Ang Pangutana Mahitungod Sa Pagpuasa

LUCAS 5: 33~39

33 Miingon sila ni Jesus: “Kanunayng nagpuasa ug nag-ampo ang mga alagad ni Juan, ingon man ang mga alagad sa mga Pariseo, apan ang imong mga tinun-an nangaon ug nanginom.” 34 Mitubag si Jesus: “Dili mo makapapuasa sa dinapit sa kasal samtang uban pa nila ang kinasal, dili ba? 35 Apan moabot ang panahon nga kuhaon ang kinasal, ug magpuasa na sila.”

36 Gisulti ni Jesus ang lain pang sambingay: “Walay magtabas og bag-ong panapton nga itapak sa daang sinina! Kon buhaton ni, mausik ang bag-o, ug ang gitapak dili mohaom sa daan. 37 Walay mobutang og bag-ong bino sa daang sudlanan. Kon buhaton ni, buk-on sa bag-ong bino ang mga sudlanan, ug mausik ang bino lakip ang sudlanan. 38 Hinunoa, ibutang sa bag-ong sudlanan ang bag-ong bino. 39 Apan walay mangitag bag-ong bino sa nakatilaw na sa daan: Moingon sila: ‘Labing maayo ang daan

PAGPAAMBIT SA MENSAHE:

Ang maong ebanghelyo maoy pagpasabot lamang nga ang pagpuasa maoy atong paglikay sa pagpakasala, diin gikan sa pagbayaw ni Jesus nadto sa langit maoy pagsugod sa atong paglikay sa mga kasal-anan ug magpadayon kini hangtod sa iyang pagbalik diin mao na unya ang kataposang paghukom.

Ang atong pagpuasa sa ato pa mga igsoon dili lamang matag semana santa kundili sa matag adlaw nga tanan diin atong ibalaan ang atong huna-huna ug kasing-kasing pinaagi sa paglikay sa mga tawhanong kailibgon.

Tinud-anay gayud nga pagpuasa o paglikay sa mga binuhatan nga dili kahimut-an sa Diyos, Apan lagi matod pa ang tawoa makasasala man gayud aspulong sa huna-huna ug sa buhat busa kinahanglan gayud ang kada-adlaw nga mga pag-ampo ug pagpangalagad sa Diyos diin atong iampo ang kapasaylo-an sa atong mga sala.

Dinhi niining panahuna, hataas pa ang pasaylo sa Diyos diin tanang kasal-anan adunay kapasaylo-an magamay ug madako, kinahanglan lamang nga moduol kita kang Cristo Jesus aron sa pagpangayo sa pasaylo sa atong mga kasal-anan, ug nga aduna kay pagtuo nga mapasaylo ka sa imong sala pinaagi kang Cristo Jesus kay kun dili ka motuo nga ikaw maluwas pinaagi kang Jesu Cristo nan sama ra nga wala ka motuo nga si Cristo anak sa Diyos.

Walay lain natong kadangpan niining panahuna taliwala sa mga kalisod ug sa mg bug-at nga katalagman mao ra gayud ang pag-ampo ngadto sa Diyos , ug bisan kadtong mga katawhan nga gigamhan sa dautan atong iampo, kay kun kabubut-on sa Diyos mopasilong gayud sila sa landong sa espiritu santo gumikan as atong mga pag-ampo, kay Diyos lamang ang adunay gahum sa pagpahumok sa matig-a nga kasingkasing sa tawo.