Gipili Kamo Aron Maluwas

2 TESALONICA : 2:13~17

• 13 Apan, nagpasalamat mi sa Diyos sa tanang panahon tungod ninyo, mga igsoon diha sa Ginoo. Kay gipili mo sa Diyos sukad sa sinugdan aron maluwas mo pinaagi sa tinuod nga pagtoo ug mahimong balaan pinaagi sa espiritu. 14 Kini ang katuyoan sa iyang pagtawag ninyo pinaagi sa Ebanghelyo nga among gisangyaw. Pagbuot niya nga maambitan ninyo ang himaya ni Cristo Jesus nga atong Ginoo.
15 Tungod ini, mga igsoon, pagmalig-on mo. Barogi ang mga tradisyon nga among gitudlo sa pulong o sa sulat. 16 Lig-onon unta mo ni Cristo Jesus nga atong Ginoo ug sa Diyos nga atong Amahan nga nahigugma nato. Pinaagi sa iyang kaluoy gihatagan ta sa walay kataposang kalipay ug matuod nga paglaom. 17 Dasigon unta niya ang inyong kasingkasing ug lig-onon sa maayong buluhaton ug pulong.

3 • 1 Ingon sa dili ko na maagwanta busa, mihukom ko sa pag-adto nga mag-inusara sa Atenas. 2 Ipadala ko si Timoteo, atong igsoon, ug alagad sa Diyos sa Ebanghelyo ni Cristo. Buot ko nga lig-onon mo niya ug dasigon sa pagtoo, 3 aron walay mosibog tungod sa inyong mga pagsulay. Nahibawo mo nga kini ang atong dangatan. 4 Samtang diha pa ko, ako mong gipasidan-an: “Sagubangon ta ang panglutos.” Ug natuman ni sama sa inyong nakit-an. 5 Busa, sa dili ko na maantos, gipadala ko si Timoteo aron pagsusi sa inyong pagtoo, basig natumpawak na mo sa mga panulay ug nakawang ang among kabudlay.
6 Bag-o pang miabot si Timoteo gikan ninyo. Mibalita siya sa inyong pagtoo ug gugma. Miingon siya nga naghandom mo namo sa kamaayo ug nangandoy sa pagpakigkita namo. Ingon sab ini ang among gibati. 7 Mga igsoon, sa taliwala sa among pag-antos ug pagsulay, gilipay mi ninyo sa inyong pagtoo. 8 Tinuod ang inyong kalig-on diha sa Ginoo! Busa, buhi sab mi. 9 Unsaon namo pagpasalamat ang Diyos tungod sa kadako sa among kalipay mahitungod ninyo atubangan sa Diyos? 10 Adlaw ug gabii, nagpakiluoy mi niya nga makita mo namog usab aron makumpleto namo ang among pagtudlo sa mga magtotoo.
11 Andamon unta sa Diyos nga atong Amahan ug ni Jesus nga atong Ginoo ang among agianan paingon ninyo. 12 Dugangan unta sa Ginoo ang inyong gugma sa usag usa ug sa tanang tawo, sama sa among paghigugma ninyo. 13 Lig-onon unta niya ang inyong kaugalingon. Sa ingon, mabalaan mo ug mawalay buling sa sala atubangan sa Diyos nga atong Amahan, sa pag-abot ni Jesus nga atong Ginoo uban sa santos mga binuhat

PAGPAAMBIT SA MENSAHE:

Ang maong mensahe maoy pagmatuod lamang diha sa pulong sa Diyos sa balaang kasulatan nga nagaingon “ Didto ka pa sa tago-angkan sa imong inahan, gitawag ko na ikawng daan. Sa ato pa mga igsoon ang Diyos dunay mga pinili nga mga katwahan dinhi sa ibabaw sa kalibutan diin ang uban kanila wala pa mahimugso apan gitawag ug gipili ng daan.

Diha sa ubang pulong nagaingon usab ang Diyos nga dili tanang katawahan dinhi sa ibabaw sa kalibutan pinili ug tinawag sa Diyos sa ato pa adunay mga katawhan nga wala pili-a sa Diyos ug ang mga pinili niya nga mga katawhan wala lang usab gani kini makatunga sa kinatibuk-an.

