MATEO 13:47~50
• 47 Ang gingharian sa langit sama sab sa dakong baling nga gitaktak sa dagat ug nakakuha sa tanang matang sa isda. 48 Inigkapuno sa baling, bitaron ni sa baybayon. Unya, ang mga tawo manglingkod ug manghagpat sa ma-ayo nga ilang isulod sa mga bukag, ug isalibay ang way pulos. 49 Kini ang mahitabo sa kataposan sa panahon. Ang mga anghel manganhi aron pag-lain sa maayo ug sa daotan 50nga itambog sa nagdilaab nga hudno. Didto maghilak sila ug magkagot sa ngipon.”
PAGPAAMBIT SA MENSAHE:
Ang maong ebanghelyo maoy pagpasabot lamang nga diha unya sa kataposang paghukom gipanag-ingnan kita sa mga lain-laing isda nga gi-“harvest” pinaagi sa baling diin pilion ang maayo ug ang dautan nga isda sunogon sa kalayo , Sa ato pa mga igsoon ayaw pagsalig nga ikaw tinawag ug pinili sa Diyos, kay matod pa diha sa usa ka alawiton ang atong kamatayon sigurado apan ang atong kaluwasan walay siguro.
Ang Diyos nagaingon dili ang tanan nagtawag Diyos ko, Diyos ko makasulod sa gingharian sa langit kundili kadto lamang nagasunod ug nagatuman sa iyang kabubut-on . Walay makasiguro diha sa kaluwasan sa matag tawo, nga sa ato dili nato mahukman ang atong kaugalingon ni ang atong isigkatawo nga sigurado na nga maluwas, kay ang kaluwasan nga gisaad ni Jesu-Cristo diha sa kinabuhing dayun dili kini premyo o ganti tungod sa maayong binuhatan, aron sa ingon walay magpasigarbo diha sa atubangan sa Diyos nga siya maluwas tungod sa maayong binuhatan, tungod kay ang kaluwasan nga gisaad sa Diyos gasa kini nga langitnon tungod sa iyang gugma kanato.
Tinuoray nag walay relihiyon o pagtulun-an nga makaluwas, kay ang kataposang paghukom nga ihatag sa Diyos sa matag-usa wala magsumikad sa imong pagtulun-an nga gibarugan, kundili nagsumikad kini diha mismo sa kabubut-on sa Diyos. Nan unsa nga pamaagi nga duna kitay purohan nga maluwas ngadto sa kinabuhing dayon? Atong isul-ob ang kinaiyahan sa espiritu santo sa Diyos nga maoy gisul-ob ni Jesu-Cristo, ang pagkamangindawaton , ang pagpaubos ug ang kanunay nga mga pag-ampo ug pangaliya.
No comments:
Post a Comment