Pagkinabuhi Sumala Sa Pagtawag Sa Diyos Kaninyo

1 CORINTO 7:17~24

17 Magkinabuhi ang usag usa sumala sa gasa nga gihatag kaniya sa Diyos ug sa iyang panawagan. Kini ang gisugo ko sa tanang simbahan. 18 May gitawag ba sa Diyos nga tinuli? Ayawg ipatangtang ang ilhanan sa pagkatinuli. May gitawag bang pisot? Ayaw siyag ipatuli. 19 Dili importanti ang pagkatinuli o pagkapisot. Ang impor-tanti mao ang pagtuman sa mga sugo sa Diyos.

20 Busa, ang matag usa magpabilin sa kahimtang sa pagtawag niya sa Diyos. 21 Kon ulipon ka nga gitawag, ayawg kabalaka; apan kon makuha nimo ang kagawasan, pahimusli ang higayon. 22 Ang gitawag sa pagtoo sa Ginoo bisag ulipon, gawasnon diha sa Ginoo. Ang gitawag sa pagkakristyano nga gawasnon, ulipon ni Cristo. 23 Gipalit mo sa Diyos sa dakong presyo. Hinunoa, ayawg paulipon sa mga tawo 24 Busa, mga igsoon, magkinabuhi atubangan sa Diyos ang tanan sa kahimtang sa pagtawag sa Diyos sa matag usa.

PAGPAAMBIT SA MENSAHE:

Ang maong ebanghelyo maoy pagpasabot lamang mga igsoon nga gitawag kita sa Diyos sa paagi nga siya ray nasayod.daghan ang gitawag sa Diyos pinaagi sa paghatag kanila ug mga balatian kay mao lamang kini ang usa ka epektibo nga paagi nga sa kanunay makasangpit ug magpaduol ka sa Diyos ilabi na kun ang imong balati-an milagro na lamang sa Diyos ang makaayo niini.

Una man ang gusto sa Diyos diha sa pagtawag kanimo? Pinaagi sa usa ka balatian?, Kini dili tungod kay gisakit ka kundili gitudlo-an ka sa mag pag-ampo ug mga paghalad ug mga sakripisyo nga iyang gikahimut-an. Tinuoray nga sa sinugdanan naga-antos ka sa mga kasakitan apan pinaagi diha sa imong pagtuman ug sa imong pagpangaliya ang imposible nga kaayuhan sa imong sakit mamahimo kining posible.

Kay matod pa dili ang tanan nga katawhan dinhi sa kalibutan tinawag ug pinili sa Diyos, nan kadtong wala tawga ug pili-a dinhi lang sila sa kalibutan apan ang gitawag ug pinili sa Diyos pagapili-an pa. Giingon dinhi sa ebanghelyo nga pagkinabuhi sumala sa pagtawag sa Diyos kanimo, sa ato pa pagkinabuhi diha sa pag-ampo ug pangaliya samtang ania ka pa dinhi sa kalibutan, kay mao kini ang pagkinabuhi nga balaan didto sa gingharian sa lalngit, ang pagkinabuhi nga minando-an sa espiritu santo, ang pagsimba didto sa iyang gingharian diin anaa ang mga pag-ampo ug pagpanghalad.

Ibalaan sa kanunay ang imong huna-huna ug ang imong kasing-kasing, aron sa ingon sa kanunay ang espiritu santo maoy magagiya kanimo. Ug tinu-oray nga kay lagi tawo pa man kita sa kalibutan nagkinahanglan gayud kita ug materyal apan ma gayuy gusto sa Diyos nga ang iyang tinawag ug pinili nga katawhan sa kanunay maga-ampo ug magahalad kaniya diha sa pagpakabuhi nato nga kalibutanon, Unaha una ang gingharian sa Diyos ug ang tanan nimong gipangAyo ihatag ra kanimo.