ikaduha ang atong espiritu ug ang ikatulo ang atong kalag. Ang atong materyal nga lawas sa atong kamatayon magpabilin kini dinhi sa yuta ug mobalik kini sa abog, ug ang atong espiritu mobalik kini sa Diyos diin maoy nagasumbong sa atong mga kasal-anan sa adlaw nga tanan kay diay diha sa atong pagkatulog mogawas ang atong espiritu ug mobalik ngadto sa Diyos Amahan aron sa pagsumbong sa atong mga binuhatan diin ang atong kalag mao magapabiling buhi nga maoy magahulat diha sa kataposang paghukom.

Sa ato pa mga igsuon bulahan ka nga naminaw ug mamati ug nagpatalinghug ka sa pulong sa Diyos diin makadawat sa panalangin ang imong kalag ug espiritu, Bulahan nga nagpakita ka ug pagtuo nadto sa mga ebanghelyo nga imong nadungog, kay matod pa sa balaang kasulatan ang pagtuo maoy atong pagsalig ug paglaom sa mga butang nga dili nato makita ug mahikap. Apan sumala usab diha sa mga sinulat ni Santiago 2: 26 nagaingon “Kay kun patay ang alwas kun wala nay spiritu, Patay usab pagtuo kun walay buhat , busa kulang pa diay ang atong nadungog ug atong naambitan nga mga maayong balita kundili nato kini ipakita diha sa atong mga buhat nga kristuhanon.

Apan lagi dili ato ang paghukom diha sa nabatunan nga pagtuo sa atong isigkatawo kay matod pa diha sa pulong sa espiritu santo ang pagtuo dili masulod pinaagi sa tawhanon nga sukdanan, apan masukod kini pinaagi sa espirituhanon nga sukdanan kay anaa man kini nahimutang sa atong panumduman ug sa atong kasingkasing, busa dili kita maghukom sa atong isigkatwo, ang pulong sa Diyos Amahan nagaingon “Ayaw tan-awa ang imong isigkatawo siguro-a ang imong kaluwasan”.