Ang Subasko

BUHAT 27:13~45

13 Unya, misugod paghuros ang habagat. Nagtoo sila nga nakab-ot na nila ang ilang tuyo. Gibira nila ang angkla ug milawig subay sa isla sa Creta. 14 Apan pagkataudtaod, may kusog nga hangin nga gitawag og “amihan” nga mibulhot gikan sa isla. 15 Ang barko naguyod ug dili makaabanti tungod sa hangin. Sa ingon gianud-anod mi.
16 Samtang mitabok mi ubos sa liwag sa gamayng isla sa Cauda, nasiguro namo ang salbabida nga sakayan sa tumang kalisod. 17 Human ni namo isaka, gilikosan nilag mga pisi ang kasko. Tungod sa among kahadlok nga masangyad sa balas sa Sirte, gihulog ang angkla. Sa ingon, gipadayon mi pagguyod.

18 Gikusokuso mig kusog sa bagyo. Sa sunod adlaw gikinahanglan na nga ilabay ang ubang karga. 19 Sa ikatulong adlaw, ang mga marinero nanglabay sa kasangkapan sa barko. 20 May pipila na ka adlaw nga ang mga bitoon ug ang adlaw wala magpakita. Walay hunong ang bagyo. Nawad-an mi sa tanang paglaom.
21 Wala miy kaon sa daghang adlaw. Busa, si Pablo mibarog sa ilang taliwala ug miingon, “Mga higala, kon mipatoo pa mo nako sa dili pagbiya sa Creta, dili unta ingon ini kakuyaw ang atong kahimtang. Malikayan unta nato ang kapildihan. 22 Apan karon awhagon tamo pagbaton og kaisog. Walay mamatay. Ang barko lay maguba. 23 Kagabii mitungha nako ang anghel sa Diyos, ang akong tag-iya ug gialagaran. 24 Miingon siya, ‘Pablo, ayawg kahadlok. Kinahanglang moatubang ka sa hukmanan ni Cesar. Ang Diyos nagpasalig sa imong kinabuhi ug sa tanan mong ‘kauban.’

25 Busa, pagbaton og kaisog, mga higala. Misalig ko sa Diyos ug matuman ang tanan sumala sa iyang gisulti. 26 Masangyad hinuon ta sa usa ka isla.”
27 Mga tungang gabii sa ika-14 ka gabii samtang gianud-anod mi sa Dagat Adriatico, ang mga marinero, nagduda nga duol na mi sa mamala. 28 Gisukod nila ang giladmon sa tubig, mga 37 metros. Taudtaod giusab og sukod, 27 na lang. 29 Nahadlok sila nga makaigo mig bato. Busa, gihulog ang upat ka angkla gikan sa ulin. Nahingawa kaayo mi nga naghulat sa kabuntagon. 30 Unya, ang mga marinero misulay pagbiya sa barko. Gipataas nila ang pisi sa mga angkla gikan sa dulong ug gikanaog ang salbabida nga sakayan sa dagat. 31 Apan si Pablo miingon sa kapitan ug sa mga sundalo, “Kon mobiya sila, dili mo maluwas.” 32 Busa, giputol sa mga sundalo ang gakot sa barko ug gipasagdang mahulog.

33 Samtang nagpaabot sila sa kaadlawon, si Pablo miawhag sa tanan, “Sulod sa 14 ka adlaw wala tay kaon tungod sa kahingawa sa nahitabo. 34 Hangyoon tamo sa pagkaon kon buot mong mabuhi. Kay walay mawala, bisag usa ka lugas nga buhok sa inyong ulo.” 35 Human niyag sulti mikuha siyag pan ug nagpasalamat sa Diyos atubangan sa tanan. Iya ning gipikaspikas ug mikaon. 36 Nadasig ang tanan ug nangaon. 37 276 ang tanan. 38 Sa nabusog na sila, gilabay sa dagat ang trigo aron mogaan ang barko. 39 Sa buntag, wala nila mahibaw-i unsa tong dapita. Apan nakamatikod silag luok nga may baybayon. Mihukom sila pagpadunggo sa barko kon mahimo. 40 Gipaubos ang mga angkla ug gipasagdan sa dagat. Unya, gipaluagan ang mga pisi sa timon, giisa ang layag nunot sa hangin ug mipadulong sila sa baybayon. 41 Apan natunong silag balas ug nasangyad ang barko. Ang ulin nabara ug dili na mairog. Samtang ang dulong nabuak sa bangis nga balod. 42 Ang mga sundalo naglaraw pagpatay sa mga priso. Nahadlok silang may molayas nga manglangoy. 43 Apan ang kapitan, nga naninguha pagluwas ni Pablo wala motugot. Hinuon, gipaambak niya pag-una ang mahibawong molangoy aron makaadto sa baybayon. 44 Ang uban gipagunit sa bisag unsang bahin sa barko nga makatabang nila. Sa ingon, naluwas ming tanan.

PAGPAAMBIT SA MENSAHE:

Ang maong ebanghelyo maoy pagpasabot lamang nga diha sa tahas nga gisangon sa Diyos kanato adunay kini katumbas nga mga pagsulay o mga subasko. Diin daghan ang naglikay diha sa pagsimba sa dagkong templo kay matod pa nila kun pagpaduol ka sa Diyos haduol ka usab sa mga kapit-os sa kinabuhi. Busa diha sa mga sinagoga daghan ang igo lang molili, diha lang sa silong ug dili moambit diha sa mga pag-ampo kay nahadlok makaambit sa pagsulay.

Apan ang Diyos nagaingon molikay ka man sa mga pag-ampo dili ka man tumotuo ni Cristo apan kun nakalatid na daan ang mga pagsulay sa imong kinabuhi nan maka-ambit ka gayud sa mga pagsulay, diin ang Diyos Jesu-Cristo nagaingon tukhi ang mga pagsulay sa mga pag-ampo kay anaa si Jesu Cristo nga atong Diyos nga maoy manalipod kanimo.

Sa ato pa mga igsoon ang mga pagsulay kabahin na kini sa atong kinabuhi, diin matod pa kun nagasunod ka sa pagtulun-an ni Jesu Cristo ug nagpakabuhi nga usa ka kristuhanon nan makaambit ka gayud sa mga paglutos. Kay ang mga katawhan nga iya ni Jesu Cristo pagalutoson gayud. Ang pulong sa Amahan nagaingon mahibaw-an ninyo nga kini nga pagtulun-an iya sa Diyos kay makaambit ka gayud sa mga paglutos. Ang pulong sa Diyos nagaingon usab nga bisan anaa kana sa baba sa kamatayon kun bug-os ang imong pagtuo ngadto sa Diyos nan luwason ka sa Diyos.

Ang balaang kasulatan nagaingon nga bulahan ang mga katawhan nga hingpit nga nagatugyan sa iyang kinabuhi sa Diyos ug nagasunod sa iyang kabubut-on kay mahatagan ka ug dugang kinabuhi, apan kun nagdumili ka sa pagsunod sa kabubut-on sa Diyos sa kahadlok nga mawad-an ka ug kinabuhi nan basin ug kawad-an ka niini.