Nagdan-ag Ingon nga Suga Sa kalibutan

FILIPOS 2:12~29

• 12 Busa, mahal kong kahigalaan, ingon nga kanunay mong nagsunod nako samtang uban pa ko ninyo, padayon mo labi pa karon nga layo na ko, sa pagbudlay alang sa inyong kaluwasan uban ang “Kahadlok ug pangurog.” 13 Ang Diyos nagdasig sa inyong pangandoy ingon man sa pagtuman sa makapahimuot niya. 14 Buhata ang tanan sa walay bagulbol, 15 sa ingon, maanak mo sa Diyos nga walay sayop ug dili mabasol; dili salawayon taliwala sa hiwi ug badlongong kaliwat. Kahayag mo taliwala nila, sama sa kabitoonan sa tibuok kalibotan nga 16 naghupot sa pulong sa kinabuhi. Mobati kog garbo nga ang inyong paningkamot ug kahago wala makawang. 17 Kon ibubo ko ang akong dugo isip gasa alang sa pagsaulog sa inyong pagtoo, magmaya ko ug magpadayon pag-ambit sa inyong kalipay. 18 Magmaya sab mo ug moambit sa akong kalipay.

• 19 Tungod sa Ginoong Jesus naglaom ko sa pagpadala kaninyo sa dili madugay ni Timoteo. Magdala siyag balita alang ninyo. Sa ingon, madasig ko. 20 Walay usa sa nia nako nga nagpakabana ninyo sama niya. 21 Ang kadaghanan nagsunod sa kaugalingong kaayohan, dili sa kaayohan ni Cristo Jesus. 22 Apan nagmatuod ini si Timoteo, sumala sa inyong nahibaw-an. Sama sa anak nga lalaki sa kiliran sa amahan, kanunay siyang nag-uban nako sa pag-alagad sa Ebanghelyo. 23 Tungod ana, naglaom ko nga sa pagpadala niya sa higayon nga makita ko ang paglambo sa mga butang alang nako. 24 Bisan pa ana, gilamdagan ko sa Diyos nga makaanha sa dili madugay.

25 Nakahukom ko sa pagpadala kaninyo ni Epafrodito nga nagtrabaho ug nakig-away uban nako aron pagtabang sa dakong panginahanglan. 26 Gani, gimingaw siya ninyo ug labaw pang nabalaka, kay nakadungog mo sa iyang sakit. 27 Tinuod nga nasakit siya ug hapit gani mamatay. Apan ang Diyos naluoy niya ug nako, gilikay ko sa dakong kaguol. 28 Busa, madasigon ko nga mopadala siya. Kon magkita na mo, paglipay, ug magmalinawon pod ko. 29 Dawata siya sa kamaya, ingon nga makalipay sa Ginoo. Tagda ang mga tawong balaan sama niya

PAGPAAMBIT SA MENSAHE:

Ang maong ebanghelyo maoy pagpasabot lamang nga kining maong pagtulon-an nga atong gibarugan usa ka kahayag diha sa atong tagsa-tagsa ka kalag ug espiritu. Ang pagtulon-an nga gisangyaw ni Cristo maoy kahayag sa kalibutan kahayag diha sa tagsa-tagsa nato ka kasing ug huna-huna diin maoy giya nga mahiduol kita sa Diyos.

Duha na kalibo (2000) ka tuig ang milabay diin nagpakatawo si Jesu-Cristo ug nagpakamatay diha sa krus aron madayag ang katuyo-an sa iyang Amahang Diyos nga ang tawo adunay gayuy tahas diha sa pagpakabuhi niya dinhi sa kalibutan, tagsa – tagsa kita adunay tahas diha sa pagahin ug panahun ug oras ngadto sa Diyos nga makagagahum sa tanan.

Matod pa sa Birhen Maria sa iyang Milagro nga iyang gipasinati didto sa Fatima , Portugal kaniadtong May 13, 1917 nagaingon nga katungdanan sa usa ka magtutuo sa pagsangyaw niining pagtulon-an nga iyang gibarugan kay tulobagon sa matag magtutuo kun adunay usa ka kalag nga natunaw didto sa kalayo sa impyerno tungod kay wala niya masangyawi sa maayong balita ug bulahan usab ang usa ka magtutuo kun adunay kalag nga naluwas tungod sa iyang pagsangyaw sa maayong balita tungod kay sama ra man unya nga ang iyang kaugalingong kalag ang iyang naluwas.

Ingon niana mga igsoon ang pagtulon-an nga gisangyaw ni Jesu Cristo, pagtulon-an nga puno sa paghigugma sa iyang mga sumusunod diin matod pa diha sa balaang kasulatan 2 Pedro 3: 8 nagaingon: nga dili na maglangan sa pagbalik ang Diyos kun makita niya nga naandam na ang tanan kay mao gayuy gusto sa Diyos nga sa panahun sa iyang pagbalik walay usa sa iyang piniling katawhan ang mahimulag kaniya.

Busa atong pamalandungan nga dili diay alkanse ang mga katawhan nga nagsangyaw sa maayong balita diha sa pagtuman sa mga bulohaton nga balaan sama sa pag-ampo ug mga sakripisyo, kay ang Diyos nagaingon “Usa lamang diha sa matag pamilya ang naga-ampo ug naga-alagad diri Kanako nan bulahan kay luwason Ko ang tibuok pamilya”.