Nan kadtong wala niya tawga ug pili-a nan dinhi lang usab sila kutob sa kalibutan, apan ang mga pinili sa Diyos maoy gitagaan ug kahigayonan nga maluwas ngadto sa kinabuhing dayun, apan ang Diyos nagaingon nga ang mga pinili pagapili-an pa gayud sa Diyos, paga-alig-igon kun kinsay angayan nga mahiadto sa iyang gingharian sa langit.

Sa ato pa mga igsoon ang pagkatinawag ug pagkapinili dili kini garantiya mga mahiadto ka sa gingharian sa Diyos nan unsa na kaha kadto wala tawga ug pili-a. Nagpasabot lamang kini mga igsoon nga walay makapanganti sa tawo nga siya maluwas bisan diha sa maayo niyang binuhatan, kay ang pulong sa Diyos naga-ingon nga ang kaluwasan nga iyang gisaad pinaagi sa iyang bugtong anak dili kini premyo o ganti tungod sa maayong binuhatan, aron sa ingon walay magpasigarbo diha sa atubangan sa Diyos nga siya maluwas tungod sa maayong binuhatan kundili ang kaluwasan grasya kini gikan sa Diyos tungod sa iyang gugma ug kalooy kanatong mga katawhan.

Busa dili diay kita angay mokumpiyansa kay matod pa diha sa ubang sinulat sa balaang kasulatan bisan kadtong mga katawhan nga adunay mga pag-ampo, sa higayon nga mobalik na ang iyang kalag ngadto sa laing kalibutan, nan dili niya masigurado nga mahiadto kini sa gingharian sa langit, ug mas labaw nga walay siguro nga maluwas kadtong mag kalag sa mga katawhan nga walay mga pag-ampo.

Apan matod pa diha sa ubang sinulat sa balaang kasulatan. Ang kamatuoran nagahatag kanato ug kagawasan, Ug bulahan kita kay niining nga kamatuoran nga atong nakaplagan gipadayag sa Diyos ang iyang kabubut-on, ang unsay gusto niya nga mga pag-ampo nga maoy gustong madungog sa atong langitnong Amahan didto sa iyang gingharian. Diha sa mga hini-usa nato nga pag-ampo sama niining worship , madungog kini ug maoabot didto sa gingharian sa langit.

Ug bulahan ang nakakaplag niining maong kamatuoran , kay nahibalo kita nga ang mga pag-ampo didto sa santa krus maoy nahimut-an sa Diyos diha sa mga misyon ug mga pagsangyaw diin nadawat ug gidawat ang mga pagbiay-biay ug mga pagtamay, kay ang Diyos miingon nga dili kamo ang ilang gitamay kundili Ako nga inyong Diyos nga nagsugo kaninyo.

Apan sa laing bahin nagaingon usab ang atong birhen Maria nga wala may kalainan ang mga pag-ampo diha sa mga magarbong templo ug didto sa mga hilit ug bakilid nga bukid sa santa krus kay Ginoo man gihapon ang atong giampo-an apan matod niya aduna lamay kulang , kulang ang ilang sakripisyo

Ang mga pag-ampo nga gitudlo sa Diyos diha niining maong pagtulon-an maoy pag-ampo nga mga bulohaton didto sa iyang gingharian sa langit , kay matod pa mao kini ang pagsimba didto sa langit, diin ang kalibutan mao man ang nagpasakit ug nagkastigo kang Cristo Jesus nan kita nga mag sumosunod ug tumutoo ni Cristo samtang ania pa sa kalibutan makaambit gayud kamo sa mga paglutos. Ang Diyos miingon mahibaw-an ninyo kun ako kanang mga pagtulun-an nga inyong gisunod ka makaambit gayud kamo sa mga kalisdanan.

Diha sa ubang pulong sa Diyos sa balaang kasulatan nagaingon “ Kun gusto ninyong himaya-on ug daygon didto sa iyang gingharian sa langit nan puy-i ang kinabuhi nga puno sa mag paglutos ug mag kasakitan dinhi sa yuta, pas-ana ang imong krus sa kinabuhi ug sunod sa mga pagtulon-an nga gisangyaw ni Cristo , kay bulahan ka nga nakaambit diha sa mga kasakitan ug mga paglutos ni Jesu Cristo didto sa krus sa kalbaryo kay makaambit ka usab sa himaya sa iyang pagkabanhaw didto sa iyang gingharian sa langit.