Bag-o Ug Karaaang Mga Kamatuoran

MATEO: 13:51~52

51 Nangutana si Jesus: “Nakasabot ba mo ining tanan?” “Oo,” mitubag sila. 52 Busa, miingon siya: Makita ninyo nga ang tanang magtutudlo sa Balaod nga mahimong tinun-an sa Gingharian sama sa tagbalay nga makakuhag bag-o ug daang butang gikan sa iyang tipiganan

PAGPAAMBIT SA MENSAHE:

Ang maong ebanghelyo nagpasabot lamang nga ang pagtulun-an nga iya sa balaod sa tawo ug ang pagtulun-an nga iya sa Diyos ug sa tawo dili gayud mahitabo nga magkasagol. Apan kining nga pagtulon-o balaod sa tawo gitugotan sa Diyos aron mamahimong pagsukod usab sa kabubut-on sa tawo.

Diha niining maong ebanghelyo nagpasabot ang Diyos nga ang magtutuo nga suheto sa balaod kun makakaplag sa mga pagtulun-an nga Diyosnon nan sama siya sa tagbalay nga nakaplag ug mga daan ug bag-o nga butang diha sa iyang tipiganan.

Ang pagtulun-an nga iya sa langit walay pakadaan ug sa kanunay magapabilin kini diha sa pagtulonn-an ug mga panumduman sa iyang mga tinawag ug pinili. Kay matod pa diha sa ubang sinulat Si Jesu-Cristo nga tuburan sa kaalam sa Diyos mao sa gihapon kaniadto ug karon ug sa umaabot.

Ang patulun-an sa balaod gitugot kini sa Diyos aron sa pag-alig-ig usab sa iyang mga katawhan, apan ang balaod nga binuhat sa tawo adunay nabintaha-an,, kay ang nagabuhat niini kadto man usab nga mga katawhan nga adunay mga kuwarta, demodo katong mga kabos ug mga timawa sa kanunay makadawat gayud sa mga paglutos.

Apan ang pagtulun-an nga gisangyaw ni Jesu Cristo nga maoy gihimong gabay sa iyang unang mga tinawag maoy iyang gihimong sukaranan diha sa iyang ehemplo sa iyang pagpakatawo niining kalibutan.

Ang pagtulun-an nga iya sa Diyos maoy bitamina sa imong kalag diin mamahimong lig-on ang imong kalag ug esperitu diin mao kining mga pagtulun-ana ang imong mabawon ngadto sa laing kalibutan