Gamita Ang Inyong Lawas Sa Paghimaya Sa Diyos

1 CORINTO 6:12~20

• 12 Ang tanan gitugot kanako sa balaod. Apan dili ang tanan makatabang nako. Ang tanan gitugot kanako sa balaod, apan dili ko magpaulipon sa bisag unsa. 13 Ang pagkaon alang sa tiyan, ug ang tiyan alang sa pagkaon, apan ang Diyos molaglag ini. Ang lawas hinunoa, dili alang sa pamuta kondili, sa Ginoo; ug ang Ginoo alang sa lawas. 14 Ang Diyos nga nagbanhaw sa Ginoo, mobanhaw sab nato pinaagi sa iyang gahom.

15 Wala ba mo masayod nga ang inyong lawas mga bahin ni Cristo? Himoon ba ninyo ang maong bahin nga bahin sa puta? Dili motugot ang Diyos! 16 Wala ba mo masayod nga ang nakighilawas sa puta, nahiusa niya? Ang Kasulatan nag-ingon: Ang duha usa ka lawas. 17 Sa laing bahin, ang nahiusa sa Ginoo nahimong espiritu uban niya.
18 Likayi sa hingpit ang pamuta. Ang ubang sala nga buhaton sa tawo wala maggamit sa lawas. Apan ang namuta nakasala batok sa kaugalingong lawas.

19 Wala ba mo masayod nga ang inyong lawas templo sa Espiritu Santo nga naa sulod ninyo, hinatag sa Diyos? Dili na mo tag-iya sa inyong kaugalingon. 20 Hinumdomi ang presyo sa gibayad alang ninyo. Busa, himayaa ang Diyos sa lawas ug sa espiritu nga iya sa Diyos.

PAGPAAMBIT SA MENSAHE:

Ang maong ebanghelyo maoy pagpasabot lamang nga ang lawas sa tawo sagrado kay templo man kini sa Diyos. 1 Corinto:3:16 nagaingon nga ang lawas sa tawo templo sa diyos ug ang moguba o mopasipla sa lawas sa tawo nan pagalaglagon usab sa Diyos
.

Diin unsa may mahitabo kun ikaw mismo nga tagtungod maoy molaglag ug mopasipala sa imong lawas pinaagi sa pagbuhat sa mga butang nga wala mahasunod sa kabubut-on sa Diyos.

Igsoon matod pa mahal ang pagpalit sa Diyos kanato diin giula mismo sa Diyos Jesu- Cristo ang iyang lawas ug dugo aron maluwas kita sa atong mga kasal-anan. Tinuoray nga ania pa kita sa kalibutan diin samtang buhi pa ang tawo maulipon gayud siya sa pagpakasala sa pulong sa huna-huna ug sa buhat.

Apan matod pa nga nahiusa na ang atong lawas diha kang Cristo Jesus ug ayaw tugoti mahimulag pa kini pinaagi sa pagbuhat ug sala o mga binuhatan nga nahisupak sa balaang kasulatan.

Gamita kanunay ang mga pag-ampo nga imong nakat-onan, ug labaw sa tanan ibalaan sa kanunay ang imong huna-huna ug kasing-kasing, kay tinuoray nga huyang ang atong materyal nga lawas diin kun kini maoy gamiton sa daotan aron maluya ang imong kinaiyahan nan bugtong mga pag-ampo ug mga paghalad lamang ngadto sa Diyos ang makasumpo niini.

Ang tahas sa tawo sa pagpakabuhi niya dinhi sa kalibotan mao gayud ang pagahin ug panahon sa pag-alagad sa Diyos. Angay natong mahinumduman nga aduna pay kinabuhi human niining mao natong pagkinabuhi didnhi sa yuta diin kadto nga kinabuhi , ang pagkinabuhi nga espirituhanon maoy angay natong pangandaman.

Ug atong ibutang kanunay sa atong alimpatakan nga walay malilong sa Diyos tungod kay ang iyang espiritu nga maoy gahatag kanato ug kinabuhi sa kanunay ug sa matag-adlaw nagapahibalo sa Diyos sa atong binuhatan.