Ang Usa Ka Dako Nga Nawala

LUCAS 15: 8~10

8 Kon ang babaye nga may 10 ka salapi mawad-ag usa, dili ba siya magdagkot og suga, manilhig sa balay ug mangita pag-ayo hangtod nga makit-an ni? 9 Inigkakita na niya, manawag siya sa kahigalaang babaye ug mga silingan sa pag-ingon: ‘Maglipay ta, kay nakit-an ang nawala kong salapi.’ 10 Ingnon tamo nga ingon sab ini ang kalipay sa mga anghel sa Diyos, tungod sa usa ka makasasala nga maghinulsol.”

PAGPAAMBIT SA MENSAHE:

Ang maong ebanghelyo maoy pagpasabot lamang kun atong pangitaon ang kuwarta nga nawala nan mas labaw nga pangitaon sa Diyos kita nga iyang mga anak nga pinili ug tinawag kun sa higayon nga matipas kita diha sa laing dalan .

Matod pa diha sa ebanghelyo nga bisan ang mga anghel sa kalangitan malipay ug magasaulog kun adunay binuhat dinhi sa yuta nga mobalik ngadto sa sabakan sa Diyos. Mas dako ug bili ang tawo kay sa bulawan diin atong mapalandungan, nga gipakanaog sa Diyos Amahan ang iyang bugtong anak aron sa pagpangita ug sa pagluwas sa mga katawhan gikan sa kasal-anan

Ang Diyos maoy nangita kanato ug dili kay kita maoy nangita ug miduol sa Diyos. Mahal ang lukat o bayad kanato sa Diyos kay gihalad mismo ni Jesu Cristo ang iyang lawas ug dugo ug matod pa dili na kita maoy tag-iya sa atong kaugalingon kay gibayran ug gipanag-iya na kita sa Diyos.

Apan matod pa ang kamatuoran nagahatag kanato ug kagawasan, ug kinsa man kining maong Kamatuoran, Ang balang kasulatan naga-ingon : " Siya ang dalan ang kamatuoran ug ang kinabuhi , sa ato pa ang kamatuoran mao si Jesu Cristo, Gipanag-iya sa Diyos ang atong lawas ug kalag apan gitagaan kita sa Diyos ug kagawasan sa pagpakabuhi sumala sa atong kabubut-on dinhi sa ibabaw sa yuta.

Matod pa nga giluwas kita ni Jesu Cristo, apan samtang nagpakabuhi pa ang tawo padayon gayud siya sa pagpakasala, pinaagi sa pulong , sa huna-huna ug sa buhat, Apan ang tinawag ug pinili nga katawhan sa Diyos iya gayud kining tawgon diha sa daghang paagi, usa na niana ang pagtawag kanimo sa balati-an, usa na niana ang pagtawag kanimo diha sa mga paglutos, ug usa na niana ang pagtawag kanimo sa kawad-on,

Kay mao gayuy gusto sa Diyos nga kitang tawo mahiduol ug moduol kanunay Kaniya kay anaa man sa Diyos ang tubag sa atong mga kakulangon, ug makaduol kita sa DIyos pina-agi sa hinay-hinay ug kanunay nga pag-ampo inubanan sa atong bug-os nga pagtuo ug maayong binuhatan , kay bulahan ang tawo nga nakaambit sa grasya gikan sa Diyos gumikan sa iyang mga pag-ampo kay sa kanunay ang panalangin magauban gayud kaniya ug hangtod sa iyang mga kaliwatan.