Awhag Sa Panaghiusa

EFESO 4: 1~16

4 • 1 Busa, ako, ang piniriso ni Cristo, nagdapit nga puy-an ninyo ang tawag nga inyong nadawat. 2 Pagmapaubson pagbinuotan, mapailobon ug pagtinabangay sa usag usa diha sa gugma. 3 Buhata ang tanan aron magpabilin diha ninyo ang kahiusa sa Espiritu pinaagi sa mga bugkos sa kalinaw. 4 May usa lang unta ka lawas ug usa ka espiritu, kay dihang gitawag mo sa Diyos naghatag siya og usa ka Espiritu alang sa tanan. 5 Usa ka Ginoo, usa ka pagtoo, usa ka bunyag. 6 Usa ka Diyos, ang Amahan sa tanan nga labaw sa tanan ug nagtrabaho pinaagi sa tanan ug naa sa tanan.

7 Apan sa matag usa nato gihatag ang diyosnong grasya sumala sa gidak-on sa gasa ni Cristo. 8 Busa, ginaingon: Sa pagsaka niya sa kahitas-an nagdala siyag mga bihag ug naghatag sa iyang mga gasa sa katawhan. 9 Misaka siya. May kalabotan ni sa mikanaog pag-una sa mga minatay, sa ubos nga bahin sa kalibotan. 10 Siya mismo mikanaog unya, misaka ibabaw sa tanang kalangitan aron mapuno niya ang tanang butang. 11 Kabahin sa iyang mga gasa, gitugahan niya ang pipila sa pagkaapostol, ang uban sa pagkapropeta o ebanghelista, o pagkapastor ug magtutudlo. 12 Busa, giandam niya ang iyaha alang sa ministeryo. Sa ingon matukod ang Lawas ni Cristo 13 hangtod nga mahiusa tang tanan sa samang pagtoo ug kahibawo sa Anak sa Diyos. Hinunoa, mahimo tang hingpit nga tawo inigkahingkod ug inig-ambit nato sa kahingpitan ni Cristo.

14 Dili na ta mahisama sa mga bata nga giitsaitsa sa bisag unsang balod o hangin sa pagtulun-an, giilad sa mga limbongan nga nagguyod nila sa kasaypanan. 15 Uban hinuon sa matinud-anong gugma, motubo ta sa tanang paagi ngadto ni Cristo nga mao ang ulo. 16 Gikan niya ang pagtubo sa tibuok lawas nga gidumala ug gilambigit pinaagi sa usa ka kutay sa mga lutahan. Ang matag usa nagtuman sa katungdanan sa matag usa aron ang lawas makatubo ug makapabarog sa kaugalingon diha sa gugma.

PAGPAAMBIT SA MENSAHE:

Ang maong ebanghelyo maoy pagpasabot lamang nga kitang mga katawhang Cristohanon mahiusa diha kang Cristo-Jesus pinaagi sa iglisea nga iyang gibarugan. Lahi lahi ang pagtawag sa Diyos kanato apan dili ang tanan nag nagasangpit sa Diyos makasulod sa gingharian sa langit kundili kadto lamang ang nagatuman ug nagasunod sa iyang kasugo-an.

Kabubut-on sa Diyos nga modagsang ang daghang mag pagtulon-an dinhi sa tibuok kalibutan, diin miabot na kita ug 46,000 ka relihiyon. Kay aron gayud makita sa tanan nag usa lamang ang Diyos diin lahi-lahi nga pagtulon-an nagpasidungog gayud sa Diyos nga labing gamhanan.

Tanan nga pagtulon-an ang Diyos adunay pinili nga mga katawhan nagpasabot lamang nga dili lamang nga kining nga pagtulon-an nga atong gibarugan nga aduna siyay pinili, aron gayud madayag nga dili ang pagtulon-an nga maoy makaluwas sa tawo kundili ang imo mismong binuhatan diha sa pagtuman sa mga kasugo-an.

:
Ang Diyos miingon nga mahibaw-an ninyo kun ako kanang pagtulon-an kay makaambit gayud kamo sa mga paglutos, sa ato pa mga igsoon ang mga paglutos ug mga kalisdanan nga atong na-agi-an, diin imong nadawat sa tumang pagpaubos nagpasabot lamag kana nga wala ka daug-dauga ug nagpasabot lamang kana nga wala ka magpakamartir kundili nagpasabot kana nga imong gidawat , gipapuyo ug gipahari si Jesu-Cristo diha sa imong kasing-kasing.

Busa mga igsoon paningkamot nga molahutay ka sa pagdagan dritso sa dag-anan, pina-agi diha sa pagbalaan sa imong kaugalingon diha sa mga pag-ampo nga gitudlo sa Amahan, kay matod pa kun unsa kakusog ang espiritu santo nga nagapuyo kanimo mao usab ka kusog ang dautan nga gustong mosakit kanimo. Himumdumi lamang nga gidaug na ni Jesu-Cristo ang kalibutan ug paningkamot nga mahiusa ka diha kang Cristo Jesus aron modaug ka usab uban kaniya.